ஒரு அகதியின் நன்றிக் கடிதம்

நன்றி புலம்பெயர் உறவுகளே!

இதுவரை 'புலம்பெயர் உறவுகள்' என்ற வார்த்தைகள் எனக்கு வெறும் சம்பிரதாயங்களாகவே பட்டன. எனினும் இந்த அகதி யுத்த அகதிகளைப் பிரதிநிதித்துவப்படுத்தி ஜொலிஸ்ரார் விளையாட்டுக்கழக இலண்டன் கிளையினருக்கு எழுதிய 'ஒரு அகதியின் கடதாசி' எனத் தலைப்பிடப்பட்ட பகிரங்க மடலுக்கு உங்கள் அனைவரிடமும் இருந்து தெளிவான பிரதிபலிப்புகள் செயற்பாடுகளாக வெளிவந்தன என இன்று மாலை தெரிய வந்தது.

அதற்காக எனது நன்றிகள்.....!

எனது மக்களின் உண்மையான துயரார்ந்த வாழ்வை, எண்ணத்தை எம்மால் எங்குமே சொல்ல முடியாத, வாய்விட்டு அழமுடியாத, பரஸ்பரம் பேசிக்கொள்ள முடியாத நிலையில் புலம்பல்களாக எழுதப்பட்ட அந்தக் கடதாசிக்கு உங்களிடமிருந்து இத்துணை மதிப்பார்ந்த பதிலிருப்புகள் என நான் எதிர்பார்க்கவில்லை.

எமது ஆதங்கத்தை வெளிப்படுத்திய புலம்பல்களை வெறும் புலம்பல்களாகவே எடுத்துக் கொள்வீர்கள் என நினைத்தோம். எனினும் எங்கள் உணர்ச்சிகளைப் புரிந்து கொண்டு உடனடி எதிர்வினையாக ஜொலிஸ்ரார் விளையாட்டுக்கழக இலண்டன் கிளை எனும் 'பிக்பொக்கட்' கும்பலின் மாய விளையாட்டு நிகழ்வை நீங்கள் அனைவரும் புறக்கணித்ததை அறிந்து எமது இருண்ட நெஞ்சங்கள் புன்னகை புரிகின்றன. வறண்டு போன எமது இதயங்களிலிருந்து சிறு ஈரலிப்பான நன்றிகளை மீண்டும் தெரிவிக்கிறோம்.

எமது அவலங்களைப் பற்றி கையுயர்த்தி உரக்கக் குரலெடுத்துப் பேசுவார்கள். சில வேளைகளில் கண்ணீரும் விடுவார்கள். எனினும் அவலங்களைப் போக்க வழி தேடுபவர்களாக அவர்கள் இல்லை. எமது கண்ணீரைத் துடைக்க அவர்களது கரங்களுக்கு நேரமில்லை.

புலம்பெயர் நாடுகளில் வசிக்கும் உங்களிடையே கோட்பாடு ரீதியாகவும், அரசியல் ரீதியாகவும் வேறு பல காரணிகளாலும் முரண்பாடுகள், சிலவேளைகளில் பகைமைகள் கூட இருக்கலாம். எனினும் சிதைந்து போன எமது மக்களுக்காக, தொலைந்து போன அவர்களது முகவரிகளுக்காக வேற்றுமைகளிடையே ஒற்றுமையைக் காணுங்கள்.

முரண்பாடுகளிடையே உடன்பாடுகளைத் தேடிக் கண்டறியுங்கள்.

என்னதான் வேற்றுமைகள் இருந்தாலும், என்னதான் பகைமைகள் இருந்தாலும் 'உங்கள் உறவுக்கான எம்மை சிதைவுகளிலிருந்து மீட்டெடுத்து மனிதர்களாக வாழ வைக்க வேண்டும்' என்ற எண்ணம் உங்கள் எல்லோருக்கும் இருக்கும் என நான் உறுதியாக நம்புகின்றேன்.

நினைவில் இருத்திக் கொள்ளுங்கள். நாம் உண்பதற்கு மீன் கேட்கவில்லை. தூண்டிலைக் கேட்கிறோம். அதைத் தாருங்கள். மீனை நாமே பிடித்துக் கொள்வோம். எமது மக்களுக்காக என்று அங்கே நடைபெறும் ஆடம்பரச் செலவுகளைச் சுருக்கி எளிமையாக்கிக் கொள்ளுங்கள். எஞ்சும் பணத்தொகையை எமது வாழ்க்கைத் தரத்தை உயர்த்தச் செலவிடுங்கள்.

உங்களிடம் வரும் இந்தச் செய்தியை உங்கள் நண்பர்களுடனும் பகிர்ந்து கொள்ளுங்கள். நாம் தொடர்ந்து ஆக்கபூர்வமான தொடர்பாடலைப் பேணுவோம்.

இவ்வண்ணம்

நண்பர்களுடன்

அகதி.

(இது தொடர்பான கட்டுரையை வாசிக்க...)