தமிழர் பிரச்சினைக்கு நிரந்தர தீர்வு ஏற்பட சாதகமான சூழ்நிலை உருவாகி வருகிறது

தமிழ்த் தேசியக் கூட்டமைப்பின் தலைவர் இரா. சம்பந்தன் தலைமையிலான தூதுக்குழுவொன்று கடந்த வாரம் புதுடில்லி சென்று இந்தியப் பிரதம மந்திரி நரேந்திர மோடியைச் சந்தித்து பேச்சுவார்த்தைகளை நடத்திய போது இந்தியப் பிரதம மந்திரி தமிழ்த் தேசிய கூட்டமைப்பினருக்கு நீங்கள் தயவுசெய்து யதார்த்தபூர்வமாக பிரச்சினைகளை அணுக வேண்டுமே ஒழிய பிரச்சினையை காலம் கடத்துவதற்கு எக்காரணம் கொண்டும் இடமளிக்கக் கூடாது. நீங்கள் விட்டுக்கொடுக்கும் மனப்பான்மையுடன் ஜனாதிபதி மஹிந்த ராஜபக்ஷவுடன் பேச வேண்டும். அப்படியான சூழ்நிலையிலேயே இந்தியாவினால் உங்களுக்கு உதவக் கூடிய முறையில் காய்களை நகர்த்த முடியும் என்று நரேந்திர மோடி அறிவுரை வழங்கினார். தமிழ்த் தேசிய கூட்டமைப்பினர் எவருடன் பேசினாலும் பிரச்சினைக்கு இறுதித் தீர்வை ஏற்படுத்துவதற்கு என்னிடம் பேச வேண்டும் என்று ஜனாதிபதி மஹிந்த ராஜபக்ஷ ஒரு யதார்த்தபூர்வமான கருத்தை தெரிவித்திருப்பது பாராட்டுக்குரிய விடயமாகும்.

அதற்கு ஏற்புடைய வகையில் கடந்த புதன்கிழமை யாழ்ப்பாணத்தில் அச்சுவேலியில் கைத்தொழில் பேட்டை ஒன்றை ஆரம்பிக்கும் நிகழ்வில் உரை நிகழ்த்திய இந்திய தூதுவர் வை.கே.சின்ஹா, இலங்கை மக்களுக்கு சுபீட்சமான, வளமான எதிர்காலத்தை ஏற்படுத்திக் கொடுப்பதற்கு இந்நாட்டின் மத்திய அரசாங்கமும், வடமாகாண முதலமைச்சரும், வடமாகாண சபையும் இந்தியாவுடன் இணைந்து செயற்படுவது அவசியம் என்று கேட்டுக் கொண்டார்.

இந்தியாவில் புதிதாக ஆட்சி அமைத்துள்ள பிரதம மந்திரி நரேந்திர மோடி தலைமையிலான அரசாங்கமும் இலங்கைக்கு தொடர்ந்தும் உதவிகளை வழங்கத் தயாராக இருக்கிறது என்றும் அவர் கூறினார். இதேவேளையில் சென்னை மாநகரில் நடந்த நிகழ்வில் உரைநிகழ்த்திய இரா. சம்பந்தன், ஒருங்கிணைந்த இலங்கையில் போதிய அதிகாரங்களுடன் தமிழர்கள் வாழ வேண்டும் என்ற நிலையில் நாட்டைப் பிரித்து தீர்வு ஏற்படுத்த வேண்டும் என்று தாங்கள் கோர முடியாது என்று திட்டவட்டமாக அறிவித்துள்ளார்.

இலங்கைத் தமிழர் பிரச்சினையை சுமுகமாக தீர்ப்பதற்கு சம்பந்தன் ஐயாவின் இந்த புதிய நிலைப்பாடு ஒரு நல்ல சகுனமாக அமைந்துள்ளது. இந்த நிலைப்பாட்டுடன் தமிழ்த் தேசியக் கூட்டமைப்பு பாராளுமன்ற தெரிவுக் குழுவுக்குச் சென்று தங்கள் அபிலாஷைகளை யதார்த்தபூர்வமாக எடுத்துரைத்து, இணக்கப்பாட்டு அரசியலில் ஈடுபட்டால் நிச்சயம் இப் பிரச்சினைக்கு தீர்வு ஏற்படும் என்று அரசியல் அவதானிகள் கூறுகிறார்கள்.

தமிழ்த் தேசியக் கூட்டமைப்பின் தூதுக்குழுவினர் இந்திய பிரதம மந்திரி நரேந்திர மோடியை சந்தித்து பேச்சுவார்த்தைகள் நடத்தியது இலங்கையின் இறைமையை மீறிய ஒரு செயலாக கருதப்பட வேண்டும் என்று காணாமல் போனோர் பற்றிய விசாரணை செய்யும் ஆணைக்குழுவுக்கு உதவி செய்வதற்காக நியமிக்கப்பட்ட நிபுணத்துவக் குழுவின் உறுப்பினர் பத்மஸ்ரீ அவ்தாஸ் கெளஷால் கண்டனம் தெரிவித்துள்ளார்.

தமது இந்த நிலைப்பாடு குறித்து மேலும் கருத்து தெரிவித்திருக்கும் பத்மஸ்ரீ அவ்தாஸ் கெளஷால் தமிழ் தேசிய கூட்டமைப்பு பிரிவினை வாதத்தை ஆதரிக்கும் ஓர் அரசியல் கட்சியாகும். இந்திய அரசாங்கம் இவர்களுடன் பேசியது போன்று இலங்கை அரசாங்கம் இந்திய பிரவினைவாதிகளுடன் பேச்சுவார்த்தைகளை நடத்தினால் இந்தியாவின் உணர்வுகள் எவ்விதம் இருக்கும் என்பதை புரிந்து கொண்டு, இந்திய தலைவர்கள் இலங்கை தமிழர்கள் விடயத்தில் சமரச தீர்வு ஒன்றை ஏற்படுத்த வேண்டுமானால் இலங்கை அரசாங்கத்துடன் மாத்திரமே பேச்சுவார்த்தைகளை நடத்த வேண்டும் என்றும் கூறியுள்ளார்.

தமிழ்க் கட்சிகள் வடமாகாணத்திற்கு பொலிஸ் அதிகாரத்தை கோருவதும் தவறு என்று தெரிவித்திருக்கும் இவர், இலங்கை தமிழர்கள் பிரச்சினைக்கு சுமுகமான தீர்வு ஒன்றை ஏற்படுத்த வேண்டுமாயின் தமிழ்த் தேசிய கூட்டமைப்பினர் யதார்த்த பூர்வமாக இந்த பிரச்சினையை அணுக வேண்டும் என்று நியூ இந்தியன் எக்ஸ்பிரஸ் பத்திரிகைக்கு அளித்த பேட்டியில் குறிப்பிட்டுள்ளார். இலங்கையின் தமிழ் மக்களின் பிரச்சினையை தீர்க்க உதவி செய்யும் அதேவேளையில் இலங்கையின் இறைமையை இந்தியா மதித்து நடக்க வேண்டும் என்றும் அவர் கூறினார்.

இதே வேளையில் உயர்கல்வி அமைச்சர் எஸ்.பி.திஸாநாயக்க பசறையில் நடந்த ஊவா மாகாண தேர்தல் பிரச்சார கூட்டத்தில் உரையாற்றுகையில் வடமாகாணத்திற்கு காணி, பொலிஸ் அதிகாரங்களை வழங்க முடியாது என்று திட்டவட்டமாக அறிவித்துள்ளார். வடமாகாண சபை இந்த அதிகாரங்களை கோரி இருக்கும் நிலையில் அவற்றை அரசாங்கம் வழங்கினால் மற்றுமொரு ஆயுதப் போராட்டம் ஏற்படும் என்றும், அது புலிகள் மீள அணிசேர ஓர் அரிய வாய்ப்பாக அமையும் என்றும் கூறியுள்ளார்.

எதற்கெடுத்தாலும் எதிர்மாறான கருத்துக்களை தெரிவித்து குட்டையை குழப்புவதில் ஆர்வம் செலுத்தும் மங்கள சமரவீர தனது அரசியல் வாழ்க்கை அணைந்து விடுவதை தவிர்க்கும் முகமாக இன்று ஐக்கிய தேசிய கட்சியில் சேர்ந்து அக்கட்சிக்கு அனாவசியமான பிரச்சினைகளை ஏற்படுத்தி வருகிறார்.

இவர் இந்திய பிரதம மந்திரி மோடியுடன் தமிழ் தேசிய கூட்டமைப்பினர் சந்தித்ததில் எவ்வித தவறுமில்லை. அது ஒரு நியாயமான நடவடிக்கை என்று வரவேற்றுள்ளார். இதேவேளையில் யாழ். மாவட்டத்தின் கட்டளைத் தளபதி மேஜர் ஜெனரல் உதய பெரேரா யாழ்ப்பாணத்தில் குழப்பத்தை உருவாக்கி தங்களின் செல்வந்த வாழ்வை தக்க வைத்துக் கொள்ள வெளிநாடுகளில் சுகபோகமாக வாழ்ந்து கொண்டிருக்கும் புலம்பெயர்ந்த தமிழர்கள் முயற்சி செய்கிறார்கள் என்று தெரிவித்துள்ளார்.

கொழும்பில் நடைபெற்ற பாதுகாப்பு தொடர்பான மகாநாட்டில் கலந்துகொள்வதற்கு வந்திருந்த அவுஸ்திரேலியா, கானா, சம்பியா, நெதர்லாந்து ஆகிய நாடுகள் உள்ளிட்ட 11 நாடுகளைச் சேர்ந்த இராணுவ அதிகாரிகள் யாழ்ப்பாணத்திற்கு சென்றிருந்த போது அவர்களுக்கு இது குறித்து மேஜர் ஜெனரல் உதய பெரேரா விளக்கமளித்துள்ளார். வெளிநாடுகளில் உள்ள புலம்பெயர்ந்த தமிழர்கள் உள்ளூர் தீவிர அரசியல்வாதிகளுக்கு பெருந்தொகையை பணத்தை அனுப்பி வைத்து யாழ்ப்பாணத்தில் அமைதியின்மையை ஏற்படுத்தும் நோக்கத்துடன் செயற்பட்டு வருகிறார்கள் என்றும் அவர் மேலும் தெரிவித்துள்ளார்.

இதேவேளையில் அரசாங்க கட்சியும் தமிழர் பிரச்சினையை தீர்த்து வைப்பதற்காக இப்போது புரிந்துணர்வுடன் செயற்பட ஆரம்பித்துள்ளது. இதுவரை காலமும் தமிழ்த் தேசியக் கூட்டமைப்புடன் இருதரப்புப் பேச்சுவார்த்தைகளை நடத்த முடியாது, அவர்கள் பாராளுமன்ற தெரிவுக்குழு கூட்டத்திற்கு வந்து எல்லாக் கட்சிகளுடனும் மனம் விட்டு பேச வேண்டும் என்று தெரிவித்த அரசாங்கக் கட்சியின் நிலைப்பாட்டில் இப்போது ஒரு சிறிய மாற்றம் ஏற்பட்டுள்ளது.

பாராளுமன்ற தெரிவுக்குழுவுக்கு வருவதற்கு முன்னர் அரசாங்கத்துடன் இருதரப்பு பேச்சுவார்த்தைகளை நடத்துவது தொடர்பாக தமிழ்த் தேசிய கூட்டமைப்பு உத்தியோகபூர்வமான கோரிக்கை ஒன்றை விடுத்தால் நாம் அதனை பரிசீலிக்கத் தயாராக இருக்கிறோம். கூட்டமைப்புடன் இருதரப்பு பேச்சுவார்த்தைகள் நடத்த முடியாது என்ற நிலைப்பாட்டில் அரசாங்கம் இல்லை என்று ஐக்கிய மக்கள் சுதந்திர முன்னணியின் பொதுச் செயலாளரும், அமைச்சருமான சுசில் பிரேமஜயந்த தெரிவித்துள்ளார்.

ஒரு கோரிக்கை சட்டபூர்வமாக கிடைக்காது என்பதை நன்கு தெரிந்திருந்தும் வேண்டும் என்றே கச்சத்தீவை நாம் மீட்டெடுப்போம் என்ற தொனிப் பொருளில் பிரசாரம் செய்து அரசியல் இலாபத்தை பெறுவதற்கு தமிழ் நாட்டின் முதலமைச்சர் ஜெயலலிதா செய்யும் திருகுதாளத்துக்கு இந்தியாவின் சட்டமா அதிபர் முகுல் ரோகாட்ஜி ஜெயலலிதாவுக்கு ஒரு தக்க பதிலை அளித்துள்ளார்.

1974ம் ஆண்டில் இலங்கையும் இந்தியாவும் செய்து கொண்ட இணக்கப்பாட்டு ஒப்பந்தத்தின் கீழ் கச்சத்தீவின் உரிமை இலங்கைக்கு வழங்கப்பட்டது. சட்டபூர்வமாக அதனை இந்தியா திரும்பப் பெற முடியாது. அப்படி செய்வதாயின் நாம் இலங்கையுடன் யுத்தத்தில் ஈடுபட வேண்டி இருக்கும் என்று இவ்வித கோமாளித்தனமான கோரிக்கைகளை ஜெயலலிதா அரசியல் இலாபத்துக்காக பகிரங்கமாக விடுப்பது தவறு என்று கூறியுள்ளார்.

எஸ். தில்லைநாதன்