கைகொடுக்கும் மே தினம்

பல்லாண்டு காலமாக மே முதலாந் திகதி செவ்வாய்க்கிழமை சர்வதேச தொழிலாளர் தினமாகக் கொண்டாடப்படுகின்றது. ஏலவே உலகளாவிய ரீதியில் மே முதல் நாளை மேதினமாகக் கொண்டாட சர்வதேச தொழிலாளர் சமூகம் ஏகமனதாக முடிவு செய்தது. இத்தினத்தில் தொழிலாளர்களினால் மேற்கொள்ளப்படுகின்ற நிகழ்வுகள், அணிவகுப்பு ஒற்றுகூடல் என்பன பிரதான பங்கினை வகிக்கின்றன என்றும் கூறலாம்.

மே தினத்தை தேசிய விடுமுறை தினமாக (National Holiday) இலங்கை அடங்கலாக அனேக நாடுகள் அறிவித்துள்ளன. நம் நாட்டில் அன்றுதொட்டு இன்றுவரை ஆட்சிபுரியும் அரசாங்கங்கள் மே தினத்தை பொது விடுமுறை தினமாக பிரகடனம் செய்துள்ளன. இதனால் வர்த்தக வங்கி சேவையாளர் உட்பட அரச மற்றும் தனியார் ஊழியர்களுக்கு (Employees)  பொது விடுமுறை தினமாக்கப்பட்டுள்ளது.

அன்றைய தினம் இலங்கையில் உள்ள பிரதான அரசியல் கட்சிகளான ஸ்ரீலங்கா சுதந்திரக் கட்சி, அரசாங்கத்தின் பங்காளிக் கட்சிகள் என்பன கொழும்பிலும் ஏனைய இடங்களிலும் ஊர்வலங்களையும், ஒன்றுகூடல்களையும் ஒழுங்குபடுத்தியுள்ளன. அதேவேளை மக்கள் விடுதலை முன்னணி, லங்கா சமசமாஜக் கட்சி (LSSP), கம்யூனிஸ்ட் கட்சி, இலங்கை தொழிலாளர் காங்கிரஸ் (CWC), மலையக மக்கள் முன்னணி என்பனவும் தொழிலாளர் தினமான மே தினத்தைக் கொண்டாடவுள்ளன. பிரதான எதிர்க் கட்சியான ஐக்கிய தேசியக் கட்சி ஏனைய எதிர்க் கட்சிகளுடன் இணைந்து இம்முறை தனது மே தின நிகழ்வுகளை வட மாகாணத்தின் தலைநகராக விளங்கும் யாழ்ப்பாணத்தில் மேற்கொள்ள திட்டமிட்டுள்ளமை ஒரு விசேட அம்சமெனக் கொள்ளலாம்.

இனி உலகெங்கிலுமுள்ள பிரதான நாடுகளில் மே தினம் எவ்வாறு கொண்டாடப்படுகின்றன என்பதை விரிவாக ஆராய்வோம். அல்பேனியாவில் மே முதலாம் திகதி தேசிய விடுமுறை தினமாக தொழிலாளர்களை நினைவுகூரும் விதமாகக் கொண்டாடப்படுகின்றது. பதாகைகளில் எழுதி அவற்றைத் தாங்கிய வண்ணம் கோஷங்களை எழுப்பியவாறு செல்வார்கள்.

சல்வேனியா, செர்பியா மற்றும் உக்ரேன் போன்ற நாடுகளில் மே இரண்டாம் திகதியும் தேசிய விடுமுறை தினமாக உள்ளமை குறிப்பிடத்தக்கது. கரீபிய நாடுகளில் தொழிலாளர் விடுமுறை தினம் மே மாதம் முதல் திங்கட்கிழமை என்று வழங்கப்படுகிறது. டொமினிக்கா, டொமினிக் குடியரசு குயின்ஸ்லாந்து என்பவற்றிலும் இந்தக் கொள்கையே தொடருகின்றது. இச் செயற்பாடுகள் அனைத்துக்குமே அந்நாடுகளின் தொழிற் சங்கங்களே (Trade Unions) உறுதுணை புரிகின்றன என்பதை மறுப்பதற்கில்லை.

அவுஸ்திரேலியாவில் தொழிலாளர் இயக்கத்தை கொண்டாடுகையில், அத்தினம் பொது விடுமுறையாக பல்வேறு மாநில பிரதேச அரசாங்கங்களிலும் உறுதி செய்யப்படுகின்றது. தலைநகர் பிரதேசம், நியூசவுத் வேல்ஸ் (New South Wales) மற்றும் தெற்கு அவுஸ்திரேலியா, விக்டோரியா, தாஸ்மானியா ஆகியவற்றிலும் மே தினம் சிறப்பாக கொண்டாடப்படுகின்றது. அவுஸ்திரேலியாவில் ஆயிரத்து எண்ணூற்று ஐம்பத்தாறாம் ஆண்டுதான் முதன் முதல் மே தின விடுமுறை வழங்கப்பட்டதாகவும் அறிய முடிகின்றது.

தொழிற்சாலைகள் எங்கு ஸ்தாபிக்கப்படுகின்றனவோ அங்கு வேலை நிறுத்தங்கள் (Strikes) உருவாகுவது வழமையான விடயம். அமெரிக்காவின் சிக்காகோ நகரில் தொழிலாளர்கள் மூன்று நாள் பொது வேலை நிறுத்தம் மேற்கொண்டிருந்தனர். இதனைத் தொடர்ந்து பிற்பகலில் பேரணி ஒன்றும் ஒழுங்கு செய்யப்பட்டிருந்தது. பேரணி நடைபெறவுள்ளதை தெரிந்துகொண்ட காவல்துறையினர் அங்குள்ளோரை அமைதியாகக் கலைந்து செல்லுமாறு ஒலிபெருக்கி மூலம் அறிவித்தும் துரதிர்ஷ்டவசமாகத் தொழிலாளர் கலைந்து செல்ல மறுத்ததால், இதனை அடுத்து துப்பாக்கிப் பிரயோகம் மேற்கொள்ளப்பட்டது. ஏக காலத்தில் நான்கு தொழிலாளர் பலியானார்கள். நகரெங்கும் வன்செயலும் கட்டவிழ்த்து விடப்பட்டது. அதேவேளை கூட்டத்தை நோக்கி விஷமியொருவரினால் கைக்குண்டொன்று வீசப்பட்டது. இதனால் ஒரு காவல்துறை அதிகாரி உட்பட பன்னிரெண்டு தொழிலாளர் பலியாகினார்கள். பின்னர் வேலை நேரத்தையொட்டி தொழிற்சங்கப் போராட்டம் கடுமையான முறையில் முன்னெடுக்கப்பட்டது. தொழிலாளரது நாளொன்றுக்கு எட்டு மணித்தியாலங்கள் பணிபுரிய உத்தியோகபூர்வமாக அனுமதிக்கப்பட்டது. அதிகமாக மேலும் ஒவ்வொரு மணித்தியாலங்களுக்கும் மேலதிக நேரக் கொடுப்பனவு (Over Time)  கணிக்கப்பட்டு ஊதியக் கொடுப்பனவோடு அவ்வப்போது வழங்கவும் இணக்கம் காணப்பட்டது.

பிரான்ஸில் தொழிலாளர், பள்ளி மாணவர்கள் மே தின லில்லிப் பூக்களை வீதிகளில் சென்று விற்கும் அதேவேளை, தொழிலாளரின் நலனுக்காக வீடு வீடாக நிதி சேகரிப்பிலும் ஈடுபடுகின்றனர்.

ஜெர்மனியில் நாசிக் கட்சி ஆட்சிக்கு வந்த பிறகே தொழிலாளர் தினமான மே தினம் அதிகாரபூர்வமாக விடுமுறை தினமாக்கப்பட்டது.

எமது அண்டை நாடான இந்தியாவில் ஆயிரத்து எண்ணூற்று அறுபத்தேழாம் ஆண்டு முதல் மே தினம் மே முதலாம் திகதியே கொண்டாடப்பட்டு வருகின்றதாம். அங்கு மே தின வார நிகழ்வுகளும் நடைபெறுவது வழக்கம். மகராஷ்டிரா மற்றும் குஜராத் மாநிலங்களில் தொழிலாளர் வாரங்கள் கடைப்பிடிக்கப்படுகின்றன.

அயர்லாந்தில் தொழிலாளர் தினம் மே தினத்தில் அதாவது, மே மாதத்தில் முதல் திங்கட்கிழமையில் வருகின்றது. இது பொது விடுமுறை தினமாகும்.

இஸ்ரேலில் மே ஒன்று அதிகாரபூர்வமாகக் கொண்டாடப்படுவதில்லை. ஆனால் ஒவ்வொரு ஆண்டும் சோஸலிஸ்ட் மற்றும் மார்க்சிஸ்ட் இளைஞர் இயக்கங்கள் டெல்அவிவில் (TelAviv) அணிவகுப்பை ஏற்பாடு செய்து திருப்திகொள்கின்றனர்.

இத்தாலியில் மே ஒன்று தேசிய விடுமுறை தினம் ஆகும். தொழிலாளர் வர்க்கத்தினரின் உரிமைகளுக்காகப் பரவலாக ஆர்ப்பாட்டங்கள் நடைபெறும். ஆயிரத்து தொள்ளாயிரத்து தொண்ணூறாம் ஆண்டிற்குப் பிறகு றோமில் (Rome) கணிசமான அளவு தொழிலாளர் ஒன்றுகூடி மே தின நிகழ்வுகளைக் கண்டுகளிக்கின்றனர். இங்கும் தொழிலாளருக்கான எட்டு மணி நேர வேலை நேரம் அங்கீகரிக்கப்பட்டு அதுவே நடைமுறையிலும் உள்ளது.

வெளிநாட்டு ஆட்சிக் காலத்தில் ‘தப்பரபேன்’ என்று அழைக்கப்பட்ட இலங்கையின் பொருளாதார வளர்ச்சிக்கு முதுகெலும்பாகத் திகழுபவர்கள் தோட்டத் தொழிலாளர்கள்தான் என்பதை நாமறிவோம். ஆகவே நம் நாட்டில் மே தின நிகழ்வுகள் தலைநகரில் இடம்பெறுவது போன்று மலைநாட்டிலும் வருடா வருடம் கொண்டாடப்படுவதையும் காண முடிகின்றது.

எது எவ்வாறு இருப்பினும் மே தினத்தை தொழிலாளர் வர்க்கம் தனது உரிமைகளை வென்றெடுத்த பொன்னாளாகக் கொண்டாடி வருகின்றது.

ஆகவே மே தினத்தை மதித்து அதற்கு உகந்த கெளரவத்தை அளித்திடல் வேண்டும். இதுவே தொழிற்சங்கவாதிகளின் தலையாய வேண்டுகோளாகும் என்பது வெள்ளிடை மலை.

(அருணா தருமலிங்கம், வந்தாறுமூலை)