மக்களின் மனம் கவர்ந்த தலைவன் அமரர் அருணாசலம் தங்கத்துரை

1970 ம் ஆண்டு மூதூர்த் தொகுதியின் "கிளிவெட்டி" எனும், கிராமத்திலிருந்து, இலங்கை தமிழரசுக் கட்சியின் வேட்பாளராக அமரர், தந்தை செல்வ நாயகத்தால், அறிமுகம் செய்து வைக்கப்பட்ட இளைஞர் தான் அருணாசலம்- தங்கத் துரை. இதற்கு முந்திய காலங்களில், தமிழரசுக் கட்சி பாராளுமன்ற உறுப்பினர்கள் வெற்றி பெற்றாலும், மூதூர் தொகுதியின் தமிழர் பிரதி நிதித்துவம் பாதுகாக்கப்பட்டாலும், மூதூர் தொகுதியின் தமிழ் கிராமங்களின் அபிவிருத்தி, இளைஞர்களின் தொழில் விருத்தி, தமிழ் மக்களின் அடிப்படைத் சேவைகள் பூர்த்தி செய்யப்பட்ட நிலை காணப்படவில்லை. இவ்வாறாக தமிழர்கள் அநாதைகளாக விடப்பட்ட நிலையில்தான், அமரர் அருணசாலம் தங்கத்துரை என்ற இளைஞனின் அரசியல் பிரவேசம் அமைந்திருந்தது.

இருண்ட வானில் ஒளிக் கீற்றுப் போல, அறிமுகமாகிய அமரர், 1970 பொதுத் தேர்தலில் இரட்டை அங்கத்தவர் தொகுதியான, மூதூரின் இரண்டாவது பாராளுமன்ற உறுப்பினராக தெரிவு செய்யப்பட்டார்.

தெரிவுச் செய்தியானது, தமிழ் கிராமங்களில், பட்டாசு ஒலியை எழுப்பியதுடன், கிராமங்களில், அருணாசலம்- தங்கத்துரைக்கு அளிக்கப்பட்ட வரவேற்பானது, அவரைத் தமிழ் மக்களின் தலைவான மாற்றியது.

குறிப்பாக மூதூர் தொகுதியினதும், பின்னர் திருகோணமலை மாவட்டதினதும், கல்வித்துறை சார்ந்த அபிவிருத்தி, குடியேற்றம் மற்றும் வீதி அபிவிருத்தி சுகாதார சேவைகள், தபாலக வசதிகள் பொருளாதாரத் துறைசார் அபிவிருத்திகளை தனது திறமையினாலும், அரசியல் சாணக்கியத்தின் மூலமும் செயற்படுத்தினார்.

மூன்று மொழிகளிலும், முதிர்ச்சி பெற்ற, அவரது கணீர் என்ற குரல், இன,மத,பேத மற்ற சேவை, கொடுத்த வாக்குறுதிகளை நிறைவேற்றுகின்ற விரைவு, அரச அதிகாரிகளுடன், உடனடித் தொடர்புகளை ஏற்படுத்தி மக்களுக்கான தீர்வுகளை உடனடியாகப் பெற்றுக் கொடுக்கும் விதம் என்பவற்றுக்கு, தங்கத்துரைக்கு நிகராக யாராலும் நிற்க முடியாது.

தமது உறவினர்களுக்கு மட்டும், உதவி புரிய வேண்டும், வேலை வாய்ப்புகளை வழங்க வேண்டும் என்ற எண்ணம் அமரருக்கு இருந்ததில்லை. அரச துறைகளில் உள்ள வெற்றிடங்களுக்கு மூதூர்த் தொகுதியின் அனைத்து கிராமங்களின் இளைஞர்களுக்கு அவர் சம வாய்ப்பினையே வழங்கினார்.

பதவிகள் மூலம் தம்மை பிரபல்யப்படுத்தும் மாந்தர்கள் வாழும் இவ்வுலகில், தங்கத்துரை என்ற பெயரின் மூலம், அவர் வகித்த பாராளுமன்ற உறுப்பினர் பதவிக்கு வலிமை, பெருமை சேர்த்துக் கொடுத்தவர் மதிப்புக்குரிய அமரராகும்.

ஒரு பாராளுமன்ற உறுப்பினர் எவ்வாறு செயற்பட வேண்டும் என்பதற்கு முன் உதாரணமாகத் திகழ்ந்தவர் அமரர் அருணாசலம் தங்கத்துரையாகும்.

1981ல் நடைபெற்ற மாவட்ட அபிவிருத்திச் சபைத் தேர்தலில் அமோக வெற்றி பெற்றார். இதில் சிங்கள, முஸ்லிம் மக்களும் அமரர் தங்கத்துரையை ஆதரித்தமை குறிப்பிடத்தக்கதாகும்.

1994ம் ஆண்டு பொதுத் தேர்தலிலும் தமிழர் விடுதலைக் கூட்டணி சார்பில் போட்டியிட்டு திருகோணமலை மாவட்டத்தில் கூடிய வாக்குகளைப் பெற்று தங்கத்துரை தெரிவு செய்யப்பட்டமையானது அவரை திருகோணமலை மாவட்ட மக்கள் எவ்வாறு நேசித்தார்கள் என்பதற்கு சான்றாக அமைந்தது.

மக்கள் சேவகனாக தம்மை மாற்றிக் கொண்ட மூதூரின் தலைவன், கிழக்கின் விடிவெள்ளி மூதூர் வாழ், திருகோணமலை மாவட்டம் வாழ் தமிழ் மக்களின் துரதிருஷ்டமோ, மக்களின் தலைவன், மக்களுக்கான சேவையின் போது வீழ்த்தப்பட்டான்.

ஏழை மக்களின் கலங்கரை விளக்கு மறைந்து விட்டது. மூதூர் விடி வெள்ளி தனது ஒளியை இழந்து விட்டது. அவரின் பூத உடல் மறைந்து 15 வருடங்கள் கடந்து விட்டது. ஆனால் அவரது புகழ் உடம்போ அழிய வில்லை. அமரர் தங்கத்துரையின் அரசியல் பாதையானது, துணிச்சல் மிக்க சாணக்கியம் நிறைந்த தனி வழியாகும். தங்கத்துரையின் அரசியல் வெற்றிடத்தை யாராலும் நிரப்ப முடியாது.

தமிழர்கள் வாழும் வரை, தங்கத்துரை என்ற மனிதனின், நாமம் வாழ்ந்து கொண்டே இருக்கும். அமரர் தங்கத்துரையின் ஆத்ம சாந்திக்காக பிரார்த்திப்போமாக...