சட்டவிரோத கட்டடம் அமைப்பு, குப்பை கொட்டுதல்

பாரபட்சமின்றி நடவடிக்கை எடுக்க ஜனாதிபதி பணிப்பு

கரையோரப் பிரதேசத்தை மாசுபடுத்தும் வகையில் கழிவுப் பொருட்களை கொட்டுவோர் மற்றும் கரையோரப் பிரதேசங்களில் சட்ட விரோத கட்டடங்களை நிர்மாணிப்போருக்கும் எதிராக பாரபட்சமின்றி சட்ட நடவடிக்கை எடுக்குமாறு ஜனாதிபதி மஹிந்த ராஜபக்ஷ அவர்கள் பணிப்புரை வழங்கியுள்ளார். கரையோரப் பிரதேச வலயங்களின் முகாமைத்துவம் மற்றும் அபிவிருத்தி பற்றிய கலந்துரையாடல் ஒன்று நேற்று (02) அலரி மாளிகையில் ஜனாதிபதி மஹிந்த ராஜபக்ஷ அவர்களின் தலைமையில் இடம்பெற்றது. இதன்போது அவர் அதிகாரிகளுக்கு மேற்படி பணிப்புரையினை வழங்கினார். கரையோரப் பிரதேசங்களில் இடம்பெறும் சட்டவிரோத நிர்மாணங்கள் மற்றும் ஹோட்டல்கள் என்பன மூலம் கரையோரப் பிரதேசத்திற்கு பாரிய அளவிலான கழிவுப் பொருட்கள் வெளியேற்றப்படுவதால் பாரியளவில் சூழல் மாசடைவதாக கரையோரப் பாதுகாப்புத் திணைக்கள அதிகாரிகள் இதன்போது ஜனாதிபதி அவர்களின் கவனத்திற்குக் கொண்டுவந்தனர்.

இலங்கையின் மொத்த சனத் தொகையில் 24% வீதத்தினரும், காணிகளில் 25% வீதமும் கரையோரப் பிரதேசத்திற்கு சொந்தமானதாகும். கடற்றொழில் துறையில் 90% வீதமும், சுற்றுலாத் துறையில் 90% வீதமும் கரையோர வலயத்தை கேந்திரஸ்தானமாகக் கொண்டுள்ளன. 1,520 கி.மீ. நீளமான இலங்கையின் கரையோரப் பிரதேசத்தில் சுமார் 267 கி.மீ. நீளமான பிரதேசத்திற்கு கரையோர பாதுகாப்பு மதில் கட்டப்பட்டுள்ளதுடன், மேலும் 350 கி.மீ. நீளமான பிரதேசம் வள ஒதுக்கு பிரதேசங்களாக பிரகடனப்படுத்தப் பட்டுள்ளன. மேலும் மிகவும் முக்கியமான சூழல் பிரதேசங்களாக மணல், களிமண், மணல்குன்று மற்றும் களப்பு ஆகியவற்றிற்கு சுமார் 280 கி.மீ. நீளமான பிரதேசமும், மீன்பிடித் துறைமுகங்கள், நங்கூரமிடும் பிரதேசங்கள் என்பவற்றிற்காக 14 கி.மீ. நீளமான பிரதேசமும் ஒதுக்கப்பட்டுள்ளன. கரையோரப் பிரதேசத்தில் முக்கியமாக 40 கி.மீ. நீளமான பிரதேசம் சுற்றுலா பணிகளுக்காகப் பயன்படுத்தப்படுகின்றது. இதனடிப்படையில் 569 கி.மீ. நீளமான பிரதேசமே ஏனைய நடவடிக்கைகளுக்காக மீதமாக உள்ளன.

நாட்டின் அபிவிருத்தி இலக்கினை அடைவதற்கு கரையோரப் பிரதேசங்களில் காணப்படும் வளங்கள் மற்றும் சூழலியல் ரீதியில் பெறுமதி மிக்க இடங்களை சிறந்த முறையில் முகாமைத்துவம் செய்வது தொடர்பாகவும், கடலரிப்பு, கடலுக்கான நுழைவாயில்கள் இன்மை, உள்ளூர் சுற்றுலா பயணிகளுக்கு பொழுது போக்கிற்கு போதிய வசதிகள் காணப்படாமை என்பன தொடர்பாகவும் இதன்போது மேலும் கவனம் செலுத்தப்பட்டது.

இதன்போது கடற்கரைகளுக்கான நுழைவாயில்களை அமைப்பதற்கு பொருளாதார அபிவிருத்தி அமைச்சின் ஊடாக நடவடிக்கை எடுப்பதற்கு அமைச்சர் பெசில் ராஜபக்ஷ இணக்கம் தெரிவித்தார்.

மீன்பிடித் துறைமுகங்களின் அபிவிருத்தி தொடர்பான கலந்துரையாடலின்போது வடக்கு வாழ் மீனவர்கள் அதிகம் பயன்படுத்தும் பருத்தித்துறை மீன்பிடித் துறைமுகம் ஒன்றாக இருப்பதனால்அதனை அபிவிருத்தி செய்வதற்கு நடவடிக்கை எடுக்குமாறும் உரிய அதிகாரிகளுக்கு இதன்போது ஜனாதிபதி அவர்கள் பணிப்புரை வழங்கினார்.

கரையோரப் பிரதேசங்களில் சுற்றுலா கைத்தொழிலுடன் தொடர்புடையதாக வாழ்வாதாரத்தை கொண்டுள்ள மக்கள் தொடர்பாகவும் இதன்போது கவனம் செலுத்தப்பட்டது. அவர்களுக்கான வசதிகளை பெற்றுக்கொடுக்குமாறும் ஜனாதிபதி அவர்கள் உரிய அதிகாரிகளுக்கு மேலும் பணிப்புரை வழங்கினார்.

கரையோர பூங்காக்களை அமைத்தல், அதன் நெரிசல்மிக்க பிரதேசங்களை விஸ்தரித்தல், கரையோரத்தை பசுமையான பிரதேசமாக மாற்றியமைத்தல் என்பவற்றிற்குத் தேவையான கருத்திட்டங்கள் தொடர்பாகவும் ஜனாதிபதி மஹிந்த ராஜபக்ஷ அவர்கள் இதன்போது விளக்கினார்.