என்று முடியும் இந்த ஏமாற்று வேலை? (பகுதி 2)

இந்திய தமிழக அரசியல்வாதிகள் தமது அரசியல் நலனிற்காக அடிக்கடி புலி புலி என பூச்சாண்டி காட்ட நீங்களோ மகிழ்வின் உச்சத்திற்கு செல்கின்றீர்கள். உண்மையில் இந்தியாவில் புலிகளின் பயிற்சிமுகாமோ அல்லது செயற்பாடுகளோ இல்லை. இது இந்திய அரசிற்கு நன்கு தெரியும். தப்பிச்சென்ற ஒரு சில உறுப்பினர்களும் தருணம் பார்த்து வெளிநாடுகளிற்கு செல்லவே முயற்சிக்கிறார்கள். தவிர நீங்கள் நினைப்பதுபோல் எதுவும் இந்தியாவில் இல்லை. இந்நிலையில் தமிழகத்தலைவர்களின் அரசியல் பிழைப்புவாதம் மீண்டும் தமிழரை சீண்டத்தொடங்குகிறது. 

'பிரபாகரனின் இருப்பை மறுதலித்து வரலாற்றுத் தவறு செய்யாதீர்கள் என்று...பலர் கூறுகிறார்கள்.

தாமும் தமிழ்நாட்டிலுள்ள தமிழின உணர்வாளர்கள் என்று கூறிக்கொள்பவர்களும் பிரபாகரன் இருக்கின்றார் என்று நம்பவைக்க படாத பாடுபடுவதாகவும் இப்போது தான் எல்லோரும் நம்ப ஆரம்பித்துள்ளார்கள்' என்றும் கூறுகின்றார்கள். சரி நீங்கள் சொல்வது உண்மை என்றால் ஏன் இன்று புலிகளின் சர்வதேச கட்டமைப்பு சிதைந்து தறிகெட்டுப்போய் ஒவ்வொருவரும் மேய்ப்பவன் இல்லாத ஆட்டு மந்தைக்கூட்டம் போல் உள்ளனர். இன்றய தமிழரின் இழிவான நிலைக்கு சுயநலத்துடன் செயற்படும் சர்வதேசப்புலிகள் தாமே எனச் சொல்லும் சில சுயநலவாதிகளே காரணம். இதில் உள்ள பெரும்பாலான உறுப்பினர்களிற்கு சாதாரண துப்பாக்கியின் பாரம் கூட தெரியாது. இன்று வீரவசனம் பேசி மக்களை ஏமாற்றி பிழையான வழியில் கொண்டு செல்கின்றார்கள். இவர்களுக்கு ஜால்ரா போடுவதற்கென்று ஒரு கூட்டம் உள்ளது. இவர்கள் எல்லோரும் தேசியச் செயற்பாட்டாளர்கள், உணர்வாளர்கள் என்னும் புதிய புதிய பெயர்களில் புதிதாக முளைக்கிறார்கள். தமிழ் நாட்டில் சாதிக்கு ஒரு கட்சி தெருவுக்குத் தெரு ஒரு கட்சி என்று இருப்பது போல புலம்பெயர் தமிழ் சமூகத்திலும் புதிய புதிய பெயர்களில் துதிபாடும் கூட்டங்கள் முளைவிடத் தொடங்கி விட்டன.
　
பிரபாகரன் இருக்கிறார் என்று கூறுவதன் மூலம் எதை நீங்கள் சாதிக்கப்போகிறீர்கள்?
தமிழ்இனம் இன்று ஒவ்வொருதிசையில் ஒற்றுமையின்றி இருப்பதற்கு முக்கியகாரணம் பழைமைவாதக்கொள்கைகளுடன்கூடிய புலச் சிந்தனையாளரகளே. அவர்களின் சிந்தனைஎல்லாம் தமது சுயநல வாழ்கைக்கானதாகவே அமைந்திருக்கும் அவர்களால் எதையும் செய்யமுடியாது. பணம் பண்ணுவதிலேயே குறியாக இருப்பார்கள்.
பிரபாகரனின் நிலைமை என்ன என்று தேடுவதை முதலில் நிறுத்தி. புலி என்ற மாயையில் இருந்து வெளியே வாருங்கள். சில நேரங்களில் எல்லாமே எமக்கு எதிராக நடக்கிறது. இதை எம்மால் ஏற்றுக்கொள்ள முடியவில்லை என்றாலும் உண்மை அதுதான் என்றால் அதை நாம் ஏற்றுக் கொண்டுதான் ஆகவேண்டும்.

முள்ளிவாய்காலில் என்ன நடந்தது என்பது புலித் தமிழர்களால் ஏற்றுக்கொள்ள முடியவில்லை. ஆனால் உங்களால் ஏற்றுக்கொள்ள முடியாத ஒன்று நடந்து முடிந்து விட்டது. அடுத்த கணமே. ஒரு கற்பனையில் இப்படி நடந்திருக்கக் கூடாதா என்ற ஏக்கம் விடுதலை வியாபரிகளுக்கு ஏற்படுகின்றது. அதனால் தான் அவர்களின் கற்பனைக் கதைகள் இன்று விஸ்வரூபம் எடுத்துள்ளது.

ஆயிரக்கணக்கான இளைஞர்களை சயனற் தற்கொலைக்கு தயார்படுத்தியவர். போட்டோக்களுக்கு இரண்டு சயனற் குப்பிகளுடன் போஸ் கொடுத்த பிரபாகரன் கையைத் தூக்கிக்கொண்டு இராணுவத்திடம் போகும் போது சயனற் குப்பி இல்லாமல்தான் போனாராம். அங்கு அவருக்கு சயனற் குப்பி அணிந்துவிடப்பட்டது. எக்கட்டத்திலும் அதை உட்கொள்ள அவர் முயற்சிக்கவில்லையாம். உலகின் மாபியா கும்பல்களிடம் இருந்து எடுத்துக்கொண்ட தற்கொலை உத்தியை தனது இயக்கத்தின் முக்கிய கொள்கையாகத் திணித்துக்கொண்ட பிரபாகரன் இங்கேயும் தனது சீடர்களுக்குத் துரோகமிழைத்தார்.
 
கற்பனைக் கதைகளின் அடிப்படையில் பிரபாகரன் வருவார், வருவார் என்ற நம்பிக்கையினை மக்களின் மனதினில் இன்று ஆழமாக பதியவைக்க படாத பாடுபடுகின்றனர். இதில் வேடிக்கை என்னவென்றால், எந்த அரசிற்கெதிராக தமிழர் போராடினார்களோ அந்த அரசிற்கு நடந்தது என்ன, நடந்துகொண்டிருப்பது என்ன, என்ற உண்மை தெரிய..... தமிழரோ இன்னும் புலி என்ற மாயையில் இருந்து விடுபடவில்லை.

 
உண்மையில் மகிந்த ராஜபக்ஷவிற்கோ அல்லது கோட்டபாய ராஜபக்ஷவிற்கோ அல்லது சரத்பொன்சேகாவிற்கோ இறுதியுத்தத்தில் என்ன நடந்தது என்று தெரியாது என்று யாராவது சொல்லமுடியுமா? உண்மையிலேயே பிரபாகரன் சாவடையவில்லையென்றால் எதற்காக ஒரு அரசிற்கெதிராக போராடியவர்களை அந்த அரசே மன்னித்து விடுதலை செய்யவேண்டும். இவர்கள் மீண்டும் சென்று தலைவனுடன் சேர்ந்து விடுவார்கள் என்று ஏன் நினைக்கவில்லை? அரசியற் காரணங்களிற்காக மன்னித்தது என்றால், புலிகளின் முக்கிய உறுப்பினர்களை ஏன் விடுதலைசெய்யவில்லை?

(தொடரும்.....)