தென்னாசியாவில்

பெரும் பிரச்சினையாகியுள்ள வாகனநெரிசல்

தென்னாசியாவில் இன்று பெரும் தலையிடியாகவும், பெரும் அலுப்பையும் எரிச்சலினையும் ஏற்படுத்தும் விடயமாக போக்குவரத்து நெரிசல்களும், பாதை ஒழுங்கீனங்களும், பிரயாணி களுக்கும், வாகன ஓட்டுநர்களுக்கும் பெரும் சிக்கல்களை ஏற்படுத்தியுள்ளன. அதாவது உலகின் சனத்தொகை யில் 5 இல் 1 பங்கினர் உள்ள தென்னாசியா போன்ற பிரதேசங்களில் உள்ள மக்கள் போக்குவரத் திற்காக இன்னும் ஓரிரு பதைகளே பிரதான பாதைகளாக இருந்து வருகின்றன. இதில் குறிப்பிடத்தக்க விடயம் என்னவென்றால் இந்த நாடுகள் ஆங்கில காலனித்துவ ஆட்சியில் போடப்பட்ட பாதைகளையே இன்றும் பெரும்பாலும் பயன்படுத்தி வருகின்றமையினை கூறலாம். குறிப்பாக பக்கத்தில் உள்ள ஊர்களுக்குக்கூட சுற்றிவரத்தக்க வகையிலேயே பெரும்பாலான பாதைகள் அமைந்துள்ளதை நோக்கலாம்.

மேற்படி நாடுகள் பிரித்தானியாவிடம் இருந்து சுதந்திரம் பெற்று இன்று 60 ஆண்டுகளுக்கும் மேலாகிவிட்ட போதிலும்கூட இன்றுவரை முறையான வீதி அபிவிருத்தி, போக்குவரத்து ஒழுங்குகளை அமுல்படுத்தும் நிலைமைகள் அரிதாகவே காணப் படுகின்றன.

மேலை நாடுகளில் 60, 70 களில் இப்படியான போக்குவரத்து சிக்கல்கள் எழுந்தபோதிலும் அவை குறிப்பாக ஐரோப்பிய, வட அமெரிக்க நாடுகளில் 1985ஆம் ஆண்டுகளின் பின்னர் ஒரு முழுமையான கட்டுப் பாட்டின் கீழ் கொண்டுவரப்பட்டன. எனினும் இந்த நடைமுறைகளை தென்னாசியா போன்ற நாடுகளில் செயற்படுத்த இன்னும் முடியாமல் இருப்பது பெரும் கேள்விக்குறியி னையே ஏற்படுத்துகின்றது.

இதற்கு, சனத்தொகை பெருக்கமும் வாகனப் பாவனையாளர்களின் பெருக் கங்களும் காரணமாகக் கூறப்படுகிறது.

இந்தியாவை பொறுத்தவரை உலகில் இரண்டாவது பாரிய ரயில்வே போக்குவரத்து உள்ள நாடு என்று கூறப்படுகின்றது. நட்டத்தில் ஓடிய அத்துறை இன்று இலாபமீட்டும் துறையாக மாற்றப்பட்டிருக்கிறது.

அது ஓரளவுக்கு வரவேற்கத்தக்க விடயமும் ஆகும். ஆனால் இன்றும் கூட மேற்படி ரயில்களின் வேகம், குறிப்பிட்ட பிரதேசங்களை அடையும் காலம் என்பன பெரும் சந்தேகத்துடனே நோக்க வேண்டி உள்ளது. ஏனெனில் இன்றும் முன்னேற்றம் அடைந்த நாடுகளின் வேகங்களுக்கு இணையாக கடுகதியில் செல்லக்கூடிய மின்சார ரயில் திட்டங்கள், மின்சார ரயில்கள் என்பன தெற்காசிய நாடுகளில் குறை வாகவே சேவைகளில் ஈடுபடுத்தப்படு கின்றன. ஓரிரு இடங்களில் இடம்பெற்றாலும் அவை 90-95 களில் அறிமுகப் படுத்தப்பட்ட திட்டங்களை அடிப்படை யாகக் கொண்டதாகவே உள்ளன.

வாகன நெரிசலை எடுத்துக் கொண்டால் அது ஒரு பெரும் பிரச்சினையாகவே உள்ளது. பல்வேறு காரணங்களுக்காக இரண்டு ஊர்களுக்கு இடையில் செல்வதென்றாலும் கூட பல மணித்தியாலங்களை வாகன நெரிசல் காரணமாக வீதிகளிலேயே செலவ ழிக்க வேண்டி ஏற்படுகின்றது. இந்த நெரிசல் காரணமாக பல்வேறு தேவைகள், அவசரத் தேவைகள் என செல்பவர்களின் பாடு பெரும் திண்டாட்டமாக உள்ளது. பல மேம்பாலங்களும் அமைக்கப்பட்டு வருகின்றமை வரவேற்கத்தக்கது. மக்கள் செறிவு அதிகமான இடங்களில் நாளாந்தம் வாகன நெரிசல்களிலேயே பெரும் பாலானவர்களின் நேரம் விரயமா கின்றது.

குறிப்பாக நடைபாதைக் கடைகள், சட்டவிரோத கட்டடங்கள், முச்சக் கரவண்டி ஓட்டுனர்களின் அசண்டை யீனமான போக்குவரத்து வீதி மீறல்கள், வாகன ஒழுங்குகளை பின்பற்றாமை போன்ற காரணங்களை நாம் வெளிப்படை உண்மை யாக தெரிவித்துவிட்டுப் போகலாம்.

அது தவிர, வீதிகள் அகலப் படுத்தப்படாமை, குறிப்பிட்ட சில வீதிகளை மட்டுமே தொடு பாதைகளாக கொண்டிருப்பது சிறிய வீதிகள் கூட இரு வழிப் பாதைகளுக்கு அனுமதிக்கப்பட்டது. வீதிகள் பராமரிப்பின்றி குண்டும் குழியுமாக இருப்பது என்பனவும் காரணமாக இருக்கின்றன.

இந்தியா, இலங்கை, பாகிஸ்தான், பங்களாதேஷ் போன்ற நாடுகளில் இன்றும் கூட மின்சார சமிக்ஞை விளக்குகள் முக்கிய இடங்களில் பொருத்தப்பட்டாலும் கூட அங்கு போக்குவரத்துப் பொலிஸாரின் விசில்களும், கை சமிக்ஞைகளும் நின்றதாக காணமுடியவில்லை. காரணம் மின் சமிக்ஞை ஒழுங்கு களைக் கடைப்பிடிப்பதற்கு வாகனச் சாரதிகள் தயாரில்லை என்பதே மேலை நாடுகளில் உடனுக்குடன் ஒழுங்கு படுத்தப்படும் போக்கு வரத்து நடைமுறைகளை இங்கும் ஒழுங்குபடுத்தப்பட வேண்டும். மாறாக இங்கு படிப்படியான திட்டங்களே மேற்கொள்ளப்படு கின்றன.

இவற்றின் மூலம் போக்குவரத்துப் பிரச்சினைகள் நிரந்தரமாக தீர்ந்துவிடும் என்று கூறிவிட முடியாது. குறிப்பிட்ட காலத்தினுள் பாரிய தொகை நிதியினை ஒதுக்கிப் புதிய பாதைகள் அமைக்கப்பட வேண்டும். நகரத் தின் மத்திகளில் உள்ள வாகன நெரிசலை கட்டுப்படுத்த நகர்ப் புறங்களிலேயே தனியார் வகனங் களை தரிக்கவைத்து சகலரும் மைய நகருக்குள் குறிப்பிட்ட பேருந்துகளிலேயே பயணிக்க வேண்டும் என்ற ஒழுங்குகளை அறிமுகப்படுத்தலாம்.

விரைவான ஒரு வழிப்பாதைகளை வாகன சாரதிகளுக்கு இலகுவான முறையில் ஒழுங்குபடுத்தலாம். பாதசாரிகளு க்கு என பாதசாரிகள் கடவைகள் மிகப் பாதுகாப்பாக நிறுவப்பட்டு குறிப்பிட்ட இடங்களில் மட்டுமே கடவைகள் அமைக்கலாம். இவை போன்றவற்றுடன் வருடத்திற்கு ஒருமுறையாவது வீதிகளின் தரப் படுத்தலை செயற்படுத்துவதுடன் வீதி ஒழுங்குகளை மீறுபவர்கள் மீது கடுமையான நடவடிக்கைகளை எடுப்பதன் மூலமுமே இந்தப் போக்குவரத்து நெரிசலை இல்லாது செய்ய முடியும். இன்று அமைக் கப்பட்டு வரும் புதிய பெருந் தெருக்களும் வீதி அபிவிருத்தி நடவடிக்கைகளும் பாராட்டப்பட வேண்டியவையே.

குறிப்பாக இன்று நம்மில் பலருக்கு, தான் மட்டும் என்ற சிந்தனைகள் மாறி மற்ற வாகனங்களும் வீதியில் பயணிக்கின்றன, மற்றவர்களும் எங்களைப்போல பல்வேறு தேவைகளுக்காக வீதியில் பயணிப்பவர்கள் என்ற எண்ணம் வந்துவிட்டாலே வீதி ஒழுங்குகள் கண்டிப்பாக கடைப்பிடிக்கப்படும்.