நிறைவேற்றப்படாத விருப்பத்துடன் மரணமடைந்த பாபாவின் விமர்சகர்கள் கோவூர்,நரசிம்மையா,பிரேமானந்த் முக்கியமானவர்கள்

பகவான் சத்திய சாயி பாபா உயிருக்கான தனது போராட்டத்தில் ஞாயிற்றுக்கிழமை தோல்வியடைந்திருக்கக்கூடும். ஆனால், அவரின் வாழ்வுக் காலத்தில் பல போராட்டங்களிலிருந்தும் அவர் தப்பிப் பிழைத்திருந்தார். அவரின் அற்புதங்களுக்கு பகுத்தறிவாளர்கள் பலர் சவால் விடுத்திருந்தனர். ஏபிரகாம் கோவூர், பி.பிரேமானந்த் போன்ற பகுத்தறிவாளர்கள் பாபா நிகழ்த்திய அற்புதங்கள் தொடர்பாக பல வருடங்களாக சவால் விடுத்து வந்தனர். அறிவியல் தன்மையின் அடிப்படையில் இவரின் அற்புதங்களை அவர்கள் சவாலுக்குட்படுத்தினர். ஆனால், ஒவ்வொரு தடவையும் பாபா அவற்றை சமாளித்து அவர்களை தோல்விகாணச் செய்திருந்தார். பாபாவை வெளிப்படுத்தும் முயற்சியாக பல சவால்களை பகுத்தறிவாளர்கள் மேற்கொண்டிருந்ததை கடந்த சில தசாப்தங்களாக காணக்கூடியதாக இருந்தது.

இலங்கையைச் சேர்ந்த பகுத்தறிவாளரான ஏபிரகாம் கோவூரே பாபாவை பாரியளவு விமர்சித்தவராவார். இளந்தென்றல் காற்றில் சாம்பலை (விபூதியை) எடுக்கும் செயற்பாட்டையும் கோவூர் முன்னெடுத்திருந்தார். கேரளத்தில் பிறந்த கோவூர் இலங்கையில் வசித்தவர். இலங்கையில் அவர் தாவரவியல் பாடத்தைக் கற்பித்தவர்.

புட்டபர்த்தி ஆசிரமத்தில் சத்திய சாயி பாபாவைச் சந்திக்க சர்வதேச புகழ்பெற்ற பகுத்தறிவாளரான கோவூர் முயற்சித்திருந்தார். தனது வருகையைப் பற்றி ஆசிரமத்திற்கு அறிவித்திருந்தும் கூட அவரைச் சந்திப்பதை பாபா தவிர்த்துக்கொண்டதாகத் தெரிவிக்கப்படுகிறது. அச்சமயம் அவர் பெங்களூரிலிருந்த தனது வைற்பீல்ட் ஆசிரமத்திற்குச் சென்றுவிட்டார். 1978 செப்டெம்பர் 18 இல் கோவூர் காலமானார். அவருடைய விருப்பம் நிறைவேறியிருக்கவில்லை.

பாபாவுக்கு சவால் விடுத்திருந்த மற்றொரு பகுத்தறிவாளர் எச்.நரசிம்மையா ஆவார்.கர்நாடகத்தைச் சேர்ந்த மருத்துவரான அவர் பெங்களூர் பல்கலைக்கழகத்தின் உபவேந்தராக இருந்தவர். கடவுளின் மனிதர்களாகக் கருதப்படுவோரை அம்பலப்படுத்துவதற்கு அவர் குழுவொன்றையும் அமைத்திருந்தார். குறிப்பாக பாபாவை இலக்கு வைத்து இந்த நடவடிக்கை மேற்கொள்ளப்பட்டிருந்தது. அற்புதங்கள் மற்றும் ஏனைய உறுதிப்படுத்தப்பட வேண்டிய அமானுஷ்ய விடயங்கள் குறித்து விசாரணை செய்வதற்கு இந்தக் குழு அமைக்கப்பட்டிருந்தது. அதன் தலைவராக நரசிம்மையா விளங்கினார். இக்குழுவானது சத்திய சாயி பாபாவுக்கு பகிரங்க சவால் விடுத்திருந்தது. குறிப்பிட்ட கட்டுப்பாடுகளுடனான நிபந்தனைகளின் கீழ் அற்புதங்களை நிகழ்த்துமாறு சத்திய சாயி பாபாவுக்கு பகிரங்க சவால் விடுக்கப்பட்டிருந்தது. பாபாவின் அற்புதங்களை உறுதிப்படுத்தும் நோக்கத்துடன் இந்தச் சவால் விடுக்கப்பட்டது.

இந்தச் சவாலை சத்திய சாயி பாபா புறக்கணித்தார். நரசிம்மையாவின் அணுகுமுறையானது பொருத்தமானதல்ல. அதனாலேயே நான் அதனை நிராகரித்தேன். விஞ்ஞானத்தின் பரிமாணங்கள் மற்றும் வரையறுக்கப்பட்ட களம் என்பனவற்றில் பொருத்தமானது எதுவுமில்லை. இதிலிருந்து எதனையும் சிருஷ்டிக்க முடியாது. இதிலிருந்து எந்தவொரு சூத்திரத்தையும் உருவாக்க முடியாதென்று பத்திரிகையொன்றுக்கு அளித்த பேட்டியில் பாபா குறிப்பிட்டிருந்தார். மாற்றத்துக்குள்ளாகும் களத்திலும் ஆன்மீக பரிமாணத்திலும் இவற்றைப் பிரயோகிக்க முடியாதென்றும் அவர் கூறியிருந்தார். 2005 ஜனவரி 31 இல் நரசிம்மையா இறந்துவிட்டார். பாபாவை விசாரணைக்குட்படுத்தும் அவரின் விருப்பம் நிறைவேறியிருக்கவில்லை.

பாபாவுக்கு எதிராக தீவிரமாக குரல்கொடுத்தவர்களில் ஒருவராக தமிழ் நாட்டின் பிரேமானந்த் விளங்கினார். எந்தவொரு அற்புதத்தையும் எந்தவொரு சாதுவும் நிகழ்த்தும் போது விஞ்ஞானபூர்வ அவதானிப்புக்குட்படுத்த விரும்பினால் தான் ஒரு இலட்சம் ரூபாவை வழங்குவதாக பிரேமானந்த் கூறியிருந்தார். சத்திய சாயி பாபாவுக்கும் இந்த விடயம் குறித்துத் தெரிவிக்கப்பட்டது.

2009 அக்டோபர் 04 இல் பிரேமானந்த் இறந்துவிட்டார். ஆனால், தங்கக் கட்டுப்பாட்டுச் சட்டத்தை மீறியதற்காக பாபாவை நீதிமன்றத்தின் முன் நிறுத்தும் சங்கடமான முயற்சியை அவர் மேற்கொண்டிருந்தார். ஆந்திரப் பிரதேசத்தின் மேல்நீதிமன்றத்தை பிரேமானந்த் நாடியிருந்தார். தங்கக் கட்டுப்பாட்டுச் சட்டத்தின் 11 ஆவது பிரிவை சாயி பாபா மீறியுள்ளதாகவும் தங்கத்தை உற்பத்தி செய்வதாயின் இச்சட்டத்தின் மூலம் அனுமதி பெற்றிருக்க வேண்டுமெனவும் பிரேமானந்த் நீதிமன்றத்தை நாடியிருந்தார். தங்கச் சங்கிலிகளை வெளியே எடுப்பதன் மூலம் சாயி பாபா புகழ்பெற்று வருவதாகவும் அவர் மனுவில் குறிப்பிட்டிருந்தார். ஆனால், அந்த மனுவை விசாரணைக்கு எடுத்துக்கொள்ள மேல்நீதிமன்றம் மறுத்துவிட்டது என்று ரைம்ஸ் ஒவ் இந்தியா பத்திரிகை நேற்று திங்கட்கிழமை தெரிவித்துள்ளது.