உங்கள் குழந்தைகள் சொல்வதைக் கேளுங்கள்!

குழந்தைகளுக்கு பெற்றவர்கள்தான் எல்லாமே. இதனாலேயே அவர்கள் மீதான நம்பிக்கையும் அன்பும் மிக அதிகம். உண்மையில் பெற்றோரைவிடக் குழந்தைகள் அவர்கள் மீது காட்டும் அன்பு மிக அதிகம். எந்த நிலையிலும் தன் அம்மாவோ அப்பா துன்புற, தான் காரணமாகி விடக்கூடாது என்ற பய உணர்ச்சி அவர்களிடம் உண்டு. விவாகரத்தின் போதோ இல்லை அம்மாவும் அப்பாவும் விவாதங்கள் செய்யும் போதோ இதற்குத்தான் காரணமாகி விடக் கூடாது என்ற பயமும் அதனால் அவர்களை மகிழ்விக்க செய்யும் சின்ன சின்ன செயல்களிலும் இதை புரிந்து கொள்ளலாம்.

குழந்தைகளுக்காக ஒரு வேலையை விட்டுவிட நேரிடும் சில பெண்கள் எந்த காரணம் கொண்டும், உன்னால் தான் இதை விட்டேன் என்று சினந்து சொல்லி விட்டால் குழந்தைகள் மனம் உடைந்து போய் விடுவார்கள். இப்போதெல்லாம் என் மகன் ஒரு நகைச்சுவையாக எடுத்து கொண்டாலும் நான் ஆராய்ச்சியை விட்டுவிட்டு மேலே படிக்க சென்ற போது யாராவது உனக்காகத்தானே என்று சொல்லி விட்டால் முகம் வாடிப் போவான். பெற்றோர்கள் எடுக்கும் எந்த முடிவிற்கும் குழந்தைகள் காரணம் இல்லை.

அதேபோல சில சமயம் கணவன் மீது உள்ள கோபத்தைக் குழந்தைகளிடம் காட்டுவதும் கூடத் தவறு. அவர்கள் செய்யாத குற்றத்திற்கு கோபம் கொள்வது அவர்களின் தன்னம்பிக்கையை குலைக்கிறது. சமீபத்தில் விலகி விட நினைத்து வெளியேறிய பெண் ஒருவரின் 4 வயதுக் குழந்தையை பரிசீலித்த மனநல மருத்துவர் அவன் விவாகரத்தால் மிகவும் பாதிக்கப்பட்டிருக்கிறான் என்று தெரிவித்தார். லயன் கிங் திரைப்படத்தில் எந்த பாத்திரம் பிடிக்கும் என்று கேட்ட போது ஸ்கார் என்று சொல்லி இருக்கிறான்.

ஏன் என்று கேட்ட போது அவன், நானும் அவனைப் போல எல்லாவற்றையும் இழந்து விட்டேன் என்று பதில் சொல்லி இருக்கிறான். அவனைப் படம் வரைய சொன்ன போது அவன் இறந்து விட்டதை போலவும் அதன் பின் அவன் அம்மா மகிழ்ச்சியாய் இருப்பதாகவும் வரைந்திருக்கிறான். நீ இல்லாவிட்டால் எனக்கு இந்த கஷ்டம் இல்லை என்றோ, இந்த பிள்ளைகள் இல்லா விட்டால் இத்தனை கஷ்டப்படத் தேவையில்லை என்று அவரின் தோழிகளோ சொல்லும் போது அவனுக்குத்தான் இருப்பதுதான் அம்மாவை காயப்படுத்துகிறது என்று தோன்றி இருக்கிறது.

கண்ணுக்கு கீழே உடலில் எல்லா இடங்களிலும் கீறிக் கொண்டிருந்திருக்கிறான். இன்னும் சில விவாகரத்தானவர்கள் மறுமணம் செய்து கொள்ளும் போது புதிய துணைவனை வருத்திவிடக் கூடாது என்று இன்னும் அதிக கவனத்துடன் இருக்கும் போது குழந்தைகளிடம் அதிகம் பழகுவதோ அதிக நேரம் செலவழிப்பதோ இல்லை. விவாகரத்தால் குழந்தைகளும் பாதிக்கப்படுவதால், அந்த நேரத்தில் அவர்களுக்கு இன்னும் கூடுதல் ஆதரவும் அன்பும் தேவை.

வளர்ப்புத் தந்தையோ தாயோ குழந்தைகளிடம் அன்பை பெற இன்னும் அதிகம் முயற்சிக்க வேண்டும். மாறாக எடுத்த உடனே குழந்தைகள் அன்பு செலுத்தவில்லை என்றால் அதைக் கண்டிப்பது, வெறுப்பை வளர்த்துவிடும்.

குழந்தைகள் அம்மா அல்லது அப்பா தன் புதிய துணைவன்/வியிடம் செலுத்தும் அன்பைக் கண்டு, அவர்கள் மேல் தான் குற்றம் சொல்வது அவர்கள் உறவைப் பாதிக்குமா என்றும் சொல்வதை நம்புவார்களா என்ற பயமும், அதைவிடத் தன்னைப் துன்புறுத்துவார்களா என்ற அச்சமும் சொல்லவிடுவதில்லை. இதை தவிர பாலியல் துன்பங்கள் ஏற்படும் போது தன் மீது குற்றம் என்ற எண்ணமும், புரியாத வயதில் குழந்தைகள் சொல்வதை பெற்றோர்கள் நம்ப மறுப்பதும் காரணம்.

குழந்தைகளை கவனமாக கவனிக்க வேண்டும். சரியாகச் சாப்பிடாமல் இருந்தால் மதிப்பெண்கள் குறைந்தால் உடலில்காயங்கள் வருவது அதிகமானால் அவர்களுடன் பேசுவது மிக நல்லது. சொல்வதைக் கவனமாக கேட்காமல் உடனே அவர்கள் மீது கோபப்படாதீர்கள். நல்லதையும் அல்லதையும் தெளிவாக எடுத்துச் சொல்லுங்கள். நீங்கள் எடுத்த எந்த முடிவிற்கும் அவர்கள் எந்த வகையிலும் காரணம் இல்லை என்பதையும் மீண்டும் மீண்டும் எடுத்து சொல்வது மிக அவசியம்.

குழந்தைகள், பதின்ம வயதினருக்கு நட்பு அளவிலும் துன்பங்கள் நேரிடலாம். என் மகன் 6 வயதாக இருக்கும் போது மைக்கல் என்ற நண்பன் இருந்தான். அவனை நாங்கள் வீட்டிற்கு இரவு தங்கி விளையாட அழைத்திருந்த போது மைக்கல்லுக்கு விருப்பம் இல்லாத விளையாட்டுகளை விளையாட அழைத்தால் அவன் மறுப்பதும், அவன் சொல்கிற எல்லாவற்றையும் என் மகன் செய்வதையும் பார்த்தோம்.

எனக்குச் சரியில்லை என்று தோன்றிய போதும் அவனாகப் பேசட்டும் என்று விட்டு விட்டோம். மைற்கல் போனபின், என் மகன் அழ ஆரம்பித்து விட்டான். நான் எனக்கு பிடித்த எதையும் செய்ய முடியவில்லை என்று, நீ ஏன் விட்டு கொடுத்தாய் என்று கேட்ட போது இல்லை என்றால் மைகல் தன் வீட்டிற்கு போய் விடுவேன் என்று சொன்னான் என்று பதில் வந்தது. இது நடந்து மூன்று வாரங்களுக்கு பின், என் மகனின் வகுப்பாசிரியையும் என்னிடம் புகார் கூறினார்.

அதன் பின் நானும் வகுப்பாசிரியை, பள்ளி கவுன்சிலர் மூவரும் அவனிடம் பொறுமையாக நான் விரும்பாததை செய்யாவிட்டால் உன்னுடன் பேச மாட்டேன் என்று சொல்வதும் அதற்கு பயந்து உன் விருப்பங்களை மாற்றி கொள்வதும் தவறு என்று எடுத்து சொன்னோம். நண்பர்கள் அல்லது சகோதரர்கள் இடையே சமஅளவு மரியாதையும் புரிந்துணர்வும் வேண்டும் என்பதையும் அவன் புரிந்து கொண்டான்.

இதைச் சிறிய வயதில் கவனிக்காமல் விட்டிருந்தால் வளர்ந்த பின்னும் பிறருக்காக தன் விருப்பங்களை விட்டு கொடுப்பதும் உணர்ச்சி பயமுறுத்தல்களுக்கு அடிபணிவதும் பழகி இருக்கும். ஆகையால் பெற்றோர்களே, உங்கள் குழந்தைகள் சொல்வதை கேளுங்கள்.