சாவு எங்களை துரத்திக்கொண்டிக்கிறது. ஆனாலும் நாங்கள் கொண்ட கொள்கையில் உறுதியோடு செயற்படுவோம்? - தமிழினத் துரோகி சிவஞானம் சிறிதரன் பேச்சு.

இலங்கையில் அரசியல் சட்ட திருத்தம் சம்பந்தமாக நாடாளுமன்றத்தில் விவாதம் வாக்கெடுப்பு நடந்து கொண்டிருக்கும் போது, அதில் கலந்து கொண்டு தமது தரப்பு கருத்துக்களைத் தெரிவிக்காமல் நழுவி வந்து நாடகம் போடுகிறார்கள். கோத்தபாயாவுக்கும் இவருக்கும் இடையில் இருக்கும் தொடர்பு என்ன? 18வது அரசியல் சட்ட திருத்தம் தொடர்பாக தமிழ்த் தேசிய கூத்தமைப்பினர் உறுதியான கருத்து எதையும் தெரிவிக்காமல் ஒருமாதிரியான நழுவல் போக்கைக் கடைப்பிடித்தது ஏன்? யாருடைய நிகழ்ச்சி நிரலுக்கு செயற்படுகின்றார்கள். இவர்களுக்கு வாக்குப் போட்ட மக்களே சிந்தியுங்கள். 

ஆறு தசாப்தங்களாக விடுதலைக்காக போராடிய இனம் இன்று நாங்கள் தோற்றுப்போய் விட்டோமா என்ற ஏக்கத்துடன் மீண்டும் எப்படி தலைநிமிர்ந்து வாழ்வது என ஏங்கிக்கொண்டிருக்கிறது. அந்த மனநிலையை மாற்றி விழுதிலிருந்து எழும் ஆலமரமாய் உயர்ந்து நிற்பதற்கு நாங்கள் முனைய வேண்டும் என யாழ் மாவட்ட நாடாளுமன்ற உறுப்பினர் சிவஞானம் சிறிதரன் ஜேர்மனியில் நடைபெற்ற உலக தமிழர் பண்பாட்டு இயக்கத்தின் அகம் புலம் தமிழர் வாழ்வியல் சிறப்பு மகாநாட்டில் சிறப்பு அதிதியாக கலந்து கொண்டு உரையாற்றுகையில் தெரிவித்தார்.

அவர் தொடர்ந்து உரையாற்றுகையில், தமிழர்களின் நிலம் இன்று அவனுக்கு சொந்தம் இல்லை என்ற நிலையை ஸ்ரீலங்கா அரசு ஏற்படுத்தியிருக்கிறது. எமது நிலம் எங்கும் வேற்று மொழி பேசும் மனிதர்களை காண்கிறோம். எங்களை வீழ்த்திவிட்டு எங்கள் எம்மீது ஏறி மிதித்துக்கொண்டு செல்லுகின்ற காட்சிகளைத்தான் நாங்கள் காண்கிறோம்.

இந்த உண்மைகளை உணர்ந்தவர்களாய் வீழ்த்தப்பட்ட மக்களை தூக்கி விடுவதற்கு உண்மைகளை யதார்த்தங்களை உணர்ந்து செயற்பட வேண்டிய கடமையில் மேற்குலக நாடுகளில் உள்ள தமிழர்கள் உள்ளனர். பொதுவான ஒரு கொள்கையின் கீழ் அனைவரும் ஒற்றுமைப்பட வேண்டும்.

நாடு இழந்து அகதிகளாய் இருந்த இஸ்ரேல் இனம் எப்படி உறுதியோடு ஒற்றுமையாக செயற்பட்டு தங்களுக்கான ஒருநாட்டை பெற்றுக்கொண்டார்களோ அதே போன்று நாங்களும் உறுதியோடு செயற்பட வேண்டும்.

ஜப்பானை அழித்த அமெரிக்காவுடன் இன்று இருதரப்பும் கைகோர்த்து இருக்கிறார்கள். எனவே இந்தியாவுடன் நாகரீகம் கருதி உலக ஒழுங்கு கருதி நாங்கள் பேசவேண்டியவர்களாக இருக்கிறோம். ஆனால் கூனி குறுகி நின்று பேச வேண்டிய அவசியம் இல்லை. உறுதியோடு தலைநிமிர்ந்து நின்று பேச வேண்டும்.

இன்று 10ஆயிரம் சிங்கள குடும்பங்களை வடமாகாணத்தில் குடியேற்ற அரசாங்கம் நடவடிக்கை எடுத்திருக்கிறது. எங்கும் வேற்றுமொழி பேசித்திரியும் வியாபாரிகளையும் உத்தியோகத்தர்களையும் படைகளையும் தான் எங்கள் நிலத்தில் இப்போது காண்கிறோம்.

எனவே எங்கள் நிலத்தில் நாங்கள் உறுதியாக தலைநிமிர்வதற்கு தயவு செய்து உதவுங்கள். யதார்த்தமான நோக்கோடு வாழ்வியல் கட்டுமானங்களை கட்டி எழுப்ப நீங்கள் உறுதியோடு செயற்பட வேண்டும்.  சாவு எங்களை துரத்திக்கொண்டிக்கிறது. ஆனாலும் நாங்கள் கொண்ட கொள்கையில் உறுதியோடு செயற்படுவோம் என நாடாளுமன்ற உறுப்பினர் சிவஞானம் சிறிதரன் தெரிவித்தார்.