வெனிசுலா

நனவாகும் “அனைவருக்கும் வீடு” திட்டம்

நாட்டில் பெரும்பாலான மக்களுக்கு குடியிருக்க வீடில்லாத நிலையில், ஹியூகோ சாவேஸ் தலைமையிலான வெனிசுலா அரசு அனைவருக்கும் வீடு என்ற திட்டத்தை அறிமுகப்படுத்தியது. முதல் கட்டமாக மிகவும் தேவையுள்ளவர்களுக்கு இந்தத்திட்டத்தை நடைமுறைப்படுத்த முடிவு செய்தனர். அவர்கள் வீடு கோரி பதிவு செய்யவும் வாய்ப்பு தரப்பட்டது. லட்சக்கணக்கானோர் நாடு முழுவதும் பதிவு செய்தனர். தற்போது அவர்களின் தேவையை சரிபார்த்து, தற்போதுள்ள வாழ்நிலையை ஆய்வு செய்யும் பணி துவங்குகிறது. ஒவ்வொரு பகுதியாக அந்தப் பணியைச் செய்யும் திட்டத்துடன், ஐந்து மாகாணங்களில் அந்தப் பணியை முதலில் துவக்குகிறார்கள்.

இந்தத்திட்டத்தில் எவ்வாறு பங்கேற்க வேண்டும் என்பதை மக்களுக்கு எடுத்துச் சொல்லவும் திட்டமிட்டிருக்கிறார்கள். இதை நடைமுறைப்படுத்த 2 ஆயிரம் குழுக்கள் தயாராகியுள்ளன. ஒவ்வொரு குழுவிலும் நான்கு பேர் இடம் பெற்றிருக்கின்றனர். இதில் ஒருவர் செயற்கைக் கோள் உதவியுடன் இயங்கும் ஜிபிஎஸ் தொழில்நுட்பக் கருவியை இயக்குவார். மற்ற மூவரும் மக்களின் நிலைமையை ஆய்வு செய்து தகவல்களைத் தருவார்கள். “இதன்படி, 8 ஆயிரம் தன்னார்வத் தொண்டர்கள், வீடு கோரிப் பதிவு செய்துள்ள 12 லட்சத்து 50 ஆயிரம் பேரை சந்திக்கப்போகிறார்கள்” என்கிறார் வெனிசுலாவின் அறிவியல் மற்றும் தொழில்நுட்பத்துறை அமைச்சர் ரிக்கார்டோ மெனென்டிஸ்.

பயனாளிகளின் குடும்பத்தலைவர் குறித்த விபரங்கள், குடும்பத்தினரின் எண்ணிக்கை, அவர்களின் தற்போதைய வாழ்நிலை மற்றும் புகைப்படங்கள் ஆகியவற்றை செயற்கைக்கோள் மூலம் இயங்கும் ஜிபிஎஸ் தொழில்நுட்பக்கருவி மூலமாகப் ஒரு தொண்டர் பதிவு செய்து கொள்வார். அவர்களின் தற்போதைய குடியிருப்பு இருக்கும் பகுதியையும் பதிவு செய்து கொள்ள செயற்கைக்கோள் தொழில்நுட்பம் உதவுகிறது. இந்தக்குழுவின் பணி இதோடு நிறைவு பெற்று விடாது. அவர்களை ஒரு அமைப்பு ரீதியாகத் திரட்டும் வேலையும் உள்ளது. “இதுதான் அவர்கள் செய்யப்போகும் முக்கியமான பணி. இந்தத்திட்டத்தை முன்னெடுத்துச் செல்லப்போவதே மக்கள்தான். அதேவேளையில் புரட்சிகரமாக அரசின் தொழில்நுட்பம் மற்றும் சமூக-அரசியல் உதவி அவர்களுக்கு பெருமளவில் துணை நிற்கும்” என்கிறார் வெனிசுலாவின் வீட்டுவசதித்துறை அமைச்சர் ரிக்கார்டோ மோலினா.

இந்தக்குழுக்களின் பணி காலை எட்டு மணிக்குத் துவங்கி மாலை நான்கு வரை நீடிக்கிறது. வார இறுதி மற்றும் விடுமுறை நாட்களிலும் இதே நேரத்தில் குழுக்களின் பணி நீடிக்கும். வார நாட்களில் சந்திக்க முடியாதவர்களை இந்த நாட்களில் சந்தித்துக் கொள்ளலாம் என்பதுதான் திட்டம். தங்கள் பணி குறித்து முதல் கட்டத்திலிருந்து பங்கேற்று வரும் மார்லெனிஸ் கொன்சால்வஸ் என்கிற தன்னார்வத் தொண்டர் கூறுகையில், இது மிகவும் கடினமான பணியாகும். ஆனால் அரசின் திட்டத்தின் மீது நான் நம்பிக்கை வைத்துள்ளேன். இந்தப் பதிவு மற்றும்சரி செய்யும் பணி ஆகிய இரண்டும் திட்டத்தின் வெற்றிக்கு மிகவும் முக்கியமானதாகும். யாருக்கு வீடு மிகவும் தேவையாக உள்ளது என்பதையும் நாம்உறுதி செய்து கொள்ள முடியும் என்கிறார்.

தலைநகர் காரகாஸ்அமைந்துள்ள மாகாணம், ஃபால்கான், மிராண்டா, வர்காஸ் மற்றும் ஜுலியா ஆகிய ஐந்து மாகாணங்களிலும் இந்த இரண்டாம் கட்டப் பணி நடைபெறுகிறது. இந்தப்பணி நிறைவு பெற இரண்டு மாதகாலம் ஆகும் என்று எதிர்பார்க்கப்படுகிறது.

வீடில்லாதவர்கள் என்று மட்டுமல்ல, மோசமான வாழ்நிலையில் இருக்கக்கூடியவர்கள் தங்கள் இருப்பிடங்களைப் புனரமைத்துக் கொள்ளவும் இந்தத்திட்டம் உதவி செய்யும். மிகவும் சிறிய வீடுகளில் வாழ்ந்து கொண்டிருப்பவர்கள் புதிதாக ஓரிரு அறைகளைக் கட்டிக் கொள்ளலாம் என்கிறார் மோலினா.  அரசின் இந்தத் திட்டத்தைகுதூகலமாக வரவேற்கிறார் ஓஸ்வால்டோ கலண்ட்ரா. என்னுடைய பொருளாதார நிலையில், அரசின் உதவியில்லாமல் வீட்டைப் புதுப்பிக்க வேண்டுமென்றால், உணவைத் தியாகம் செய்ய வேண்டியிருந்தது என்கிறார்.

எல்லாமே முதன்முறைதான்...மக்களுக்கான நலத்திட்டங்களில் கிட்டத்தட்ட அனைத்துமே முதன் முறையாகவே அமலாகின்றன. சாவேஸ் ஜனாதிபதியாகப் பொறுப்பேற்பதற்கு முன்பாக, நாட்டின் எண்ணெய் வளம் மூலமாகக் கிடைக்கும் வருமானத்திற்கும், சுமார் 90 விழுக்காடு மக்களுக்கும் தொடர்பில்லாத நிலையே இருந்தது. பெரும் நிறுவனங்கள் எண்ணெய் வளத்தைச் சுரண்டுவதில் அதிக கவனம் செலுத்தின. அவர்களிடம் லஞ்சம் பெறுவதில் மும்முரமாக இருந்த ஆட்சியாளர்கள், மக்களின் துயரங்களைப் பற்றிக் கவலைப்படவில்லை. சாவேஸ் ஆட்சிக்கு வந்தபிறகுதான் பிரதான துறைகள் அனைத்தும் நாட்டு டைமையாக்கப்பட்டு, அதிலிருந்து வரும் வருமானம் கல்வி, சுகாதாரம், விவ சாயம், வீட்டுவசதி உள்ளிட்ட பல்வேறு துறைகளுக்கு பயன்படுத்தப்படுகிறது.