செய்தியும் சிந்தனையும்(2)

(அபிமன்யு)

செய்தி :

நேற்றைய தினம் (07-10-2013) இலங்கை ஜனாதிபதி மகிந்த ராஜபக்சா முன்னிலையில் வடக்கு மாகாணசபையின் முதலமைச்சராக முன்னாள் நீதியரசர் விக்னேஸ்வரன் பதவிப் பிரமாணம் எடுத்துக் கொண்டார்.

சிந்தனை:

பல வருடங்களுக்கு முன்னர் நடைபெற்றிருக்க வேண்டிய இந் நிகழ்வு, காலம் தாழ்த்தி இப்பொழுது நடைபெற்றிருக்கிறது. அதுவும், எண்ணிக்கையற்ற அனாவசிய அழிவுகள், அனர்த்தங்கள், இன்னல்கள், இழப்புகள், இடப் பெயர்வுகளின் பின்னர் நடைபெற்றிருக்கிறது. யுத்தம் தொடர்ந்தால், மேற்குறிப்பிட்ட அத்தனையும் தவிர்க்க முடியாது, இலங்கையில் வாழும் தமிழ் மக்களின் வாழ்வாதரங்களின் வீழ்ச்சிக்கும், சமூகத்தின் அழிவிற்குமே இட்டுச் செல்லும் என்று தீரக்கதரிசனத்துடன் எடுத்துக் கூறியும், அவற்றைத் தடுக்க முயன்றும் செயற்பட்ட தமிழ்த் தலைவர்கள் துரோகிகளாக முத்திரை குத்தப்பட்டு விரட்டப்பட்டார்கள். படுகொலை செய்யப்பட்டார்கள். வன்முறைகளுக்கு அடி பணிந்தும், மனச்சாட்சியை ஒதுக்கியும், அறம் சாராத வாழ்வும் வாழ வல்லவர்களே தமிழர்களின் தலைவர்களெனக் கோலோச்சி வலம் வந்தார்கள்.

அந்தத் தலைவர்களில் அனேகர் இரத்தக்கறைகள் படிந்தவர்கள், கெட்டித்தனமாக போருக்குப் பின்னரான புதிய அரசியலை எடுத்துச் செல்லத் தகுந்த புத்திசாலித்தனம் இல்லாதவர்கள், தலைவர்களாகச் செயற்படத் திறனற்றவர்கள், முரண் அரசியலை முன்னெடுத்து தங்களின் பதவிகளுக்காக குறுக்கு வழிகளைக் கையாண்டு நிலைமைகளை மோசமாக்கக் கூடியவர்கள் என்பதைக் கோடிட்டுக் காட்டுவது போலவும்............  

இதுவும் முப்பது வருடப் போராட்டத்தின் ஒரு பலாபலன் போலவும்............

தமிழ் மக்களின் அரசியலிலோ, இலங்கை அரசியலிலோ, அடித்தட்டு மக்களின் வாழ்க்கையிலோ  எதுவித பங்களிப்பும் வழங்காத ஒருவர் வடக்கு மாகாணசபைத் தேர்தலில் தமிழ்மக்களின் முக்கிய கட்சியான தமிழ் தேசியக் கூட்டமைப்பின் (TNA) முதலமைச்சர் வேட்பாளராக முன்னாள் நீதியரசர் சி.வி.விக்னேஸ்வரன் நிறுத்தப்பட்டார்.  

படித்தவர், ஆயுதப் போராட்டத்தில் பங்களிக்காதவர், அதனை ஆதரிக்காதவர், இலங்கையின் பல பாகங்களில் நீதிபதியாகவும், இலங்கை உச்சநீதிமன்ற நீதிபதியாகவும் பணியாற்றியவர், நல்லவர், நேர்மையானவர், ஆன்மீகத்தில் ஈடுபாடுடையவர், சிங்கள மொழியில் சரளமாகப் பேசக்கூடியவர், சிங்களமக்கள் தலைவர்கள் மத்தியிலும் மதிப்புடையவர்.-இதுவே அவரது தகுதிகள்.

இந்தியாவின் விருப்பும் அவரே!.

அவர் வடக்கு மாகாணசபைத் தேர்தலில் தமிழ் மக்களின் அதிகப் பெரும்பான்மை விருப்பு வாக்குகளைப் பெற்றவராகிறார். வடக்கு மாகாணசபையின் முதலைமைச்சர் ஆகிறார். இப்பொழுது முன்னாள் நீதியரசர் விக்னேஸ்வரன் தமிழ் மக்களின் புதிய நம்பிக்கை நட்சத்திரம்! அவர் எடுக்க வேண்டிய சத்தியப் பிரமாணமே தமிழர்கள் சிலரால் சர்ச்சைகளுக்கு உள்ளாக்கப்பட்டது. மகிந்த ராஜபக்சா முன்னிலையில் அவர் சத்தியப் பிரமாணம் எடுக்கக் கூடாது என்பது இலங்கையில் இருக்கும் மெத்தப்படித்த தமிழர்கள் சிலரும், தூர இருந்து கொண்டு விண்ணாணம் பேசும் புலம் பெயர்ந்து வசதியாக வாழ்க்கை நடாத்தும்  தமிழ்ப் பிரமுகர்களும் விடுத்த கட்டளை!.  

அவற்றிற்கு மத்தியிலும், வடக்கு மாகாணசபை அமைச்சர்களுக்கான  இழுபறிப்புகளின் மத்தியிலும், இன்றைய அரசியல் நிலைமையின் யதார்த்தத்திற்கு முகம் கொடுத்து சரியாகவே இலங்கை ஜனாதிபதி முன் சத்தியப் பிரமாணம் செய்திருக்கிறார். தமிழில் செய்திருக்கிறார். மகிந்த ராஜபக்சாவிடமிருந்து ஒரு பிள்ளையார் சிலையையும் அன்பளிப்பாகப் பெற்றிருக்கிறார்!. அவர் (நீதியரசர்) எடுத்த சத்தியப் பிரமாணம், பயபக்தியுடன் வெளிப்படுத்தி உறுதி செய்து சத்தியம் செய்தது:

• இலங்கை குடியரசிற்கு விசுவாசமுள்ளவனாக இருப்பேன்.

• அதன் அரசியல் அமைப்பிற்கும் சட்டத்திற்கும் இணங்க பற்றுதியோடு பணியாற்றுவேன். அவற்றை உறுதியாக போற்றிக் காப்பேன்.

• தனிநாடொன்று ஸ்தாபிக்கப்படுவதற்கு நேரடியாகவோ மறைமுகமாகவோ இலங்கையிலோ அல்லது இலங்கைக்கு வெளியிலோ ஆதரவளிக்கவோ, ஆக்கமளிக்கவோ ஊக்குவிக்கவோ பரிந்துரைக்கவோ மாட்டேன்.

அப்பதவி ஏற்பின் பின்னர் இடம்பெற்ற தேநீர் விருந்துபசார நிகழ்வில்  கலந்துரையாடும்போது ஜனாதிபதி மஹிந்த ராஜபக்சா கூறியதாக செய்திகள் தெரிவிப்பது:

• அரசாங்கத்தோடு ஒத்துழைத்து செயற்பட தமிழ் தேசியக் கூட்டமைப்பு தயாரென்றால் வடக்கின் அபிவிருத்தி, மேம்பாடுகளை தொடர்ந்து முன்னெடுக்க நான் தயார்.

• எக்காரணம் கொண்டும் எவ்விதமான பாரபட்சத்தையும் நான் காட்டமாட்டேன்.

• தமிழ் தேசியக் கூட்டமைப்பானது அரசாங்கத்துடன் ஒத்துழைத்து நடந்துகொள்ளுமானால் அபிவிருத்தி, மேம்பாடுகள் வழமைபோல் சுமூகமாக நடைபெறும்.

பதவிப் பிரமாணத்தின் பின்னர் முதலமைச்சர் விடுத்த அறிக்கையில்  தெரிவித்திருப்பது:

• ஐக்கிய இலங்கைக்குள்ளேயே நாம் அரசியல் தீர்வொன்றை எதிர்பார்க்கிறோம்.

• உள்ளக சுயநிர்ணயம் ஒரு நாட்டைப் பிளவுபடுத்தாமல் ஒற்றுமைப் பாதையில் கொண்டு செல்ல முடியும்.

• நாம் எமது கடந்தகாலப் போராட்டங்கள், அரசியல் அணுகுமுறைகள், அனுபவங்கள் யாவற்றிலிருந்தும் பாடங்களைக் கற்றே முன்னேற வேண்டி உள்ளது.

• இங்கு வன்முறைக்கு இடமில்லை. பலாத்காரத்திற்கு இடமில்லை.

• புரிந்துணர்வு ஒன்றே எம்மை சமாதானத்தையும் சகோதரத்துவத்தையும் நோக்கிச் செல்ல வழிவகுக்கும்.

இவை அனுபவ முதிர்ச்சியும் அறிவுபூர்வமானதும் யதார்த்தங்களை மனதில் நிறுத்தி மக்கள் நலன் சார்ந்த அணுகுமுறைகளுக்கான அத்திவாரங்களைக் கொண்டுள்ளதாகக் கொள்ளலாம்.

ஆனாலும், தமது சொந்தச் சுயநல நிகழ்ச்சி நிரல்களுக்கும், பதவி மோகங்களுக்கும் கற்பனைகளிலும் கனவுகளிலும் மக்களை வாழ வைத்து மக்கள் மேலும் அழுந்துவதற்கு வழி வகுப்போரால் அவரும் இழுக்கப்பட்டு மக்கள் அவர் மீது வைத்துள்ள நம்பிக்கையை வீணடித்து விடுவாரா? அல்லது, அத்தகையோரின் இழிபறிகளுக்கும், சூழ்ச்சிகளுக்கும், குழிபறிப்புகளுக்கும் ஈடு கொடுக்க முடியாமல் “போதுமடா சாமி!--ஆளை விட்டால் போதும்!” என்று ஒதுங்கி விடுவாரா? அல்லது, இலங்கை அரசின் கடும்போக்குகளை எதிர்கொள்ள நேரும்  பட்சத்தில் மக்களின் சக்தியைத் திரட்டியும் ஒருங்கிணைத்தும், விவேகமானதும் ஆக்கபூர்வமானமானதுமான நடவடிக்கைகளைத் தொடராது கைவிட்டு விடுவாரா? அல்லது, துணிச்சலுடன், மனத் திண்மையுடன் தமிழர்களின் உண்மையான நலன்கள் சார்ந்ததும், அறம் சார்ந்ததுமான செயற்பாடுகளை எடுத்து தமிழர்களின் அவலங்கள் தீர, அவர்கள் வாழ்வு தழைக்க, வேண்டிய வழிமுறைகளை மேற்கொள்வாரா? அவருக்கும், அவர் சார்ந்த ரிஎன்ஏயினருக்கும் அமோகமாக வாக்களித்த தமிழ் மக்களின் எதிர்பார்ப்புகளை நிறைவேற்றுவாரா?

அவர் தனது அறிக்கையின் இறுதியில் கூறியிருப்பது:

“இறைவன் ஆசி சகலருக்கும் கிடைப்பதாக”!

நல்லவையையே செய்ய, நன்மைகளையே எய்த, தமிழ்மக்களின் இன்னல்கள் தீர, இறைவன் ஆசி அவருக்கும் கிடைப்பதாக!

[08 ஒக்ரோபர், 2013]