நீண்ட நாட்களாக காத்திருந்த மக்களுக்கு அவர்களின் வாக்குகள் ஆயுதமாக, அதை பாவித்து தீயதை விலக்கி நல்லதை பதவியில் ஏற்றினார்கள். அதுவரை சமூகவிரோத செயல் நடந்தால் செய்தவரை கைது செய்யும் முன் அவரது அரசியல் பின்புலம் பற்றி ஆராய்ந்தே நடவடிக்கை எடுக்கும் நிலை இருந்தது. அந்த தைரியம் தான் தீவகம் முதல், சாவகச்சேரி, கிளிநொச்சி, கனகராயன்குளம் வரை பாதக செயல்கள் நடந்தபோது கைது செய்யப்பட்டவர் மீது சட்டப்படி நடவடிக்கை எடுக்க முற்பட்ட நீதிபதிகள் கூட இடமாற்றம் செய்யப்பட்டார்கள்.
மக்கள் பயத்தில் அரசல் புரசலாக தமக்குள் மட்டும் தாம் அறிந்ததை பேசிக்கொண்டார்கள். நல்லாட்சி வந்ததால்தான் புங்குடுதீவு வித்தியாவிற்கு நடந்த கொடுமைக்காக மக்களால் வீதிக்குவந்து போரடமுடிந்தது. அல்லது அதுவும் பத்தோடு பதினொன்றாக விசாரணை என்ற பெயரில் கிடப்பில் போடப்பட்டிருக்கும். அந்த சம்பவத்தில் கூட ஒருவரை தப்பவைக்க பதவி அல்லது பணம் முயன்று முடியாமல் போனதும் மக்களுக்கு கிடைத்த வெற்றி தான்.

தலைவன் எவ்வழியோ தொண்டனும் அவ்வழி என்பதுபோல நாட்டின் தலைமையில் ஏற்பட்ட நல்லமாற்றம், தேவைப்பட்ட மாவட்டம் வடக்கு ஆகும். நீண்ட நெடிய யுத்தம் பல சீரழிவுகளுக்கு வித்திட்டு நிர்வாக கட்டமைப்பையே ஆட்டம்காண வைத்துவிட்டது.
அதை சட்டம் ஒழுங்கு மூலம் சீர்படுத்தும் செயலை நீதிமன்றங்கள் கையில் எடுத்திருப்பது நாளாந்த செய்திகளாக வந்த வண்ணம் உள்ளன. வக்கீல் வைத்து வாதாடி பிணையில் வந்து விடலாம் தீர்ப்பு வரும் வரை சுதந்திரமாக நடமாடி திரியலாம் என்ற நிலைக்கு ஆப்பு வைக்கின்றன இப்போது வழங்கப்படும் நீதிமன்ற தீர்ப்புகள்.

அண்மையில் முன்னாள் ஆசிரியர் தன்னிடம் ரியூசன் படித்த மாணவிகளுக்கு பாலியல் இம்சை கொடுத்ததாக கைது செய்யப்பட அவருக்காக வாதாடிய வக்கீல் அவர் நல்லவர் அப்படி செய்திருக்க மாட்டார் என கூறி பிணையில் விடும்படி கேட்க நீதவான் மறுத்துவிட்டார். அதேபோல ஆயுதங்களுடன் திரிந்த வாலிபர்களுக்கும் பிணை மறுக்கப்பட்டது.
இதற்கும் மேலாக தாமே விரும்பி ஏதோ காரணத்துக்காக ஹோட்டலில் ரூம் போட்டு தலை மறைவாக இருந்து தம்மை யாரோ கடத்திவிட்டதாக புரளி கிளப்பிய 2 இளம் பெண்களை விளக்கமறியலுக்கு அனுப்பினார் நீதிபதி. யாழில் பரவலாக காணப்படும் இன்ரநெட் நிலையங்களில் நடைபெறும் சீர்கேடுகளை சீர்செய்ய அவ்வாறு செயல்படும் நிலையங்களுக்கு சீல்வைக்கும் உத்தரவும் நீதவானால் பிறப்பிக்கப்பட்டது.

கல்லூரிகளுக்கு அருகில் ஐஸ்கிரீம் உட்பட தின்பண்டங்கள் விற்பவர்களை கண்காணிப்பதுடன் பாடசாலை தொடங்கும், முடிவடையும் நேரங்களில் கூடி நின்று மாணவிகளை சுமாட் போணில் படம்பிடிக்கும் மன்மத ராசாக்களும் தற்போது கம்பி எண்ணுகிறார்கள். ஆலயங்களில் திருவிழா என்ற பேரில் களியாட்ட நிகழ்ச்சி நடத்துவது, பரீட்சைக்கு படிக்கும் மாணவர்களை குழப்பும் ஒலிபெருக்கி பாவனைத்தடை என அதிரடி நடவடிக்கைள் பெற்றோர் மனதில் நிம்மதியை தந்துள்ளது.சமுதாய சீரழிவோடு வியாபார சீரழிவையும் நீதிமன்றம் கவனத்தில் கொள்வது அண்மைய தீர்ப்பில் தெரிகிறது. இந்தியாவில் இருந்து சுற்றுலா விசாவில் வந்து யாழில் பட்டுசேலை வியாபாரத்தில் ஈடுபட்ட இந்திய வியாபாரிகளை நாடுகடத்தும் நீதிமன்ற உத்தரவு பல லட்சம் முதலீடு செய்து வரிசெலுத்தி இறக்குமதி செய்து வியாபாரம் செய்யும் உள்ளூர் புடவை வியாபாரிகளின் வயிற்றில் பால்வார்த்துள்ளது.

போதைவஸ்த்து கடத்தல்காரர், விற்பவர்கள், கஞ்சா பாவிப்பவர் பொது இடங்களில் மதுபவானை எல்லாவற்றுக்கும் அதிரடி நடவடிக்கை எடுக்கும் கடும் உத்தரவை யாழ் மேநீதிமன்ற நீதிபதி பொலிசாருக்கு வழங்கியுள்ளார். கடந்த காலத்தில் அரசியல் அதிகார தலையீட்டல் கடமையை செய்ய முடியாதிருந்த பொலிஸார் இப்போது தினம் தினம் கஞ்சா கசிப்பு போதைப்பொருள் வியாபாரிகள், சந்திச் சண்டியர்கள், ஆயுத கோஸ்டிகள் என அனைவரையும் கைது செய்து நீதிமன்றத்தில் நிறுத்த பிணை மறுப்புடன் சிறைசெல்கின்றனர் சமூகவிரோதிகள்.

யாழ் பொலிஸ் நிலைய பொறுப்பதிகாரி அரசியல் கட்சிகளிடம் வேட்புமனு தாக்கல் தினத்தன்று பொது மக்களுக்கு இடையூறு விளைவிக்கும் நடவடிக்கையில் ஈடுபட்டால் பாரபட்சமற்ற நடவடிக்கை எடுக்கப்படும் என தெரிவித்திதுள்ளார்  இது முன்பு நடந்த தேர்தல் கால அத்துமீறல்கள் இம்முறை நடக்காது என்ற நம்பிக்கையை வாக்காளருக்கு நிச்சயம் ஏற்படுத்தும். அதனால் வாக்களிப்போர் எண்ணிக்கை அதிகரிக்கும். ஜனநாயகத்தின் அடிப்படை கடமை தேர்தல்களில் வாக்களிப்பது. அதற்கு இனி இடையூறு இல்லை.
கடந்த காலத்தில் நடந்த சமூகவிரோத செயல்கள் அராஜகங்கள் விதிமீறல்கள் என்பவற்றிக்கு தனிப்பட்ட ரீதியில் தனிநபர்கள் மீதோ, கட்சிகள் மீதோ, யாரும் யார் மீதும் குற்றம் சுமத்தி தப்பிக்க முடியாது. நாம் எல்லோரும் எதோ வகையில் தவறிளைத்தவர்களே. சமூகவிரோத செயலில் ஈடுபடுபவரும் நம்மவரே.

இதுவரை அன்னையர் தினம், மகளிர் தினம், காதலர் தினம் கொண்டாடிய எம்நாட்டில் நல்லாட்சியின் நாயகனான ஜனாதிபதி மைத்திரி ஜூலை 9 முதல் ஆகஸ்ட் 8 வரை போதைப்பொருள் ஒழிப்பு மாதமாக பிரகடனப் படுத்தி உள்ளார். அந்த காலத்தை விரிவுபடுத்தி காமபோதை, அதிகார போதை, புகழ் போதை கொண்டவருக்கும் பாடம் படிப்பிக்கும் தினமான ஆகஸ்ட் 17 பொது தேர்தலில் அனைவரும் வாக்களிப்பதன் மூலம் நல்ல தீர்ப்பு எழுத வேண்டும். எமது சமூகத்தின் விடிவுக்கு ஜனவரி 8 ஆரம்ப புள்ளியாகட்டும். தை பிறந்தால் வழிபிறக்கும் என்ற தமிழர் நம்பிக்கை பலிதமாகட்டும். எதிர்வரும் தேர்தல் முடிவு அதற்கு வழிசமைக்கட்டும். இன்றைய சூழ்நிலை தொடருமானால் நாமனைவரும் நிமிர்ந்து நிற்க்கலாம். பாதி தின்கின்ற போதினில் தட்டிப்பறித்தால் மீண்டும் பாழ்பட்டுப்போவோம்.

(மாதவன் சஞ்சயன்)

அமைதி சமாதானம் ஜனநாயகம்

www.sooddram.com