செத்தும் கொடுத்தான் சீதக்காதி என்பதுபோல் மரணத்தின் பின்பும் மகிந்தரின் வாக்கு வங்கியாக பிரபாகரன் அவருக்கு பயன்படுகிறார். தனது முதலாவது தேர்தல் பிரச்சாரத்தை அனுராதபுரத்தில் ஆரம்பித்த மகிந்த பல தடவைகள் பிரபாகரனை நினைவு கூர்ந்தார். எனது தகவல் சரி எனின் புலிகள் நடத்திய எல்லாளன் தாக்குதல் நடவடிக்கைக்கு பின் பிரபாகரன் அனுராதபுரத்தில் நினைவு கூரப்பட்டது அந்த மேடையில் தான்.

புலிகளுக்கும் அனுராதபுரத்துக்கும் அவர்களின் நடவடிக்கை மூலம் தொடர்பு உண்டு. அவர்களின் பிரச்சாரங்களில் பிரபாகரனை அனுராதாபுரத்தை தலைநகராக கொண்டு ஆண்ட எல்லாளனின் ஆசீர்வாதம் பெற்றவராக குறிப்பிடுவர். அதை நிரூபிக்க பிரபாகரின் தந்தை வேலுப்பிள்ளை அனுராதபுரத்தில் அரச கடமை புரிந்தபோது மாலை வேளைகளில் கருவுற்றிருந்த தன் மனைவியுடன் காலாற நடந்தது விட்டு, எல்லாளன் நினைவு மண்டபத்தில் சிறிது நேரம் அமர்வார்களாம். அப்போது கருவாக இருந்தவர் பிரபாகரன். இலங்கையை பல தசாப்தங்கள் ஆண்ட வீர தமிழ் மன்னன் எல்லாளனின் நினைவுமண்டப காற்றை சுவாசித்ததால் தன் வயிற்றில் இருந்த கருவுள்ளும் வீரம் விதைக்கப்பட்டிருக்கலாம் என பின்னாளில் பார்வதியம்மாள் கூறியதாக அவர்களின் தலைவனை போற்றும் பதிவுகளில் பார்க்கலாம்.

ஜே ஆர் முரண்டு பிடிக்க அவரை பேச்சுவார்த்தைக்கு உடன்பட செய்ய இந்திய றோ உளவு அமைப்பு தாக்குதல் நடத்த கொடுத்த திட்டத்தை ஏனைய இயக்கங்கள் பலகாரணங்களால் செயல்படுத்த மறுக்க, புலிகளின் மன்னார் தளபதி விக்டர் ஒஸ்கார் தலைமையில் புத்தர் ஞானம் பெற்ற வெள்ளரசு மர கிளை விருட்சம் பூஜிக்கப்படும் புனித நகரும், மக்கள் அதிகம் கூடும் பேரூந்து நிலையமும் போகும் வழிகளில் காணப்பட்ட பாதசாரிகளும், துப்பாக்கி ரவைகளால் தாக்கப்பட்டு நூற்றுக்கணக்கான அப்பாவிகள் அழிக்கப்பட்டதும் அனுராதபுரத்தில் தான்.

வன்னி மீது அரச வான்படை தாக்குதல்கள் தீவிரமாக நடத்தப்பட்ட வேளை அதன் தாக்கத்தை கட்டுப்பாட்டுக்குள் கொண்டுவர புலிகள் வகுத்த திட்டம் வான்படைத்தளத்தை தாக்கி, தாக்குதல் விமானங்களை அழித்தல். அதற்காக சிறப்பு ஊடுருவி தாக்கும் படையணி தயாரானது. எல்லாளனின் பெயலில் நடத்தப்பட்ட அந்த தற்கொலை தாகுதலில் 14 க்கு மேற்பட்ட தாக்குதல் விமானங்கள், ஹெலிகளை அழித்து விட்டு இருபதுக்கு மேற்பட்ட புலிப் போராளிகள் வீர மரணம் அடைந்தனர். அதுவும் நடந்தது அனுராதபுரத்தில் தான்.

பிரபாகரனுக்கு மட்டுமல்ல மகிந்தவுக்கும் அனுராதபுரம் ஒருவகையில் மூதாதையர் வெற்றிகண்ட பூமிதான். எல்லாளனை தோற்கடிக்க படைதிரட்டி வந்து வென்ற துட்டகைமுனு பிறந்த றுகுணை தான் மகிந்த பிறந்த இடமும். தன்னை றுகுணுவின் மைந்தன் என பெருமைப்படுபவர் மகிந்த. தன்னை துட்டகைமுனுவின் மறு அவதாரம் என புகழ்வதை விரும்புபவர். வரலாற்றில் துட்டகைமுனுவின் தளபதி பெயர் கோட்டாபய. ஜனவரி 8 வரை மகிந்தவின் பாதுகாப்பு செயலாளராக இருந்தவரின் பெயரும் கோதடாபய. என்னே ஒற்றுமை.

துட்டகைமுனு அன்று எல்லாளனை வென்ற பூமியில் நின்று, எல்லாளனின் வாரிசு என புலிகளால் போற்றப்படும் பிரபாகரனை தான் வென்றதாக இன்று முழக்கமிடுவதும் அனுராதபுரத்தில் தான். அமைதிப்புயலில் அரசுரிமையை இழந்தவர் தன் மீள் அரசியல் பிரவேசத்தை அனுராதபுரத்தில் ஆரம்பிக்கிறார். அதற்கு அவர் அழைப்பது, நினைப்பது, மக்களுக்கு நினைவூட்டுவது பிரபாகரனை.

இனித்தொடரும் அவரின் தேர்தல் பிரசார கூட்டங்களில் எல்லாம், தெற்கின் மூலை முடுக்கெல்லாம் பிரபாகரன் நினைவு கூரப்படுவார். புலிவருது புலிவருது என கூச்சலிட்டே இந்த ஊழல் பெருச்சாளிகள் மீண்டும் பாராளுமன்றம் செல்ல முயல்வர். பிரபாகரனை கொன்று கருமாதி பண்ணியதை கூட காட்டாமல் மூடி மறைத்தவர்கள், இப்போது தேர்தலில் வாக்குப்பெற புதைத்திருந்தால் தோண்டியும் எரித்திருந்தால் சாம்பலை அள்ளிக்கொண்டும் மேடைதோறும் அகோரிகளாக (காசியில் பிணங்களோடு வாழ்பவர்) ஆட்டம் போடப்போகிறார்கள். இனவாதம் தான் இவர்களின் அரசியல் பிழைப்பு. பிரபாகரன் தான் பேசுபொருள். தமிழர் தரப்பிலும் இதுவே பிழைப்பிற்கான கதை. இங்கும் பிரபாகரன்தான் பேசுபொருள். ஹிட்லரை வைத்து நாஜிகள் பிழைப்பு நடத்துவது போல்.......?
(மாதவன் சஞ்சயன்)

அமைதி சமாதானம் ஜனநாயகம்

www.sooddram.com