யாழ்ப்பாண மக்களை யார் பாதுகாப்பது?    

(சிவானந்தம், கனடா)                                                  

கிறீஸ் மனிதனின் அடாவடித்தனத்தால் ஆடிப்போயிருக்கின்றனர் யாழ்ப்பாண மக்கள். யுத்தகாலத்தில்  உள்ள நிலைமைபோல  ஓரு பயங்கரமான  நிலைமை ஏற்பட்டுள்ளதாகவும் வேலியே பயிரை மேய்வதினால் யாரிடம்போய் முறையிடுவது யாரிடம்போய் பாதுகாப்புகேட்பது  என்ற  நிலையில் வேறுவழியில்லாமல்  தமக்குரிய தற்பாதுகாப்பை மக்கள் தங்கள் கைகளில் எடுத்துக்கொண்டுள்ளனர். இரவில் நாய் குரைக்கும் சத்தம் கேட்டவுடன் கிறீஸ் மனிதன் வந்திட்டான் என்ற பீதியில் நித்திரையில்  இருக்கும் பிள்ளைகள் தாயை இறுக்க கட்டிப்பிடித்துக்கொண்டு  மிகவும் பயந்த நிலையில் காணப்படுவதாகவும் இதனால் அவர்கள்  உளவியல்ரீதியாக பாதிக்கப்பட்டுள்ளதாகவும்   இரவில்நித்திரை கொள்ளாமல் தந்தைமார்கள்  தன் மனைவியையும்  பிள்ளைகளையும் கிறீஸ் மனிதனின் தாக்குதலில்  இருந்து பாதுகாப்பதற்காக  தன்  உயிர்போனாலும்  பரவாயில்லை கிறீஸ் மனிதனை  எதிர்த்து தாக்குவதற்காக  மிளகாய்த்தூளும்  கொட்டன்தடிகளுடனும்  கண்விழித்து  தங்கள் குடும்பத்தை பாதுகாக்கும் பணியில் ஈடுபட்டிருக்கிறார்கள். 

இதனால் ஆண்கள் பகலில் வேலைக்குச்செல்லமுடியாத நிலையும் ஏற்பட்டுள்ளது.  இரவினில் எல்லோரும் கூட்டமாக ஓரு வீட்டில் தங்குவதாகவும் ஆண்கள் இரவினில் நித்திரைகொள்ளாமல் செல்போனுகளுடன்  ஏனையவர்களுடன் தொடர்பில்  இருப்பதாகவும் கிறீஸ் மனிதனின் நடமாட்டம் அல்லது  சந்தேகமாக யாரும் தமது பகுதியில் நடமாடினால் உடனடியாகவே கூட்டமாக அந்த இடத்திற்கு சென்றுவிடுவதாகவும்  இப்படியான முறையில்தான் ஊரைப்பாதுகாப்பதாகவும்  சொல்கிறார்கள்.                                              

வீடுகளில் கூட்டமாக இருப்பவர்கள்  வெளிநாடுகளில் இருக்கும் தமது  உறவுகளிடம் தொடர்புகொண்டவண்ணம்  இருக்கின்றார்கள். இரவில் நாய்கள் குரைக்கும் சத்தத்தையும் வெளிநாட்டு  உறவுகளுக்கு  செல்போன்ஊடாக  கேட்கசெய்கிறார்கள். நாய்கள் குரைக்கும் சத்தம் கேட்டவுடன்  கிறீஸ் மனிதன் வெளிக்கிட்டுவிட்டான் போலகிடக்குது என்றார் ஒருவர்.  உடனடியாக மற்றபகுதியில் உள்ளவர்களிடம் தொடர்புகொள்கிறார்கள்.  நிலைமைகளை கேட்டு அறிகிறார்கள்.  எங்களின் பாதுகாப்பிற்கு நாய்கள்தான் உதவியாக இருக்கின்றது என்று கூறுகிறார்கள்.

அங்குள்ள அரசியல்வாதிகள் என்ன செய்கிறார்கள் என்று கேட்டால்  அரசாங்கத்தை ஆதரிப்பவர்கள் சொல்கிறார்கள் மகிந்தவுடன் நேரடியாக கதைத்திருக்கின்றோம்  என்று மக்களுக்கு சொல்கிறார்கள்.  மற்ற கட்சியினர் சொல்கிறார்கள்  வெளிநாடுகளுக்கு சொல்லுகின்றோம்.  எதிர்த்து ஆர்ப்பாட்டம் செய்யப்போகிறோம் என்று சொல்கிறார்கள். இந்தக்கட்சிகளுக்கும் இவ்வளவுதுதான் லிமிட் இதைவிட  இவர்களால் எதனையும் மீறிச்செய்துவிடமுடியாது. அதனால் இந்தத்தரப்புகளாலும்  தமிழ்மக்களைப் பாதுகாக்கமுடியாது  எங்களின் பாதுகாப்பு எங்களின் கைகளில்தான்  இதனால் எங்கள் உயிர்கள் கூட பறிக்கப்படலாம்  என்கிறார்கள் அங்குள்ள உறவினர்கள்.

சாதாரணமாக அங்குள்ள மக்களுடன் அந்நியோன்னியமாக பழகும் இராணுவத்தினர்  இதுபற்றி மக்கள் கேள்விகேட்டபோது நாங்கள் உங்களுடன்  சகோதரர்களாகப்பழகுவதால்  இதனை விரும்பாத  மேலிடத்தில் உள்ளவர்கள்  எங்களிற்கும் உங்களிற்கும் இடையில் மோதல்களை  உருவாக்கச்செய்கின்றார்கள்  என்கிறார்களாம். பாதுகாப்புச்செயலாளரின் நெருங்கிய நண்பரான யாழ்ப்பாண கட்டளைத்தளபதி வெளிநாட்டில் உள்ள சில சக்திகள்  பணத்தைக்கொடுத்து   இந்தநடவடிக்கைகளை செய்வதாக கூறுகின்றனர்.   இவர் இப்படிக்கூறியிருந்தால்  அதாவது சிறையில்  இருக்கும் இராணுவத்தளபதி பொன்சேக்காவிற்கு சார்பான இராணுவமோ அல்லது யு.என்.பி கட்சிக்கு சார்பான இராணுவமோ  இந்தநடவடிக்கைகளை செய்வதாக  கூறியிருந்தால் மக்கள் ஓரளவுக்காவது நம்புவார்கள். அதைவிடுத்து  வெளிநாட்டுச்சக்திகளை குற்றம்சாட்டுவது  முழுப்பூசனிக்காயை சோற்றில் மறைப்பதுபோல உள்ளது.                            

முன்பு யாழ்ப்பாணத்தில் தொடர்ச்சியாக வீடுகளில் நடைபெற்ற  கொள்ளைகளினால்  மக்கள் ஆத்திரம் அடைந்தபோது  இப்போது வெளிநாட்டுச்சக்திகளை குற்றம்சாட்டும்  யாழ்கட்டளைத்தளபதி யாழ்ப்பாண மக்களை பாதுகாக்கின்றோம் என இராணுவக்காவல்  அரண்களை மீண்டும்  நிறுவினார்.  ஆனால் களவுகளை கட்டுப்படுத்தமுடியுவில்லை  பின்னர்  இலங்கையில் உள்ள எல்லாக்கட்சிகளும்  அரசுக்கு கொடுத்த அழுத்தத்தினால்  கொள்ளையர்கள்மீது நடவடிக்கை எடுக்கவேண்டிவந்தது. கல்வியங்காட்டில் பெற்றோல் நிரப்புநிலையத்தில்  இடம்பெற்றகொள்ளையின்போது பொதுமக்களின் உதவியுடன் அருகில் உள்ள இராணுவத்தினரால் மடக்கிப்பிடித்தபோது  அவர்கள் பெரும்பான்மையினர் எனத்தெரியவந்தது. அதன் தொடர்ச்சியாக 13 கொள்ளைக்கோஸ்டியைச் சேர்ந்தவர்கள் கைது செய்யப்பட்டனர் என்றும் பல இலட்சம் பெறுமதியான நகைகள் கைப்பற்றியதாகவும்  கொள்ளையர்கள் அனைவரும்   குருநாகலைச்சேர்ந்தவர்கள்  என  யாழ்ப்பாண கட்டளைத்தளபதி     பத்திரிகையாளர்களுக்கு கூறியிருந்ததார்.  ஆனால் அவர்களின் படங்களையோ அல்லது விபரங்களையோ  வெளியிடவில்லை.  அவர்களை இன்றுவரை  நீதிமன்றத்தில் கூட நிறுத்தவில்லை.

எனவே இப்படியான பல அபாயகரமான பிரச்சினைகளுக்கு முகம் கொடுத்துவரும் யாழ்மக்களின் பாதுகாப்பிற்கு ஜனாதிபதி அவர்கள் தனதுநேரடிக் கவனத்தை  செலுத்தி தனது பிரதிநிதிகளை  யாழ்ப்பாணத்திற்கு  அனுப்பி பாதிக்கப்பட்டு  பயந்து வாழும்  மக்களைச் சந்தித்து உண்மைநிலைமைகளை  அறியவேண்டும்  என்பதே எல்லோரினதும்  விருப்பமாகும். அழகிய இலங்கைத் திருநாட்டில் அனைத்து  இன மக்களும்  அச்சமின்றி  ஜக்கியத்துடன் வாழவழி செய்யவேண்டும் என்பதே  புலம்பெயர்தமிழர்களின்  வேண்டுகோள் ஆகும்.