18 வது திருத்த யோசனைக்கு தேசிய சுதந்திர முன்னணி ஆதரவு

எதிர்வரும் 08ம் திகதி பாராளுமன்றத்தில் கொண்டுவரவுள்ள 1978 ஆம் ஆண்டின் அரசியல் அமைப்பின் 18வது திருத்த யோசனைக்கு தேசிய சுதந்திர முன்னணி ஆதரவளிக்கின்றது என தேசிய சுதந்திர முன்னணி கட்சியின் தலைவர் விமல் வீரவன்ச தெரிவித்தார். அமைச்சர் விமல் வீரவன்ச பத்தரமுல்லையில் உள்ள கட்சி தலைமையகத்தில் நேற்று நடத்திய ஊடகவியலாளர் மாநாட்டிலேயே மேற்கண்டவாறு தெரிவித்தார்.

அங்கு அவர் தொடர்ந்து உரையாற்றுகையில் தெரிவித்ததாவது,

இந்த நாட்டில் ஜனாதிபதித் தேர்தலில் பலமுறை போட்டியிட்டு தோற்பவர் எத்தனை முறை வேண்டுமானாலும் ஜனாதிபதித் தேர்தலில் போட்டியிட முடியும். ஆனால் மக்களின் அமோக ஆதரவைப் பெற்றவர் இரண்டு முறை ஜனாதிபதியாக வந்தவர் இரண்டு முறைக்கு மேல் ஜனாதிபதியாக வருவதற்கு இந்த யாப்பில் இடமில்லை. இந்த நாட்டில் மக்களின் அமோக ஆதரவு பெற்றவர் இரண்டு முறைக்கு மேல் ஜனாதிபதியாக வருவதற்கே இந்த சட்டதிருத்தம் கொண்டுவரப்படுகின்றது. இவர் இரண்டு அல்லது மூன்று முறை ஜனாதிபதியாக வருவதை தேர்தலில் மக்கள் தீர்மானிக்கட்டும். எதிர்க்கட்சியினர், ஜனாதிபதி ஏகாதிபத்திய பதவி வகிக்க திட்டமிடுகின்றார் என்று கூறுவதை முற்றாக மறுப்பதோடு ஜனாதிபதி ஒவ்வொரு மூன்று மாதமும் பாராளுமன்றத்துக்கு சமுகமளிப்பது மிகவும் வரவேற்கக் கூடியது. இதனால் சகல பாராளுமன்ற உறுப்பினர்களும் ஜனாதிபதியிடம் தத்தமது பிரச்சினைகளைக் கூற முடியும்.

இந்த நாட்டில் முதலிட வரும் வெளிநாட்டு முதலீட்டாளர்கள் தொடர்ச்சியான பலமான அரசாங்கத்தை நம்பி முதலிட வருவார்கள். ஐ.தே.கட்சிக் காலத்தில் இந்து லங்கா ஒப்பந்தம், விடுதலைப்புலிகளோடு செய்துகொண்ட யுத்தநிறுத்த ஒப்பந்தம் 1978ம் ஆண்டு அரசியல் யாப்பு ஆகியன ஐ.தே. கட்சியில் உள்ள உறுப்பினர்களுக்கே தெரியாமல் இரவோடு இரவாக அப்போதைய ஐ.தே.கட்சி தலைவர்களால் நிறைவேற்றப்பட்டன. ஆனால் தற்போது அரசினால் மேற்கொள்ளப்படும் அரசியல் திருத்தம் கட்சித் தலைவர் கூட்டத்தில் அமைச்சர் ஜீ. எல். பீரிஸினால் சமர்ப்பிக்கப்பட்டு கட்சித் தலைவர்களால் ஆராயப்பட்டுள்ளது. இது பற்றிய நன்மை தீமைகள் கட்சித் தலைவர்களினால் தெரிவிக்கப்பட்டன. இத் திருத்தம் அமைச்சரவை கூட்டத்தில் ஆராயப்பட்டுத்தான் பாராளுமன்றத்துக்கு கொண்டு வரப்படுகின்றதென அமைச்சர் விமல் வீரவன்ச தெரிவித்தார்.