நடந்த தேர்தலில் வடக்கு கிழக்கு மக்களின் மனதை படிக்க முடிந்த அளவுக்கு கூட்டமைப்பு தலைவர்களின் தேசிய பட்டியல் பகிர்வை ஊகிக்க முடியவில்லை. பலவிதமான பகிர்வுகளை கூறி இறுதியில் பிள்ளையை கிள்ளி தொட்டிலை ஆட்டி பாலை சம்மந்தர் குடித்து விட்டார். அனந்தியை என்ன நோக்கத்துக்காக கொண்டு வந்தனரோ அதே நோக்கில் தான் இப்போது சாந்தியை கொண்டு வருகின்றனர். தாம் விரும்பாதவருக்கு கொடுப்பதை தவிர்க்கவே அவரை தெரிவு செய்தனர். சில நூறு வாக்குகளால் தான் முதலில் சாந்தி தெரிவு செய்யப்பட வில்லை. சாந்தியின் ஆதரவு வாக்குகளை பெற அவரை களமிறக்கி விட்டு தங்களுக்கு வாக்கு கேட்ட சக வேட்பாளர் செயலால் நடந்த நிகழ்வு அது. ஆனால் மக்கள் தீர்ப்பை மாற்ற முடியாது என்பது அவர் தெரிவில் இருந்து தெரிகிறது.

அந்த பிரதேசத்தின் தேவை கருதி அவர் வரவு நல்வரவாகட்டும். ஒரு அனுபவம் மிக்க நிர்வாக அதிகாரி யுத்த வடுக்களை தாங்கியவர் மக்கள் சேவைக்கு நிச்சயம் தேவை. அதே வேளை அவருக்கு ஒரு ஆலோசனை. தயவு செய்து அரசியல் பேசாதீர்கள். புலம் பெயர்ந்த அரசியல் வியாபாரிகள் அழைப்பை ஏற்று ஐநா சபை வரை போகாதீர்கள். உடுக்கு அடித்து மஞ்சள் சிவப்பு கரை சேலை தந்து சன்னதமாட வைப்பார்கள்.

திரும்பி வந்தபின் அனந்தியை போல் கட்சியில் இருந்து இடைநிறுத்தப்பட்டு அரசியல் அம்மண ரங்காவின் மின்னலில் முனக மட்டும் தான் முடியும். அதை விடுத்து வந்த வெள்ளம் இருந்த வெள்ளத்தை கொண்டு சென்றது போல் மற்ற பிரதேசங்களில் இருந்து பிரபாகரனை நம்பி வந்த மக்களோடு உங்கள் மக்களும் புதைந்து மயான பூமியான முல்லைத்தீவை மீண்டும் கட்டி எழுப்புவதில் கவனம் செலுத்துங்கள்.

வளம் கொழிக்கும் வயல்களும், மழை தருவிக்கும் அடர்ந்த காடுகளும், மீன் துள்ளி தோணியில் விழும் கடல் வளமும் கொண்ட பிரதேச மக்கள் இன்று அகதிகளாய் பஞ்சப் பராரிகளாய் நிவாரணம் வேண்டி அலையும் நிலை. ஆ நிரையும் கோழி வளர்ப்பும் வேளாண்மையும் சிறு தானிய பயிரும் செய்து வாழ்ந்த வன்னிமையின் பெரும் பகுதி கொண்ட மண்ணில் இன்று கைம்பெண்கள் கதியற்ற நிலையில் மகவிற்கு பாலின்றி மடிப் பிச்சை ஏந்தும் நிலை.

கற்சிலை மடுவில் பண்டார வன்னியன் தன் மக்களை, மண்ணை காக்க லெப்டினன் வொன் றிபேக் உடன் வாள் கொண்டு போரிட்டே மாண்டான். சுடுகலன்கள் வைத்திருந்த பிரபாகரன் போல் தன் மக்களை பலிகொடுத்து தப்பித்து ஓடும் போதல்ல. வீரம் விளைந்த மண்ணில் கொலைகாரன் வரலாறு தேவையில்லை. எனவே அழிக்கப்பட்ட மண்ணில் உங்கள் வரவு புதிதாய் துளிர்க்கும் விதையாய் விருச்சமாய் வான் நோக்கி வளரட்டும்.

முஸ்லிம்கள் ஆதரவு தந்தால் மூன்று ஆசனம் பெறலாம். அப்போது ஒரு முஸ்லிம் ஒருவரை தெரிவு செய்வது பற்றி முடிவெடுப்போம் என மூதூரில் பேசிய சம்மந்தர் 1 ஆசனம் மட்டுமே திருமலையில் கிடைத்ததால் 2வது தேசிய பட்டியலை மூதூர் தமிழ் மகனுக்கே கொடுக்க முடிவெடுத்தார். நீங்கள் போடவில்லை அதனால் உங்களுக்கு தர முடியவில்லை என தௌபிக்கிடம் சொல்வார்.

துரைரட்ணசிங்கம் தலையில் பாரிய சுமை ஏறி உள்ளது. மூதூர் தொகுதியின் சம்பூர் தோப்பூர் மல்லிகைத்தீவு கங்குவேலி உட்பட பல கிராமங்கள் மீள் குடியேற்றம் வேண்டி நிற்கின்றன. பெரும் தொகை மக்கள் இடம் பெயர்ந்து வெருகலுக்கு அப்பால் அகதி நிலையில். அவர்களை மீளமர்த்தி அழிந்த பாடசாலைகளை இயங்க செய்யுங்கள். இணக்க அரசியலில் அபிவிருத்தியும் உள்ளடக்கம் என்பதால் முன்னாள் கல்வி அதிகாரியான உங்களால் அது முடியும்.

13 - 12 பெற்ற தேசிய கட்சிகளே 2 தினங்களுள் தம் தெரிவை தெரிவித்து விட்டன. 2 ஆசனம் பெற்ற இவர்களின் இழுபறி மீண்டும் வட மாகாண சபை பதவி ஏற்பை ஞாபகப்படுத்தியது. ஒருவர் சமாதியில் மற்றவர் சந்தியில் என திக்குக்கு ஒருவராக சத்திய பிரமாணம் எடுத்தனர். ஆனால் அனைவரும் 6வது திருத்த சட்டத்தை ஏற்றே பதவி பிரமாணம் செய்தனர். வாய்ப்பேச்சு பல்லக்கு தம்பி கால்நடை என்பது இது தான்.

அன்று தம்பிக்கு மந்திரி பதவி கேட்டவர் இன்று தனக்கு எம் பி பதவி கேட்டு பிச்சைக்காரர் சங்கம் தவிர ஏனைய இல்லாத சங்கங்களின் பெயரில் கோரிக்கை வைத்தார். சிவமோகன் விலகி சாந்தி தெரிவாக அந்த தேசிய பட்டியலை தான் பெற முயல, அவரோ நான் ஈபி இல்லை வென்றது என் செல்வாக்கில் என மறுக்க சிவசக்தி ஆனந்தனுக்கும் வலை வீசியதாக செய்தி. 2001ல் அகப்படாத ஆனந்தனுக்கு இம் முறை கோடிகள் ????????

ஊகங்களுக்கும் பேரம் பேசலுக்கும் ஆரம்பத்தில் வித்திட்டவர்கள் வெறும் பதவி தான் தம் நோக்கம் என வெளிச்சம் போட்டு காட்டிவிட்டனர். என்னதான் முக்கினாலும் முடிவு எப்போதும் சம்மந்தர் கையில்தான். கூடவே சுமந்திரனின் மந்திர ஆலோசனையும். மாவையின் தலையாட்டலும். முதல்வர் தெரிவு முதல் தேசிய பட்டியல் வரை. பேராசிரியர் சிற்றம்பலம் இம்முறையும் இலவு காத்த கிளி. அவரது வயதுக்கு இன்னம் 5 வருடம் தாக்குப் பிடித்தால் அடுத்த பட்டியலிலும் அவர் பெயர் இடம் பெறும்.

(மாதவன் சஞ்சயன்)

அமைதி சமாதானம் ஜனநாயகம்

www.sooddram.com