யாழ். மாவட்ட குடிநீர் பிரச்சினையை தீர்க்க வலையமைப்பு நீர்வழங்கல் சேவை

இரணைமடுக் குளத்து நீருக்கான மாற்று திட்டம் யாழ் கடல் நீரேரிகளை நன்னீரேரிகளாக மாற்ற யோசனை

யாழ். மாவட்ட குடிநீர் பிரச்சினைக்கு தீர்வு காணும் வகையில் விரைவில் நீர்வழங்கல் வலையமைப்பு சேவையொன்று நிறுவப்படுமென நீர்வழங்கல் மற்றும் வடிகாலமைப்பு அமைச்சின் செயலாளர் நிஹால் சோமவீர தெரிவித்தார். யாழ்ப்பாணம், கிளிநொச்சி மாவட்டங்களுக்கான நீர்வழங்கல் மற்றும் கழிவகற்றல் திட்டம் தொடர்பாக பல்வேறு கருத்துகளையும் உள்வாங்கும் வகையில் துறைசார் நிபுணர்களுடனான கலந்துரையாடல் நீர்வழங்கல் மற்றும் வடிகாலமைப்பு அமைச்சின் ஏற்பாட்டில் அனர்த்த முகாமைத்துவ அமைச்சின் கேட்போர் கூடத்தில் ஒழுங்கு செய்யப்பட்டிருந்தது.

இந்த கலந்துரையாடலில் யாழ். மாவட்டத்துக்கு இரணைமடுக்குளத்திலிருந்து நீரை பெற்றுக்கொள்வதற்கான மாற்றுத் திட்டமாக யாழ்ப்பாணத்துக்கான ஆற்று நீர்த் திட்டத்தினை முன்னாள் நீர்ப்பாசன பொறியியலாளர் ஆறுமுகம் திருமுகம் விக்னராஜா முன்வைத்தார். யாழ். குடாநாட்டிலுள்ள கடல் நீரேரிகளை நன்னீரேரிகளாக மாற்றுவதன் மூலம் நீர்ப்பிரச்சினைக்கு தீர்வு காண்பதே இந்த திட்டத்தின் பிரதான நோக்கமாகும்.

கலந்துரையாடலில் பங்குபற்றிய ஏனைய தொழில்சார் நிபுணர்கள். யாழ்ப்பாணத்துக்கான ஆற்று நீர்த்திட்டத்திலுள்ள சாதக, பாதக நிலைமைகளை ஆராய்ந்ததுடன், இதனை நடைமுறைப்படுத்த எடுக்கும் காலம், ஒப்பீட்டளவில் செலவீனம் உள்ளிட்ட பல்வேறு விடயங்கள் தொடர்பிலும் தமது தனிப்பட்ட கருத்துகளை முன்வைத்தனர்.

இக்கலந்துரையாடலில் அமைச்சர்களான தினேஷ் குணவர்தன, டக்ளஸ் தேவானந்தா, தமிழ் தேசியக் கூட்டமைப்பின் தலைவர் இரா. சம்பந்தன், பாராளுமன்ற உறுப்பினர்களான சுரேஷ் பிரேமச்சந்திரன், எம்.ஏ. சுமந்திரன், சி. சிறிதரன், ஐ.தே.க. பாராளுமன்ற உறுப்பினர் விஜயகலா மகேஸ்வரன், ஈ.பி.டீ.பி. பாராளுமன்ற உறுப்பினர் சந்திரகுமார், வட மாகாணசபை எதிர்க்கட்சித் தலைவர் தவராசா, யாழ். மாநகர முதல்வர் திருமதி யோகேஸ்வரி பற்குணராசா, நீர்ப்பாசனத் திணைக்களத் தலைவர் பிரேமசிறி, யாழ்.மாவட்ட அரசாங்க அதிபர் சுந்தரம் அருமைநாயகம், கிளிநொச்சி மாவட்ட் அரசாங்க அதிபர் ரூபவதி கேதீஸ்வரன், அமைச்சினது பிரதிநிதிகளும் உயரதிகாரிகளும் துறைசார் நிபுணர்களும் பங்கேற்றிருந்தனர்.

இந்நிகழ்வில் இரணைமடுத்திட்டம் தொடர்பாக யாழ். பல்கலைக்கழக சிவில் பொறியியல் பீடத் தலைவர் கலாநிதி சிவகுமார், ஜெய்க்கா நிறுவனத்தின் கிளிநொச்சி நீர் வழங்கல் திட்டங்களுக்கான ஆசிய அபிவிருத்தி வங்கியின் பிரதிப் பொது முகாமையாளர் திலின விஜயதுங்க, நீர்ப்பாசனத் திணைக்கள ஆலோசகர் தயாரத்ன ஆகியோர் யாழ். மாவட்ட நீர் தேவையை நிறைவேற்றக் கூடிய வகையிலான தமது தனிப்பட்ட ஆய்வுகளை முன்வைத்திருந்தனர்.

தமிழ்த்தேசியக் கூட்டமைப்பைச் சேர்ந்த பாராளுமன்ற உறுப்பினர்களான சுரேஷ் பிரேமச்சந்திரன், எம்.ஏ. சுமந்திரன், சி. சிறிதரன் ஆகியோர் யாழ்ப்பாணத்துக்கான ஆற்று நீர் திட்டத்திற்கு ஆதரவு தெரிவித்திருந்த அதேவேளை, குடிநீர் பிரச்சினைக்கான உடனடி தீர்வாக இத் திட்டத்தினை முழுமையாக ஏற்றுக்கொள்ள முடியாதென ஈ.பி.டீ.பி.யின் பாராளுமன்ற உறுப்பினர் முருகேசு சந்திரகுமார் தெரிவித்தார். கலந்துரையாடலில் பங்குபற்றிய அனைவரது கருத்துக்களையும் உள்வாங்கியதாகவும் விரைவில் யாழ்ப்பாணத்திற்கான நீர்வழங்கல் வலையமைப்பு சேவையொன்று நிறுவப் படுமெனவும் அமைச்சின் செயலாளர் கூறி னார்.