சர்வதேச ஆசிரியர் தினம் இன்று

மாணவர் சமுதாயம் போற்றும்படி கல்விப்பணி புரிபவரே நல்லாசிரியர்

ஆசிரியர்களின் உன்னத சேவைகளை கெளரவிக்கும் முகமாக 1966ல் பாரிஸில் யுனெஸ்கோவின் ஆதரவில் நடைபெற்ற ஆசிரியர் அந்தஸ்து பற்றிய சர்வதேச மாநாட்டில் ஆசிரியர்களின் விடயங்களை கருத்திற்கொண்டு விதப்புரைகள் தயாரிக்கப்பட்டன. இந்த விதப்புரைகள் ஆசிரியர் அந்தஸ்தினை உயர்த்தும் ஒரு சாசனமாக அமைந்தது. யுனெஸ்கோவின் தீர்மானப்படி முதலாவது உலக ஆசிரியர் தினம் 1991 ஆம் ஆண்டு ஒக்டோபர் மாதம் ஆறாம் திகதி உலகெங்கும் கொண்டாடப்பட்டது. ஆசிரியர் தம் நிலையை உணரவும் சமூகத்திற்கு ஆசிரியர் மதிப்பை உணர்த்தவும் இத்தினம் அனுஷ்டிக்கப்படுகிறது. யுனெஸ்கோவின் தீர்மானப்படியே ஆசிரியர் தினத்தை இலங்கை ஒவ்வொரு வருடமும் ஒக்டோபர் மாதம் ஆறாம் திகதி அனுஷ்டித்து வருகின்றது.

ஆசிரியர்களின் உன்னத சேவையை கெளரவிக்குமுகமாக ஒவ்வொரு ஆண்டும் உலகம் முழுவதும் பல்வேறு நாடுகளில் வெவ்வேறு திகதிகளில் ஆசிரிய தினம் கொண்டாடப்படுகிறது. கல்வி தொடர்பாக மாபெரும் தாக்கத்தை ஏற்படுத்திய கல்வியாளர்க¨யோ. கல்வி சம்பந்தப்பட்ட சிறப்பான நிகழ்வுகளையோ நினைவுகூரும் வகையில் ஆசிரியர் தினம் வருகிறது.

உதாரணத்திற்கு இந்தியாவில் ஒவ்வொரு வருடமும் செப்டெம்பர் ஐந்தாம் திகதியை ஆசிரியர் தினமாக அனுஷ்டிக்கின்றனர். இத்தினமானது தன்னுடைய வாழ்வில் ஆசிரியர் பணியை புனிதமாக கருதி பிற ஆசிரியர்களுக்கு முன்மாதிரியாக ஒரு நல்ல ஆசியராக தமது இறுதிக்காலம் வரை வாழ்ந்துகாட்டிய மாபெரும் தத்துவ மேதையாக விளங்கிய டாக்டர் சர்வபள்ளி ராதாகிருஷ்ணன் அவர்களின் பிறந்த நாளாகும்.

இவ்வாறுதான் கல்வி சம்பந்தமான ஒரு காரணத்தை முன்வைத்து பாகிஸ்தான் (ஒக்டோபர் - 5), அமெரிக்கா (மே மாதத்தின் முதல் வாரத்தின் செவ்வாய்க்கிழமை), சீனா (செப்டெம்பர் - 10), மலேஷியா (மே - 16), சிங்கப்பூர் (செப்டெம்பர் மாதத்தின் முதல் வெள்ளி), ஈரான் (மே - 02), ஜோர்தான் (பெப்ரவரி - 28), இந்தோனேஷியா (நவம்பர் - 25) ஆகிய நாடுகள் வெவ்வேறு தினங்களில் ஆசிரியர் தினத்தை கொண்டாடி வருகின்றன.

ஒரு மனிதனை அவனுக்கே அடையாளம் காட்டுபவராக இருப்பவர் தான் ஆசிரியர். மேலும் மாணவ சமூகத்திற்கு தேவையான ஆற்றல், ஊக்கம், தன்னம்பிக்கை, விடாமுயற்சி என அனைத்தையும் அவர்களுக்கு கற்றுத் தந்து அவனை நல்லவனாக, பண்புள்ளவனாக சிறந்தவனாக, அறிஞராக. மேதையாக உயர்த்தும் உன்னத பணி ஆசிரியர் பணி என்பதை யாராலும் மறுக்க இயலாது.

ஒரு சமூகம், அதி உன்னத நிலை அடைந்து இருந்தால், நிச்சயமாக அதன் பின்னால் அற்புதமான ஆசிரியர் சமூகம் இருப்பதாக அர்த்தம். ஒரு சமூகம் தாழ்ந்து போனால், ஆசிரியர் சமூகம், தனக்கான பணியை சரிவர செய்திடவில்லை என அர்த்தம்.

வேறு எந்தத் துறையை விடவும் அதிக பொறுப்புகளும் அதிக முக்கியத்துவமும் நிறைந்தது இந்த ஆசிரியர் பணியாகும். மாணவர்களுக்கு அதிகம் தேவைப்படுவது என்றென்றுமான ஊக்கமும் தன்னம்பிக்கையும் நன்னெறிகளும் ஆகும். இதை சரியாக நிறைவேற்றினர். அங்கே ஆசிரியர் வேலை அதன் முழு நிறைவை எட்டியதாக அர்த்தம் ஒரு மாணவன் ஆசிரியரை அடையும் தருணத்தில் வெறும் மண் கலவையாய் மட்டுமே உள்ளான்.

அவனை தேவையான வடிவில் சிலையாக வார்ப்பது ஆசிரியனின் பணியாக உள்ளது. ஆசிரியர்களுடைய பணியின் மதிப்பு அளவிடப்பட முடியாதது. ஏனெனில் ஒரு மனிதனை மனிதன் என்று அடையாளப்படுத்துவது மிருகங்களிலிருந்து வேறுபடுத்தும் சிறப்பு பண்புக் கூறுதான். அந்த சிறப்புப் பண்புக்கூறு சிறந்த கல்வியின் மூலமே கிடைக்கிறது.

அந்த சிறந்த கல்வியை அளிக்கும் மாபெரும் பணி ஆசிரியர்களைச் சார்ந்துள்ளது. ஏனெனில் ஆசிரியர்கள் உருவாக்கும் மாணவர் சமூகமானது ஒரு நாட்டின் எதிர்காலத்தை மட்டுமல்ல. இந்த உலகின் எதிர்காலத்தையே தீர்மானிக்கிறது. அனைத்து மக்களின் நல்வாழ்வும் ஆசியர் சமூகத்தின் கைகளில்தான் உள்ளது. எனவே இந்த இடத்தில் ஆசிரியர் என்பவரின் பணியானது அனைத்தையும் விட உயர்ந்து நிற்கிறது.

மற்ற பணிகளைப் போல ஆசிரியர் பணி என்பது ஒருவரின் வாழ்வாதாரத் திற்கான பணி அல்ல. தனது வாழ்வையே ஆதாரமாக்கும் பணி. அந்தப் பணியில் வேண்டுமானால், வாழ்வை நகர்த்துவதற் கான ஊதியம் கிடைக்கலாம். ஆனால் அந்த ஊதியத்திற்காக அந்தப் பணி அல்ல என்பதுதான் ஒரு சிறந்த ஆசிரியரின் தத்துவம்.

ஆசிரியர் பணி என்பது ஒரு உயிரோட்டமான பணி. ஆய்வு ரீதியான பணி, உளவியல் ரீதியான பணி, சேவை ரீதியான பணி, அர்ப்பணிப்புள்ள பணி, கால நேரமற்ற பணி.

ஒரு சிறந்த ஆசிரியர் வகுப்பறைக்குள் மட்டுமே ஆசிரியராக இருப்பதில்லை. இருக்கவும் முடியாது. அவர் தன் வாழ்வின் பெரும்பகுதி நேரங்கள் ஆசிரியராகவே இருக்கிறார். அவரின் சேவைக்கு எல்லை கிடையாது. மனித வாழ்வில் திருப்புமுனையை ஏற்படுத்தி அதற்கு அர்த்தத்தைக் கொடுக்கும் ஒரு கடமை ஆசிரியருக்கு உள்ளது.

உலகில் உள்ள பணிகளிலேயே ஆசிரியர் பணியே அதிக திறமைகள் தேவைப்படும் பணி என்று சொல்லும் அளவிற்கு அதன் பொறுப்புகள் அதிகம். எனவே அந்தப் பணிக்கு தகுதியான நபர்கள் தேர்வு செய்யப்படுவதை உறுதி செய்வது அரசின் பிரதான கடமையாகும்.

எது எப்படியிருந்தாலும் சிறந்த அர்ப்பணிப்பு உணர்வுடன் எந்த இலாப நோக்கமும் இன்றி, பாடப்புத்தக அறிவு மட்டுமின்றி, பல்துறை பரந்த அறிவை மாணவர்களுக்கு வழங்கி, அவர்களின் அறிவுலகை விரியச் செய்து. உத்தரவாதமான எதிர்காலத்தை தொடர்ந்து வழங்கி வரும் ஆசிரிய சமூகம் கணிசமான அளவில் இருந்து சமூக முன்னேற்றத்திற்காக தொடர்ந்து பாடுபட்டு வருகின்றது.

கற்றல் கற்பித்தல் என்பதே அவர்களின் தாரக மந்திரம். இத்தகைய ஆசிரியர்கள் சமூக உருவாக்கத்தின் மூல ஆதரங்களாக திகழ்கிறார்கள். இவர்களைப் போன்றவர்களை போற்றவும். புகழவும். கெளரவிக்கவுமே ‘ஆசிரியர் தினம்’ அனுஷ்டிக்கப்பட்டு வருகிறது. என்றென்றும் மாணவர் உலகில் நறுமணம் வீசிட செய்திடும் ஆசிரியர் சமூகத்திற்கு நல்வாழ்த்துக்கள் ஆசிரியர் சமூக அரிய பணி தொடரட்டும். உலகில் தனக்னெ வாழாமல் பிறர்க்கென வாழ்பவர்கள் பிறரால் என்றென்றும் ஞாபகம் கொள்ளப்படுகிறார் கள்.

இதற்கு ஏற்றபடி ஆசிரியர்கள் பணியுபுரிய வேண்டும். மாணவரால் போற்றப்படும்படி பணிபுரிபவரே உண்மையான ஆசிரியர். நவீன சமுதாயத்தில் ஆசிரியர்கள் வளர்ச்சிக்கான மாற்றங்களை முன்னெடுத்துச் செல்பவர்களாகவும் இளைய தலைமுறையினருக்கு வழிகாட்டி யாகவும் அவர்களை நற்பிரஜைகளாக உருவாக்குபவர்களாகவும் பணியாற்றுதல் வேண்டும்.

அல்ஹாஜ்
எம். எப். எம். இக்பால்
யாழ்ப்பாணம்.