இலங்கை 2010ம் ஆண்டில்

34 வருடங்களின் பின் 8 வீத பொருளாதார வளர்ச்சி

இலங்கை 2010ம் ஆண்டில் 8 சதவீத பொருளாதார வளர்ச்சியை அடைந்துள்ளதாக இலங்கை மத்திய வங்கி நேற்று உத்தியோகபூர்வமாக அறிவித்தது. இவ்வாறான பொருளாதார வளர்ச்சியை இலங்கை 34 வருடங்களின் பின்னர் அடைந்திருப்பதாகக் குறிப்பிட்ட இலங்கை மத்திய வங்கி ஆளுநர் அஜிட் நிவார்ட் கப்ரால், இந்த நாடு சுதந்திரமடைந்த பின்னர் இரண்டாவது தடவையாகப் பெற்றிருக்கும் உயர் பொருளாதார வளர்ச்சி இது என்றும் குறிப்பிட்டார்.

இலங்கை மத்திய வங்கியின் 61வது வருட அறிக்கை ஜனாதிபதி மஹிந்த ராஜபக்ஷ அவர்கள் தலைமையில் இலங்கை மத்திய வங்கியின் கேட்போர் கூடத்தில் நேற்று வெளியிடப்ப ட்டது. இவ்வைபவத்தின் போதே மத்திய வங்கி ஆளுநர் கப்ரால் மேற்படி தகவல்களைத் தெரிவித்தார்.

2010 ஆண்டுக்கான இலங்கை மத்திய வங்கி அறிக்கைப்படி பொருளாதாரம் 8 சதவீதம் வளர்ச்சி அடைந்துள்ளது. விவசாயத்துறை 7 சதவீதமாகவும் கைத்தொழில் துறை 8.4 சதவீதமாகவும் சேவைகள் துறை 8 சதவீதமாகவும் வளர்ச்சி அடைந்துள்ளது.

இலங்கையில் 1977ம் ஆண்டில் தான் முதன் முறையாக திறந்த பொருளாதாரக் கொள்கை அறிமுகப்படுத்தப்பட்டது. இக்கொள்கை அறிமுகப்படுத்தப்பட்ட பின்னர் உச்ச பொருளாதார வளர்ச்சியை கடந்த வருடமே இந்நாடு அடைந்துள்ளது என்று மத்திய வங்கியின் பொருளாதார ஆராய்ச்சி பிரிவின் பதில் பணிப்பாளர் சுவர்ணா குணரட்ன குறிப்பிட்டார்.

திறந்த பொருளாதார கொள்கை நடைமுறையில் இருக்கும் சூழலில் எமது பொருளாதாரம் 8 சதவீத வளர்ச்சி அடைவதற்கு மஹிந்த சிந்தனை தேசிய வேலைத் திட்டமே மூல காரணி என்றும் அவர் கூறினார்.

மேலும் 2010ம் ஆண்டுக்கான மத்திய வங்கி அறிக்கைபடி 2009ம் ஆண்டில் 5.8 சதவீதமாகக் காணப்பட்ட வேலை இன்மை 2010ம் ஆண்டு முடிவுறும் போது 4.9 சதவீதம் வரை வீழ்ச்சி அடைந்துள்ளது.

பயங்கரவாதம் முழுமையாக ஒழிக்கப்பட்ட பின்னர் முதலீடுகள் அதிகரித்ததோடு புதிய வேலைவாய்ப்புகள் வடக்கு, கிழக்கு உட்பட நாடெங்கிலும் உருவாகின. இதன் பயனாகவே வேலை இன்மை வீழ்ச்சி அடைந்ததாகவும் பதில் பணிப்பாளர் சுவர்ணா குணரட்ன கூறினார். இந்த அறிக்கையின்படி, 2009 ஆம் ஆண்டில் 2057 அமெரிக்க டொலர்களாகக் காணப்பட்ட தனிநபர் தலா வருமானம் 2010ம் ஆண்டு முடிவுறும் போது 2399 அமெரிக்க டொலர்கள் வரை அதிகரித்துள்ளது.

இலங்கையரின் தலா வருமானத்தை 2016ம் ஆண்டாகும் போது 4000 அமெரிக்க டொலர்கள் வரை அதிகரிப்பதென்று மஹிந்த சிந்தனை தொலைநோக்கு வேலைத் திட்டத்தில் அறிவிக்கப்பட்டிருக் கின்றது. அதற்கேற்ப வேலைத் திட்டங்கள் முன்னெடுக்கப்பட்டு வருகின்றன. இதன் பயனாக 2005ம்ஆண்டு முதல் இலங்கையரின் தலா வருமானம் கட்டம், கட்டமாக அதிகரித்து வருகின்றது என்றும் அவர் கூறினார்.

2010ம் ஆண்டில் 6 இலட்சத்து 54 ஆயிரம் உல்லாசப் பயணிகள் இங்கு வருகை தந்துள்ளனர். இது உல்லாசப் பயணத்துறையில் 46 சதவீத வளர்ச்சி. அதேநேரம் பணவீக்கம் 5.9 சதவீதமாக வீழ்ச்சி அடைந்துள்ளது என்றும் அவர் குறிப்பிட்டார்.

இலங்கை மத்திய வங்கி அறிக்கைப்படி 2009ம் ஆண்டில் 9.9 சத வீதமாகக் காணப்பட்ட வரவு- செலவுத் திட்டப் பற்றாக்குறை, 2010ம்ஆண்டு முடிவுறும் போது 7.9 சத வீதம் வரை வீழ்ச்சி அடைந்துள்ளது. கட்டிட நிரமாணத்துறையில் 9.3 சதவீத வளர்ச்சி ஏற்பட்டுள்ளது.

இதேவேளை, 2009ம் ஆண்டில் 64.4 சதவீதமாகக் காணப்பட்ட தனியார் முத லீடு 2010ம்ஆண்டு முடிவுறும் போது 65.8 சத வீதம் வரை அதிகரித்துள்ளது.

இலங்கையின் வெளிநாட்டு நாணயக் கையிருப்பு 2010ம் ஆண்டு முடிவுறும் போது 6.6 பில்லியன் அமெரிக்க டொலர் களாக இருந்தது. இது 2011ம்ஆண்டு ஏப்ரல் மாதம் 10ம் திகதியாகும் போது 7.2 பில்லியன் அமெரிக்க டொலர்கள் வரை அதிகரித்துள்ளது. இலங்கை வரலாற்றில் முதல் தடவையாக வெளிநாட்டு கையிருப்பு இவ்வாறு அதிகரித்துள்ளதாகவும் பதில் பணிப்பாளர் கூறினார்.

2009ம் ஆண்டில் 24.9 சதவீதமாகக் காணப்பட்ட அரச செலவீனம் 2010ம் ஆண்டு முடிவுறும் போது 22.9 சதவீதம் வரை வீழ்ச்சி அடைந்துள்ளது. 2009ம் ஆண்டில் 6.6 சதவீதமாகக் காணப்பட்ட அரச முதலீடு 2010ம் ஆண்டில் 6.2 சதவீதமாக வீழ்ச்சி அடைந்துள்ளது.

2010ம் ஆண்டில் ஏற்றுமதி வருமானம் 17.3 சதவீதமாக அதிகரித்தது. இதற்கு பயங்கரவாதம் முழுமையாக ஒழிக்கப்பட்டு சமாதான சூழல் ஏற்படுத்தப்பட்டமை பெரிதும் உதவியது. இலங்கை துறைமுகங் களுக்கு வருகை தரும் கப்பல்களுக்குப் பாதுகாப்புக்காக மேலதிகமாக அறவிடப் பட்டுவந்த கட்டணமும் இப்போது நீக்கப்பட்டுள்ளது.

பீஐரோப்பிய ஒன்றியம் கடந்த ஓகஸ்ட் மாதம் முதல் இலங்கைக் கான வரிச்சலுகையை நீக்கியது. என்றாலும் இலங்கையின் தைத்த ஆடைகளுக்கு உலக சந்தையில் கேள்வி அதிகரித்தமையும் இலங்கையின் ஏற்றுமதி வருமானம் அதிகரிப்பதற்கு மற்றொரு காரணம் என்றும் அவர் குறிப்பிட்டார்.

இந்த அறிக்கையின் வெளியீட்டு வைபவத்தில் அமைச்சர் பசில் ராஜபக்ஷ, பிரதியமைச்சர் கீத்தாஞ்சன குணவர்தன, நிதியமைச்சு செயலாளர் கலாநிதி பி. பி. ஜயசுந்தர உட்பட முக்கியஸ்தர்கள் பலரும் கலந்து கொண்டார்கள்.