அரசாங்கம் நிதி தரவில்லை என அழுது வடிக்கின்றார் முதலமைச்சர்

ஏன் வெளிநாட்டு நிதி வரவில்லையா? புலம்பெயர்ந்தோர் மறந்துவிட்டார்களா? முதலமைச்சருக்கு 15 மில்லியனிலும் அமைச்சர்மாருக்கு தலா 7.5 மில்லியனிலும் கேட்கும் சொகுசு வாகனங்களுக்குரிய பணம் அரசினுடையதா? அல்லது புலம்பெயர்ந்தவர்களுடையதா? அவ்வளவு ஏன்? அரசாங்கம் மாகாணசபை ஊழியர்களின் சம்பளத்திற்கு மட்டுமே நிதி ஒதுக்கியுள்ளது என்றால் மேற்படி உரையை நிகழ்த்திய வட்டக்கச்சி மாயவனூர் புழுதியாற்று நீர்ப்பாசனத் திட்டத்திற்கான நிதி எவ்வாறு பெறப்பட்டது? அரசாங்கம் எமக்கு ஐயாயிரம் மில்லியன் ரூபா வழங்கியுள்ளதாக தெரிவித்துக் கொண்டு நான்காயிரம் மில்லியன் ரூபாவை தனது கையில் வைத்துக்கொண்டு பல வேலைத்திட்டங்களை செய்துவருகின்றது. இவ்வாறு பகிரங்கமாக தெரிவித்திருப்பவர் வேறு யாருமல்ல. வடமாகாண சபை முதலமைச்சர்.

கிளிநொச்சி வட்டக்கச்சி மாயவனூர் புழுதியாற்று நீர்ப்பாசனத் திட்டத்திற்கான அடிக்கல் நாட்டும் நிகழ்வு கடந்த 27ம் நடைபெற்றபோது அதில்; கலந்து கொண்டு உரையாற்றுகையிலேயே அவர் மேற்கண்டவாறு திருவாய் மலர்ந்தருளியுள்ளார்.

அதாவது அரசாங்கம் வெறும் ஆயிரம் மில்லியன் ரூபாவினையே வடமாகாணத்திற்கு வழங்கியுள்ளது என்பதுதான் அவரது நேரடிக் குற்றச்சாட்டு. ஆயினும் உணர்ச்சியைத்தூண்டும் சில பிரச்சாரப் பீரங்கிகளைப்போல மீதிப்பணத்தை அரசு தென்பகுதிக்கு (சிங்கள) கொண்டு சென்றுவிட்டது என்று சொல்லாததற்கு அவரைப் பாராட்டலாம்.

ஆயினும் இவ்விடத்தில் முக்கியமான விடயம் ஒன்றினை நோக்கியாக வேண்டும். அரசாங்கம் வடமாகாணசபைத் தேர்தலை அறிவித்தது முதலே தேர்தல் பிரச்சாரத்தில் ஈடுபட்ட தமிழ் தேசிய கூட்டமைப்பினர் தமது கையில் ஆட்சி வந்தால் தமிழீழமே கிடைத்துவிடும் மாதிரியான ஒரு தோற்றப்பாட்டினையே மக்கள் மத்தியில் விதைத்து வந்தனர். ராணுவத்தை வெளியேற்றுவோம்! உயர் பாதுகாப்பு வலயத்தை அகற்றி மக்களை மீள்குடியேற்றுவோம் என்றெல்லாம் மேடைக்கு மேடை உசுப்பேற்றும் வாசகங்கள்.

இதெல்லாம் சாத்தியந்தானா? இவ்வாறு மக்கள் மத்தில் ஓர் சந்தேகம் ஏற்பட்டது உண்மை. ஆயினும் விக்னேஸ்வரன் ஐயா முன்னாள் நீதியரசர். சட்டங்களைக் கரைச்சுக் குடிச்சவர். எண்டபடியால் அதுக்குள்ளாள சுழிச்சு எப்படியும் காரியத்தை சாதிச்சுப் போடுவார் என்றே மக்கள் நம்பினார்கள். சாதாரண பாமர மக்கள் நம்பினாலும் பரவாயில்லை. மெத்தப் படித்த சமூகம் என்று சொல்லப்படும் குடாநாட்டு மேதாவிகளே இதனை எல்லாம் நம்பியதுதான் அதிசயம்.

இவற்றையெல்லாம்விட நேற்றுப்பெய்த மழைக்கு முளைத்த சில காளான்களோ ஒருபடி மேலே போய் மாவீரர் துயிலுமில்லங்களை மீண்டும் கட்டுவோம். மாவீரர் தினத்தை மாகாண சபைக்கூடாக உத்தியோகபூர்வமாக கொண்டாடுவோம் என்றெல்லாம் மேடைகளில் வீராவேசம் காட்டினார்கள்.

இறுதியில் என்ன நடந்தது என்பது உலகறிந்த விடயம். யாழ்ப்பாணத்து செத்தவீட்டு பத்திரிகை சொன்னதுபோல தமிழர் அரசும் மலர்ந்தது. அதற்குப்பின்னர் கார்த்திகை மாதமும் வந்து சென்றுவிட்டது. தேடப்பட்டு வந்ததாகக் கூறப்படும் கோபி மற்றும் மூவரின் மரணமும், விபுசிகாவின் கைதையுமே இறுதியில் வடமாகாண மக்கள் கண்டனர்.

இதையெல்லாம் ஏன் இங்கு சொல்கின்றேன் என்றால் உணர்ச்சிவசப்பட்டு பேசுவதற்கும் உத்தியோகபூர்வமாக அறிவிப்பதற்கும் மலைக்கும் மடுவிற்கும் உள்ள வேற்றுமை உண்டு. வடமாகாணசபைத் தேர்தல் அறிவிக்கப்பட்ட பின்னர் பெரும் இழுபறியுடன் தமிழ் தேசிய கூட்டமைப்பின் தேர்தல் விஞ்ஞாபனம் வெளியிடப்பட்டது. செப்ரெம்பர் 03 2013 வெளியிடப்பட்ட அவ்விஞ்ஞாபனத்தில் இவ்வாறு குறிப்பிடப்பட்டுள்ளது.

‘வடக்கு, கிழக்கின் அபிவிருத்திக்கான விரிவானதொரு நிகழ்ச்சித் திட்டம் இலங்கை அரசாங்கத்தினதும் புலம்பெயர் தமிழர்களினதும் சர்வதேச சமூகத்தினதும் முனைப்பான ஆதரவுடன் மேற்கொள்ளப்படும்’

இதனது உண்மையான அர்த்தம் யாருக்கு விளங்கியோ இல்லையோ ததேகூ தலைவர்களே மேடைமேடையாக அதற்கு அர்த்தம் கற்பித்தனர். அதாவது “மாகாண சபையினை எம்மிடம் தாருங்கள். இந்த அரசாங்கத்தை நம்பி பிரயோசனமில்லை. எமக்கு உதவுவதற்கும் அள்ளித் தருவதற்கும் சர்வதேச நாடுகளும், புலம்பெயர் எம் உறவுகளும் காத்திருக்கின்றன. இதன்மூலம் எமது தேசத்தை நாமே கட்டியெழுப்புவோம்” என மேடைக்கு மேடை முழங்கினார்.

ஆனால் இப்போதோ அரசாங்கம் நிதி தரவில்லை என அழுது வடிக்கின்றார் முதலமைச்சர். என்ன நடக்கின்றது இங்கே? ஏன் வெளிநாட்டு நிதி வரவில்லையா? புலம்பெயர்ந்தோர் மறந்துவிட்டார்களா? முதலமைச்சருக்கு 15 மில்லியனிலும் அமைச்சர்மாருக்கு தலா 7.5 மில்லியனிலும் கேட்கும் சொகுசு வாகனங்களுக்குரிய பணம் அரசினுடையதா? அல்லது புலம்பெயர்ந்தவர்களுடையதா?

அவ்வளவு ஏன்? அரசாங்கம் மாகாணசபை ஊழியர்களின் சம்பளத்திற்கு மட்டுமே நிதி ஒதுக்கியுள்ளது என்றால் மேற்படி உரையை நிகழ்த்திய வட்டக்கச்சி மாயவனூர் புழுதியாற்று நீர்ப்பாசனத் திட்டத்திற்கான நிதி எவ்வாறு பெறப்பட்டது?

எல்லாவற்றையும்விட இறுதியாக கடந்த இரவு இலங்கையின் தனியார் தொலைக்காட்சி ஒன்றில் பேட்டியளித்த அவைத் தலைவர் சிவிகே சிவஞானம் இதுவரை நூற்றிற்கு மேற்பட்ட பிரேரணைகளை சபையில் நிறைவேற்றி விட்டோம். எதுவுமே நடைமுறைப்படுத்தப்படவில்லை என அழுது வடிக்கின்றார்.

தேர்தல் காலத்தில் மேடைகளில் முழங்கிய வாக்குறுதிகள் தொடர்கதையாகி தற்போது பிரேரணைகள் நிறைவேறவில்லை எனக்கூறி எம்மிடம் நிதி இல்லை என முதலமைச்சர் கூறும் அளவில் வந்து நிற்கின்றது. ஆடத்தெரியாதவனுக்கு மேடை மட்டுமல்ல கார்பற் வீதியும் கோணல் மாணல்தான்.

யாழ் கண்ணன

(thenee.com)