டொலரின் பெறுமதி 150 ரூபாவை எட்டும் அபாயம் 10 ஆயிரம் ரூபா நோட்டை அச்சடிக்க தயாராகிறது அரசு - ஐ.தே.க. எம்.பி. ஹர்ஷ டி சில்வா

பாரிய பொருளாதார நெருக்கடிக்குள் சிக்கியுள்ள அரசாங்கம் சர்வதேச நாணய நிதியிடமிருந்து 200 கோடி டொலர்களை கடனாகப்பெற முயற்சிகள் மேற்கொண்டு வருவதாக தெரிவித்திருக்கும் ஐக்கிய தேசியக் கட்சி ஏற்கனவே எடுக்கப்பட்ட கடனுக்கு வட்டி மட்டுமே செலுத்தப்பட்டு வரும் நிலையில் மற்றொரு கடனைப் பெறுவதன் மூலம் மேலும் நெருக்கடிக்குள் தள்ளப்படும் அபாயம் உருவாகி வருவதாகவும் சுட்டிக்காட்டப்பட்டுள்ளது.
எதிர்க்கட்சித் தலைவர் அலுவலகத்தில் நேற்று புதன்கிழமை இடம்பெற்ற செய்தியாளர் மாநாட்டில் பாராளுமன்ற உறுப்பினர் கலாநிதி ஹர்ஷ டி சில்வா மேற்கண்ட  வாறு தெரிவித்தார்.

அரசு கூறுவது போன்று நாட்டின் பொருளாதார வளர்ச்சியில் 8.8 வீதமாகக் காணப்படவில்லை. அரசு பொய் கூறுகிறது. உண்மையான  பொருளாதாரம் 6.85 சதவீதமாகவே காணப்படுவதாக தெரிவித்த ஹர்ஷடி சில்வா ஊடகவியலாளர்கள் மத்தியில் தொடர்ந்து விளக்கமளிக்கையில் கூறியதாவது; நாம் நாட்டில் ஸ்திரமற்ற பொருளாதார நிலைமை குறித்து கேள்வி எழுப்பும் போது  அரச தரப்பினர் எம்மிடம் டொலர் இல்லை எனக் கூறி வருகின்றனர். ஆம் எம்மிடம் டொலர் கிடையாது ரூபா தானிருக்கின்றது. அதன் மூலம் டொலரைத் தேடிக்கொள்வதற்கான  ஒழுங்கான திட்டம் எதுவும் அரசிடம் காணப்படவில்லை எமது உள்நாட்டு உற்பத்திகளின் ஏற்றுமதி வீதம் பெருமளவுக்கு வீழ்ச்சி கண்டுள்ளது.  10 வருடங்களுக்கு முன்னர் 38 சதவீதமாகக் காணப்பட்ட  ஏற்றுமதியின்  மூலம் கூடுதலான டொலர்களை பெற்றுக்கொள்ள முடிந்தது. இன்று அது 17 1/2 சதவீதமாக  குறைவடைந்து விட்டது.

நாம் வெளிநாட்டுச் சந்தை வாய்ப்பை படிப்படியாக இழந்து வருகின்றோம்.  வெளிநாட்டு முதலீட்டாளர்கள் கூட முதலீடு செய்ய  தயக்கம் காட்டுகின்றனர். கண்டபடி நாணய நோட்டுக்கள் அச்சிடப்பட்டு குவிக்கப்படுவதால் பணவீக்கம் அதிகரித்து வருகின்றது. 2000 ரூபா , 5 ஆயிரம் ரூபா  நாணயத் தாள்களை அச்சிட்ட அரசு அடுத்த கட்டமாக 10 ஆயிரம் ரூபா நாணயத்தாளை அச்சிடவும் தயாராகி வருகின்றது. அரசு தொடர்ந்தும் இவ்வாறு செயற்பட்டால்  அடுத்த இரண்டு மாதங்களுக்கிடையில்  டொலரின் பெறுமதி  150 ரூபாவை எட்டும் நிலை ஏற்படலாம். இந்த அரசுக்கு டொலரைப் பெற்றுக் கொள்ளும் வழிதெரியவில்லை. வெளிநாடுகளுக்கு தமது பெண்களை வேலை வாய்ப்புக்காக அனுப்புவதன் மூலம் வரக்கூடிய டொலர்களை  வைத்து நாட்டில் பொருளாதார வளர்ச்சி காணமுடியுமா? என்று கேட்க விரும்புகிறோம்.

இப்போது எந்தவொருநாடும் எமக்கு உதவிகளை வழங்குவதில்லை. கூடுதல் வட்டிக்கு கடனைத்தான் பெற்றுக் கொள்கின்றனர். சீனா உட்பட  பல்வேறு நாடுகள் வழங்கி வருவது கடனாகும். இந்தக் கடனைத் திருப்பிச் செலுத்துவதற்கு வழிதேடிக் கொள்ளப்படவில்லை. பெறப்படும் கடனுதவியால்  வருமான மீட்டும் எந்தத் துறையிலும்  முதலீடு செய்யப்படவில்லை.

அரசாங்கம் பொருளாதாரத்தை யுத்தமயமாக்கியுள்ளது. மத்திய வங்கியின் செயற்பாடுகள் கூட நம்பகத்தன்மையற்றதாகவே காணப்படுகின்றது. இந்த இராணுவ மயமாக்கல் மத்திய வங்கியிலிருந்து தான் ஆரம்பிக்கப்பட்டுள்ளது.

2012 ஆம் ஆண்டின் வரவு செலவுத்திட்டத்தில் துண்டு விழும் தொகை  6.2 சதவீதமாக இருந்தது. ஆனால் இவ்வருட இறுதிக்குள் அது 11.2 சதவீதமாக அதிகரிக்கும் அபாயம் காணப்படுவதாக திறைசேரி அறிக்கையொன்றின்மூலம் தெரியவருகின்றது.
இந்த ஆபத்திலிருந்து நாடு விடுபட வேண்டுமானால் அரசு செலவினங்களை உடனடியாகக் குறைக்க வேண்டும். அல்லது வரிகள் விதிக்கப்பட வேண்டும். இந்த இரண்டில் ஒன்றை அரசு தெரிவு செய்ய வேண்டும். முதலாவதாக செலவீனத்தை அரசு குறைக்க போவதில்லை.  அடுத்த  6 மாத காலங்களுக்கிடையில் வரி அதிகரிப்புத்தான் இடம்பெறும். கண்களை மூடிக் கொண்டு பொருட்களின் விலைகள் அதிகரிக்கப்படும் அடுத்த பட்ஜட் சமர்ப்பிக்கப்படுவதற்கு முன்னர் கட்டம் கட்டமாக அத்தியாவசிய பொருட்கள் அனைத்தினதும் விலைகள் அதிகரிக்கப்படும் . அந்த சுமையை  சுமப்பதற்கு மக்கள் தயாராக இருக்க வேண்டும்.
இந்த நெருக்கடி நிலையில் இருந்து நாட்டை மீட்டெடுப்பதற்கு நாமனைவரும் ஒன்றுபட வேண்டும். மக்கள் ஒன்று பட்டு  ஓரணியில் திரள்வதா ? அல்லது கண்களை மூடிக்கொண்டு வாளாவிருக்கப் போகின்றனரா ? என்றும் ஹர்ஷ டி சில்வா கேள்வி எழுப்பினார்.