அம்பலமாகிய பொன்சேகாவின் சுயரூபம்

(அம்பலத்தார் )

முன்னாள் இராணுவத்தளபதியும் கடந்த முறை நடைபெற்ற ஜனாதிபதித் தேர்தலில் எதிரணிக் கட்சிகள் சார்பில் போட்டியிட்டு தோல்வியைத் தழுவியவருமான சரத்பொன்சேகா தமிழ் மக்கள் தொடர்பில் அண்மைய காலங்களில் தெரிவித்துள்ள கருத்துக்கள் பல்வேறு தரப்பினர் மத்தியிலும் அதிருப்தியை ஊட்டியுள்ளது கவனத்தில் கொள்ளப்பட வேண்டியதொரு விடயமாகும். 'தமிழ் மக்கள் கேட்பதையெல்லாம் கொடுத்துவிட முடியாது' என்று வெள்ளைக்கொடி விவகாரம் தொடர்பிலான வழக்கு விசாரணையை எதிர்கொண்டு அது தொடர்பிலான நீதிமன்ற விசாரணைக்கு சென்று நீதிமன்ற வளாகத்தில் வைத்து அவர் தெரிவித்த மேற்படி கருத்தானது அவரின் தெட்டத்தெளிவான இனவாத நிலைப்பாட்டையே சுட்டிக்காட்டி நிற்கிறது. இலங்கையின் இராணுவ வரலாற்றில் சிறுபான்மையின மக்களுக்கு எதிரான கடும்போக்குடைய ஒரு இராணுவத் தளபதியாகவே சரத் பொன்சேகா கருதப்பட்டவர் மாத்திமல்ல பல்வேறு தரப்பினராலும் குற்றஞ்சாட்டப்பட்டவர் என்பதும் குறிப்பிடத்தக்க விடயமாகும்.

வன்னி இறுதி யுத்தத்தின் போது இடம்பெற்ற வெள்ளைக்கொடி விவகாரம் தொடர்பில் குற்றஞ்சாட்டப்பட்டு நீதிமன்ற வழக்கு விசாரணையை எதிர்கொண்டுள்ள முன்னாள் இராணுவத் தளபதியும் ஜனாதிபதி வேட்பாளராக போட்டியிட்டவருமான சரத் பொன்சேகா நீதிமன்ற வளாகத்திற்கு வெளியே வைத்து ஊடகவியலாளர்களுக்கு தெரிவித்த கூற்றானது தமிழ் மக்களை அவமதிக்கும் கடும் போக்குடைய அவருடைய கருத்து தொனியாகவே கருதப்படுகின்றது.

இது தொடர்பில் எடுத்ததற்கெல்லாம் அறிக்கை விட்டு தமது பெயரை விளம்பரப்படுத்திக்கொள்ளும் பல தமிழ் அரசியல்வாதிகள் வாய்மூடி மெளனிகளாக உள்ளது வியப்பளிக்கும் விடயமாகும்.

இறுதியாக நடைபெற்ற ஜனாதிபதி தேர்தலில் சரத் பொன்சேகாவிற்கான ஆதரவை திரட்டும் அரசியல் செயற்பாட்டு நடவடிக்கைகளில் சிறுபான்மை கட்சிகளான மனோகணேசன் தலைமையிலான ஜனநாயக மக்கள் முன்னணி, ரவூப் ஹக்கீம் தலைமையிலான ஸ்ரீலங்கா முஸ்லிம் காங்கிரஸ் என்பன ஈடுபட்டதை எவரும் மறுக்க முடியாது.

ஆனால் சரத் பொன்சேகாவின் தமிழ் மக்களுக்கு எதிரான கடும்போக்கான இந்தக் கருத்து தொடர்பில் எதற்கெடுத்தாலும் அறிக்கை விடும் ஜனநாயக மக்கள் முன்னணியின் தலைவர் மனோகணேசன் வாய்மூடி மெளனியாக இருப்பது கவலை தரும் விடயமாகும்.

ஸ்ரீலங்கா முஸ்லிம் காங்கிரஸின் தலைவரும் நீதியமைச்சருமாகிய ரவூப் ஹக்கீமைப் பொறுத்தவரை எதற்கெடுத்தாலும் அறிக்கை விடாத ஜனநாயக அரசியல் பக்குவமுள்ளவர் என்பதையும் நாம் சுட்டிக்காட்டியாக வேண்டும்.

ஊடகத்துறையினருடன் எளிமையாகவும் பக்குவமாகவும் கண்ணியமாகவும் நடந்து கொள்ளக்கூடிய இலங்கை அரசியல்வாதிகள் மிகவும் குறைவு. அதிலிருந்து வேறுபட்டவர்கள் தான் தமிழ், முஸ்லிம் அரசியல்வாதிகளில் குறிப்பிட்டு சொல்லக்கூடியவர்கள் ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீம், முன்னாள் ஈழப்புரட்சிகர அமைப்பு (ஈரோஸ்) போராளியும் 'தற்போதைய பிரதியமைச்சருமான பiர் சேகுதாவூத், தமிழக மக்கள் விடுதலைக் கழகத்தின் (புளொட்) தலைவர் தர்மலிங்கம் சித்தார்த்தன், ஈழமக்கள் புரட்சிகர விடுதலை முன்னணி (பத்மநாபா - ஈ.பி.ஆர்.எல்.எப்) சிரிதரன், ஈழமக்கள் ஜனநாயகக் கட்சி (ஈ.பி.டி.பி) செயலாளர் நாயகமும் அமைச்சருமாகிய டக்ளஸ் தேவானந்தா போன்றவர்களை குறிப்பிட்டுச் சொல்ல முடியும்.

அதேநேரம் முன்னாள் இராணுவத்தளபதி சரத் பொன்சேகாவை இந்த நாட்டின் ஜனாதிபதியாக மாற்ற வேண்டுமென்ற நோக்கில் தலைநகர் கொழும்பு, மலையகத்தில் மட்டுமல்ல வடக்கு, கிழக்கிலும் அவருடன் சென்று தேர்தல் பிரசார நடவடிக்கைகளில் ஈடுபட்டவர், ஜனநாயக மக்கள் முன்னணியின் தலைவர் மனோகணேசன்.

ஆனால் சரத் பொன்சேகாவின் விதாண்டாவாதத்திற்குரிய அல்லது வடக்கு, கிழக்கு தமிழ் மக்களை கொச்சைப்படுத்தி இனவாத அரசியலை இழுத்து நிறுத்தும் கூற்றுத் தொடர்பாக மெளனம் காக்கும் தமிழ் அரசியல்வாதிகள் தமது மனச்சாட்சியை தொட்டுப்பார்க்க வேண்டும்.

சரத்பொன்சேகாவின் கருத்து தொடர்பில் முன்னாள் பாராளுமன்ற உறுப்பினரும் தமிbழ விடுதலை இயக்கத்தின் (ரெலோ) அரசியல் தலைவருமான எம்.கே. சிவாஜிலிங்கம் மட்டுமே தனது மன உளைச்சலை வெளிக்காட்டியிருக்கிறார்.

ஜனாதிபதி தேர்தலில் சரத்பொன்சேகா வெற்றி பெற்றிருந்தால் அவருக்காக பிரசாரம் செய்த குறிப்பிட்ட சில தமிழ் அரசியல்வாதிகளுக்கு பண வருமானமீட்டும் முக்கிய அமைச்சுப் பொறுப்புகள் கிடைத்திருக்கும். ஆனால் தமிழ் மக்களின் நிலைமை யுத்த காலத்தை விட மிகக் கொடூரமானதாக அமைந்திருக்கும் என்பதை எவரும் மறுக்க முடியாது. ஏனெனில் சரத் பொன்சேகாவின் தற்போதைய கருத்து அதனையே வெளிப்படுத்தி நிற்கிறது.

சரத்பொன்சேகா இராணுவத் தளபதியாக பதவியேற்பதற்கு முன்னர், யாழ். மாவட்ட இராணுவக் கட்டளைத்தளபதியாக பதவியிலிருந்தபோது அங்கு இடம்பெற்ற கடத்தல் கைது, காணாமல் போதல் போன்ற மிக மோசமான மனித உரிமை மீறல் சம்பவங்கள் குறித்து எழுந்துள்ள குற்றச்சாட்டுக்கள் தொடர்பில் அவருக்காக வக்காலத்து வாங்கும் தமிழ் அரசியல்வாதிகள் என்ன கூறப்போகின்றார்கள்.

இது தொடர்பில் முன்னாள் இந்து கலாசார அமைச்சரும், ஐக்கிய தேசியக் கட்சியின் யாழ். மாவட்ட பாராளுமன்ற உறுப்பினருமாகிய அமரர் தியாகராஜா மகேஸ்வரன் பாராளுமன்றத்தில் பல தடவைகள் சுட்டிக்காட்டியிருந்தார் என்பது குறிப்பிடத்தக்கது.

எனினும் யாழ். மாவட்ட இராணுவக் கட்டளைத்தளபதியாக அப்போது பதவிவகித்த சரத்பொன்சேகாவின் தலைமையின் கீழ் நடாத்தப்பட்ட எந்தவொரு அநீதியான சம்பவங்களும் சட்டத்தின் முன் வெளிக்கொண்டு வரப்படவில்லை.

யாழ். குடாநாட்டில் சரத்பொன்சேகாவின் இராணுவ ஆட்சிக்காலத்தின் போதே மிகவும் மோசமான மனித உரிமை மீறல் சம்பவங்கள் இடம்பெற்றுள்ளதாக பல்வேறு மனித உரிமை அமைப்புகள் குற்றஞ்சாட்டியிருப்பதும் கவனத்தில் கொள்ளப்பட வேண்டிய விடயமாகும்.

யாழ். குடாநாட்டின் அப்போதைய இராணுவத் தளபதியாக இருந்து செயற்பட்ட சரத் பொன்சேகாவின் மனித உரிமை மீறல் சம்பவங்கள் தொடர்பில் பாராளுமன்ற உறுப்பினர் தியாகராஜா மகேஸ்வரன் பாராளுமன்றத்தில் வெளிக்கொண்டு வந்த பல்வேறு விடயங்கள் அவரின் மறைவையிட்டு வெளிக்கொணடு வரப்பட்ட ஆவணச் சுவடான நூலில் தெளிவாக வெளிக்கொண்டு வரப்பட்டுள்ளதும் கவனத்தில் கொள்ளப்பட வேண்டியதொரு விடயமாகும்.

தியாகராஜா மகேஸ்வரனின் நினைவாக வெளிக்கொண்டுவரப்பட்ட அந்த நூலில் அவர் பாராளுமன்றத்தில் மட்டுமல்ல ஊடகங்களுக்கும் தெரிவித்த சரத்பொன்சேகா தொடர்பான பல்வேறு விடயங்கள் வெளிக்கொண்டு வரப்பட்டிருப்பதும் கவனிக்கத்தக்கதோர் விடயமாகும்.

சிங்கள, பெளத்த கடும் போக்குக் கொண்ட அதுவும் யாழ். குடாநாட்டின் இராணுவத் தளபதியாக இருந்த சரத்பொன்சேகாவின் அடாவடித்தனங்களை வெளிக்கொண்டு வந்த தமிழ் அரசியல்வாதி தியாகராஜா மகேஸ்வரன் என்பதை நாம் இன்றும் நினைவில் நிறுத்தி பெருமை கொள்ள வேண்டும்.

ஐக்கிய தேசியக் கட்சிக்கு அதுவும் யாழ். குடாநாட்டில் தமிழ்த் தேசியப்போக்கு வலுவடைந்து தீவிரம் பெற்ற காலகட்டத்தில் மக்கள் பிரதிநிதித்துவத்தை பெற்றுக்கொடுத்த பெருமைக்குரியவர் தியாகராஜா மகேஸ்வரன்.

அதேநேரம் வடக்கு, கிழக்கில் இடம்பெற்ற இராணுவ வல்லாதிக்கப் போக்குகள் மனித உரிமை மீறல் சம்பவங்கள் தொடர்பில் துணிச்சலுடன் வெளிக்காட்டியவர். இதற்காக ஐக்கிய தேசியக் கட்சியின் தலைமையுடன் கூட பல தடவைகள் முரண்பட்டவர் தியாகராஜா மகேஸ்வரன்.

அதேநேரம் அவர் செய்த தவறுகளில் ஒன்று புலிகளின் அடாவடித்தனங்களை வெளிக்கொண்டுவர முடியாத ஒன்றாகும். இது அன்றைய காலகட்டத்தில் தவிர்க்க முடியாத ஒன்றுதான்.

இன்று வாழ்விழந்து, வளமிழந்து துயர்மிகு கொடூரத்தை மட்டுமே தாங்கிக்கொண்டு நிற்கிறோம். காலம் பதில் செல்லும்.