உனக்கு ஜீவன் போனால், எனக்கு....?

(ஜீவிதன்)

ஒருவர் உயிருக்குப் போராடும் அளவுக்கு நோய் வாய்ப்பட்டுக் கிடந்தால் நீங்கள் மகிழ்ச்சியடைவீர்களா? என்று உங்களை யாராவது கேட்டால், நிச்சயம் இல்லை என்றுதான் பதில் சொல்வீர்கள். அதுவும் உங்களுக்குத் தெரிந்த ஒருவர் அவர் உங்கள் எதிரியாக இருந்தாலும், நிச்சயம் நீங்கள் ஆம் அவன் செத்துத் தொலையட்டும் என்று நிச்சயமாக கூறவேமாட்டீர்கள். ஏனெனில் அது மனிதப் பண்பு அல்ல என்பீர்கள்.

உங்களுக்கு நம்புவதற்குச் சற்றுக் கடினமாகக்கூட இருக்கும். ஆனால் ஓர் உண்மையைச் சொல்லியாகவேண்டும். ஒருவர் உயிருக்குப் போராடிக்கொண்டிருந்தால், கடவுள் நம்பிக்கையுடையவர்கள் ஆண்டவனே இவரைக் காப்பாற்று என்று இறைஞ்சுவார்கள். இதுவே மனித இயல்பு. ஆனால், இந்த மனித இயல்புக்கு மாறுபட்டவர்களாக சில ஆசிரியர்கள் இருக்கின்றார்கள்.

ஹொரண - இங்கிரியா பகுதியில் உள்ள ஓர் ‘இறை’ அருள் மிகுந்த ஒரு பாடசாலையின் அதிபர் நோய்வாய்ப்பட்டுப் படுத்த படுக்கையாக அதி தீவிர சிகிச்சைப் பிரிவில் கிடக்கிறபோது, மற்றொரு ஆசிரியர் தினமும் காலையில் எழுந்து ஆற்றில் குளித்துவிட்டு ஈரத்துணியுடன் கோயில் சென்று வழிபாடு நடத்தியிருக்கிறார்.

அந்த அதிபர் குணமாகி திரும்பி வரவேகூடாது என்பதுதான் அவரது வேண்டுதலாம். தாம் செய்த சூனியமும் வேண்டுதலும் வேலை செய்ததால்தான், எல்லோருக்கும் பிடித்தமான அந்த மனோகரமிக்க அதிபர் நோயில் விழுந்தார் என்பது ‘பிர(ஸ்)தாப’ ஆசிரியரின் நம்பிக்கை.

மாணவர்களுக்கு மனிதத்தைப் படிப்பித்து முன்மாதிரியாகத் திகழ வேண்டிய ஓர் ஆசிரியர் இப்படி தினமும் கோயில் செல்வதைப் பார்த்துப் பிரமித்துப் போயிருக்கிறார்கள் பிரதேசத்தின் பெற்றோர்கள். ஒருவர் சாக வேண்டும் என்று எவராவது ஆலய தரிசனத்திற்குச் செல்வார்களா என்ற ஆதங்கத்தில்தான் இப்போது இந்தப் ‘பிரஸ்தாப’ரைப் பார்க்கிறார்கள்.

உண்மையில் இதனை இங்கு குறிப்பிடுவதற்குக் காரணம், பெற்றோர்களின் வேண்டுகோள்தான். வேறு எதுவும் அல்ல. தம் பிள்ளைகளுக்குக் கருணையை வளர்ப்பார்கள். பிற்காலத்தில் அந்தப் பிள்ளைகள் நம்மை வைத்துக் காப்பாற்றும் அளவுக்குப் படிப்பிப்பார்கள் என்று அந்த ஆசிரியர்கள் மீது நாம் வைத்துள்ள நம்பிக்கை வீணாகிவிடக்கூடாது என்கிறார்கள் வினயமாக.

இந்த விடயம் அம்பலமாகுவதை அறிந்த பிறகாவது அந்தப் பிரதாபர் தன்னை மாற்றிக்கொள்வார் என்றும் நம்புகிறார்கள். நாமும் அந்த நம்பிக்கையில் இங்கு பல விடயங்களைச் சுட்டிக்காட்டி வருகிறோம்.

பரீட்சைக்குச் சென்ற மாணவியைத் திருமண பந்தத்தில் இணை த்த ஆசிரியர் பற்றிக் கடந்த வாரம் சிறிதாகக் குறிப்பிட்டிருந்தோம். அது பெரிதாகப் பற்றி எரிகிறதென்கிறார்கள் நீர்த்தேக்கப் பாலத்தின் சக ஆசியர்கள். இதெல்லாம் சகஜமப்பா! என்றும் சிலர் சொல்கிறார்கள். ஏனென்றால், உயர் தர மாணவிக்குத் திருமணம் செய்து வைத்த அண்ணியும் சாதாரண தரத்தில் தாரமாகியவர் என்கிறார்கள்.

இப்படி உயர் கல்வியைக் கற்கவிடாமல் மாணவர்களின் கல் வியைச் சீரழிக்கும் ஆசிரியர்களைப் பற்றிக் குமுறிக்கொண்டிருக்கின்றன பாட்டாளி நெஞ்சங்கள். மாணவியை மனைவியாக்கிக் குட்டி இங்கிலாந்திற்குக் கூட்டிச் சென்றிருக்கும் சூரியக்குஞ்சைத் தேடிப் பொலிஸார் வலை விரித்திருக்கிறார்கள். என்றாலும் அது முடிந்த கதை என்று சிவா சிவா என்றிருக்கிறார்கள் பெற்றோர்கள். அவர்களால் வேறு என்னதான் செய்ய முடியும் எல்லாம் அவன் செயலாக இருக்கும்போது.

பதுளையில் நாமகள் குடிகொண்டுள்ள பாடசாலையிலும் சில விடயங்கள் கசிந்திருக்கின்றன. அதனை நேரில் ஆய்ந்தறிந்து ஆற அமர வெளிக்கொண்டு வரலாம். இந்த மாவட்டத்தில் கல்வி நிலவரம் மிகவும் பின்னடைந்து காணப்படுவதாக ஆய்வுத் தகவல்கள் மூலம் தெரிய வந்திருக்கிறது. அதற்கான உண்மைக் காரணங்கள் நாமகள் பெயரில் ஒளிந்து கிடக்கின்றவோ என்னவோ, சோதித்துப் பார்த்துவிடுவோம்.

(ஜீவிதன்)