பெண்பார்க்கும் நிகழ்வில் தங்கையை காட்டிவிட்டு மணமேடையில் அக்கா அமர்வதுபோல, முன்னாள் புனர்வாழ்வளிக்கப்பட்ட புலிகளை காட்டியும் மலையக பாட்டாளி மக்களை காட்டியும், தாம் பாராளுமன்றம் செல்ல தயாராகிவிட்டார்கள் தம்மை ஊடகவியலாளர்களாக அடையாளப்படுத்தும் வித்தியும், ரங்காவும். தன் பின்னால் முன்னாள் புலிகள் இருப்பதை காட்டி செய்த பேரம் படியாததால், தன் முயற்சியில் மனம் தளராத விக்ரமாதித்தன் போல அவர்களுக்கு தலைமை தாங்கும் சாட்டில் சுயேட்சையாக களம் காணவருகிறார் வித்தி.
புலிகளின் ஆயுத மௌனிப்புக்கு பின் வட மாகாண சபைக்கு தானே முதல்வர் வேட்பாளர் என செய்திகளை பரவவிட்ட வித்தி, இடையில் வந்த பாராளுமன்ற தேர்தலில் குறிவைத்தார். அப்போது கூட்டமைப்பு அவருக்கு ஆசனம் தர முன்வந்தபோது அதற்கு தடையாக வந்தது அவரது மைத்துனர் சப்ரா சரவணபவன். உதயன் உரிமையாளரின் தயவு தேவை என்பதால் மாகாண முதல்வர் பதவி உமக்குத்தான் என கூறி வித்தியை மைத்துனருக்கு விட்டுக்கொடுக்க செய்தார்கள். வித்தி சம்மதித்தாலும் அதுவரை ஆசிரியராக தான் கடமையாற்றிய உதயனை விட்டு விலகினார்.

வட மாகாண சபை தேர்தல் வந்தபோது முதல்வர் வேட்பாளராக விக்னேஸ்வரன் அறிவிக்கப்பட்டதால், அந்த பதவிக்கு காத்திருந்த வித்தி கோபத்தில் அந்த கட்சியின் கொழும்பு கிளையில் இருந்து பதவி விலகினார். இலவு காத்த கிளி நிலையில் என் எழுத்து ஆயுதம் எனும் புத்தகத்தில் புலிகளுக்கு தான் வழங்கிய ஆதரவை எழுத்தில் வடித்தார். புலம்பெயர் நாடுகளில் அதை வெளியிட்டு மேடைப்பிரசங்கம் செய்து தன் எதிர்கால திட்டத்துக்கு அத்திவாரம் இட்டார். அதுதான் எஞ்சிய புலிகளை கொண்டு ஒரு அரசியல் இயக்கம் தொடங்குவது, அதன்மூலம் தன் பாராளுமன்ற பிரவேசத்தை உறுதி செய்வது.

அதற்கான தயாரிப்பு வேலைகளை செய்தவரிடம் நிருபர்கள் தேர்தலில் போட்டியிட போகிறீர்களா எனக்கேட்ட போது, அது உடனடி சாத்தியமில்லை தற்போது புனர்வாழ்வளிக்கப்பட்ட புலிகளை ஒருங்கிணைப்பது மட்டுமே தனது செயல்பாடு என கூறினார். அப்போது வித்திக்கு தெரியாது மகிந்தர் தனது பதவிக்காலம் முடியும் முன்பே தேர்தலை வைத்து மண்கவ்வி அதனால் வந்த நல்லாட்சி 1வருட காலத்துக்கு முன்பே பொது தேர்தலை நடத்துமேன்று. பொறுமையாக காரியம் சாதிக்க நினைத்தவருக்கு கலக்கம் ஏற்பட, அவசரகதியில் கூட்டமைப்பில் ஆசனம் கேட்டு புனர்வாழ்வு பெற்ற புலிகளின் போர்வையில் பேரம் பேசி மூக்குடைபட்டார்.

உண்மையில் இவர் புலிகளை பிரதிநிதிப்படுத்தவில்லை. தன்னை நிலை நிறுத்த, தான் பாராளுமன்றம் போகவே புலித்தலைவன் ஆகிறார். அவ்வாறில்லை எனில் அதை நிரூபிக்க தேர்தல் பரப்புரையில், அவரது சுயேட்சை குழு சின்னமான சிலந்திக்கு வாக்களித்து விருப்பு வாக்கில் தனது இலக்கத்தை தவிர்த்து, புலி போராளிகளுக்கு வாக்களிக்கும் படி மக்களிடம் வேண்டிக்கேட்பாரா ? அப்போது நிரூபணமாகும் இவர் இதய சுத்தியுடன் வந்துள்ளாரா அல்லது தனது நீண்டகால கனவை நனவாக்க வந்துள்ளாரா என்பது. தனது எழுத்து மூலம் பலரை ஆயுதம் எந்த செய்தவர் அதில் ஒருவரையாவது பாராளுமன்றம் செல்ல செய்வாரா இந்த ஊடகப்புலி. வெறுமனே அவர்களுக்கு அரசியல் ஞானம் போதாது மொழியாற்றல் இல்லை என சாக்குப்போக்கு சொல்ல கூடாது.

ஏற்கனவே பல முன்னாள் போராளிகள் பாராளுமன்றம் சென்று ஆற்றும் கனதியான உரைகளை பார்த்துள்ளோம். மொழி ஒரு பிரச்சனையே கிடையாது பெரும்பாலும் சிங்கள உறுப்பினர் தமது மொழியில் பேசும் போது எமது உறுப்பினர் மட்டும் ஆங்கிலத்தில் பேசவேண்டிய அவசியமில்லை. உடனடி மொழி பெயர்ப்பு வசதி மற்றும் ஹன்சாட் இருக்கிறது. ஆகவே ஒருங்கிணைப்பளராக மட்டும் வித்தி செயல்ப்படுவார இல்லை சுயநலமாக செயல்ப்பட்டு கூட்டமைப்பின் வாக்கை சிதறடிப்பரா?

ரங்கா அவரை விட கில்லாடி. வித்தி புலிகளுடன் சென்று கூட்டமைப்பில் இடம் கேட்டால் ரங்கா பாட்டாளி மக்கள் தன் பின்னால் எனசக்தி ரிவி யில் பூச்சாண்டி காட்டியே தேசியப்பட்டியலில் இடம் பிடித்துவிட்டார். தேர்தல் அறிவிக்கபட்ட தினம் தொடக்கம் சக்தி ரிவி செய்தியில் ரங்கா பற்றிய செய்தி வராத நாளோ, அல்லது வன்னிமாவட்ட குறைபாடுகள் பற்றிய செய்திகளோ, அல்லது மலையகத்தில் வாழ்கின்ற மக்களின் பிரச்சனைகள் பற்றிய செய்திகளோ வராத நாளே இல்லை. இங்குதான் அவரது கில்லாடித்தனம் அவருக்கு வெற்றியை தந்தது.

இந்த நாட்டில் ஏற்கனவே பதியப்பட்டிருந்த சிங்கள கட்சியை ஏதோ பொருள் வாங்குவது போல பல லட்சம் பணம் கொடுத்து வாங்கி அதன் தலைவராக மாறிய ஒரே ஒரு அரசியல்வாதி ரங்கா மட்டுமே. பு ரவசி பெரமுன என்ற கட்சிதான் பிரஜைகள் முன்னணி. அதை வாங்கிய ரங்கா ராஜமகேந்திரனின் (மகராஜாநிறுவன தலைவர் ) செல்லப்பிள்ளை. ரணிலின் தத்துப்பிள்ளையாக யு என் பி கூட்டில் இணைந்து 2010 தேர்தலில் நுவரேலியா மாவட்டத்தில் வென்று பாராளுமன்றம் சென்றார்.

அந்த தேர்தலுக்கு முன்பும் மலையக மக்களின் பிரச்சனைகளை மையப்படுத்தியே அவரது மின்னல் நிகழ்ச்சி உட்பட சக்தி ரிவி செய்திகளும் அமைந்தன. ஊடக வலிமையால் வென்று வந்த ரங்கா மகிந்தரின் உள் வீட்டு பிள்ளையாவார். நாமலுடன் கிளிநொச்சி வவுனியா முல்லைத்தீவு மன்னார் என கூடிக்குலவி திரிந்தார். அதேவேளை தனக்கு ஒதுக்கப்பட்ட நிதியில் பல கலாச்சார மண்டபங்களையும் தனது தொகுதியில் கட்டிக்கொடுத்து மாணவர் கல்விக்கும் பெண்கள் சுயதொழிலுக்கும் அதனை பயன்படசெய்தார். அதைச்சொல்லியே ஏனைய மலையக அரசியல் வாதிகளை தன் நிகழ்ச்சி மூலம் தாறுமாறாய் விமர்சனமும் செய்தார்.

இவரின் இந்தப்போக்கால் இம்முறை அவரை தமது கூட்டில் இணைக்க ரணில் விரும்பவில்லை. மின்னலின் தாக்குதல் ரணிலுக்கு எதிராக திரும்பியது. கட்சிகளை உடைப்பதில் ரணிலுக்கு நிகர் ரணிலே என தான் நடத்தும் தனது நிகழ்ச்சி மூலம் ரணிலை விமர்சித்தார். அதேவேளை இனக்கலவரங்களால் மலையகத்தை விட்டு வெளியேறி வன்னியில் குடியேறிய மக்களின் மீட்பராக தன்னை முன்னிலைப்படுத்தி சக்தி ரிவி நியூசில் அங்கு வாழும் மலையகத்தில் இருந்து வந்து குடியேறிய மக்களை ரங்கா சேர்தான் எங்களுக்கு வேணும் என சொல்லவைத்தார். ஊடகத்தை வைத்து அரசியல் நடத்துவதில் ரங்காவுக்கு நிகர் ரங்காதான்.

வன்னியிலும் நுவரேலியாவிலும் அவரது பிரைஜைகள் முன்னணி போட்டியிடும் என, தேர்தல் அறிக்கை வந்தது முதல் தினம் தினம் சக்தி செய்தி வாசித்தது. இப்போது வவுனியாவிலும் நுவரெலியாவிலும் பிரஜைகள் முன்னணி போட்டியிடுகின்றது. ரங்கா போட்டியிடாமலே பாராளுமன்றம் செல்வதை உறுதி செய்து கொண்டார். ஐக்கிய மக்கள் சுதந்திர முன்னணி தேசியப்பட்டியலில் உள்ள 9 தாவது பெயர் ஜெயரத்தினம் ஸ்ரீ ரங்கா. மலையகத்தில் உள்ள ஆதரவையும் வன்னியில் வாழும் அவர்களின் உறவுகளுக்கு தான் மலையகத்தில் செய்த சேவைகளையும் காட்டி பிரஜைகள் முன்னணியில் அவர்களை போட்டியிடவைத்து ஆசனம் கிடக்காவிட்டலும் நுவரேலியாவில் யு என் பி க்கு கிடைக்க கூடிய வாக்குகளை குறைத்தும் வன்னியில் கூட்டமைப்பு மற்றும் ரிசாத் பதியுதீனுக்கு கிடக்கும் வாக்குகளை சிதறடித்தும் ஜனாதிபதி தேர்தலில் தோற்ற பின் என்னை தோற்கடித்தது வடக்கு கிழக்கு மலையக தமிழரும் முஸ்லிம்களும் என கூறிய மகிந்தவின் மனப்புண்ணுக்கு மருந்திடவே ரங்காவின் இந்த தில்லாலங்கடித்தனம். அதற்கான பிரதியுபகாரமே தேசியப்பட்டியலில் நவக்கிரக நிலை (9 வது பெயர்)
"ஊடக தர்மம் என்று ஒண்டு உண்டாம். அது தனக்கு தனக்கென்றால் படக்கு படக்கு என்று அடிக்குமாம்".
(மாதவன் சஞ்சயன்)

அமைதி சமாதானம் ஜனநாயகம்

www.sooddram.com