கேள்வி ??????    பதில்

தமிழ் மக்கள் உயிரிழப்புக்கு பிரபாகரன் பிடிவாதம் தான் முழுக்காரணம் என்று எரிக் சொல்ஹெய்ம் கூறியுள்ளாரே?

இதைச் சொல்வதற்கு எரிக்சொல்ஹெய்ம் அவர்களுக்கு மூன்று வருடம் தேவைப்பட்டிருக்கிறது. புலிகளுக்கும் அரசுக்கும் சண்டை நடந்து கொண்டிருக்கும்போதே, மக்கள் மீது அக்கறை கொண்ட சிலர், மக்களைக் கேடயமாகப் பாவிப்தைத் தவிர்த்து, மக்களை யுத்தப் பிரதேசத்தில் இருந்து வெளியேற அனுமதிக்கும்படி புலிகளிடம் கேட்டுக்கொண்டார்கள். கிளிநொச்சிப் பகுதியில் சண்டை நடந்து கொண்டிருக்கும் போது, இத்தகைய வேண்டுகோளை யாழ் கத்தோலிக்க ஆயர் அவர்கள் விடுத்திருந்தார். புலிகளின் புலன்பெயர்ந்த பிரதிநிதிகளிடம் மக்களை வெளியேற அனுமதிக்கும்படி கேட்டபோது, சனத்தை விட்டுட்டுப் பொடியள் என்ன செய்யிறது, என்று பேடித்தனமாகப் பதில் சொன்னார்கள்.  நந்திக் கடலோரத்திலே தப்பித்துப்போகத் துணிந்த தமிழர்களின் மீது, புலிப் பயங்கரவாதிகள் துப்பாக்கிப் பிரயோகம் செய்து பலரைச் சுட்டுக் கொன்றதற்கான சாட்சியங்கள் அமெரிக்காவிடமும் இருக்கிறது.

அடுத்தடுத்த நாடுகளிடமும் இருக்கிறது.  புலிப் பயங்கரவாதிகளிடம் இருந்து மீட்கப்பட்ட தமிழருக்கு அத்தியாவசிய வைத்திய உதவிகள் செய்யப்படும் இடத்தின் மீது கூட, தற்கொலைத் தாக்குதல் நடத்தி, குழந்தைகள் உட்பட பல தமிழரைக் கொன்ற மாவீரமும் மறக்கத்தக்க ஒன்றல்ல.  எரிக் சொல்ஹெய்ம் தனது பேச்சின் போது பிரபாகரன் வரலாற்றுத் தவறைச் செய்தார் என்றும் கூறினார். பிரபாகரன் வரலாற்றுத் தவறு இழைத்தார் என்பதை எரிக்சொல்ஹெய்ம் சொல்லித்தான் உலகத்துக்குத் தெரிய வேண்டும் என்பதில்லை. எல்லோருக்குமே தெரிந்த விடயம்தான். நாடுகடந்த அரசு என்று கிறுக்குத்தனமாகப் பிதற்றித்  திரியும், உருத்திரகுமார் குழுவினர் உட்பட அனைத்துப் புலிக் குழுவினருக்கும் இது நன்றாகவே தெரியும். பிரபாகரன் வரலாற்றுத் தவறு இழைத்தார் என்பது தமிழர்கள் எல்லோருக்கும் தெரிந்த அப்பட்டமான உண்மை. ஆனால் அதை வெளியில் சொல்ல சில பல தயக்கங்கள் பலருக்கு இருக்கிறது. வாழ்க்கை பூராவும், துரோகம், கொலை, கொள்ளை போன்ற தவறுகளுக்கூடாகவே வாழ்ந்து புலித் தலைமைக்கு வந்த ஒரு பயங்கரவாதி, வரலாற்றுத் தவறிழைத்தார் என்பது வியக்கத்தக்க விடயமில்லை.