முஅம்மர் கடாபி மகன் சாதி அயல் நாடான நைகரில் தஞ்சம்

தலைமறைவாகியுள்ள லிபிய தலைவர் முஅம்மர் கடாபியின் மூன்றாவது மகன் சாதி கடாபி அயல் நாடான நைகரில் தஞ்சம் புகுந்துள்ளார். இதனை அந்நாட்டு அரச பேச்சாளர் மவுரோ அமன்டோ உறுதி செய்தார். கிளர்ச்சியாளர்கள் முஅம்மர் கடாபியின் கட்டுப்பாட்டிலுள்ள எஞ்சிய நகரங்களை கைப்பற்றும் நடவடிக்கையை முன்னெடுத்துள்ள நிலையிலேயே சாதி கடாபி நைகருக்கு தப்பிச் சென்றுள்ளார். பாலைவனத்தை கடந்து சாதி கடாபி நேற்று முன்தினம் நைகர் எல்லையை எட்டியுள்ளார். 8 அல்லது 9 வாகன தொடரணி மூலம் சாதி கடாபி நைகரின் அகடாஸ் நகரை வந்தடைந்துள்ளார். அவருடன் அவரது ஆதரவாளர்களும் நைகரை வந்தடைந்ததாக அங்கிருக்கும் அல் ஜரா செய்தியாளர் தெரிவித்துள்ளார்.

“வாகனத் தொடரணி ஒன்று நைகரை வந்தடைந்துள்ளது. அதில் முஅம்மர் கடாபியின் மகன் மற்றும் அந்த அரசின் முக்கிய அதிகாரிகள் இருப்பதாக தெரிய வந்துள்ளது. அந்த வாகன தொடரணி தற்போது (நேற்று) அகடாசை வந்தடைந்துள்ளது. அந்த தொடரணி விரைவில் தலைநகர் நியாமியை அடையும் என எதிர்பார்க்கப்படுகிறது” என்று நைகர் அரச பேச்சாளரும், நீதி அமைச்சருமான மவுரோ அமன்டோ தெரிவித்துள்ளார்.

முன்னதாக இம்மாத ஆரம்பத்தில் சாதி கடாபி கிளர்ச்சியாளர்களுடன் பேச்சுவார்த்தை நடத்தியிருந்தார். அதில் தான் சரணடைய தயாராக இருப்பதாகவும் அவர் கூறியதாக கிளர்ச்சியாளர்கள் ஊடகங்களுக்கு தெரிவித்திருந்தமை குறிப்பிடத்தக்கது.

38 வயதான சாதி கடாபி முஅம்மர் கடாபியின் 7 மகன்களில் மூன்றாவது மகனாவார். இவர் முன்னாள் லிபிய கால்பந்து அணியின் தலைவராக செயல்பட்டார். எனினும் இவர் நீண்ட காலம் இத்தாலியிலேயே வசித்து வந்தார். அதேபோன்று லிபிய கால்பந்து சம்மேளனத் தலைவராக செயல்பட்ட சாதி கடாபி கடந்த 2004 ஆம் ஆண்டு லிபிய இராணுவத்தில் இணைந்தார்.

அண்மைக்காலமாக சாதி கடாபி திரைப்படத்துறையில் ஈடுபட்டு வந்தார். அவர் சுமார் 100 மில்லியன் டொலர் அளவில் திரைப்படத்துறையில் முதலீடு செய்துள்ளார் என்பது குறிப்பிடத்தக்கது.

ஏற்கனவே, முஅம்மர் கடாபியின் இரண்டாவது மனைவி சபியா மற்றும் அவரது மூத்த மகன் மொஹம்மட் மற்றுமொரு மகனான ஹனிபல் ஆகியோருடன் அவரது மகள் ஆயிஷா அயல் நாடான அல் ஜீரியாவில் தஞ்சம் புகுந்துள்ளமை குறிப்பிடத்தக்கது.

நைகருக்கு அழுத்தம்

இதனிடையே முஅம்மர் கடாபி அரசின் முக்கிய அதிகாரிகள் மற்றும் அவரது உறவினர்கள் தொடர்ச்சியாக நைகரில் தஞ்சம் புகும் நிலையில் நைகர் அரசுக்கு சர்வதேச அழுத்தங்கள் அதிகரித்துள்ளது. முஅம்மர் கடாபியின் அரசில் சட்ட விரோத செயல்களில் ஈடுபட்ட நபர்கள் நைகருக்குள் வந்தால் கைது செய்யும்படி அமெரிக்கா நைகர் அரசிடம் கோரியுள்ளது.

நைகர் அரசு லிபியாவின் கிளர்ச்சிப்படை மாற்ற கெளன்ஸிலை அந்நாட்டின் அதிகார பூர்வ அரசாக அங்கீகரித்துள்ளது. எனினும் முஅம்மர் கடாபி அங்கு தஞ்சம் புகுந்தால் அவரை எவ்வாறு நடத்துவது என்பது குறித்து நைகர் அரசு இன்னும் இறுதித் தீர்மானம் எடுக்க வில்லை என்பது குறிப்பிட த்தக்கது.

முன்னாள் பிரதமர் கைது

இந் நிலையில் முஅம்மர் கடாபி அரசின் வெளி நாட்டு உளவுப் பிரிவு தலை வர் அபு செயித் டொர்டாவை கைது செய்ததாக கிளர்ச் சிப்படை அறிவித்துள்ளது. தலைநகர் திரிபோலியில் வைத்து அவர் கைதானதாக கிளர்ச்சியாளர்களின் பேச்சாளர்களில் ஒருவரான அனஸ் ஷரீகப் தெரிவித்தார்.

கைதாகியுள்ள அபு செயித் டொர்டா 1990 களில் லிபியாவின் பிரதமராக இருந்துள்ளார். அத்துடன் 2003 ஆம் ஆண்டில் அவர் ஐக்கிய நாடுகள் சபையில் லிபியா வுக்கான தூதுவராகவும் செயல்பட்டுள்ளார். அதேபோன்று முஸா கவுசாவுக்கு முன்னர் லிபிய உளவுப் பிரிவின் தலைவராகவும் இருந்துள்ளார் என்பது குறிப்பிடத்தக்கது.

10 நாட்களில் இடைக்கால அரசு

இதனிடையே இன்னும் 10 நாட்களுக்குள் இடைக்கால அரசு ஒன்றை அமைக்கவுள்ளதாக தேசிய மாற்ற கெளன்ஸிலின் பிரதித் தலைவர் மஹ்மூத் ஜிப்ரில் நேற்று திரிபோலியில் வைத்து அறிவித்துள்ளார். அத்துடன் லிபியாவில் கிளர்ச்சிப் படைகள் அனைத்தும் அந்நாட்டு தேசிய மாற்ற கெளஸில் என்ற ஒரே குடையின் கீழ் கொண்டு வரப்படும் எனவும் குறிப் பிட்டார்.

எனினும் மஹ்மூத் ஜிப்ரிலின் அறிவிப்பை தொடர்ந்து கிளர்ச்சியாளர்களுள் கருத்து முரண்பாடு ஏற்பட்டுள்ளதாக திரிபோலியில் இருக்கும் அல் ஜkரா செய்தியாளர் தெரிவித்துள்ளார். இதில் திரிபோலியில் இருக்கும் கிளர்ச்சியா ளர்களின் இராணுவ கெளன்ஸில், தேசிய மாற்ற கெளன்ஸிலின் கீழ் இயங்குவதை நிராகரிக்க வாய்ப்பு இருப்பதாக அந்த செய்தியாளர் குறிப்பிட்டுள்ளார்.

தொடர்ந்து மோதல்

இந் நிலையில் முஅம்மர் கடாபியின் கட்டுப்பாட்டிலுள்ள பானி வலீதின் பெரும் பகுதியை கைப்பற்றியதாக கிளர்ச்சியாளர்கள் அறிவித்துள்ளனர். திரிபோலியில் இருந்து தெற்காக 150 கி.மீ. க்கு அப்பாலுள்ள பானி வலீத் நகரின் மையப் பகுதியை எட்டியதாக கிளர்ச்சியாளர்கள் கூறியுள்ளனர்.

இது குறித்து கிளர்ச்சிப் படை வீரர் ஒருவர் அல் ஜkராவுக்கு கூறும் போது, நாம் பானி வலீத்துக்குள் இருக்கிறோம். நகரின் பெரும்பாலான பகுதியை நாம் கைப்பற்றியுள்ளோம். எனினும் கடாபி ஆதரவுப் படை ஆங்காங்கே நிலைகொண்டு தாக்குதல் நடத்தி வருவதாக சாபில் வபாலி என்பவர் குறிப்பிட்டுள்ளார்.

எனினும் பானி வலீதில் இருந்து இயங்கும் கடாபி ஆதரவுப் படையின் வானொலி சேவை கிளர்ச்சியாளர்களுக்கு எதிராக மோத நகர மக்களுக்கு அழைப்பு விடுத்துள்ளது. ஆயுத குழு; எலிகளிடம் இருந்து நகரத்தை காக்கும்படி அங்குள்ளோரிடம் கடாபி ஆதரவுப்படை கேட்டுக் கொண்டுள்ளது. இதேவேளை கடாபி பிறந்தகமான சிர்த் நகரிலும் இரு தரப்புக்கும் இடையில் மோதல் நீடித்து வருகிறது.