யானை தன்தலையில் தானே மண் போடுவதாக நையாண்டி பண்ணுபவர்க்கு அதன் உள்ளார்ந்த அர்த்தம் தெரியாது. இயற்கையோடு இசைந்து வாள்பவை ஐந்தறிவு ஜீவன்கள். ஆறாவது அறிவு நன்மைகளும் தீமைகளும் கொண்டது. அதனால் தான் சுனாமி வருமுன் ஊருக்குள் வந்தன பாம்புகள். ஓடி பறந்தன பறவைகள். ஆனால் புதினம் பார்கப்போன ஆறறிவு மனிதர்கள் தான் அள்ளுண்டு அதோகதி ஆனார்கள். தன் உடல் சூட்டை மற்றும் எரிச்சலை தீர்க்கும் அரு மருந்து புழுதி மண் என்பது ஐந்தறிவு யானைக்கு தெரியும்.
அதனை ஆறறிவு அண்ணல் காந்தி அவர்களும் அறிந்ததால் தான் தென் ஆபிரிக்காவில் தன் சொந்த மகனுக்கு நோய் வந்தபோது ஆங்கில வைத்தியத்தை தவிர்த்து இயற்கை வைத்தியமான மண் வைத்தியம் செய்ததை அவரின் சத்திய சோதனை புத்தகத்தை படித்தால் அறிந்து கொள்ளமுடியும்.

இயற்கையோடு வாழ்தல் தன் இனத்தை காத்தல் எதிரிகளை தன் பிரமாண்டத்தால் பயமுறுத்தல் தன் பாகனின் அங்குச ஆணைக்கு கட்டுப்பாடல் என பல தனி தன்மை கொண்டது யானை. ஆனால் மதம் பிடித்தால் தனக்கு உணவு தந்தவனையே காலில் போட்டு மிதிக்கும். இது கவி பாரதியாரே பட்ட அனுபவம். அந்த நிலையில் தான் யானை சின்னத்தை கொண்ட யு. என். பி. யும் இருக்கிறது. நாட்டில் காணப்பட்ட குடும்ப ஆட்சி அதிகாரத்துக்கு முடிவுகட்ட ஜனாதிபதி போட்டியில் இருந்து விலகி பொது வேட்பாளரை வெல்லவைத்தது யு என் பி . அப்போது அது தன் எதிர்கால அரசியலில் மண் அள்ளிபோடுவதாக தான் பார்க்கப்பட்டது.

ஆனால் அன்று நாட்டில் காணப்பட்ட தனிநபர் அதிகார சூட்டை தணிக்கத்தான் அது அவ்வாறு செய்தது. வெல்ல முடியாதவர் என வர்ணிக்கபட்ட பிரபாகரன் போல தோற்கடிக்கப்பட முடியாதவர் என பிரமாண்டப் படுத்தபட்ட மகிந்தரும் சந்தித்த முடிவு காலத்தின் கட்டாயம். காலத்தின் தேவை அறிந்து அன்று செயல்பட்டது யு. என். பி. யானையும் அதன் தலைவர் ரணிலும். யானை நிதானமாக செயல்பட்டால் பல நன்மைகள் பெறலாம். நிறைவேற்று அதிகார முறைமை பலமுறை நீக்கப்பட எடுக்கப்பட்ட முடிவுகள் பேச்சளவிலேயே கடந்த காலத்தில் காணப்பட்டது. ஆனால் இன்று அதை நிகழ்த்தி காட்ட எடுத்த முயற்சிக்கு முட்டுக்கட்டை போடுகிறது அதனால் பலன் பெற்ற ஒரு கூட்டம்.
 

உண்மையில் முழுமையாக அதிகாரங்களை நீக்க பாரளுமன்றால் முடியாது. அதற்கு மக்கள் ஆணை வேண்டும் என நீதிமன்றம் கூறிய விடயங்களை தவிர்த்தே அதை நிறைவேற்ற முற்பட்டனர் யானை கட்சியினர். அதை குழப்ப மற்றவர்கள் எடுத்த ஆயுதம் அற்பத்தனமானது. கடந்த ஆட்சியில் நடந்த அதிகார ஊழலை ஒழிக்கவே மக்களிடம் வாக்குப்பெற்று புதிய ஜனாதிபதி பதவிக்கு வந்தார். 100 நாள் வேலைத் திட்டத்தில் செய்வதை பட்டியல் இட்டே வாக்குக்கள் பெறப்பட்டன.

அதில் முக்கியமானது 19 தாவது திருத்தம். அதில் தான் எதிர்கால நேர்மையான நல்லாட்சிக்கான விடயங்கள் உள்ளன. அதை கூட நிறைவேற்றும் தினத்தில் ஊழல் விசாரணைக்கு அழைக்கபட்டவரை காப்பற்ற பாராளுமன்றத்தில் படுத்துறங்கும் கேவலம் நடந்தேறியது. புதிய ஜனாதிபதிக்கு மக்கள் கொடுத்த ஆணையை அந்த மக்களின் பிரதிநிதிகள் என பாராளுமன்றத்தில் இருக்கும் பிரகிருதிகளே உதாசீனம் செய்தனர்.

கள்வனுக்கு என்ன கௌரவம் தேவைப்படுகிறது ?. குற்றம் சாட்டப்பட்டால் கைவிலங்கு போட்டுத்தான் கூட்டி செல்வர். குற்றமற்றவர் என்பது விசாரணைக்குப் பின் தன் தெரியவரும்.
என்னை விசாரணை நிலையத்துக்கு அழைக்கமுடியாது என முரண்டு பிடிப்பது, சிறப்புரிமை இருப்பதாக மக்கள் மன்றத்தை முடக்குவிப்பது எந்தவகை நியாயம்?. பதவியில் இருக்கும் வரை தலை கால் தெரியாமல் ஆடுவது பின் ஆட்டம் முடிந்தபின் அவலக்குரல் எழுப்புவது கேவலமான செயல். முற்பகல் செய்யின் பிற்பகல் விளையும் என்பது பொய்யாமொழி.

அன்று குண்டுக்கட்டாக சரத் பொன்சேகாவை தூக்கி சென்று சிறையில் அடைத்த போது அவரது முன்னாள் இராணுவ தளபதி என்ற சிறப்புரிமை எங்கே போனது ?  தான் விதைத்த வினை தன் வாசல் கதவை தட்டியற்தகே இத்தனை ஆர்பாட்டம் செய்விக்கும் தந்தைக்காக அன்று பாராளுமன்றத்துள் போர்த்திகொண்டு படுத்துவிட்டார் மகன் நாமல் ராஜபக்ச. இன்று சித்தப்பாவை சிறை மீட்க அர்த்தராத்திரியில் நீதிமன்றம் ஓடுகிறார்.

இவை எல்லாமே 19 தை நிறைவேற்றாமல் செய்ய எடுக்கும் இவர்களின் சதி முயற்சி. தேன் எடுத்தவன் புறம் கையை நக்குவான் என்றால் இவர்கள் தேன் குடத்தையே காலிபண்ணிய கூட்டம். திருடனுக்கு தேள் கொட்டியது போல இதுவரை கமுக்கமாக இருந்தவர்கள் தம் தலைவரின் அடிமடியில் கைவைத்ததும் அடுத்தது தம் மடிமீது தான் என பயந்து பதறியடித்து வருமுன் காக்கவே பாராளுமன்றத்தில் படுத்துறங்கி சிறப்புரிமை மீறல் என பிதற்றுகின்றனர்.
உண்மையில் பாராளுமன்றத்தின் சிறப்புரிமையை மீறிய இவர்களின் மேல் சபாநாயகர் நடவடிக்கை எடுத்திருக்க வேண்டும். அவரது சகோதர பாசம் அதை தடுத்துவிட்டது என என்ணத் தூண்டுகிறது.

ஏனெனில் பாராளுமன்றத்துக்கு அணியும் ஆடை பற்றிய ஒழுங்குவிதி உண்டு. ஒரு தடவை சுரிதா உடையில் வந்த மட்டக்களப்பு பெண் உறுப்பினர் ஒழுங்கு விதிப்படி சபையில் இருந்து வெளியேற்றபட்டமை இதே சபையில் நடந்தது. அதே சபைக்குள் சாரத்துடனும் ரீ சே ட்டுடனும் படுத்துறங்கியது விதி மீறல் இல்லையா ?

மடியில் கனம் இல்லை என்றால் வழியில் பயம் இல்லை என்பார்கள். அதே போல் தவறிழைக்கவில்லை என்றால் ஆணையாளர் அழைப்புக்கு மதிப்பளித்திருக்க வேண்டும்.
முன்னாள் ஜனாதிபதி என்ற தலைக்கனம் அவரை தடுத்துவிட்டது. ஆணையாளர் பதவி படிப்பால் பட்டறிவால் வந்தது. ஓய்வு பெறும் காலம் வரை நிலைத்து நீடிப்பது. மக்கள் ஆட்சியின் பலவீனம் பதவிக்கு வருபவரின் தரம் தராதரம் நிர்ணயிக்கப்படாமை.
அதனால் தான் மக்கள் பிரதி நிதி எனும் பல மண்ணாங்கட்டிகள் முன் கை கட்டி நிற்கும் நிலையில் படிப்பறிவு பட்டறிவு கொண்ட அதிகாரிகளை வைத்திருக்கிறது. நிர்வாக சேவையில் நீண்ட அனுபவம் கொண்டவர்கள் பல ஞானசூனிய அரசியல்வாதிகளின் கீழ் சேவையாற்ற வேண்டிய பரிதாபநிலை நாம் அனைவரும் அறிந்ததே.

நேற்று பெய்த மழையில் இன்று முளைத்த காளான்களான இவர்கள் அதிகாரிகளை ஆட்டிப் படைக்கின்றனர். ஆனால் அந்த படிப்பறிவும், பட்டறிவும் கொண்ட அதிகாரிகள் ஓய்வு பெற்றபின் அவர்களுக்கு எந்தவிதமான சிறப்புரிமையும் தரப்படுவதில்லை. அந்த நிலமையை மாற்றி அதிகாரிகளை ஆமாம் சாமிகள் அன்றி சுயமாக செயல்பட்டு சிறந்த சேவையை வழங்கவும் சட்டத்திற்கு உட்பட்ட ஊழல் அற்ற ஆட்சியை கொண்டுவரவும் மக்களின் உரிமைகள் பத்திரிகை சுதந்திரம் ஆட்சியின் வெளிப்படைத்தன்மை என பல மக்கள் நலன் சார்ந்த விடயங்களை உள்ளடக்கியதே 19 தாவது திருத்தம்.

அதை கொண்டுவரும் நேரத்தில் ஊழல் விசாரணைக்கு அழைக்கப் பட்டதற்கே மக்கள் பிரதிநிதிகளும் ஒரு பகுதி மக்கள் கூட்டமும் குழப்பம் விளைவிக்கின்றனர். முன்பு இனபிரச்சனைக்கு தீர்வு தரக்கூடிய நீலன் - பீரிஸ் திட்டத்தை தீயிட்டு கொளுத்தியது யு. என். பி.. அன்று யானைக்கு மதம் பிடித்திருந்தது. அதனால் தான் என்றோ தீர்ந்திருக்கவேண்டிய பிரச்னை தீர்வு திட்டத்துக்கு தீயிட்டு யுத்தத்தை நீடித்து தன் சொந்த நாட்டு மக்களையே யுத்த அரக்கனுக்கு பலி கொடுத்தது.

காலமாற்றத்தால் இன்று முழு நாட்டிற்கும் நன்மை தரக்கூடிய அரசியல் அமைப்பு மாற்றத்தை அவர்களே கொண்டுவரும் போது அவர்களின் சொந்த இன மக்களே அதனை குழப்புகின்றனர். அன்று இனவாத நோக்கில் இன நலன் சார்ந்த தீர்வை தரவிடாமல் தமிழர் தலையில் மண் அள்ளிப்போட்ட சிங்களம் இன்று தன் நலன் சார்ந்த செயலை செய்ய விடாமல் தன்தலையில் தானே மண்ணை அள்ளிப் போடுகிறது. இதை அறிந்து தான் தீதும் நன்றும் பிறர் தர வாரா என அன்றே எழுதிவைத்தார் வள்ளுவர்.

அதிகாரிகள் அரசியல் தலியீடின்றி செயல் பட்டால் மட்டுமே மக்களுக்கு சிறந்த சேவை கிடைக்கும். அதே நேரம் விசாரணைக்கு ஆளாவோம் என்ற பயம் இருந்தால் மட்டுமே அரசியல்வாதிகள் நிதானமாக செயல்படுவர். ஜனநாயகத்தில் அனைவரும் சமம். சிறப்புரிமை என்பது செய்த சேவையை கௌரவப்படுத்துவது. களங்கப் பட்டவர் கௌரவம் பார்க்க கூடாது. பிரச்சனைக்கு முகம்கொடுக்கவேண்டும். ஒளிந்திருந்து அடுத்தவரை தூண்டி விடக்கூடாது.

உன் இடத்துக்கு நான் வரமாட்டேன் என் இடத்துக்கு நீ வா என விசாரணையை அழைத்தால் அது விருந்தில்தான் முடியும். நக்கினார் நாவிழந்தார் நிலை தான் இறுதியில் விசாரணை முடிவாக வரும். தவறு தப்பித்து கொள்ளும். இலஞ்சம் அன்பளிப்பாக அறிவிக்கப்படும். இந்த நிலை நீடித்தால் நீதிமன்றம் குற்றமிளைத்தவர் வீட்டில் நடக்கும் காலம் வரும். நாட்டாமை தீர்ப்பை மாற்றி சொல்லு எனும் குரல் கேட்கும். வேண்டாம் இந்த விபரீதம்.

இனப்பிரச்சனையில் தீர்வுகாண எடுத்த பலமுயற்சிகள் தோல்வி கண்டதற்கு இரு பகுதியினரின் விடாப்பிடியான செயல்களும் காரணமாகும். பிரித்தாளும் சூத்திரம் தெரிந்த பிரித்தானியர் தம் வசதிக்காக பதவிகள் தந்து வளர்த்த தமிழ் பெண்ணை பெரும்பான்மை சிங்கள மாப்பிள்ளையுடன் சேர்ந்து வாழ் என கட்டிவைத்து போன கல்யாணம் மனமுறி ஏற்பட்டதால் இருவரும் ஒத்து வாழ போட்ட ஒப்பந்தங்கள் மீறப்பட விவாகரத்து கேட்ட போது தமிழ் மீது சீறிய சிங்களம்.

அன்று இனவாத பேயிடம் சரணடைந்தது போல இன்று ஊழல் பூதத்திடம் மண்டியிட்டு தன் தலையில் தானே சுடு மண்ணை அள்ளிப்போடுகிறது. அவிந்து போகும் தலை. நெஞ்சு பொறுக்குதில்லையே இந்த நிலை கெட்ட மனிதரை நினைத்து விட்டால் என்ற பாரதியார் பாடல் எங்கோ ஒலிக்கிறது. அது உன் சிங்கள மொழியில் ஒலித்தால் தான் நீ தெளிவு பெறுவாயா சிங்களமே ?.
(மாதவன் சஞ்சயன்)

அமைதி சமாதானம் ஜனநாயகம்

www.sooddram.com