ஏனோ தெரியவில்லை மக்களுக்கு மட்டுமல்ல முன்னாள் போராளிகளுக்கும் புனர்வாழ்வு பெற்றுக் கொடுக்க ஒரே வழி தாம் பாராளுமன்றம் செல்வதுதான் எனும் எண்ணக்கரு, ஆயுதப்போராட்டம்தான் முடிந்த முடிவு என்று புறப்பட்ட அன்றைய இளைஞர்களின் இன்றைய மனதில் பதிந்துவிட்டது. தேர்தல் வந்துவிட்டால் போதும் யுத்தத்தால் பாதிக்கப்பட்ட எம் மக்களுக்காக, எம் முன்னாள் போராளிகளுக்காக, தாம் தான் பாராளுமன்றம் போகவேண்டும் என கூறிக்கொண்டு வாக்கு கேட்க பலர் அணிகளாக களம் இறங்குவார்கள். 1977 வரை தேர்தல் செலவு, போட்டியிடுபவரின் சொந்த பணமாகும். அதனால் தான் அப்போது அமிர்தலிங்கம் ஒவ்வொரு தேர்தலின் போதும் பண்ணாகத்தில் தன் காணிளை ஈடுவைப்பது அல்லது விற்பது போன்ற நிகழ்வுகள் நடந்தேறின.

பாராளுமன்ற அமர்வுகளுக்கு செல்ல இலவச ரயில் பாஸ், அவசர கூட்டங்களுக்கு மட்டும் பலாலியில் இருந்து விமான பயணம். அவர்களில் அநேகமானோர் வக்கீல் தொழிலும் செய்ததால் பாராளுமன்ற சம்பளம் அவர்களுக்கு வெறும் ஜுஜிப்பி. ஆனால் 1977ல் பிரதமராக வந்த ஜே ஆர் பாராளுமன்றங்களின் தாய் (Mother of Parliament) எனும் அபிவுருத்தியடைந்த பணக்கார நாடான பெரிய பிரித்தானியாவின் பாராளுமன்ற சலுகைகளை, அதுவரை பாணுக்கே கியூ வில் நின்ற மக்களுக்கு எதுவும் செய்யாமல் அவர்கள் தேர்ந்தெடுத்த பிரதிநிதிகளுக்கு கொடுத்தார்.

முதலில் அவர் கொடுத்தது மிற்சுபிசி பச்சைகலர் ஜீப்கள். அந்த ஜீப்பில் வந்த எம்பிகளை, கேட்டது தமிழ் ஈழம் கொண்டுவந்தது ஜப்பான் ஜீப் என நக்கலடித்ததும் அன்று இளைஞர்களாக இருந்த இவர்கள்தான். வசதிகள் கூடக் கூட சேவை மனப்பான்மை குறைந்து வியாபார எண்ணம் மேலோங்கியது. ஜே ஆர் கடைப்பிடித்த திறந்த பொருளாதார கொள்கையால் இறக்குமதி கதவு திறக்கப்பட ஆதரவாளருக்கு சலுகைள் பெற்ருக்கொடுக்கும் முன்முயற்சியை தொடங்கினர். அதன் மூலம் கட்சிக்கு நிதி பின் தேர்தல் காலசெலவினம் என பயனடைந்த ஆதரவாளர்கள் தம் பங்களிப்பை செய்தனர்.

ஆயுத போராட்ட காலத்தில் போராளிகளுக்கு உணவு, உடை, தங்குமிட வசதி என்பது பெரும் பிரச்சனையாக இருந்தபோதும் அவர்கள் சோர்ந்து போகவில்லை. கொண்ட லட்சியத்துக்காக அனைத்தையும் தங்கிக்கொண்டார்கள். அது திசை மாறி போனபோது அவர்கள் எடுப்பார் கை பிள்ளை போலானார்கள். பின் ஒப்பந்தத்தை ஏற்க புலிகளுக்கு மாதம் 50 லட்சம் இந்தியா கொடுத்தது. பின்பு நடந்த மாகாண சபை தேர்தலில் போட்டியிட்டவர்களுக்கும் தேவைப்பட்டதை இந்தியாவே கொடுத்தது. எந்த கட்சியின் வேட்பாளரும் தம் சொந்தப் பணத்தில் போட்டியிடவில்லை. ஆயுத போராட்டத்தை கைவிட்ட பின்பு புற்றீசல் போல புறப்பட்டவர்களால் பதியப்பட்ட கட்சிகள் எல்லாமே சம்மந்தப்பட்டவரின் நிதிப்பங்களிபில் தான் பாராளுமன்றம் சென்றன. இதில் எதிரியிடம் பணம், பாதுகாப்பு பெற்றுக்கொண்டு பாராளுமன்றம் சென்றவர்களும் உள்ளடங்குவர். பஜரோக்கள், இன்ர கூளர் வாகனங்கள், பி எம் டபிள் யு, பாராடாக்கள் என தீர்வையற்ற அதிசொகுசு வாகனங்களில், அன்று சாதாரண வசதிகள் கொண்ட ஜீப்பை பெற்றவர்களை நக்கலடித்த அன்றைய இளைஞர்கள் இன்று பவனி வருகின்றனர்.

மக்களின் மறுக்கப்பட்ட உரிமைக்காக ஆயுதமேந்திய இவர்கள் இன்று தாம் நடத்திய யுத்தத்தால் ஏற்பட்ட அழிவுகளுக்கு புனர்வாழ்வு பெறச்சென்ற இடத்தில் தம்மை புனரமைத்துக்கொண்டனர். இன்று அதே பாதையில் தம்மையும் கூட்டிச்செல்லும்படி ஆயுதங்களை மௌனிக்க செய்தவர்களும் விண்ணப்பித்து மறுக்கப்பட்டதால் தனித்து போவதாக அறிக்கை வருகிறது.

தன் எழுத்து எனும் ஆயுதத்தால், தலைவர் விடமாட்டார் புலிகள் தோற்க்கமாட்டர்கள் என பல இளைஞர்களை போராட தூண்டி பலிகொடுத்த மரணவியாபாரி வித்தியாதரனை பாராளுமன்றம் அனுப்பி புனர்வாழ்வு பெறப்போகிறார்களாம். அதனை ஆயிரம் பூக்கள் மலரட்டும் என வரவேற்பவருக்கு தெரியும், அவர்களின் வருகை கூட்டமைப்புக்கு தான் சேதாரம் என்பதும், அதனால் தன் இருப்பு பலப்படும் என்பதும்.
தனித்து போகாதீர்கள் எனது கட்சிக்கு வாருங்கள் என்பவரும் அதனால் கிடைக்ககூடிய வாக்குகளை கொண்டாவது வென்றுவிடலாம் என்ற உள்நோக்கம் கொண்டவரே. மாகாண சபையில் தன் கடமை முடிந்து விட்டதால் இனி பாராளுமன்றம் போக புறப்பட்ட முன்னாள் போராளியின் மனைவி தன் சுயபாதுகாப்பு கருதி இந்த முன்னாள் போராளிகளை அரவணைக்கவில்லை.

இங்கு எழும் கேள்வி யுத்தத்தால் பாதிப்பாடைந்த நிர்க்கதியான பொதுமக்கள் மற்றும் அனைத்து போராளிகளின் புனர்வாழ்வுக்கும் ஒரு சிலரின் பாராளுமன்ற பிரவேசம் தான் தீர்வுதருமா. அப்படி என்றால் எங்களை வெல்லவையுங்கள் யாழ்ப்பாணத்தை சிங்கப்பூராக்கி காட்டுவேன், சொர்க்கவாசலை திறந்து விடுவேன் என கூறி வென்றவரால் அதை நடத்திக்காட்ட முடியவில்லை.

 வடக்கின் வசந்தத்தில் யாழின் பெருவீதிகளில் ஒன்றான ஓட்டுமடம் சந்தி முதல் ஆனைக் கோட்டை, மானிப்பாய், சங்கானை ஊடக காரைநகர் செல்லும் வீதி கூட இன்னமும் காப்பற் வீதியாக மாறவில்லை. ஆற்றில் போவதை அள்ளிக் குடிக்கத்தான் அது பயன்பட்டது. அதற்குத்தான இவர்களும் ஆசைப்படுகிறார்கள் ?

(மாதவன் சஞ்சயன்)

அமைதி சமாதானம் ஜனநாயகம்

www.sooddram.com