(மாதவன் சஞ்சயன்)

நல்லாட்சியின் தேவை உணரப்படும் சூழ்நிலை தற்போது நாட்டில் ஏற்பட்டுள்ளது. மக்களுக்கு சேவை செய்ய வேண்டிய அரசியல்வாதிகளை கொண்டதாக அமையவேண்டிய பாராளுமன்றத்தில் அண்மை காலத்தில் ஊழல் பேர்வழிகளும் அதிகார துஸ்பிரயோகம் செய்பவரும் அங்கத்துவம் வகித்ததால் நாட்டில் ஆள் கடத்தல், கப்பம் அறவிடல் போதைபொருள் கடத்தல் போன்றவை பல்கி பெருகியதாக தெரிவித்து அடுத்த தேர்தலில் அவ்வாறான நபர்களுக்கு தேர்தலில் போட்டியிடும் சந்தர்ப்பம் வழங்க கூடாது என நாடுமுழுவதும் 10 லட்சம் பொது மக்களின் கையொப்பம் பெற நடாத்தப்பட்ட மார்ச் 12 பிரகடத்தின் நடவடிக்கை முடிவுக்கு வந்துள்ளது.

ஜனவரி 08 மக்களின் தீர்ப்பின்படி ஆட்சிக்கு வந்த ஜனாதிபதியும் அவரை ஆதரித்த அரசியல் கட்சிகள் மட்டுமல்ல நாட்டின் அனைத்து அரசியல் கட்சிகளும் இன்று தம்மை புடம் போடவேண்டிய நிலைமைக்கு இவர்களின் நடவடிக்கை உந்து சக்தியாக அமையும். ஏனென்றால் பொதுமக்களால் ஏற்பாடு செய்யப்பட்டு அவர்களின் பின் 10 லட்சம் மக்கள் அணிதிரள்வது என்பது சாதாரண விடயமல்ல. கையெழுத்து வைத்த ஒவ்வொருவரும் தங்கள் உள்ளக்கிடக்கையை தான் பதிவு செய்துள்ளனர் என்பது நிதர்சனமானது.

ஜனநாயகத்தில் யார் வேண்டுமானாலும் போட்டியிடலாம் வெல்லலாம்.ஆனால் அதிகார ஆசை, பதவி ஆசை,பணம் சம்பாதிக்கும் நோக்கம் கொண்டவர்களின் கைகளில் அது சென்று சேரும்போது வரம்பு மீறல்கள் ஏற்பட்டு மக்கள் நலன் பின்தள்ளப்பட்டு அவரவர் நலன்கள் முன்னிலை பெறுகிறது. அபிவிருத்தி என்ற பெயரில் அத்துமீறல்கள் நடக்கும். அள்ளித்தெளித்த கோலத்தில் வேலைகள் நடக்கும். அதே வேளை பதுக்கல்களும் பங்கெடுக்கும்.

ஆசியாவின் அதிசயமாக நாட்டை கட்டியேளுப்பியவர்கள் எத்தனை தலைமுறைக்கு வாங்கிய கடனுக்கு மக்களை ஈடுவைத்துள்ளனர் என்ற உண்மை வெளிவரதொடங்கியுள்ளது. அதே வேளை அவர்கள் பதுக்கிய தொகைகளும் இடங்களும் பட்டியல் இடப்படுகின்றன. பல மணிநேர விசாரணைக்கு உட்படுபவர்களும், அதனால் சிறை இருப்பை தவிர்க்க நெஞ்சுவலிவந்து வைத்தியசாலையில் இருப்பவர்களும், விசாரணைக்கு செல்வதை தவிர்க்க பாராளுமன்றத்தில் படுத்துறங்குபவர்களும் என ஒரே அல்லோல கல்லோலம் தான்.
எதிர்வரும் தேர்தலில் நல்லாட்சியின் நாயகனாக பார்க்கப்படும் ஜனாதிபதி முன்னைய பாராளுமன்றத்தில் இருந்த 30 பேருக்கு இதே காரணங்களுக்காக தான் சார்ந்த கட்சிகளில் போட்டியிட அனுமதிக்கமாட்டார் என்ற செய்தி ஒரு நல்ல ஆரம்பபுள்ளியாக தென்படுகிறது. ஏனைய கட்சிகளும் இதனை பின்பற்றவேண்டிய நிலைமை காணப்படுவதால் அவ்வாறு செய்யாதவர்களை மக்கள் தண்டிக்கவேண்டும் என்பதே இந்த 10 லட்சம் கையெழுத்து சொல்லித்தரும் பாடமாக அமையவேண்டும்.

தேர்தல் காலங்களில் இதுபோன்ற மக்கள் விழிப்புணர்வு செயல்பாடுகள் நிச்சயம் மாற்றத்துக்கான அடித்தளமாக அமையும். அரசியல்வாதிகள் செய்யும் ஊழல் பணம் மக்கள் பணம் அவர்களின் அபிவிருத்திக்காக வாழ்வாரத்துக்காக சென்று சேரவேண்டிய பணம். தம் சொந்தப்பணத்தை திருடியவனை என்ன செய்வார்களோ அதையே பொதுப்பணத்தை திருடுபவர்களுக்கும் செய்யவேண்டும். இன்று அரசியல் ஒரு சேவை அல்ல அது வியாபாரம் என்ற நிலைக்கு மாறிவிட்டது. 10 லட்சம் மக்களின் பங்களிப்பில் அனைத்து மக்களும் கரம்கோர்க்க வேண்டும்.

அந்த கூட்டத்தில் உரையாற்றியவர் கடந்த பாராளுமன்றத்தில் 100 பேரளவில் கா பொ த உயர்தரம் கூட சித்தி அடையாதவர்கள் என குறைப்பட்டார். அதனால் தான் அதிகாரிகளை அமைச்சர் மரத்தில் கட்டுவது, தன் கட்சி உறுப்பினருக்கு தண்டனை கிடைத்து விடக்கூடாதென நீதிபதிகளை மாற்றுவது, என காட்டுத்தர்பார் நிகழ்வுகளும் நடந்தன.
படிப்பறிவு முக்கியம்தான் அதே வேளை பட்டறிவும் நல்ல பலாபலன்களை தரக்கூடியது என்பதை மறுக்க முடியாது. மக்கள் நலனில் அக்கறை கொண்டவர்கள் அவர்களின் தேவைகளை பட்டறிவால் செய்துமுடித் துள்ளனர். இந்தியாவின் கிங் மேக்கர் என பெருமையுடன் பேசப்பட்ட பள்ளிப்படிப்பை தொடராத காமராஜர் தான் கிராமங்கள் எல்லாம் பள்ளிக்கூடங்களை திறந்தார். பிள்ளைகளை பள்ளிக்கு வரச்செய்ய மதிய உணவு திட்டத்தை கொண்டுவந்தார்.

அமைதி சமாதானம் ஜனநாயகம்

www.sooddram.com