சகடமுனியின் விகடசங்கடம் – 3

காணாமற் போனோர் தொடர்பான ஆணைக்குழு பற்றி..

(முனிதாசபூதன்)

செய்தி: கடந்த யுத்தகாலத்தின் போது வடக்கு கிழக்கில் காணாமற் போனோர் தொடர்பான ஒரு விசாரணை ஆணைக்குழுவை அமைக்கும்படி ஜனாதிபதி அவரது செயலாளர் லலித் வீரதுங்காவுக்கு உத்தரவிட்டுள்ளார். திரு லலித் வீரதுங்கா அவர்கள் கடந்தகால அநுபவங்களிலிருந்து பாடங்களைக் கற்றுக் கொள்ளல் மற்றும் நல்லிணக்கத்துக்கான ஆணைக்குழுவின் பரிந்துரைகளை நடைமுறைப்படுத்துவதற்கான கமிட்டிியின் பிரதான உறுப்பினருமாவார். இது தொடர்பாக தமிழ்த் தேசியக் கூட்டமைப்பின் தலைவர்களில் பிரதம பேச்சாளரான திரு சுரேஷ் பிரேமச்சந்திரனிடம் கருத்துக் கேட்டபோது அவர் இந்த ஆணைக்குழுவை தமிழர்களோ தமிழ்த் தேசியக் கூட்டமைப்போ அங்கீகரிக்க மாட்டாது என அறிவித்திருப்பதாக இலங்கையின் பிரதான ஆங்கில வாரப் பத்திரிகைகளில் ஒன்றான சண்டே லீடர் செய்தி வெளியிட்டுள்ளது. திரு.சுரேஷ் பிரேமச்சந்திரன் அவர்கள் மேலும் குறிப்பிடுகையில் இந்த ஆணைக்குழுவில் யார் யார் நியமிக்கப்படப் போகிறார்கள் என தமக்குத் தெரியும் என்றும் அது இராணுவ அதிகாரிகளையோ அல்லது அரசியற் கையாட்;களையோ கொண்டதாகத்தான் இருக்கும் என்றும் ஆரூடம் கூறியுள்ளார். அத்துடன் கடந்த இரண்டு வருடங்களாக இதில் அக்கறை காட்டாத அரசாங்கம் இப்போது ஐக்கிய நாடுகள் சபையின் மனித உரிமைகளுக்கான உயர்ஸ்தானிகர் இலங்கைக்கு வரவிருக்கும் வேளையில் எதற்காக இந்த அரசாங்கம் அக்கறை காட்டுகிறது என கேள்வியும் எழுப்பியுள்ளார். மேலும் அரசாங்கம் வீணான செலவுகள் செய்து இந்த ஆணைக்குழுவை அமைத்து காலத்தை ஏன் விரயம் செய்ய வேண்டும் என்றும் அவர் அக்கறையோடு கேள்வியெழுப்பியுள்ளதையும் அச்செய்தி தெரிவிக்கின்றது

முனியின் சங்கடம்: கடந்தகால அநுபவங்களிலிருந்து பாடங்களைக் கற்றுக் கொள்வதற்கும் நல்லிணக்கத்துக்குமான ஆணைக்குழுவின் பரிந்துரைகளை நிறைவேற்றும்படி சர்வதேசநாடுகள் இலங்கை அரசை வலியுறுத்த வேண்டித்தான் இவர்கள் டெல்லி, வாஷிங்டன், லண்டன், ஜெனீவா எனச் சென்று வேண்டிக் கொண்டார்கள். அதை அரசாங்கம் செய்யவில்லை என்று அடிக்கடி குறையும் சொன்னார்கள் குற்றமும் சாட்டினார்கள். இப்போது ஜனாதிபதி காணாமற் போனவர்கள் தொடர்பான விசாரணைகளை நடத்துவதற்கென ஒரு விசாரணை ஆணைக்;குழுவை அமைப்பதற்கு உத்தரவிட்டுள்ளதை எதிர்க்கிறார்கள். கற்றுக்கொள்வதற்கும் நல்லிணக்கத்துக்குமான ஆணைக்குழு அமைக்கப்பட்ட காலத்திலும் இப்படித்தான் இவர்கள் பயனற்றது முறையற்றது எனக் கூறினார்கள். அந்த ஆணைக்குழுவின் முன்னால் சென்று கடந்த காலங்களில் நடந்தவைகள் தொடர்பாக தமது வாக்குமூலங்களைப் பகிரங்கப்படுத்துவதற்குத் தயாராக இல்லாமல் அதனைப் புறக்கணித்து, தமது புறக்கணிப்புக்கான நியாயங்களையும் கூறினார்கள். பின்னர் அதே ஆணைக்குழுவின் பரிந்துரைகளை நிறைவேற்றும்படி கேட்டு நாடுநாடாகத் திரிந்தார்கள். தாங்கள் சொன்னபடி கேட்டுத்தான் அமெரிக்கா ஜெனீவாவுக்கு திர்மானத்தைக் கொண்டு வந்தது இந்தியா தம்மைக் கேட்டுததான் அதற்கு ஆதரவளித்தது என தமது சர்வதேச முக்கியத்;துவம் வாய்ந்த வல்லமைகளையும் யாழ்ப்பாணப் பத்திரிகைகள் மூலமாக அனைத்து உலக சமூகங்களுக்கும் சொல்லிக் காட்டி தமது தீர்க்கதரிசனம் பற்றி பெருமிதம் கொண்டார்கள்.

ஒரு விடயம் தொடர்பான விசாரணை ஆணைக்குழுவை அமைக்கும் எந்தவொரு அரசாங்கமும் தனக்குச் சரியானவர்கள் எனப்படுபவர்களை நியமிப்பதே வழக்கம். இது பொது அறிவு. நாளை இவர்கள் அமைக்கப் போகும் வடக்கு மாகாணசபை அரசாங்க ஆட்சியில் நடக்கப்போகும் ஊழல்கள் மற்றும் நிதிமோசடிகள் தொடர்பாகவோ அல்லது வேறு பாரதூரமான விடயங்கள் காரணமாகவோ ஒரு விசாரணை ஆணைக்;குழுவை அமைக்கும்படி நெருக்கடி ஏற்பட்டால் தமிழ்த் தேசியக் கூட்டமைப்பினர் தங்களுக்குச் சரியெனப்பட்டவர்களைத் தானே நியமிக்கப்போகிறார்கள்.

இவர்கள் கூறுவதுபோல இன்றைய சூழலில் சர்வதேச சமூகத்துக்குக் காட்டவே இந்த ஆணைக்குழு அமைக்கப்பட உள்ளது என்று பார்த்தாலும் இராணுவ அதிகாரிகளையோ அல்லது அரசியற் கையாட்களையோ நியமிக்கும் அளவுக்கு அரசாங்கம் முட்டாள்த்தனமாக நடந்து கொள்ளப்போவதில்லை என்பதுவும் சாதாரண பொது அறிவு.  அதில்; இளைப்பாறிய முன்னாள் நீதிபதிகளையோ அல்லது பொதுவாக பகிரங்கத்தில் நன்மதிப்பைப் பெற்ற பிரமுகர்களையோதான் அரசாங்கம் நியமிக்கும் என்பதில் சந்தேகமில்லை.

ஆணைக்குழுவை அரசாங்கம் எதற்காக இந்த நேரத்தில் அமைக்க உள்ளது அதன் மூலம் அரசாங்கம் எதனைச் சாதிக்க உள்ளது என்ற கேள்விகளுக்கு முக்கியத்துவம் கொடுப்பதை விட காணாமற் போன தங்களது பிள்ளைகள் பற்றியும் கணவன்மார் பற்றியும் தந்தையர் பற்றியும் கடந்த பல ஆண்டுகளாக எந்தத் தகவலும் தெரியாமல் கண்ணீரில் வாழ்ந்து கொண்டிருக்கும் தாய் தந்தையர்கள் பெண்கள் மற்றும் பிள்ளைகள் தங்கள் உறவுகளுக்கு என்ன நடந்தது என்பதைக் கேட்டு  இந்த ஆணக்குழுவில் தாமே நேரடியாகக் குரலெழுப்ப முடியும். தாங்கள் அறிந்த கட்டம் வரை தங்கள் உறவுகளைக் கடத்தியவர்கள் யார்? காணாமற் பண்ணியவர்கள் யார்? அவை தொட்ர்பாக தம்மால் சந்தேகிக்கப்படுபவர்கள் யார்? என்பதையெல்லாம் பகிரங்கமாக இந்த ஆணைக்குழு மூலம் உலகற்pய வெளிப்படுத்த முடியும.

அதனால் வெளியிடப்படும் தொகுப்பாவணம் அல்லது இந்த ஆணைக்குழுவின் முன் பாதிக்கப்பட்டவர்கள் வெளிப்படுத்தும் சாட்சிய வாக்குமூலங்களைத் தொகுப்பவர்களால் வெளிக்கொணரப்படும் ஆவணங்கள் ஒரு பெரும் அவலத்தின் உண்மைகளை வெளிக்கொண்டு வருபவையாக அமையும். எனவே அப்படியான ஒரு சந்தர்ப்பத்தை எதற்காக தமிழ்த் தேசியக் கூட்டமைப்பு புறக்கணிக்க வேண்டும்@ தமிழர்கள் ஏன் அதனை அங்கீகரிக்கக் கூடாது@ பாதிக்கப்பட்டவர்கள் அந்த ஆணைக்குழு முன்னால் ஏன் தமது சாட்சியங்களை அளிக்கக் கூடாது என தமிழ்த் தேசியக் கூட்டமைப்பு கோர வேண்டியதன் அவசியம் என்ன என்று தெரியாமல் தலை சுற்றி நிற்கிறது சகடமுனி.

உண்மையில், காணாமற் போனோர் தொடர்பாக அரசாங்கத்திடமுள்ள விபரங்கள் வெளியிடப்பட வேண்டும் எனக் கோருகின்ற அதேவேளை ஏற்கனவே பதின் மூன்று பாராளுமன்ற உறுப்பினர்களையும் கிழக்கு மாகாணத்தில் பதினொரு மாகாணசபை உறுப்பினர்களையும் உள்ளுராட்சி மட்டத்தில் ஐந்நூறு பேருக்கு மேல் உறுப்பினர்கள் வேட்பாளர்கள் எனவும்  கொண்டிருக்கும் தமிழ்த் தேசியக் கூட்டமைப்பு யுத்தம் முடிந்து கடந்த நான்கு ஆண்டுகளுக்குள் தன்சொந்த முயற்சிகளின் மூலம் வடக்கு கிழக்கில் கடந்த முப்பது ஆண்டுகால யுத்தத்தில் காணாமல் ஆக்கப்பட்டோரின் பெயர் இடம் காலம் மற்றும் சம்பவங்கள் தெரிந்தவர்கள் தரும் விபரம் என முழுத் தகவல்களையம் திரட்டி ஒரு பேராவணத்தை வெளிக் கொண்டு வந்திருக்க முடியும். தாம் வாக்கு வேண்டிய மக்களுக்காகச் செய்ய வேண்டியதைச் செய்யாதது மட்டுமல்ல இப்போது அப்படியொரு ஆவணம் வெளிவருவதற்கு வாய்ப்பைத்தரக்கூடிய ஒரு ஆணைக்குழுவையும் வேண்டாம் என்கிறார்கள்.

சிலவேளை இந்த ஆணைக்குழு ஊடாக வெளிவரும் பகிரங்க சாட்சியங்களால் புலிகளாற் கடத்தப்பட்டுக் காணாமற் போன விடயங்களும் விபரங்களும் உலக வெளிச்சத்துக்கு வந்து விடுமோ என்று திரு சுரேஷ் பிரேமச்சந்திரன் கவலை கொள்கிறாரா? அல்லது காணாமற் போனோர் தொடர்பாக பொத்தாம்பொதுவாக அரசுக்கு எதிராக நாலு சுலோகங்களை பத்து மட்;டைகளில் எழுதி ஏந்தி அவ்வப்போது ஐந்து மணித்தியால உண்ணாவிரதம் நடத்தும் இவர்களுக்கு அந்த சுலோக மட்டைகள் இந்த ஆணைக்குழுவின் செயற்பாடுகளுக்கப் பின்னர் பயனற்றுப் போய்விடுமே என்று கவலை கொள்கிறாரா என்று கேள்விக்கு மேல் கேள்விகள் எழும்ப ஒன்றும் புரியாமல் நிற்கிறது சகடமுனி.

(நன்றி: தேனி இணையம்)