அரசாங்கத்திற்கு எதிராக அதிகரிக்கும் விமர்சனங்களும் எதிர்ப்பு நடவடிக்கைகளும்

காற்று எப்பொழுதும் ஒரே திசையில் வீசுவதில்லை. அது பருவநிலை மாறும்போது எதிர்த்திசையில் வீசவே செய்யும். சிலவேளைகளில் பலத்த காற்றாகி சேதங்கள் விளைவிக்கவும் கூடும்.இன்னும் சில தருணங்களில் கடும் புயலாகி அழிவுகளையும் ஏற்படுத்தும். அவ்வேளையில் அவற்றுக்கு முகம் கொடுப்பது மனிதர்களுக்கு கடுமையானதாக ஆகிவிடும். இந்நிலை நாட்டின் அரசியல் அரங்கிற்கும் பொருத்தமானதாகும். அண்மைய வாரங்களில் அரசாங்கத்தை விரல் சுட்டி விமர்சிப்பதும் எதிர்த்து நடவடிக்கைகளில் ஈடுபடுவதுமான போக்குகள் முனைப்படைந்து காணப்படுகிறது. சர்வதேச நிலையில் ஐ.நா.பொதுச் செயலாளரினால் நியமிக்கப்பட்ட இலங்கையின் போர்க்குற்றச் சம்பவங்களுக்கான நிபுணர்குழுவின் அறிக்கை அரசாங்கத்தை விரல் சுட்டி நிற்கிறது. அதற்கு அரசாங்கம் பதில் கூறப் போவதில்லை என்று கூறியபோதிலும் பதில் கூற வேண்டிய புறச் சூழலே காணப்படுகிறது. மேற்படி நிபுணர் குழு முன்வைத்த அறிக்கை பற்றி ஐ.நா.செயலாளர் அடுத்த கட்ட நகர்வாக எதனைச் செய்யப் போகிறார் என்பது இன்னமும் தெரிவில்லை. அவரும் ஐ.நா.சபையும் உலக நாடுகள் முழுவதற்கும் "நடுநிலையான' "பொதுவான' "நியாயமான' போக்குகளைக் கடைப்பிடிப்பவர்கள் அல்லர். ஐ.நா.விற்குப் பின்னால் அமெரிக்காவும் மேற்குலக நாடுகளும் ஆட்டிப்படைப்போராக இருந்து வருகிறார்கள் என்பது இரகசியமல்ல. எனவே நிபுணர்குழு அறிக்கையின் கீழான அடுத்த நடவடிக்கை வெள்ளை மாளிகையின் முடிவிலேயே தங்கி உள்ளது.

ஆனால் ஐ.நா.நிபுணர் குழு அறிக்கையில் தெரிவிக்கப்பட்ட கருத்துகளும் குற்றச்சாட்டுகளும் அண்மைய நாட்களில் ஜெனீவாவில் இடம்பெற்ற ஐ.நா.மனித உரிமைகள் பேரவையின் பதினேளாவது அமர்வில் எதிரொலித்தன.அதன் உயர் ஸ்தானிகர் நவநீதம்பிள்ளை தனது வருடாந்த அறிக்கையில் அதனைச் சுட்டிக்காட்டி இலங்கையில் இடம்பெற்ற போர்க்குற்றங்கள் பற்றிய விசாரணை வேண்டுமென வற்புறுத்தியிருந்தார்.அதற்கு பதில் கூறவேண்டிய கடப்பாட்டைப் புறந்தள்ள முடியாத அரசாங்கம் இரண்டு அமைச்சர்கள், சட்டமா அதிபர் ஆகியோரை அங்கு அனுப்பி வைத்தது.அமைச்சர் சமரசிங்கவும் சட்டமா அதிபர் மோஹான் பீரிஸும் இலங்கை அரசாங்கத்தில் போர்க்குற்றச் செயல்கள் இழைக்கப்படவில்லையென அடித்துக் கூறினர்.அரசாங்கம் முன்னெடுத்த மனிதாபிமான நடவடிக்கைகளைப் பட்டியலிட்டுக் காட்டினர்.எவ்வாறாயினும் இலங்கை அரசாங்கம் மீதான நிபுணர் குழுவின் அறிக்கையானது குற்றச்சாட்டுகளின் அடிப்படையில் எந்தெந்த வழிகளில் முன்னெடுக்கப்படுமோ என்பதைப் பொறுத்திருந்தே பார்க்க வேண்டும்.

ஐ.நா.நிபுணர்குழுவின் அறிக்கை மீது கடுமையான நிலைப்பாட்டைக் கொண்டிருக்கும் மகிந்த சிந்தனை அரசாங்கம் அமெரிக்காவையும் மேற்கு நாடுகளையும் பெயர் குறிப்பிடாது நாட்டின் இறைமை மீது தலையீடு செய்ய முற்படும் தீய சக்திகள் எனச் சாடிவருகிறது.அதேவேளை அதே அமெரிக்க மேற்குலகத்தால் வழிநடத்தப்படும் உலக வங்கி,சர்வதேச நாணய நிதியம் என்பனவற்றின் முன்னால் பணிந்து நின்று அவர்களது ஆலோசனைப்படி நடந்து முழு நாட்டு மக்களினதும் இறைமையையும் அடகுவைத்து வருகிறது என்பது மறைப்பதற்குரிய ஒன்றல்ல.

நாட்டின் கல்விக் கொள்கையில் குறிப்பாக உயர்கல்விக் கொள்கையிலும் நடைமுறையிலும் படிப்படியான மாற்றியமைத்தல்கள் ஏற்படுத்துவதற்கு நிர்ப்பந்தம் செய்துவந்தது உலக வங்கியேயாகும்.நாட்டின் பொருளாதாரம் நவதாரள பொருளாதாரமாக முன்னெடுப்பதற்கு தனியார் மயமும் திறந்த சந்தையும் என்ற கொள்கை ஜே.ஆர்.ஆட்சிக்காலத்தில் பின்பற்றப்பட ஆரம்பித்தது.அதன் பின் சந்திரிகா அம்மையார் அவற்றுக்கு மனிதமுகம் அளிப்பதாகக் கூறிஅதே பாதையில் பயணித்தார்.அவருக்குப் பின் வந்த தொழிலாளர் சார்பானவர் எனத் தோற்றங்காட்டிய மகிந்த ராஜபக்ஷவும் பாதை மாறாது உலக மயமாதல் நுகர்வுப் பொருளாதாரத்தைப் பின்பற்றுகிறார்.அதற்கு ஒரு காலத்து இடதுசாரிகள் எனக் கூறப்பட்ட பாராளுமன்ற இடதுசாரிகள் உடுக்கடித்து உருவாடி ஆதரவுக்குறி சொல்பவர்களாகி நிற்கிறார்கள்.

இவ்வாறு ஏகாதிபத்திய நிறுவனமான சர்வதேச நாணய நிதியத்திடம் மிகப் பெரும் கடன் பெற்றுக்கொண்டு அவர்கள் விதித்த நிபந்தனைகளின் கீழாகவே தனியார் துறையினருக்கான ஓய்வூதியத்திட்டம் என்பது முன்வைக்கப்பட்டது.இலங்கையில் அறுபத்தைந்து இலட்சம் பேர் தனியார் துறைத்தொழிலாளர்களாக ஊழியர்களாக உள்ளனர்.இவர்களே நாட்டின் ஆகக் கூடிய தொழிற்படையினராகக் காணப்படுகின்றனர்.இவர்களின் சார்பாகவே சேமலாபநிதியம்,ஊழியர் நம்பிக்கை நிதியம் என்பன இருந்து வருகின்றன.அவற்றின் ஊடாகப் பலகோடி ரூபாய்கள் சேமிக்கப்படுகின்றன.அவற்றை நம்பியும் எதிர்பார்த்துமே ஒவ்வொரு தனியார் துறைத்தொழிலாளியும் ஊழியரும் இருந்து வருகின்றனர்.அந்நிதியப் பணம் என்பது அவர்களது வியர்வை சிந்திய உழைப்பின் ஊடாகச் சேமிக்கப்படுவதாகும்.அதில் கூட எத்தனையோ தில்லுமுல்லுகள் ஏமாற்றுகளை தொழில்தருவோர் செய்துகொள்கிறார்கள். அந்நிதியங்களுக்கு முறையாக நிதி செலுத்தாது ஏமாற்றுச் செய்யும் தொழில் தருவோர் கணிசமான அளவில் கள்ளத்தனமாக இருந்து வருகிறார்கள். தொழிலாளர்கள் ஊழியர்களிடம் சம்பளத்தில் அவர்களுக்குரிய தொகையைக் கழித்துக் கொள்ளும் அதேவேளை தமது பங்கிற்குரிய தொகையைக் கட்டாது மொத்த மோசடி செய்யும் தொழில் தருவோர் திருடர்கள் போன்று நடந்து கொள்கிறார்கள். இவை அனைத்தையும் தாண்டியே மேற்படி நிதியங்களில் தொழிலாளர்கள் ஊழியர்களின் சேமிப்புகள் இருந்து வருகின்றன. இவற்றுக்கு உத்தேச ஓய்வூதியத் திட்டத்திற்கான சட்ட மூலம் உலை வைத்து விடும் அபாயம் தோன்றியிருப்பதையே தொழிற்சங்கங்கள் சுட்டிக்காட்டியுள்ளன. அச்சட்டமூலத்தில் கூறப்பட்டுள்ள பல்வேறு அம்சங்களும் தொழிலாளர்கள் ஊழியர்களுக்கு பாதகமானவையும் சர்வதேச நாணய நிதியத்தின் ஆலோசனைக்கும் ஆணைக்கும் பணிந்து கொண்டவைகளாகும்.

அதன் காரணமாகவே தனியார் துறையினருக்கான ஓய்வூதியச் சட்ட மூலத்தை தொழிற்சங்கங்களும் தொழிலாளர்கள், ஊழியர்களும் எதிர்க்க ஆரம்பித்தனர். அந்த எதிர்ப்பு இயக்கம் விரிவடைந்து வீதி ஆர்ப்பாட்டமாகியது. கடந்த மே தினத்திலிருந்து அவ் எதிர்ப்பு இயக்கம் பல நிலைகளிலும் வளர்ச்சி கண்டது. குறிப்பாகக் கட்டுநாயக்க சுதந்திர வர்த்தக வலயத்தில் தொழிலாளர்களின் கடும் எதிர்ப்பைச் சம்பாதித்துக் கொண்டது. இலங்கையில் நிறுவன ரீதியாகத் தோட்டத் தொழிலாளர்களுக்கு அடுத்த நிலையில் கடுமையான சுரண்டலுக்கு உட்படுபவர்கள் சுதந்திர வர்த்தக வலயத் தொழிலாளர்களாவர். பல்தேசிய நிறுவனங்களின் நேரடி உழைப்புச் சுரண்டலும் வியர்வை இரத்த உறிஞ்சல்களும் இங்கேதான் தாராளமாகவே நடைபெறுகின்றன. இதற்கு இலங்கையின் பௌத்த சிங்கள தர்மம் பேசும் அரசாங்கங்கள் முழு ஆதரவும் பாதுகாப்பும் வழங்கி வருகின்றன.
ஏற்கனவே நொந்து வெறுப்புற்று இருந்து வந்த சுதந்திர வர்த்தக வலயத் தொழிலாளர்கள் ஊழியர்கள் மத்தியில் அரசாங்கம் கொண்டுவர முயன்ற ஓய்வூதியச் சட்ட மூலமானது வெந்த புண்ணில் வேல் பாச்சுவதாகவே அமைந்து கொண்டது. அதனால் தொழிலாளர்களின் நியாயமான எதிர்ப்புக்கு தொழிற்சங்கங்கள் தலைமை தாங்கின. தொழிற்சங்கங்கள் என்பன தொழிலாளர்களின் பாதுகாப்பிற்கும் அவர்களின் நலன்களுக்கும் உரியனவே அன்றி அரசாங்கம் கொண்டுவரும் மக்கள் விரோத தொழிலாளர் விரோதச் சட்டங்களுக்கு ஆதரவு தெரிவிப்பதற்காக அல்ல சுதந்திர வர்த்தக வலயத்தில் வேலை செய்யும் தொழிலாளர்களுக்கு ஏனைய தொழிலாளர்களுக்குரிய தொழிற்சங்க உரிமைகள் கிடையாது. அதனாலேயே அவர்கள் தமக்கான சங்கங்களை உருவாக்கி தமது உரிமைகளைப் பாதுகாக்க வேண்டியுள்ளது.
அந்நிய பல்தேசிய நிறுவனங்களின் தாராள சுரண்டலுக்கு வழி வகுத்தவரே ஜே.ஆர்.தான். அவரது 1978 ஆம் ஆண்டின் அரசியலமைப்பில் அதற்கான வரையறைகளைச் சேர்த்தும் கொண்டார்.
அவ்வாறு இருந்தும் சுதந்திர வர்த்தக வலயத் தொழிலாளர்கள், ஊழியர்கள் இளம் பெண்களாகவும் இளைஞர்களாகவும் தத்தமது தொழிற்சங்கங்களின் ஊடாக ஐக்கியப்பட்டு தமது எதிர்ப்பை ஓய்வூதியச் சட்டத்திற்கு எதிராகத் தெரிவித்தனர். தொழில் அமைச்சரை அங்கு இடம்பெற்ற சந்திப்பில் பல கேள்விகள் கேட்டனர். பதில் கூற முடியாது திக்குமுக்காடிய அமைச்சர் மௌனம் சாதிக்க வேண்டியதாயிற்று. அதன் பின்னர் பல்வேறு தொழிற்சாலைகளின் தொழிலாளர்கள் சட்டத்திற்கு உட்பட்ட எதிர்ப்பு ஆர்ப்பாட்டங்களையே மேற்கொண்டனர்.
அவர்கள் மத்தியிலிருந்து எதிர்த் திசைக்காற்று பலமாகவே வீச ஆரம்பித்தது. அதற்கு ஒரு பாடம் படிப்பிக்க அரசாங்கம் தீர்மானித்ததன் விளைவே கடந்த திங்கட்கிழமை இடம்பெற்ற தாக்குதலும் மோதலுமாகும்,பொலிஸ் நடத்திய தாக்குதலை மிருகத்தனமானது எனக் கூறுவதில் தவறில்லை. சில காட்சி ஊடகங்கள் தாக்குதல் நடந்ததை அப்படியே காட்டியிருந்தன. ஒரு 22 வயது இளம் ஊழியர் கொல்லப்பட்டார்.
பொலிஸ் துப்பாக்கிச் சூட்டினாலேயே அவரது உயிர் பறிக்கப்பட்டது. பல்லாயிரம் தமிழ் மக்களின் உயிர்களைப் பறித்த துப்பாக்கிகள் இப்போது சிங்கள மக்கள் மத்தியில் தொழிலாளர்களின் உயிர்களைக் குடிக்க ஆரம்பித்துள்ளன. அதன் அண்மைக்கால முதல் களப்பலியே ரொசான் சானக என்ற 22 வயதுடைய வர்த்தக வலய ஊழியராவார். பல ஊழியர்கள் படுகாயம் அடைந்துள்ளனர். அமைதியான சட்டபூர்வமான தமது எதிர்ப்பை ஆர்ப்பாட்டத்தின் மூலம் தெரிவித்த ஊழியர்கள் மீது திட்டமிட்ட பழிவாங்கல் போன்றே தாக்குதல் மேற்கொள்ளப்பட்டுள்ளது என்றே நம்ப வேண்டியுள்ளது. அதனை உறுதிப்படுத்துவது போன்றே ஜனாதிபதியின் உத்தரவுகளும் விசாரணை ஏற்பாடுகளும் செய்யப்பட்டன., அந்நிய மூலதன சக்திகளுக்கும் அவர்களது நலன்களுக்கான நிறுவனங்களினதும் ஆலோசனை வழிகாட்டலில் நடந்துகொள்ளும் எந்தவொரு அரசாங்கமும் இத்தகைய நெருக்கடிகளையே எதிர்கொள்ளும்.
தமிழ் மக்களின் நியாயமான உரிமைகளை மறுத்து அதனைப் பயங்கரவாதம் என்ற பெயரில் அடக்கியொடுக்கி வந்த பௌத்த சிங்கள முகமூடியணிந்த ஒரு அரசாங்கம் இன்று அதே பௌத்த சிங்கள மக்களுக்கு எதிராகத் துப்பாக்கி நீட்டி நிற்பது எவ்வகையிலும் விந்தை அல்ல. இது முதற்தடவையும் அல்ல. 1971 இலும் 198889 காலப்பகுதியிலும் பல்லாயிரம் சிங்கள இளைஞர்,யுவதிகள்,மக்கள் என்போர் இதே ஆளும் வர்க்கத் துப்பாக்கிகளுக்குப் பலியாகினர். அது பழைய கதையாகிவிட்டாலும் அதில் பொதிந்து காணப்பட்ட ஆளும் வர்க்க, ஆளப்படும் வர்க்கம் என்ற அடிப்படை உண்மையை மீண்டும் மீண்டும் துலக்கமுறவே செய்கிறது. வடக்கு,கிழக்கிலே இன ஒடுக்குமுறைச் சங்காரம் தாராளமாகவே நடந்து கொண்டது. அதனைக் காட்டியே ஆட்சி அதிகாரம் பெற்றோர் இப்போது சிங்கள உழைக்கும் மக்களுக்கு எதிரான வர்க்க ஒடுக்குமுறை சங்காரத்திற்குத் தயாராகிவிட்டனர். அதன் முதல் வெளிப்பாட்டினை கடந்த திங்கட்கிழமை மே 30 ஆம் திகதி கட்டுநாயக்க சுதந்திர வர்த்தக வலயத்தில் காணமுடிந்தது.

அச்சம்பவத்தில் சிங்கள உழைக்கும் வர்க்கம் அதிர்ச்சியிலும் ஆத்திரத்திலுமே உள்ளது. இதனை வலியும் வேதனையும் கொண்டு வாழும் தமிழ் மக்கள் குறுகிய பார்வையூடாக பழி என்ற கண்ணோட்டத்துடன் பார்க்கக்கூடாது.  அனுதாபத்துடனும் ஒருமைப்பாட்டுடனும் அணுக வேண்டும். இன ஒடுக்குமுறையும் வர்க்க ஒடுக்குமுறையும் ஒரு நாணயத்தின் இரண்டு பக்கங்களாக இருந்து வருவதே உண்மையானதாகும். இந்த உண்மையைத் தமிழ்,சிங்கள உழைக்கும் வர்க்கம் உணரும்போதே இலங்கையின் ஏகப்பெரும்பான்மையான மக்களுக்கு விமோசனம் கிடைக்க முடியும்.
அதற்குப் பட்டறிவின் மூலமான மாற்றுச் சிந்தனையும் அதனூடான யதார்த்தபூர்வமான மாற்றுக் கொள்கையும் உருவாக வேண்டும்.

(தினக்குரல்)