எந்த நிலை வந்தாலும் கப்பல் விளம்பரத்தை அகற்ற மாட்டோம் - கனடா கன்சவெட்டிக் கட்சி

கனடாவில் வெளியிடப்பட்ட அகதிகளை குற்றவாளிகளாகக் காட்டும் விளம்பரத்தை கனடா கன்சவெட்டிக் கட்சி அகற்ற வேண்டுமென்றும், கனடியப் பிரதமர் இந்த விளம்பரத்திற்காக மன்னிப்புக் கேட்க வேண்டும் என்று கனடிய தமிழ்த் தேசிய மக்களவை கண்சவெட்டிக் கட்சியை நிர்ப்பந்தித்திருந்தது. இந்த விளம்பரம் அகதிகளைக் குற்றவாளிகளாகச் சித்தரிக்கிறது என்பதை பலரும் ஏற்றுள்ள நிலையில் கனடிய தமிழ்த் தேசிய மக்கள் அவை இது தொடர்பான பத்திரிகை அறிக்கையை நேற்று வெளியிட்டது. இந்த விளம்பரத்திற்கு தமிழர்கள் கனடாவிற்கு வந்த “சண் சீ” கப்பல் பயன்படுத்தப்பட்டதையும் அது தனது அறிக்கையில் காட்டியிருந்து.

ஆனால் இன்று இது தொடர்பாக இன்று கனடாவின் பிரபல பத்திரிகை ஒன்றுக்கு தகவல் தெரிவித்த கன்சவேட்டிக் கட்சி “யாரோ விளம்பரத்தை நிறுத்த வேண்டும் என்று கேட்டார்கள், ஆனால் அது எப்போதுமே நடக்காது” என்று உத்தியோகபூர்வமாக தெரிவித்துள்ளது.

இந்த விளம்பரம் இனவாத, நிறவாத நோக்கம் கொண்டது, கப்பலில் வந்த 491 அகதிகளையும் அது குற்றவாளிகளாகச் சித்தரிக்கிறது என்றும் பிரதமர் ஷ்ரீபன் காப்பர் இந்த விளம்பரத்தை வெளியிட அனுமதித்திருக்கக்கூடாது என்றும் மக்கள் அவையின் பேச்சாளர் தெரிவித்தார்.

கனடியத் தமிழ் தேசிய மக்கள் அவை கனடாவின் சகல கட்சிகளையும், கன்சவெட்டிவ் வேட்பாளர்களையும், மனித உரிமை ஆர்வலர்களையும், கனடா யூதர்கள் காங்கிரஸ், சர்வதேச மன்னிப்புச் சபை ஆகியவற்றையும் தங்களுடன் இணைந்து இந்த விவகாரத்திற் குரல் கொடுக்குமாறு கேட்டுள்ளனர்.

கன்சவெட்டிவ் கட்சியின் விளம்பரத்தை அகற்ற மாட்டோம் என்ற அறிக்கையை ஆமோதித்து கன்சவெட்டிவ் குடிவரவு அமைச்சர் ஆட்க்கடத்தல் சம்பந்தமான பத்திரிகையாளர் மாநாட்டை கப்பல் வந்தடைந்த வன்கூவரில் நகரில் இன்று நடத்தியுள்ளார்.

அந்த மாநாட்டில் மேற்படி அமைச்சர் தாங்கள் அடுத்த முறை பதவிக்கு வந்ததும் சீ-49 என்ற அகதிகளை கடுமையாகப் பாதிக்கும் சட்டத்தை “எந்தவித மாற்றமுமில்லாமல்” நிறைவேற்றியே தீருவோம் என்றும், கனடா லிபரல் கட்சி ஆட்கடத்தல் குற்றங்களிற்கு ஆதரவாக மென்மையாகச் செயற்படுதாகத் தெரிவித்து லிபரல் கட்சி தமிழர்களுடன் நெருக்கமாக நிற்கிறது என்பதை மறைமுகமாகச் சுட்டிக்காட்டியுள்ளார்.