(மாதவன் சஞ்சயன்)
வடக்கில் யாழ் தேர்தல் மாவட்டத்தில் எதிர்வரும் ஆகஸ்ட் 17ல் இடம்பெறும் தேர்தல் வாக்களிப்பு ஒப்பீட்டளவில் 1977ல் இருந்து 2010 வரை இடம்பெற்ற தேர்தல் வாக்களிப்பு தினங்களை விட ஆரோக்கியமானதாக அமையும் போலத்தான் தெரிகிறது.
காரணம் சட்டத்துறையின் இரு கண்களான நீதிமன்றங்களும், பொலிசாரும் அரசியல் அழுத்தங்களுக்கு உட்படாமல் சுதந்திரமாக பக்கச்சார்பின்றி நடப்பதற்க்கான அறிகுறிகள் தென்படுகின்றன. தேர்தல் விதிமுறைகளை மீறுபவர்கள் வேட்பாளராக இருந்தாலும் தேர்தல் முடியும்வரை பிணை மறுப்பு என்ற நீதிமன்ற அறிவிப்பு, பொது போக்குவரத்து நிலையங்கள் வாகனங்களில் தேர்தல் விளம்பரம் ஒட்டப்பட்டால் கவலாளிகள், ஓட்டுனர், நடத்துனர் மீது நடவடிக்கை எடுக்கப்படும் என்ற பொலிஸ் பொறுப்பதிகாரியின் அறிவுறுத்தல் என்பன இந்த ஆரோக்கியமான வாக்களிப்புக்கு வழி வகுக்கும் என எதிபார்க்கலாம்.

மேலும் நாட்டின் ஜனாதிபதி, தான் தேர்தலில் நடுநிலை வகிக்கப்போவதாக தெரிவித்திருப்பது வெறுமனே தென்னிலங்கை தேர்தல் களத்துக்கு மட்டுமல்ல முழு நாட்டுக்குமாகவே பார்க்கப்பட வேண்டும். நாட்டின் பாதுகாப்பு என்ற வகையில் பாராளுமன்றம் கலைக்கப்பட்டாலும் காபந்து அரசில் உள்ளவர்கள் தான் நல்லாட்சிக்கான பங்காளிகளாக இருப்பதால் கடந்த கால தேர்தல் வன்முறைகளை அவர்கள் அனுமதித்தால் மக்கள் தீர்ப்பு வேறுவிதமாகிவிடும். முப்படைகளின் தளபதியான ஜனாதிபதி அறிவித்துள்ள பக்கச்சார்மின்மை அவ்வாறன செயல்களுக்கு இடமளிக்காது எனவும் எதிர்பார்க்கலாம்.

யாழ் தேர்தல் மாவட்டத்தில் 1977ல் (அப்போது 11 தேர்தல் தொகுதிகளாக இருந்தது) தமிழ் ஈழம் என்ற உத்வேகத்தில் மக்கள் வாக்களித்தனர். 1989ல் சமாதானப்படை தாக்கத்தில் வாக்களித்தனர், 1994ல் புலிகள் பகிஸ்கரிக்க கொத்தணி முறையில் தீவகத்தில் மட்டும் வாக்குகள் போடப்பட்டன, 2000, 2002 தேர்தல்களில் அரசபடைகளின் அனுசரணையுடனான கெடுபிடிகள் தலையீடுகள் , 2004ல் புலிகளின் ஆளுமை, 2010ல் மத்திய அரசின் அனுசரணையுடனான அதிகாரம் இராணுவத்தினரின் கெடுபிடிகள் போன்ற புறக்காரணிகள் வாக்களிக்கும் மக்களின் மனநிலையில் செல்வாக்கு செலுத்தின.

கடந்த தேர்தல்களில் நடந்த சம்பவங்களில் முக்கியமானது வேட்பாளர்களின் மீதான படுமோசமான தாக்குதல். தெரிவு செய்யப்பட்ட பாராளுமன்ற உறுப்பினர்கள் மண்டையுடைந்தும், கைகள் கால்கள் முறிந்தும் சக்கர நாற்காலியில் பாராளுமன்றம் சென்ற காட்சி ஒன்றே பின் நாளில் பலரின் தேர்தலில் போட்டியிடும், வாக்களிப்பில் பங்கு பெறும் ஆர்வத்தை குறைத்தது. முன்பு ஆதரவாளர்கள் மோதிக்கொள்ளும் சம்பவங்கள் வெறுப்பேற்றினாலும் வேட்பாளர்கள் மீதே தாக்குதல் நடத்தும் அராஜக கலாச்சாரம் ஆரம்பிக்கப்பட்ட பின் தான் மக்களின் மனநிலை மாற்றமடைந்தது. மக்களால் தரப்பட்ட அதிகாரத்தை துஸ்பிரயோகம் செய்ததே, அரசியலே வேண்டாம் என பலரை ஒதுக்கியது.

யாழ் சமூகத்தை பின்னோக்கி பார்த்தால் தன் சொந்தக்காலில் நிற்பவர்களே மிகமிக பெரும்பான்மை. தேர்தலில் வாக்களித்த பின் அடுத்த தேர்தல் வரை தான் எந்த கட்சிக்கு, வேட்பாளருக்கு வாக்களித்தனரோ அவரை தம் சொந்த தேவைக்கு தேடிச்செல்லும் வழக்கம் அவர்களிடம் இருப்பதில்லை. தாம் வாக்களித்தவர் இனத்தின் உரிமைகளுக்காக, முன்னேற்றத்துக்காக எதை செய்கிறார்கள் என அவதானிப்பதேடு சரி. மற்றப்படி தனது தோட்டம், வயல், வியாபாரம், உத்தியோகம் என தமது அலுவல்களுக்கு மீண்டு விடுவார்கள்.
அவர்களுக்கு சலுகைகள் தேவைப்படவில்லை.

நீண்ட நெடிய யுத்தம் தான் நிலைமையை மாற்றிவிட்டது. ஏற்படுத்தப்பட்ட அழிவுகளில் இருந்து மீண்டுவர அவர்களுக்கு ஆதரவு தேவைப்படுகிறது. அதற்காக அவர்கள் அடிபணிந்து செல்லவும் தயாரில்லை. சலுகைகளுக்காக தன்மானத்தை விட்டுவிடவும் அவர்களால் முடியாது. ஆனால் சொந்த மண்ணில் அகதியாய் வாழ்தையும் அவர்கள் விருப்பவில்லை. அதனால் அதனைப்பயன்படுத்தி ஊடுருவம் அரசியலுக்குள் அவர்கள் அகப்படும் நிலை அண்மைவரை தொடர்கிறது. அண்மையில் தென்னிலங்கையில் ஏற்பட்டிருக்கும் மாற்றம் (எதிர்கட்சியும் ஆளும்கட்சியும் இணைந்து செயல்ப்படும் அரசு ) இந்த தேர்தலின் பின்பும் தொடரும் என்ற ஜனாதிபதியின் உறுதியான நம்பிக்கை, இன்று யாழ் தேர்தல் மாவட்டத்தில் உறங்குநிலையில் இருக்கும் அதிகார துஸ்பிரயோக செயல்கள் போன்ற சூழ்நிலை, தெளிவான முடிவெடுக்கும் மனநிலையை மக்கள் மனதில் நிச்சயம் தோற்றுவிக்கும்.
வாக்களிப்பு வீதமும் அதிகரிக்கும் என எதிர்பார்க்கலாம்.

அதனால் இம்முறை தேர்தல் பலகட்சிகளின் உண்மை நிலையை அவர்கள் பெறும் வாக்குகள் மூலம் வெளிப்படுத்தும். ஏனெனில் மற்றவர் புகமுடியாத அலிபாபா கோட்டைகளுக்கான பாதைகள் இப்போது அனைவருக்கும் திறந்து விடப்பட்டுவிட்டன. இது நம்ம ஏரியா உள்ளே வாராதே எனும் அராஜகத்தை இம்முறை அரங்கேற்ற முற்பட்டால் பிணைமறுப்பு எனும் சிறைக்கதவை திறந்திடு சீசே என அலிபாபா கத்தினாலும் (அதிகாரம் இல்லாததால் ஆணையிட முடியாது) ஆகஸ்ட் 17 தேர்தல் தினத்துக்கு பின் தான் அராஜகம் புரிவோருக்கு சிறைக்கதவு திறக்கும்.
(மாதவன் சஞ்சயன்)

அமைதி சமாதானம் ஜனநாயகம்

www.sooddram.com