இலங்கையின் போர்க்குற்றம் தொடர்பான சனல்-4 ஊடகக் காணொளித் தட்டு கனடியப் பிரதமரின் ஊடகச் செயலாளரிடம் கையளிப்பு

இலங்கை அரசாங்கம் மற்றும் அதன் இராணுவச் சிப்பாய்கள் ஆகியோரின் போர்க் குற்றம் தொடர்பான சனல் - 4 ஊடகக் காணொளித் தட்டு கடந்த சனிக்கிழமையன்று கனடியப் பிரதமரின் ஊடகச் செயலாளரிடம் கையளிக்கப்பட்டது. கனடாவின் தலைநகரான ஒட்டாவாவில் கனடியப் பிரதமரின் உத்தியோகபூர்வ மாளிகையில் நடைபெற்ற ஒரு அரச வைபவம் ஒன்றில் கலந்து கொண்ட தமிழ் பிரதிநிதிகள் குழுவொன்று மேற்படி காணொளித் தட்டின் பிரதியொன்றை கனடியப் பிரதமரின் ஊடகச் செயலாளரிடம் கையளித்தது.  அதைப் பெற்றுக் கொண்ட பிரதமரின் ஊடகச் செயலாளர் அதை கனடியப் பிரதமரின் பார்வைக்கு கையளிப்பதாக உறுதியளித்தார்.

கனடாவின் பிரதமர் வருடா வருடம் இங்குள்ள பல்லின ஊடகங்களின் பிரநிதிகளையும் பிரதான ஆங்கில ஊடகங்களின் பிரதிநிதிகளையும் அழைத்து இரண்டு மணி நேர சந்திப்பை நடத்தி பின்னர் அவர்களுக்கு விருந்து வழங்கி கௌரவிப்பது வழக்கம். அந்த வகையில் கடந்த சனிக்கிழமையன்று அழைக்கப்பட்ட சுமார் நூறு ஊடகப் பிரதிநிதிகளோடு தமிழ் பிரதிநிதிகள் குழுவினரும் ஒட்டாவா சென்றிருந்தனர். அங்கு பிரதமரின் ஊடகச் செயலாளரிடம் மேற்படி காணொளித் தட்டை அவர்கள் கையளித்தனர்.

மேற்படி வைபவத்தில் கலந்து கொண்ட கனடிய ஒலிபரப்புக் கூட்டுத்தாபனத்தின் (சிபிசி) கனடிய பாராளுமன்ற பிரிவின் சிரேஸ்ட ஊடகவியலாளர் திரு ரெரி மைலிவ்க்சி (Terry Milewski) அவர்களைச் சந்தித்த மேற்படி தமிழ் பிரதிநிதிகள் குழு அவரிடம் மேற்படி சனல்-4 போர்க்குற்றம் தொடர்பான விபரங்களைக் கூறியபோது அவரும் தனக்கு தமிழ் கனடியத் தமிழ் மக்கள் சிலரிடமிருந்து மின்னஞ்சல்கள் வந்ததாகவும், ஆனால் மேற்படி காணொளி பிரதி இதுவரை தனக்கு கிடைக்கவில்லை என்றும், அதைப் பெற்று தான் பார்க்க விரும்புவதாகவும் தெரிவித்தார். இதைக்கேட்ட தமிழ்ப் பிரதிநிதிகள் மிக விரைவில் ஒரு பிரதியை அனுப்பி வைப்பதாகவும் உறுதியளித்தனர்.

மேற்படி அரச வைபவத்தில் கடனாவில் இயங்கிவரும் பல்லின ஊடக நிறுவனங்களின் பல பிரதிநிதிகள் கலந்த கொண்டனர். அவர்களில் பலர் தாங்களும் சனல்-4 போர்க்குற்றம் தொடர்பான பல செய்திகளை தங்கள் ஊடகங்களில் பிரசுரித்தும்  வெளியிட்டும் தங்கள் இன மக்களுக்கு அறியத் தந்துள்ளதாகவும் தெரிவித்தனர்.