நாட்டைவிட்டு வெளியேற

கிளர்ச்சியாளர்கள் கடாபிக்கு 72 மணிநேர கெடு

முஅம்மர் கடாபி மேலும் 72 மணி நேரத்திற்குள் நாட்டைவிட்டு வெளியேறினால் தாக்குதலை நிறுத்துவதாக கிளர்ச்சியாளர்கள் நேற்று அறிவித்துள்ளனர். இதன்படி முஅம்மர் கடாபி தமது பதவியை உடனடியாக ராஜினாமா செய்து மேலும் 72 மணித்தியாலத்திற்குள் நாட்டைவிட்டு வெளியேறினால் தாக்குதலை நிறுத்திக்கொள்வதோடு, கடாபி மீது எந்த நடவடிக்கையையும் எடுக்கப்பட மாட்டாது என கிளர்ச்சியாளர்களின் தேசிய கெளன்ஸில் தெரிவித்துள்ளது. இந்த அறிவிப்பு அல் ஜீரா தொலைக்காட்சி சேவையில் ஒளிபரப்பப்பட்டது.

இது குறித்து எதிர்ப்பாளர்களின் தேசிய கெளன்ஸில் தலைவர் முஸ்தபா அப்தெல் ஜலீல், அல்- ஜீராவுக்கு அளித்த பேட்டியில் எமது நாட்டின் மீது நாம் அன்பு கொண்டுள்ளோம். இதனாலேயே இந்த முடிவை எடுத்துள்ளோம். இதன்படி கடாபி ஆதரவுப்படை முதலில் தமது தாக்குதல்கள் அனைத்தையும் நிறுத்த வேண்டும்.

இரண்டாவது மேலும் 72 மணி நேரத்திற்குள் கடாபி நாட்டை விட்டு வெளியேற வேண்டும். மூன்றாவது எமக்கு அரச நிர்வாகம் ஒன்றை அமைக்க வழிவிட வேண்டும். இந்தக் கோரிக்கைகளுக்கு கடாபி ஆதரவுப்படை எவ்வாறு பதில் அளிக்கப்போகின்றது என்று நாம் பொறுத்திருந்து பார்ப்போம்.

எனினும் இந்த 72 மணி நேர கால அபகாசம் எக்காரணத்திற்காகவும் நீடிக்கப்படமாட்டாது என்றார்.

எனினும் லிபிய அரச தொலைக்காட்சி, கடாபி கிளர்ச்சியாளர்களுடன் பேச்சுவார்த்தை நடத்தியதாகக் கூறப்படும் தகவலை முற்றாக மறுத்தது. இது குறித்து லிபிய வெளியுறவு அமைச்சர் கூறும் போது, இந்த செய்தி உண்மையிலே முட்டாள்தனமானது என்றார்.

எவ்வாறாயினும் கடந்த ஞாயிற்று க்கிழமை இரவு பெங்காசி நகருக்கு கடாபி தூதுக்குழு சென்றதாகவும் அவர்கள் கிளர்ச்சியாளர்களுடன் பேச்சுவார்த்தை நடத்தியதாகவும் அல்ஜkரா செய்தி வெளியிட்டுள்ளமை குறிப்பிடத்தக்கது.

இதனிடையே லிபியாவில் தொடர்ந்து போராட்டங்கள் தீவிரமடைந்துள்ளன. எண்ணெய் நகரமான ராஸ்லனூபாவை கைப்பற்ற கடாபி ஆதரவுப் படை நேற்று முன் தினமும் தொடர்ச்சியாக வான்வழி தாக்குதலை நடத்தியது. இதில் பலர் கொல்லப்பட்டதோடு, பலருக்கு காயம் ஏற்பட்டது.

லிபியாவில் இதுவரை இடம்பெற்ற மோதல்களால் 1000க்கும் மேற்பட்டோர் கொல்லப்பட்டுள்ளனர். பல்லாயிரக்கணக்கானோர் காயமடைந்துள்ளனர். 2 இலட்சத்திற்கும் அதிகமானோர் அண்டய நாடுகளுக்கு இடம்பெயர்ந்துள்ளனர்.

இதனிடையே பிரிட்டன் மற்றும் பிரான்ஸ் நாடுகள் லிபியா மீது போர் விமானங்கள் பறக்கத் தடை செய்யத் தீர்மானம் ஒன்றை தயாரித்துள்ளன. இத்தீர்மானம் இன்று ஐ. நா. வில் விவாதத்திற்கு வரும் எனத் தெரிகிறது.

அமெரிக்க எம். பி. க்கள் சிலர் லிபியாவில் அமெரிக்க இராணுவம் நேரடியாகத் தலையிட வேண்டும் என்றும் வலியுறுத்தி வருகின்றனர். ஆனால் அது சாத்தியமில்லை என்று அமெரிக்க பாதுகாப்புத்துறை அமைச்சர் ரொபர்ட் கேட்ஸ் திட்டவட்டமாகத் தெரிவித்துவிட்டார்.

லிபியாவின் மீதான இராணுவ நடவடிக்கை அல்லது போர் விமானம் பறக்கத் தடை உள்ளிட்டவற்றுக்கு ரஷ்யா கடும் எதிர்ப்பு தெரிவித்துள்ளது. இந்நடவடிக்கைகள், லிபியா மீதான அந்நிய படையெடுப்புக்குச் சமம் என்றும் அது கருதுகிறது. ஐ. நா. பாதுகாப்பு கவுன்சிலில் ரஷ்யாவுக்கு ‘வீட்டோ’ அதிகாரம் உள்ளதால் இதுபோன்ற தீர்மானங்களை நிறைவேற்றவிடாமல் அதனால் தடுத்து விட முடியும் என்பது குறிப்பிடத்தக்கது. ஐ. நா. வைத் தொடர்ந்து ஜப்பானும், தன் நாட்டில் உள்ள கடாபி சொத்துக்களை முடக்கி, லிபியா மீது பொருளாதாரத் தடைகளை விதித்துள்ளது.

இதேவேளை லிபிய வான்வெளி மீதான 24 மணி நேர வான்வெளி எச்சரிக்கை மற்றும் கட்டுப்பாடு (அவாக்ஸ்) முறையை ‘நேட்டோ’ அமைப்பு அமுல்படுத்தியுள்ளது. இதன் மூலம் நேட்டோ கண்காணிப்பு விமானங்கள் லிபிய வான்வெளியில் 24 மணி நேரமும் பறக்கும் விமானங்களை அடையாளம் கண்டறியும்.

லிபிய எதிர்த்தரப்புக்கு உதவும் பல்வேறு முடிவுகளில் அவர்களுக்கு ஆயுதம் வழங்கும் திட்டம் பற்றியும் அமெரிக்கா ஆலோசித்து வருகிறது. ஆனால் அமெரிக்க வெளியுறவு செய்தித் தொடர்பாளர் பி. ஜே. க்ரவுலி இதுபற்றிக் கூறுகையில், ‘அது ஐ. நா. பாதுகாப்பு கவுன்சில் லிபியா மீது விதித்துள்ள ஆயுதப் பரிமாற்றத் தடைக்கு எதிரானது என்று கூறியுள்ளார்.

அமெரிக்க வெள்ளை மாளிகை செய்தித் தொடர்பாளர் ஜே. கார்னே வெளியிட்ட அறிக்கையில், ‘கடாபி ஆதரவாளர்கள் அவரை விட்டு விலகி விட வேண்டும். அவ்வாறு செய்யவில்லை என்றால் அதற்கான விளைவுகளை எதிர்கொள்ள நேரிடும்’ என்று எச்சரித்துள்ளார்.

அத்துடன் கிழக்கு லிபியாவில் செயல்பட்டு வந்த எண்ணெய் சுத்திகரிப்பு நிறுவனங்கள் இழுத்து மூடப்பட்டதால், பெங்காசி உள்ளிட்ட பகுதிகளில் விரைவில் பெட்ரோலுக்கு கடும் தட்டுப்பாடு நேரும்.

அதனால் இடைக்கால அரசு இத்தாலியில் இருந்து பெட்ரோலை இறக்குமதி செய்வது குறித்து ஆலோசித்து வருகிறது.

இதேவேளை, லிபிய ஜனாதிபதி முஅம்மர் கடாபி நேற்று மீண்டும் ஒருமுறை அரச ஊடகத்தில் தோன்றினார். இதன் போது அவர், லிபியாவில் மூக்கை நுழைக்கும் வெளிநாட்டு சக்திகளுக்கு எச்சரிக்கை விடுத்தார். அத்துடன் லிபியாவில் மோதலில் ஈடுபடுவது அல்கைதா தீவிரவாதிகள் என்றும், ஆப்கானிஸ், பாகிஸ்தான், அல்ஜீரியா, எகிப்து போன்ற நாடுகளைச் சேர்ந்த பல தீவிரவாதிகளை தமது பாதுகாப்புப் படையினர் கைது செய்துள்ளதாகவும் குறிப்பிட்டார்.

தவிர, தமது நாட்டினை எண்ணெய் வளத்தை கைப்பற்றவே அமெரிக்கா, பிரான்ஸ் போன்ற நாடுகள் முயற்சித்து வருவதாகவும் இந்த பேட்டியில் அவர் குறிப்பிட்டார்.

கிளர்ச்சியாளர்கள் 72 மணி நேர கெடுவிதித்ததை தொடர்ந்தே கடாபி தொலைக்காட்சியில் தோன்றி இதனைத் தெரிவித்தார்.