(மாதவன் சஞ்சயன்)

தனிப்பட்ட விடயங்களில் கருத்துக் கூறுவதும் அரசியல் விடயங்களில் கருத்துக் கூறுவதும் ஒரே மாதிரியானது அல்ல. தனிப்பட்ட ஒரு சம்பவம் பற்றிய கருத்து சில தினங்களில் வாராத்தில் மாதத்தில் மாற்றத்துக்கு உள்ளாகலாம். ஆனால் அரசியல் கருத்து குறிப்பாக தேர்தல் காலத்தில் கூறும் கருத்தினால் ஏற்படும் விளைவை அடுத்த தேர்தல் வரை காத்திருந்து தான் மாற்றத்துக்கு உட்படுத்தலாம். அது சரியான அல்லது தவறானதாகவும் அமையலாம்.

அரசியல் கருத்துகள் சுயவிருப்பு கருத்து, யதார்த்த கருத்து, விருப்பு கலந்த யதார்த்த கருத்து என அமைவதுண்டு. சுயவிருப்பு கருத்து தான் விரும்பும் தலைவனை அவர் சார்ந்த கட்சியை முனிலைப் படுத்தி கூறப்படுவது. யதார்த்த நிலை கருத்து கள நிலவரத்தை உள்ளது உள்ளபடி கூறுவது. விருப்பு கலந்த யதார்த்த கருத்து கள நிலவரத்தை கூறுவதோடு தம் விருப்பப்படி முடிவுகள் வந்தால் நல்லது என்ற நோக்கில் கூறுவது.

சுயவிருப்பு கருத்து பக்க சார்பாக இருப்பது தவறில்லை. ஆனால் அது தம்மை போற்றியும் எதிரணியை தூற்றியும் கூறப்படலாகாது. யதார்த்த கருத்து பெரும்பாலும் பொது கருத்துக் கணிப்புகளாக அமைபவை. அவை கூட சிலவேளைகளில் முடிவுகளில் தாக்கம் செலுத்துவதுண்டு. பொய்த்து போவதும் உண்டு. விருப்புடன் கூடிய யதார்த்த நிலை கருத்து பெரும்பாலும் சரியாவதும் அந்த கருத்தை கூறுவதற்கான காரணத்தை எழுதினால் பழிகேட்பதும் சகஜம்.

அண்மையில் நடந்த தேர்தல் பற்றி என் விருப்பு கலந்த யதார்த்த கருத்துகளையே முன்வைத்தேன். அதற்கு காரணம் கடந்த கால சம்பவங்கள். போராளிகள் என்பதால் தலையில் வைத்து கொண்டாடவோ அல்லது கனவான்கள் என்பதால் வால்பிடிக்கவோ நான் தயாராய் இல்லை. மக்கள் போராளிகளால் நடத்தப்பட்ட விதம் கனவான்கள் மக்களை ஏமாற்றிய விதம் இரண்டையும் பார்த்து தாக்கமா, ஏமாற்றமா என்ற பார்வையில் ஏமாற்றம் பரவாயில்லை என்பதே என் முடிவு.

பெரும்பான்மை மக்களின் மனநிலை ஒரு நாள் வாக்களித்து விட்டு பின் 5 வருடங்கள் ஏமாந்தாலும் பரவாயில்லை என்பதே. பல துன்பியல் சம்பவங்களை பார்ப்பதை, கேள்விப்படுவதை அனுபவிப்பதை தவிர்ப்பதே அவர்தம் நிலை. எங்கும் எதிலும் நீக்கமற நீண்ட அதிகாரத்தின் கைகள் தன் கைத்தடிகளை தான் முன் நிறுத்தியது. ஆயுதங்கள் மட்டுமல்ல மக்களின் குரல்களும் மௌனிக்கப்பட்டன. அதிகாரம் தலைவிரித்து ஆடியது. கைத்தடிகள் தாளம் போட்டது.

இந்த நிலையில் சற்று மாறுபட்ட சூழலில் தேர்தல் வந்தது. வழமை போல் வாய்பேச்சில் தம்மை பல்லக்கில் ஏற்றுவோம் என்பவர்கள் இறுதியில் தம்மை கால் நடையாகத்தான் அனுப்புவார்கள் என்பது மக்ககளுக்கு தெரியும். ஆனால் அவர்களின் கால் ஒடித்து அனுப்பமாட்டார்கள் என்பதும் அவர்களுக்கு தெரியும். அதேவேளை தமக்காக எதிரியுடன் மோதியவர்கள் பின் தம்மையே அடக்கி ஆண்டபோது அவர்களை எதிர்க்கவும் முடியவில்லை. காலம் கனியும் என காத்திருந்தார்கள்.

அந்த யதார்த்த சூழலை புரிந்து கொண்டு என் விருப்பும் கலந்த கருத்துகளை கட்டுரையாக்கினேன். என் விருப்பு 1983 க்கு முந்திய நிலை மீண்டும் எம் மண்ணில் ஏற்படவேண்டும் என்பதே. தடி எடுத்தவன் எல்லாம் தண்டல்காரன் போல இயக்கங்களில் இணைந்தவன் எல்லாம் போரளியானது அப்போது தான். ஆயுதங்கள் தமக்கு அரணாகும் என்றே மக்கள் அவர்களை அரவணைத்தார்கள் ஆனால் அவர்களே எமனாக மாறியபோது வெறுத்தார்கள்.

அழிவிற்கு பின் அபிவிருத்தி வேண்டி நின்வர்கள் அதை முன்னிலைப் படுத்தியவருக்கு வாக்களித்தார்கள். வென்று வந்தவர்கள் ஆடிய கண் மண் தெரியாத ஆட்டத்தை வெறுத்தார்கள். மக்கள் ஆணை மக்களுக்கு சேவை செய்யவே. அமைச்சர் தனக்கு பலன் தரும் வேலைகளை மட்டும் அதிகாரிகளை கொண்டு செய்விக்க அல்ல. பல்கலைகழக நடவடிக்கைகள் கல்விமான்கள் செய்யவேண்டியது. கல்லா மாக்கள் அல்ல. மாநகர சபை கடைகள் ஏல கட்டைப் பஞ்சாயத்தை வியாபாரிகள் விரும்பவில்லை.

விடுதலை என்ற பெயரில் எம் மக்கள் வீடுகளில், கடைகளில் கொள்ளையடித்து கோவில் சங்கை கூட களவெடுத்து அதன் பின் ஆரம்பித்த அரசியல், அதிகாரம் கிடைத்ததும் மக்கள் தலையில் மண்ணை போட்டது. ஒரு கண்ணுக்கு வெண்ணெய் மறு கண்ணுக்கு சுண்ணாம்பும் போல நன்மையையும் தீமையும் கலந்தே நடந்தது. தாம் போட்ட வாக்கை கொள்ளையடித்து பின் தம் பக்கம் திரும்பி கூட பாக்கதவரை பற்றி எண்ணாத மக்கள் அதே வாக்குகளால் அதிகாரம் பெற்றவரின் ஆட்டத்தை அடக்க காத்திருந்தார்கள்.

கனவான்களை விட பிச்சை வேண்டாம் நாயை பிடி என சொல்லவைத்தவர்கள் போராளிகள் என்ற பெயரில் புகுந்துவிட்ட சில வேட்டையன்கள். வேறு தொழில் செய்ய தெரியாதவர்கள். அதற்கான தகுதியும் இல்லாதவர்கள். அதற்காக கனவான்கள் எல்லாம் கலாநிதிகள் அல்ல கண்ணியவான்களும் அல்ல. அவர்களில் கல்லா நிதிகளும் உண்டு களவாணிகளும் உண்டு. முன்னையவர் வேட்டை நாய்கள் போல் எங்கும் பாய்வர். பின்னையவர் வீட்டு நாய்போல் கிடைத்ததை தாம் மட்டும் உண்டு கொழுப்பர்.

மக்களுக்கு கடிக்கும் நாய்களை விட குரைக்கும் நாய்களைத் தான் பிடிக்கும். கடிநாய் வீட்டுக்காரரையும் கடிப்பதுண்டு. குரைக்கும் நாயால் சேதாரம் இல்லை. தமக்கு தருபவர்களை விட தம்மிடம் இருப்பதை பறிப்பவர்களை மக்களுக்கு பிடிக்காது. தம் பகுதிகளை வளப்படுத்தாது போனாலும் பரவாயில்லை இயற்கை வளங்களை பாழாக்கி பணம் பண்ணும் செயலை தடுக்கவே தம் வாக்குகளை ஆயுதமாக்க காத்திருந்தனர்.

அதே வேளை பலனடைந்த மக்கள் தொடர்ந்தும் ஆதரிக்க காத்திருந்தார்கள் என்பதும் உண்மை. அதனால் தான் கீரைக் கடையின் எதிர்க்கடை பற்றிய என் கணிப்பு 1ஆசனம் ஆகும். இவர்கள் செய்த நன்மைகளை அறிந்த பலர் இவர்களின் அத்துமீறல்களை அறியாதவர்கள். அவர்களில் சிலர் வெளிவரும் உண்மை செய்திகளை வதந்திகள் திட்டமிட்டு பரப்பப் படுபவை காழ்ப்புணர்ச்சியில் எழுதப்படுபவை என வியாக்கியானம் செய்பவர்கள். விஸ்வாச சுய விருப்பினால் விட்டுக் கொடாமல் வாதிடுபவர்கள். கள நிலை அறியாதவர்கள்.

உலகின் எந்த மூலையில் இருந்தும் செய்திகள் அறியலாம். ஆனால் உண்மையான மக்கள் மனநிலை அறிய ஊரில் சாதாரண மக்களை சந்திக்க வேண்டும். ஆதரவாளர்களை அல்ல. செய்மதி ஜாம்பவானான அமெரிக்காவின் கழுகு பார்வைக்கு புலப்படாமல் போனது பொக்ரானில் இந்தியா நடத்திய அணுகுண்டு பரிசோதனை. அதனை நிகழ்த்திக் காட்டியவர் மர்கூம் (அமரர்) டாக்டர் அப்துல் கலாம். அது சாத்தியமாகக் காரணம் அவருக்கு இருந்த கள கால நிலை அறிவு. தேர்தல் காலத்தில் எனக்கு இருந்தது கள மக்கள் மனநிலை அறிவு.

புதிய அரசு, புதிய சூழல், சிந்திப்பதற்கு நிறைய நேரம், தவறுகளை திருத்த நல்லவாய்ப்பு. மந்திரியானால் கூட இனி அதிகார மீறலுக்கு நல்லாட்சி இடம் தராது. எதிர் வரிசையில் அமர்ந்தால் தவறுகளை சுட்டிக் காட்டி வீட்டுக்காரரை தூங்காமல் பார்த்துக் கொள்ளலாம், வட மாகாண எதிர்க்கட்சி தலைவர் செய்வது போல. அப்படி செய்தும் அங்கு சிலர் தூங்குகிறார்கள் முதல்வர் உட்பட. 5வருட உழைப்பு அடுத்த தேர்தல் முடிவில் சாதகம் தரும்படி மக்கள் சேவகம் செய்யுங்கள். பாதகம் தவிர்த்து.

சயிக்கிளும் வேண்டாம் சிலந்தியும் வேண்டாம் என்று வீட்டுக்கு வாக்கு போட்டது கூட அவர்களின் மாற்றத்தினால் தான். நடைமுறை சத்தியமான விடயத்தை கொள்கையாக தேர்தல் விஞ்ஞாபனத்தில் சொல்லி இணங்கப் போகிறோம் கேட்ட சம உரிமை கிடைத்தால் ஒரு நாட்டில் கூடி வாழ்வோம் உங்கள் விருப்பத்தை வாக்குகளால் தெரிவியுங்கள் என்றனர். மக்களின் யதார்த்த நிலை அறிந்த என் விருப்பும் அதுவாகவே இருந்தது. 5 வருடம் முடிய நான் தேரிலா? தெருவிலா? அல்லது விதிப்படி பாடையிலா? தெரிந்தவன் பரமனே. இந்த பாமரன் அல்ல.

(மாதவன் சஞ்சயன்)

அமைதி சமாதானம் ஜனநாயகம்

www.sooddram.com