தி.மு.க - காங்கிரஸ் கூட்டில் வெளித்தெரியாத விரிசல்கள்

தமிழ்நாடு சட்ட சபைத் தேர்தல் அடுத்த வருடம் மே மாதம் நடைபெறவிருக்கின்றது. இதற்கான கூட்டணி முயற்சிகள் இப்போதே ஆரம்பமாகிவிட்டன. அனைத்திந்திய அண்ணா திராவிட முன்னேற்றக் கழகக் கூட்டணியில் முன்னர் இடம்பெற்ற கட்சிகளுள் பாட்டாளி மக்கள் கட்சி அதிலிருந்து வெளியேறிவிட்டது. டாக்டர் கிருஷ்ணசாமியின் புதிய தமிழகம் கட்சி இப்போது இக்கூட்டணியில் சேர்ந்திருக்கின்றது.

திராவிட முன்னேற்றக் கழகக் கூட்டணியில் கழகமும் காங்கிரஸ் கட்சியும் பிரதான கட்சிகளாக விளங்குகின்றன. ஏனையவை மிகச் சிறிய கட்சிகள். இவ்விரு கட்சிகளுக்குமிடையே நெருக்கமான நல்லுறவு இருப்பதாக வெளிப்பார்வைக்குத் தோன்றினாலும் வெளியே தெரியாமல் பல விரிசல்கள்.

காங்கிரஸ் கட்சி தனியாக அல்லது தனது தலைமையில் ஆட்சி அமைக்கும் இலக்குடனேயே செயற்படுகின்றது. காமராஜர் ஆட்சியை மீண்டும் அமைக்க வேண்டும் என்று காங்கிரஸ் தலைவர்கள் அடிக்கடி கூறுவது அவர்களுடைய நோக்கத்தை வெளிப்படுத்துகின்றது. காங்கிரஸ் தலைமையில் ஆட்சி அமைய வேண்டும் என்று இளங்கோவன் போன்ற தலைவர்கள் வெளிப்படையாகவே சொல்கின்றார்கள். இளங்கோவன் அத்தோடு நிற்கவில்லை. சந்தர்ப்பம் கிடைக்கும் போதெல்லாம் திராவிட முன்னேற்றக் கழகத்தை விமர்சனம் செய்கின்றார்.

தேசிய முற்போக்கு திராவிடக் கழகத்தின் தலைவர் நடிகர் விஜயகாந்த் கருணாநிதிக்கு எதிரானவர். அவரது பிறந்த நாளன்று இளங்கோவன் காலையிலேயே வீட்டுக்குச் சென்று வாழ்த்துத் தெரிவித்ததோடு தமிழ்நாட்டில் விஜயகாந்த் பெரிய தலைவராக வருவார் என்றும் கூறினார். இளங்கோவன் திட்டமிட்டுச் செய்தாரோ என்னவோ இச் செயல் நிச்சயமாகக் கருணாநிதியிடம் எரிச்சலைத் தோற்றுவித்திருக்கும்.

திராவிட முன்னேற்றக் கழகத்துக்கு அறுதிப் பெரும்பான்மை இல்லை. காங்கிரஸ் கட்சியின் தயவிலேயே அதன் ஆட்சி தங்கியிருக்கின்றது. இதைச் சாதகமாகப் பயன்படுத்திக் காங்கிரஸ் கட்சி பல தடவைகள் ஆட்சியில் பங்கு கோரியது. கருணாநிதிக்கு இது பெரிய தலையிடி. திராவிட முன்னேற்றக் கழகக் கூட்டணியில் இணைவதற்கு ஜூன் மாதத்தில் பாட்டாளி மக்கள் கட்சி முன்வந்தபோது காங்கிரஸ் தரும் தலையிடிக்கு நல்ல மருந்து என்று கலைஞர் மகிழ்ச்சி அடைந்திருப்பார். பாட்டாளி மக்கள் கட்சிக்கு இடங்கள் ஒதுக்க வேண்டும் எனக் கூறிக் காங்கிரஸ் கட்சியின் தொகுதிகளைக் குறைக்கலாம் என்றும் தேர்தலுக்குப் பின் காங்கிரஸ் கட்சி ஆட்சியில் பங்கு கேட்டால் பாட்டாளி மக்கள் கட்சியைக் காட்டித் தவிர்க்கலாம் என்றும் கலைஞர் நினைத்திருப்பார். அன்புமணி ராமதாஸுக்கு மாநிலங்களவையில் உறுப்புரிமை வேண்டும் என்பதில் பாட்டாளி மக்கள் கட்சியினருக்கு அவசரம். சட்டசபைத் தேர்தலுக்குப் பின்னர் ஏற்படும் வெற்றிடத்துக்கு நியமிக்கலாம் என்ற கலைஞரின் உறுதிமொழி அவர்களுக்குத் திருப்தி அளிக்கவில்லை. இணைவு முயற்சி இடையில் முறிந்தது.

ஆட்சியில் பங்கு என்ற கோரிக்கையைக் காங்கிரஸ் கட்சி இப்போதெல்லாம் முன்னர் போல வலியுறுத்துவதில்லை. மத்திய தலைமையின் ஆலோசனையாக இருக்கலாம். மத்தியில் ஆட்சியைக் கொண்டு நடத்துவதற்குக் கருணாநிதியின் ஆதரவு தேவை. அதனால் அவரை அனுசரித்துப் போகவேண்டும் என்று மத்திய தலைமை கருதுவதில் நியாயம் உண்டு. எனினும் தமிழ் நாட்டில் ஆட்சியதிகார நோக்கம் காங்கிரஸ் மத்திய தலைமைக்கு இல்லை எனக்கூற முடியாது. ராகுல் காந்தி பல தடவைகள் தமிழ் நாட்டுக்கு வந்து சென்றிருக்கின்றார். ஒரு தடவையாவது மரியாதைக்காகக் கருணாநிதியைச் சென்று பார்க்கவில்லை. காங்கிரஸ் மத்திய தலைமையின் மனோநிலையை இதிலிருந்து விளங்கிக்கொள்ளலாம்.

கலைஞருக்குக் காங்கிரஸ் கட்சி தொடர்பான தலையிடி ஒருபுறம். அதனிலும் கூடுதலாக இருக்கின்றது கட்சிக்குள் குடும்ப உறுப்பினர்கள் தொடர்பான தலையிடி. கனிமொழியை மத்திய அமைச்சராக்க வேண்டும் என்பது கருணாநிதியின் பிரதான விருப்பம். தனக்கு விசுவாசமான ஆங்கில அறிவுள்ள ஒருவர் மத்தியில் அமைச்சராக இருக்கவேண்டியது அவரைப் பொறுத்த வரையில் அவசியமான தேவை. முன்னர் முரசொலி மாறன் இருந்தார். பின்னர் பேரப்பிள்ளை தயாநிதி மாறன். இப்போது மாறன் சகோதரர்களை அணைத்துக்கொண்டுள்ள போதிலும் முன்னைய நம்பிக்கை இல்லை. ஒருமுறை முட்டிய எருது இனிமேல் முட்டாது என்று நம்ப அவர் தயாராக இல்லை.

விசுவாசமான குடும்ப உறுப்பினர் ஒருவர் மத்திய அமைச்சராக இருக்க வேண்டும் என்பதில் கலைஞர் உறுதியாக உள்ளார். அழகிரி இப்போது அமைச்சராக உள்ள போதிலும் அவருக்கு ஆங்கிலம் தெரியாதது ஒரு பெரிய பின்னடைவு. கனிமொழியே கலைஞரின் எதிர்பார்ப்புக்குப் பொருத்தமானவர். அழகிரி அமைச்சராக இருக்கும்போதே கனிமொழிக்கும் அமைச்சுப் பொறுப்பைப் பெறுவது நடைமுறைச் சாத்தியமானதல்ல. அழகிரியை மாநில அரசியலுக்குக் கொண்டு வருவதிலும் சிக்கல் இருக்கின்றது. ஸ்ராலினை முதலமைச்சராக்குவதற்கு அழகிரி ஒருபோதும் சம்மதிக்கப் போவதில்லை. பிரச்சினைகளை உருவாக் குவார். கலைஞரைப் பொறுத்தவரையில் இது தீர்க்க முடியாத சிக்கல்.

காங்கிரஸ் கட்சிக்கும் திராவிட முன்னேற்றக் கழகத்துக்கும் இடையிலான பனிப்போரைத் தனக் குச் சாதகமாகப் பயன்படுத்துவ தற்குப் பாட்டாளி மக்கள் கட்சித் தலைவர் டாக்டர் ராமதாஸ் முயற்சிக் கின்றார். தமிழகத்தில் காங்கிரஸ் கட்சியின் ஆட்சி வர வேண்டும் என்று அவர் அண்மை யில் விடுத்த அறிக்கை காங்கிரஸ் கட்சியின் தலைமையில் மூன்றாவது அணி உருவாக வேண்டும் என்றும் அதில் பாட்டாளி மக்கள் கட்சி இணைய வேண்டும் என்றும் அவர் விரும்புவதைப் பிரதி பலிக்கின்றது. இது இப்போதைக்கு நடக்கக் கூடியதல்ல.