மக்களை ஏமாற்றும் நாடு கடந்த அரசு!

புலம்பெயர்ந்த மக்களையும் தமிழக உறவுகளையும் ஏமாற்றி தமது நிகழ்ச்சி நிரலை கொண்டு செல்லும் முயற்சியில் உருத்திரகுமாரனின் நாடு கடந்த அரசு செயற்படுவதை அண்மைக்காலங்களில் மிகவும் வெளிப்படையாக அவதானிக்க முடிகின்றது. அண்மையில் ஜெனீவாவில் நடைபெற்ற மனித உரிமைகள் கூட்டத்தொடருக்கு சென்றிருந்த இதன் பிரதிநிதிகள் சிலர், அங்குள்ள முக்கிய பிரமுகர்களுக்கு பக்கத்தில் சென்று அமர்ந்துகொண்டு அவர்களுடன் பேச்சுக்கொடுப்பதுபோல் பாவனை செய்ய, அதனை வேறொருவர் தனது கமெராவில் பதிவு செய்துகொள்ள பின்னர் அதனையே ஐக்கிய நாடுகள் மனித உரிமைகள் அமைப்பில் நாடு கடந்த அரசின் பிரதிநிதிகள் பங்கேற்பு என உருத்திரகுமாரனின் நாடு கடந்த அரசு ஊடகங்களுக்கு செய்தி அனுப்பியிருந்தது.

இவ்வாறான நிகழ்வுகள் ஐ.நா. மனித உரிமைகள் சபையில் அரங்கேறிக்கொண்டிருந்ததை அங்கிருந்த ஊடக இல்லத்தின் செய்தியாளர் நேரில் கண்டு எமக்குத் தெரிவித்திருந்தார். இந்நிலையில், தற்போது பிரித்தானிய நாடாளுமன்ற கட்டடத்தில் நாடு கடந்த தமிழ் ஈழ அரசின் உயர்மட்ட கூட்டம் நடைபெற்றது என்ற செய்தியைப் பரப்பியுள்ளனர்.

நாடாளுமன்றங்களில் உள்ள சந்திப்புக் கூடங்களில் அந்நாட்டில் பதிவு செய்யப்பட்ட கட்சி ஒன்றின் ஏற்பாட்டில் சந்திப்புக்களை மேற்கொள்ள முடியும். ஒரு கட்சியின் ஆதரவைப் பெற்றுக்கொண்டால் நாடாளுமன்றங்களில் நடத்தமுடிகின்ற கூட்டங்களை பிரமாண்டப்படுத்தி ஏன் செய்தியாக்குகின்றது என்ற கேள்வியே எழுகின்றது.

கடந்த இரண்டு ஆண்டுகளாக ஆரோக்கியமான எந்த செயற்பாடுகளுமின்றி அறிக்கையும், அடையாள அட்டையும் வெளியிடும் நாடு கடந்த அரசு போகும் பாதை எங்கே என்பது இதன்மூலம் மக்களுக்கு தெளிவாகி வருகின்றது.

இதேவேளை, தமிழகத்தில் இன உணர்வு சார்ந்த முக்கிய அரசியல் தலைவர்கள், பிரமுகர்களைச் சந்தித்து பொய்யான பரப்புரைகளை இவர்கள் செய்து வருவதும் தெரியவருகின்றது. அண்மையில் தமிழகம் சென்றிருந்த நாடுகடந்த அரசின் அமைச்சரெண்டு சொல்லிக் கொள்ளும் ஒருவர், நாம் தமிழர் இணைப்பாளர் சீமானைச் சந்தித்து படங்களையும் வெளியிட்டு, நாடு கடந்த அரசிற்கு சீமான் ஆதரவு என்று செய்திகளையும் வெளியிட்டிருந்தனர்.

சீமானுடன் உரையாடிய சந்தர்ப்பமொன்றில் இது குறித்து கேள்வி எழுப்பியபோது, ‘வர்றாங்கள், பக்கத்தில் நின்று படம் எடுக்கவேண்டும் என்கிறாங்கள். பிறகு எதாவது இனப்படுகொலையை வெளிக்கொண்டுவாற நடவடிக்கைகளை எடுக்கப்போறம் எண்டுறாங்கள். அதற்கு ஆதரவெண்டு சொன்னால் வெளியிலைபோய் சீமான் இதற்கு ஆதரவு எண்டு செய்தியளைப் போடுறாங்கள். அதுக்கு நான் என்ன செய்யமுடியும்?’ என்றார்.

அண்மையில் பிரான்ஸ் வந்திருந்த தமிழக அமைப்பொன்றின் பிரதிநிதி ஒருவர், தமிழகத்தில் இவர்கள் செய்துவரும் பிரச்சாரம் குறித்து தான் பலத்த சந்தேகங்களைக் கொண்டிருந்ததாகவும், சேரமான் எழுதிவரும் ‘ஈழமுரசுலீக்ஸ்’ படித்ததன் பின்னர் தனது பல கேள்விகளுக்கு விடை கிடைத்ததாகவும் கூறியதுடன், தமிழகத்தில் இவர்களது பொய்யான பரப்புரையை முறியடிக்க வேண்டும் அதற்கு ஈழமுரசு அங்கு செல்லவேண்டும் என்றும் கேட்டுக்கொண்டார்.

தற்போது விடுதலைச் சிறுத்தைகள் கட்சியின் தலைவர் திருமாவளவன், ஈழத் தமிழ் மக்களுக்கு செய்யவேண்டிய எத்தனையோ பணிகள் இருக்கையில், இவர்களின் பொய்ப்பரப்புரைகளில் ஏமாந்தே நாடு கடந்த அரசுக்கு ஆதரவாக கையெழுத்து சேகரிப்பதில் இறங்கியிருக்கின்றார் என்று குற்றச்சாட்டுக்கள் எழுந்துள்ளன.

நன்றி: ஈழமுரசு (21/06/2011)