ஒன்பது சுன்னி-முஸ்லீம் நாடுகளைச் சேர்த்து யேமனின் ஹூத்தி போராளிகள் மீது வான் வழித்தாக்குதல் நடத்திக்கொண்டிருக்கும் வஹாபிகளின் பிளாஸ்டிக் போருக்கும் ஐ.எஸ் மீது அதே விதமான தாக்குதல்கள் நடத்திக்கொண்டிருக்கும் அமெரிக்காவும் நண்பர்களும் கோஷ்டி போருக்கும் இருக்கும் ஒற்றுமைகளில் ஒன்றாக இருப்பதாகக் கணிக்கப்படும் விடயங்களில் ஒன்று, இவர்களில் எவருமே நிலப்போர் நடத்தாமல் எதிரியை வெற்றிபெறுவது நடக்காத காரியம் என்று பெரும்பாலான இராணுவக் கணிப்பீட்டாளர்கள் கணிப்பிட்டிருப்பதாகும்.
நவீன போர்க்கருவிகளுடன் இருக்கும் வஹாபிச் சவூதிகளின் இராணுவத்தினர் ஓரளவு "போர்ப்பயிற்சி" பெற்றவர்களாக இருந்தாலும்கூட அவர்கள் கடைசியாக உண்மையான போரில் ஈடுபட்டது 1991 இல் தான் [ஈராக்குக்கு எதிரான போரில் நேச நாடுகளுக்கு ஆதரவாக] என்பதை அவர்களுக்கு நவீன போர்ப்பயிற்சியைக் கொடுத்த அமெரிக்க இராணுவப் பிரத்தியேகப் பயிற்சியாளர்களே வெளிப்படையாகச் சொல்கிறார்கள்.

பெரும்பாலும் பணத்தில் புரளும் எண்ணெய்வள மத்திய கிழக்கு நாடுகள் நிலப்போரொன்றை யேமனில் நடத்தத் துணியுமானால் அதற்காக அவர்கள் நம்பியிருப்பது [வாங்க நினைத்திருப்பது] பாகிஸ்தான், எகிப்து போன்ற வறிய சுன்னி-முஸ்லீம் நாடுகளின் வீரர்களைத்தான் என்பது தெரிந்த விடயமே. (இதனால்தான் இந்த நாடுகளுக்கு வெவ்வேறுவடிவில் கணிசமான உதவிகள் கொடுக்கப்பட்டு வெருட்டல்களும் செய்யப்படுகின்றன சமீபகாலத்தில்). பாகிஸ்தான் பாராளுமன்றம் ஒரு வாரத்துக்கு முன்பு நாட்டின் பிரதமரின் விருப்பத்துக்கு மாறாக யேமனில் நிலப்போரில் ஈடுபட மாட்டாது என்று சொல்லிவிட்டது.  மாட்டியிருப்பது எகிப்து.

சவூதியுடன் சுமார் 1770 கி.மீ எல்லையைக் கொண்ட யேமனின் ஹூத்தி போராளிகள் நீண்டகாலமாகப் போரில் ஈடுபட்டு வருபவர்கள். சவூதி எல்லைக்கு வந்து சமீபத்தில்கூட எல்லை இராணுவத்தினரைக் கொன்றுவிட்டுப் போனவர்கள். யேமன் போராளிகள் பற்றி எகிப்துக்கு நன்றாகத் தெரியும். 1962 இல் அன்றைய யேமனின அரச குடும்பத்துக்கெதிரான போராட்டம் சவூதி - பிரிட்டன் இயக்கத்தில் நடாத்தப்பட்டபோதும் எகிப்தின் அதிபர் நாஸர் தனது "சமூக உதவிப் படையொன்றை" யேமனுக்குள் அனுப்பினார். இப்படையின் தொகை 70 000 ஆக வீங்கியது சுமார் மூன்றே வருடங்களில்.

புலிகளுக்கெதிராக அனுப்பப்பட்ட இந்தியப் படைகள் அடைந்ததுபோன்ற வீழ்ச்சியைச் சந்தித்தது நாஸரின் இராணுவம். சுமார் 1967 இல் திரும்ப எடுக்கப்பட்ட எகிப்திய இராணுவத்தின் அழிவு 26 000 பேர் என்று கணக்கிடப்பட்டிருக்கிறது. யேமன் போராளிகளுடன் போரில் இறங்குவது வெளிநாட்டு இராணுவத்தினரை ஒரு புதைகுழிக்குள் இறக்குவதற்குச் சமமானது என்ற பலமான கருத்து நிலவுகிறது. தனது நிலத்தில் தனது வழியில் பலமாக இருக்கும் ஹுத்தி இராணுவத்தைச் சந்திக்கச் சொல்லி எகிப்தை "நேர்ந்து விடுவதில்" சவூதியின் புதிய மன்னருக்கு மிகவும் சந்தோசமாகவே இருக்கும். ஏனெனில் வஹாபிகளின் நிழலாகச் செயற்பட்டுவந்த இஸ்லாமியச் சகோதரத்துவ இயக்கத்தை சட்டத்துக்கெதிரான இயக்கமென்று பிரகடனப்படுத்திய பாவத்தைச் செய்திருக்கிறதல்லவா இன்றைய எகிப்திய அரசு. ஆனால் இன்னொருமுறை பலிக்கடாவாகப் பயன்படுத்தப்பட எகிப்து தயாரா?
(Alex Varma )

அமைதி சமாதானம் ஜனநாயகம்

www.sooddram.com