(அர்வின். ஜீ)

செய்தக்க அல்ல செயக் கெடும்
செய்தக்க செய்யாமை யானுற் கெடும்
- திருக்குறள்.

இலங்கை ஜனாதிபதித் தேர்தலில் வெல்லப்போவது தற்போதைய ஜனாதிபதி மகிந்தவா? அல்லது முன்னாள் அமைச்சர் மைத்திரியா? ஜனவரி 09ம் திகதி தெரிந்துவிடும். மகிந்தவும் மைத்திரியும் நல்ல நண்பர்கள். இப்போது எதிர் எதிராக மக்கள் முன் ஜனாதிபதி வேட்பாளர்களாக நிற்கிறார்கள். தேர்தலின் பின் இவர்கள் இருவரும் தொடர்ந்து நண்பர்களாக இருப்பார்களா? அல்லது வென்றவர் தோற்றவரை பழிவாங்குவாரா? இதற்கும் புதிய ஜனாதிபதி அறிவிக்கப்பட்ட பின்னர் தெரிந்துவிடும்.

மகிந்த ராஜபக்ச தொடர்ந்தும் ராஜபரிபாலணத்தை தலைமையேற்று நடாத்துவதற்கு மூன்றாவது முறையாகவும் விருப்பம்கொண்டுள்ளார். கடந்தகால அவரது ஆட்சிக்காலத்தில் சில அபிவிருத்திகள் நடைபெற்றாலும் பல பாதகமான சம்பவங்களும் நடந்திருக்கின்றன.

தமிழ் மக்களின் பிரச்சினை தொடர்பாக எந்த தீர்வும் எட்டப்படவில்லை என்பதும் முஸ்லீம் மக்களுக்கு எதிரான சிங்கள பௌத்த அடாவடித்தனமும் முஸ்லீம், தமிழ் - சிங்கள மக்களின் பெரும் ஏமாற்றமான அமைந்தது.

ஊடகச் சுதந்திரத்தைப் பொறுத்தவரை யுதத்தத்தின் போது நடைமுறையில் இருந்த கட்டுப்பாடு பின்னர் தளத்தப்படவில்லை. மாறாக அது அச்சுறுத்தும் அளவுக்கு வளர்ந்துவந்தது.

மேலும் ராஜபக்ச அங்கத்தவர்களின் அதிகார துஸ்பிரயோகம் மற்றும் அரசியல் அடாவடித்தனம். இவ்வாறான செயற்பாடுகள் சராசரி மனிதனுக்கு அதிகாரத்தின் மீது வெறுப்பை ஏற்படுத்தும் என்பதும் அதற்கெதிராக தனது உரிமையைப் பாவிக்கும் என்பதும் சமூகவிஞ்ஞானம்.

இதனால் பிரதான பொதுவேட்பாளர் மைத்திரிபால சிறிசேன, பிரதான எதிர்க் கட்சியான ஐக்கிய தேசிய கட்சியின் பின்பலத்துடன் ஜனாதிபதித் தேர்தலில் நிறுத்தப்பட்டுள்ளார். இதற்கு பௌத்த சிங்கள பிற்போக்கு சக்திகளும் இடதுசாரிகள் எனத் தம்மைக் கூறிக்கொள்ளும் ஜேவிபியும் ஆதரவினைத் தெரிவித்துள்ளன. மேலும் பல முற்போக்கு பிற்போக்கு உதிரிகளும் ஆதரவினைத் தெரிவித்திருக்கிறார்கள்.

பொது வேட்பாளருக்கு தமிழ் தேசியக் கூத்தமைப்பும் தனது ஆதரவினைத் தெரிவித்திருக்கிறது. கூத்தமைப்பு தனது முடிவினை எட்டுவதற்கு முன்னதாக பொதுவேட்பாளர் மைத்திரியின் கூட்டம் யாழ்ப்பாணத்தில் நடைபெற்றது. இதற்குப் பெரும் திரளான தமிழ் மக்கள் அணிதிரண்டதால் மிரண்டுபோன கூத்தமைப்பு அவசரஅவசரமக தனது 'தகிடுதத்தோம்' விளையாட்டினை வெளிப்படுத்தியிருக்கிறது.

ஜனாதிபதி மகிந்த ராஜபக்ச, ஈவிரக்கமின்றி புலிகளைப் பூண்டோடு அழித்ததினால் புலன்பெயர்ந்த புலிவாலுகளும் தமிழ் தேசியவாதிகளும் மகிந்த ராஜபக்சவை மீண்டும் ஆட்சிபீடம் ஏறுவதை இதனால் தடுத்துவிட முடியும் என்பதையும் மகிந்தாவை சர்வதேச குற்றவியல் கூண்டில் நிறுத்துவதற்கும் இதுவொரு சந்தர்ப்பமாக கருதி பொதுவேட்பாளர் மைத்திரியை ஆதரிக்கின்றனர்.

துரதிஸ்டவசமாக இயல்பாகவே மாற்றத்தை விரும்பும் மனித இயல்பூக்கம் கொண்டவர்களும் மகிந்தவின் குடும்ப ஆட்சியை அகற்றிவிடவேண்டும் என்பதால் பொதுவேட்பாளர் கூடாரத்துக்குள் ஒதுங்கவேண்டியேற்பட்டிருக்கிறது. அதேவேளை முற்போக்கு சிந்தனையும் மாக்சிஸ சிந்தனையின்பால் ஈர்க்கப்பட்டவர்களும் மைத்திரியின் பக்கம் சாய்ந்திருப்பதில் அவர்களது நியாயமும் கவனிக்கப்பட வேண்டியதே.

மகிந்த ராஜபக்சவுக்கு எதிராக மைத்திரிபால சிறிசேனவை பொதுவேட்பாளராக களமிறக்குவதும் அதற்கு முற்போக்கு பிற்போக்கு அணியின் சக்திகளைப் பெற்றுக்கொள்வதன் மூலமே அது சாத்தியப்படும். இதனை நன்குணர்ந்த முன்னால் ஜனாதிபதி சந்திரிகா முன்னின்று செயற்பாட்டார்.

இலங்கை வரலாற்றில், இலங்கைத் தமிழ்பேசும் மக்களின் அரசியல் பிரச்சினைக்கு முற்போக்கான தீர்வினை முன்வைத்த அரசியல் தலைவி சந்திரிகா. மற்றும் அவரது நம்பிக்கைக்குரியவர்கள் (அரசியல் நெருக்குதலால் அது வெட்டி சிதைக்கப்பட்டதை ஒரு புறம் வைத்துக்கொள்வோம்) பின்புலத்தில் இருக்கும்போது தமிழர் பிரச்சினைக்கு மட்டுமல்ல முஸ்லீம்களின் பிரச்சினைக்கும் ஒரு சுமூகமான தீர்வு எட்டப்படாதா? என்ற நப்பாசை யாருக்குத்தான் தோன்றாது?

ஒருவேளை ஐக்கிய தேசியக் கட்சியின் கை ஓங்கி, பொதுவேட்பாளர் கூட்டணியிலுள்ள முற்போக்கு சக்திகள் ஓரம்கட்டப்படலாம். ஆனால் மற்றத்தை விரும்பும் மனங்கள் சாதகமான சிந்தனைகளையும் செயற்பாடுகளையுமே நாடும்.

எனவே இடதுசாரி பாரம்பரியத்தைக்கொண்ட பொதுசன ஐக்கிய முன்னணி வேட்பாளர் என்பதற்காகவோ ஏகாதிபத்திய எதிர்ப்பு அரசாங்கத்தை நிறுவியதற்காகவோ மகிந்தவை ஆதரிக்கும் இடதுசாரிகள், எதிரணி மீதும் எதிரணி சார்பான,வர்கள் மீதும் சேறள்ளிப் பூசுவதைவிடுத்து அரசியல் ரீதியான தர்க்கங்களை முன்வைத்தால் ஆரோக்கியமான, நகரீகமான அரசியல் கலாசாரமாவது நம்மிடையே மிஞ்சும்.

எது எப்படியோ? ராஜபச்ச குடும்பம் மீண்டும் ஆட்சிபீடம் ஏறும் தப்பவெப்ப நிலைமைகளே தென்படுகின்றன. இதற்கு தர்க்கரீதியான அரசியல் விளக்கம் என்னிடமில்லை. கீழ்மட்ட உறுப்பினர்கள், பெரும்பாலான மக்கள் அவர் பக்கம் இருப்பதாலோ இல்லையோ அவரிடம் அதிகாரம் இருக்கிறது. அது ஒன்றே போதுமானது அல்ல என்றாலும் அதுவும் இன்றியமையாதது. சொற்ப வாக்கு வித்தியாசத்தில் மகிந்த ராஜபக்ச குடும்பம் மீண்டும் ஆட்சி பீடம் ஏறும்.

வாழ்க
வாழ்க வழமுடன்
வளர்க நின் கோலும் கோத்திரமும்
மக்களையும் கொஞ்சம் வழவிடுங்கள்.

திருக்குறனின் பொருள்: செய்யக் கூடாததைச் செய்வதால் கேடு ஏற்படும். செய்ய வேண்டியதைச் செய்யாமல் விடாலும் கேடு ஏற்படும்.

அமைதி சமாதானம் ஜனநாயகம்

www.sooddram.com