வட அயர்லாந்தின் ஐ.ஆர்.ஏ அமைப்பின் உறுப்பினர்களை ஈவிரக்கமின்றி பிரிட்டிஷ் புலனாய்வுப் படை சுட்டுக் கொன்றது

மனித உரிமை மீறல்களை மேற்கொண்ட நாட்டைச் சேர்ந்த பிரதம மந்திரி டேவிட் கெமரூனுக்கு எங்கள் நாட்டைப் பற்றி பேச என்ன அருகதை இருக்கிறது? இலங்கை மீது போர்க்குற்றச் சாட்டுகளையும், யுத்தக் குற்றச்சாட்டுகளையும் சுமத்தும் பிரிட்டிஷ் பிரதமமந்திரி டேவிட் கெமரூன் முதலில் தமது நாட்டில் இடம்பெற்றதாக கூறப்படும் யுத்தக்குற்றச்சாட்டுகள், மனித உரிமை மீறல்கள் பற்றி தெரிந்திருந்த போதிலும் வெளிநாடுகளின் மேற்கத்திய நாடுகளின் ஆதரவுடன் பயங்கரவாதத்தை முன்னெடுத்துச் சென்ற எல்.ரி.ரி.ஈ. பயங்கரவாதிகளினால் பெரும் பாதிப்புக்குள்ளான இலங்கை போன்ற நாடுகளுக்கு வந்து அந்நாடுகள் மீது ஆதாரமற்ற குற்றச்சாட்டுகளை சுமத்துவது பற்றி சிந்தித்து செயலாற்றியிருக்க வேண்டும்.

பிரிட்டிஷ் பிரதம மந்திரி டேவிட் கெமரூன் அவ்விதம் செயற்படாத காரணத்தினால் அவரது அரசாங்கம் கடந்த காலத்தில் இழைத்த யுத்தக்குற்றச் சாட்டுகளையும், மனித உரிமை மீறல்களையும் பற்றி நாம் இனிமேலும் மெளனம் சாதிக்க முடியாது என்பதனால் பிரிட்டிஷாரின் சட்டவிரோத செயற்பாடுகள் குறித்து நாம் இங்கு தகவல்களை வெளியிட வேண்டிய நிர்ப்பந்த நிலைக்கு தள்ளப்பட்டுள்ளோம்.

பிரிட்டிஷ் அரசாங்கம் தங்கள் இராணுவ பதிலடிப் படை என்ற சட்டத்திற்கு புறம்பான உளவுப்படை ஒன்றை அந்நாட்டு பாராளுமன்றத்திற்கும் அறிவிக்காமல் செயற்படுத்தியது. இந்த பிரிட்டிஷ் உளவுப்படையைச் சேர்ந்த முன்னாள் இராணுவ வீரர் ஒருவர் பி.பி.சி. சர்வதேச தொலைக்காட்சிக்கு நிறுவனத்திற்கு அளித்த பேட்டியில், 1972ம் ஆண்டு முதல் வட அயர்லாந்தில் உள்ள கத்தோலிக்க அரசாங்கத்தை ஆதரிக்கும் எதிர்ப்பு செயற்பாட் டாளர்களை மெளனமாக்குவதற்காக அவர்கள் வாழ்ந்த பிரதேசத்துக்கு இந்த உளவுப்படையினரை அனுப்பி சம்பந்தப்பட்டவர்களை ஈவிரக்கமின்றி கொன்றதாக தெரிவித்துள்ளார்.

அந்த உளவுப்படையின் ஒரு கொலைபுரியும் வீரனாக இருந்த முன்னாள் பிரிட்டிஷ் இராணுவ வீரர் தங்கள் இலக்க அடையாளமற்ற வாகனங்களில் மேற்கு பெல்பாஸ் நகரங்களில் பயணம் செய்து அங்கு தாங்களது சந்தேகத்திற்கு இலக்காகும் IRA இராணுவத்தைச் சேர்ந்த உறுப்பினர்களை மறைந்திருந்து சுட்டுக் கொன்றதாக கூறுகிறார்.

பி.பி.சி. தொலைக்காட்சி சேவையின் பெனரோமா நிகழ்ச்சியில் கடந்தகால அனுபவத்தை விளக்கிக் கூறிய இராணுவ வீரர், பிரிட்டனின் சட்டமா அதிபர் வட அயர்லாந்தில் 1972, 1973ம் ஆண்டுகளில் அப்பாவி மக்களை சுட்டுக் கொன்றதாக சந்தேகிக்கப்படும் பிரிட்டிஷ் இராணுவ வீரர்களுக்கு பொது மன்னிப்பு அளிக்கப்படும் என்று அறிவித்தவுடன் பிரிட்டிஷ் அரசாங்கம் 1972,1973ம் ஆண்டுகளில் மேற்கொண்ட சட்டவிரோத சம்பவங்கள் வெளி உலகிற்கு தெரிய வந்தது.

இவ்விரு வருடங்களின் போது பிரிட்டிஷ் இராணுவமும் அதனது உளவுப்படையும் மேற்கொண்ட படுகொலைகள் குறித்து பேச்சு அடிபட்ட போதிலும் அதுபற்றிய சுதந்திரமான ஆதாரங்கள் எதுவும் வெளிவரவில்லை.

இத்தகைய சூழ்நிலையில் பிரிட்டிஷ் சட்டமா அதிபர் இந்த பொதுமன்னிப்பு அளிக்கப்படும் என்று அறிவித்ததை அடுத்து இந்த உளவுப்படையின் முன்னாள் உறுப்பினர்கள் 7 பேர் பி.பி.சி. தொலைக்காட்சி சேவையின் பெனரோமா நிகழ்ச்சியை நெறிப்படுத்திய ஜோன்பாரி என்ற செய்தியாளருக்கு தாங்கள் புரிந்த குற்றங்கள் பற்றிய பயங்கர தகவல்களை வெளியிட்டார்கள். இவர்களில் மூவர் தமது அடையாளத்தை மறைத்துக் கொண்டு இந்தத் தொலைக்காட்சி சேவைக்கு தங்கள் குரலையும் மாற்றிக் கொண்டு பல குற்றச்செயல்கள் பற்றிய தகவல்களை தெரிவித்தார்கள்.

தாங்கள் ஐ.ஆ.ர்.ஏ இயக்கத்தின் உறுப்பினர்கள் என்று சந்தேகித்தவர்களை ஈவிரக்கமின்றி சுட்டுக் கொன்ற போதிலும் துப்பாக்கிச் சண்டையின் போது நடுவில் சிக்கிக் கொண்ட பலரை தாங்கள் காப்பாற்றியதாகவும் தெரிவித்தனர்.

இவர்கள் அன்றைய காலகட்டத்தில் பெல்பாஸ்ட் நகரசபையின் வீதிகளை சுத்தப்படுத்தும் கூலித் தொழிலாளர்கள் போல் வேடமணிந்து தங்கள் புலனாய்வுகளை மேற்கொண்டு சந்தேகத்திற்கிடமான ஐ.ஆர்.ஏ போராளிகளை எவ்வித விசாரணைக்கும் உட்படுத்தாமல் சுட்டுக் கொன்றதாக அறிவித்தனர்.

தாங்கள் இராணுவ சீருடை அணியாதி ருந்ததனால் எங்களுக்கு ள்ளும் யார் எந்தப் பதவியை வகிக்கிறார்கள் என்பது தெரியாதிரு ந்ததாகவும் தொலைக் காட்சி சேவைக்கு அறிவி த்தார்கள். பிரிட்டிஷ் இராணுவத்தில் மஞ்சள் அட்டை என்ற அறிவுறுத்தல் பயன்படுத்தப்படுகிறது. இதன்படி, ஒருவர் தான் சந்தேகிக்கும் நபர் ஒரு பயங்கரவாதி என்பதை நூற்றுக்கு நூறு வீதம் ஊர்ஜிதம் செய்த பின்னரே அவரை சட்டபூர்வமாக சுட்டுக் கொல்ல முடியுமென்று வலியுறுத்தப்பட்டிருக்கிறது.

ஆயினும், உளவுப்படையைச் சேர்ந்த தாங்கள் அந்த நிபந்தனையை என்றுமே கடைப்பிடிக்காமல் சந்தேகிக்கப்படுப வர்களை வீதிகளிலும், வீடுகளிலும் வைத்து மனிதாபி மானமற்ற முறையில் சுட்டுக் கொன்றதாக தெரிவித்தார்.

“அநாவசியமாக பிரிட்டிஷ் சாம்ராஜ்யத்திற்கு பிரச்சினைகளை ஏற்படுத்தும் ஐ.ஆர்.ஏ சந்தேகநபர்களை கண்ட இடத்தில் சுட்டுக் கொல்லுங்கள். அவர்கள் நிராயுதபாணியாக இருந்தாலும் தயவு தாட்சண்யம் காட்டாமல் சுட்டுக் கொல்லுங்கள்” என்று பிரிட்டிஷ் இராணுவம் விடுத்த உத்தரவை தாங்கள் சரியாக நடைமுறைப்படுத்தியதாக இந்த முன்னாள் உளவுப்படையைச் சேர்ந்த இராணுவ வீரர்கள் தெரிவித்தனர்.

நீண்ட இடைவெளிக்குப் பின்னர் பிரிட்டிஷ் அரசாங்கம் திடீரென்று விழித்துக் கொண்டு தங்கள் இராணுவம் வட அயர்லாந்தில் மேற்கொண்ட குற்றச் செயல்களைப் பற்றி இப்போது விசாரணையொன்றை ஆரம்பித்திருக்கிறது. பிரிட்டிஷ் அரசாங்கத்தின் இந்த கொடும்போக்கினால் பாதிக்கப்பட்ட ஒரு குடும்பத்தைச் சேர்ந்த செல்வி மெக்வே, நிராயுதபாணியாக இருக்கும் ஒரு மனிதனை சுட்டுக் கொல்பவன் இராணுவ வீரன் அல்ல. இந்த உளவுப்படையினர் எனது தந்தையை அவரது முதுகுப் பக்கத்தில் சுட்டு கொலை செய்தார்கள். இத்தகைய கொலைகளுக்கு பிரிட்டிஷ் அரசாங்கம் நஷ்ட ஈடு வழங்கிய போதிலும் அதுகுறித்து நாம் திருப்தியடையவில்லை. கொலை செய்தவனை தண்டிக்க வேண்டும் என்பதையே நாம் விரும்பினோம். அவர்களை பொது விசாரணைகளை நடத்திய பின்னர் தண்டிப்பதே இந்த கொலையாளியினால் பாதிக்கப்பட்டவர்களுக்கு மன அமைதியை ஏற்படுத்தும் என்று செல்வி. மெக்வே கண்ணீர் மல்க அறிவித்தார்.

அவர் தொடர்ந்தும் கருத்து தெரிவிக்கையில், குற்றமிழைத்தவனுக்கு தண்டனை கொடுப்பது அவசியமாகும். ஒரு மனிதனை இன்னொருவன் கொன்றுவிட்டால் அந்தக் கொலை பற்றிய விசாரணைக்கு எத்தனை ஆண்டுகள் எடுத்தாலும் ஒரு நாள் அந்த கொலைகாரனை நீதிமன்றத்தின் முன் நிறுத்தி தண்டிக்க வேண்டும். இதுவே, வட அயர்லாந்தில் பாதிப்புக்குள்ளானவர்களின் விருப்பம் என்று அவர் கூறினார்.

(எஸ். தில்லைநாதன்)