கோண்டாவில் பகுதியில் தப்பியோட முற்பட்ட மர்மமனிதன் மடக்கிப்பிடிப்பு

கோண்டாவில் வடக்கு தில்லையம்பதி சிவகாமி அம்மன் ஆலயப் பகுதியில் உள்ள வீடொன்றில் பிற்பகல் வேளையில் பதுங்கியிருந்த மர்மமனிதர்கள் இருவர் வீட்டுக்காரர்கள் கண்டதைத் தொடர்ந்து தப்பியோடிய நிலையில் அந்தப் பகுதி இளைஞர்களினால் ஒருவர் மடக்கிப் பிடிக்கப்பட்டுள்ளார். சம்பவம் நடந்த இடத்திற்கு உடனடியாக இராணுவத்தினர் விரைந்து வந்து உரிய நபரைக்கொண்டு செல்ல எடுக்கப்பட்ட முயற்சி அந்தப் பகுதயில் கூடிய பொது மக்களால் தடுத்து நிறுத்தப்பட்டது. இதனையடுத்து கோண்டாவில் பகுதியில் பெரும் பதற்ற நிலை காணப்பட்டது.

அந்தப் பகுதி இளைஞர்கள் மிகவும் தந்திரமாக மர்மமனிதன் என்று கருதப்படட சந்தேக நபரை வாசிகசாலையின் அறையில் பூட்டிவிட்டு காவல் இருந்தார்கள். நேரம் செல்லச் செல்ல அதனைப் பார்வையிட வந்த பொது மக்களுக்கும் இராணுவத்தினருக்கும் இடையே வாக்கு வாதங்கள் ஏற்படத் தொடங்கியது. இந் நிலையில் குறித்த பகுதிக்கு அழைக் கப்படட மேலதிக இராணுவத்தினர் துப்பாக்கிகள், பொல்லுகளுடன் வந்து மக்களைத் தாக்க முற்பட்ட போதும் அங்கு நின்ற அதிகாரி அதனைத் தடுத்து நிறுத்தியுள்ளார்.

கோப்பாய் பொலிஸ் நிலைய உதவி பொலிஸ் அத்தியட்சர் வந்தபோதிலும் குறிப்பிட்ட மர்மமனிதனை பொலிஸாரினாலும் கொண்டு செல்ல முடியவில்லை. இதனையடுத்து மேலதிகமாக சிவில் உடையில் கோப்பாய் பொலிஸார் அழைக்கப்பட்டு நிலைமையை சீரடையச் செய்யும் நடவடிக்கை எடுக்கப்பட்ட போதிலும் கைகூடாத நிலையில் ஊரெழுவில் நிலை கொண்டுள்ள 511 ஆவது படையணியின் கட்டளை அதிகாரி மேஜர் ஜெனரல் கொஸ்தா தமது படையதிகாரிகளுடன் உரிய இடத்திற்கு வந்து குறித்த மர்ம மனிதரை பொலிஸாரிடம் ஒப்படைத்தார்.

பொலிசார் இராணுவத்தினர் கதைத்தால் மட்டும் கதைத்த மர்ம மனிதன் புகைப்படக்காரர்கள் புகைப்படம் எடுக்க முற்பட்ட வேளையில் முகத்தை சுவரோடு மறைத்து தனது முகத்தை படம் எடுக்காத வண்ணம் பாதுகாத்துக் கொண்டார்.

பொலிஸாரும் இராணுவத்தினரும் கூட இவரைப் படம் எடுக்க அனுமதிக்கவில்லையென்பதும் குறிப்பிடத்தக்கது. திடீரென குறிப்பிட்ட இடத்திற்கு பொல்லுகளுடன்விரைந்து வந்த இராணுவத்தினர் தாக்கியதில் பொது மக்கள் நாலாபுறமும் சிதறி ஓடியதில் பலருடைய சைக்கிள்கள், மோட்டார் சையிக்கிள்கள் நிலத்தில் வீழ்ந்து சேதம் அடைந்துள்ளமையும் குறிப்பிடத்தக்கது.