சம்பந்தன் ஐயாவின் காலம்கடந்த ஞானம்   

தமிழர் தேசிய கூட்டமைப்பின் தலைவர் சம்பந்தன் அவர்கள் திரிகோணமலையில் நடைபெற்ற கிழக்கு மாகாணசபைக்; தேர்தல் பிரச்சாரக்கூட்டத்தில் 22 வருடங்களின் பின்னர் தன்னை மறந்து  சில கசப்பான உண்மைகளை இப்போது கூறியுள்ளார். வீரகேசரிப்பத்திரிகையில் அவரது பேச்சு இடம்பெற்று இருந்தது                    

சம்பந்தன் அவர்கள் என்ன கூறியிருக்கின்றார் என்றால் :   “2000ம் ஆண்டில் சந்திரிகா அரசியல் அமைப்பு திருத்தம் ஒன்றை முன் மொழிந்தார் அது அதிகாரதீர்வை அடிப்படையாகக் கொண்டிருந்தது. அதில் அதிகாரப்பகிர்வு பச்சையாக சமஸ்டி என்று கூறாவிட்டாலும் இந்திய மாநில அதிகாரங்களை விட அதிகாரங்களைக்கொண்டதாக அது அமைந்திருந்தது. ஆனால் அதுவும் ஐக்கியதேசியக்கட்சியின் எதிர்ப்பால் தடைபட்டுப்போனது.”  (நன்றி வீரகேசரி ).

ஐனாதிபதி சந்திரிக்கா அவர்கள் யு.என்.பி கட்சியை நம்பித் தீர்வுத்திட்டத்தை கொண்டுவரவில்லை சந்திரிக்கா அரசு சிறுபான்மை அரசு என்பதால் சம்பந்தன் கொடுத்த உத்தரவாத்தின் நம்பிக்கையிலும் அவரின்  கட்சியிடம் இருந்த ஐந்து பாராளுமன்ற உறுப்பினர்களையும்,  ஈ.பி.டி.பி கட்சியிடம் இருந்த நான்கு பாராளுமன்ற உறுப்பினர்களையும் அதாவது மொத்தமாக இந்த ஒன்பது வாக்குகளையும் மனதில் வைத்துக்கொண்டுதான் தீர்வைக்கொண்டு வந்தார்.  சந்திரிக்கா அவர்கள் தமிழ்மக்களுக்கு மிகவும் தரமான கௌரவமான அதாவது  தகரம் போன்று இல்லாமல் தங்கமான தீர்வை பாராளுமன்றத்தில் கொண்டுவந்தார்.

 ஐனாதிபதி சந்திரிக்கா அவர்கள் சம்பந்தன் மேல் நன்றாகவே அக்கறை கொண்டிருந்தார். அதேபோல நம்பிக்கையையும் கொண்டிருந்தார்.  சம்பந்தன் அவர்களை சாம் என்று அன்பாக அழைப்பது மட்டுமல்ல புலிகளினால் சம்பந்தன் அவர்களுக்கு உயிர் ஆபத்து இருப்பதால் ஜேர்மனியில் இருந்து குண்டு துளைக்கமுடியாத வாகனத்தை தருவித்து கொடுத்து உச்சகட்ட பாதுகாப்பையும் வழங்கினார். ஆனால் சம்பந்தனோ கடைசிநேரத்தில்  தமிழர் தீர்வுக்கு ஆதரவு தரமுடியாது என்று சந்திரிகாவின் காலைவாரிவிட்டார்   தமிழர்களுக்கு கிடைக்கவிருந்த கிட்டத்தட்ட சமஸ்டிக்கு ஒப்பான தீர்வை எதிர்க்கட்சியுடன் இணைந்து எதிர்த்தார்.

ஆமாம் அன்று கிடைத்த பொன்னானவாய்ப்பை கைநழுவவிட்டு தமிழ்மக்களின் வாழ்க்கையைத் தொலைத்துவிட்டு இப்போது  தமிழ்மக்களின் வாக்குகளுக்காக யு.என்.பி கட்சியால் அரசியல் தீர்வு அடிபட்டுபோனதாம் என்று அவர்கள் மேல் பழியைப்போட்டு தப்பிவிடப்பார்க்கின்றார்.

வடக்கில் இனவாதம் பேசி அதிக ஆசனங்களை பெற்றும் மக்களுக்கு எவ்வித பிரயோசனமும் இல்லாத இந்த கூட்டமைப்பினர்  இப்போது கிழக்கு மாகாணத்தில் தாம் ஆட்சியைப் பிடிப்பதற்காக இனவாதத்தை விதைத்து வருகின்றார்கள். கிழக்கு முதலமைச்சர் சந்திரகாந்தன் தலைமையில் அனைத்து இன மக்களுக்கும் வேறுபாடுகாட்டாமல் கிழக்கை முன்னேற்றி வருகின்றார். இதனைப் பொறுக்கமுடியாத இந்த கூட்டமைப்பினர் குழப்பியடிக்கவருகின்றனர்.

அப்பாவி முஸ்லிம் மக்கள் புலிகளால் படுகொலைசெய்யப்பட்டபோது கண்டிக்காமல் கண்மூடிக்கொண்டு இருந்துவிட்டு இப்போது தாம் ஆட்சியைப்பிடிப்பதற்காக முஸ்லீம் காங்கிரசின் உதவியுடன் ஆட்சியமைக்கப் போகிறார்களாம்.                                                            தமிழ் இளைஞர்களை உசுப்பேத்தி அந்த அழிவை வைத்து பாராளுமன்றம் சென்றவர்கள் கிழக்கிலும் அதே பாணியைப்பின்பற்றி  முஸ்லீம் இளைஞர்களையும் பலிக்கடாவாக்கப்போகின்றார்கள். ஏன் என்றால் நீர் இன்றி மீன் உயிர்வாழ முடியாதோ அதுபோல இந்த கூட்டமைப்பினருக்கும் போர் போராட்டம் இன்றி பதவியைப்பிடிக்கமுடியாது. இல்லாவிட்டால் தமிழ்மக்களின்மேல் அக்கறை உள்ளவர்களாக இருந்திருந்தால் இப்போது இருக்கும் நல்ல சூழ்நிலையில் தமிழ்மக்களுக்கு ஆரோக்கியமான வாழ்க்கையை பெற்றுக்கொடுக்கலாம். இந்தியா அமெரிக்கா உட்பட சர்வதேச சமூகம் கூட இந்த கூட்டமைப்பு சம்பந்தனுக்கு என்ன கூறியிருக்கின்றார்கள் என்றால் பாராளுமன்றத்தெரிவுக்குழுவில் முதலில் பங்குபற்றுங்கள் அதன்பின்னர் பார்க்கலாம் என்கிறார்கள். ஆனால் இவர்கள் நொண்டிச்சாட்டுக்களை சொல்லிக்கொண்டு எந்த தீர்வுக்கும் செல்லமாட்டர்கள்.  எதிர்க்கட்சிகளுடன் இணைந்து எதிர்த்துக்கொண்டே இருப்பார்கள்.                                       

இலங்கை அரசியல் வரலாற்றில் ஆளுங்கட்சி தமிழ் மக்களுக்கு தீர்வைக்கொண்டு வரும்போது எதிர்க்கட்சி எதிர்ப்பதுதான் கடந்தகால வரலாறு. சந்திரிக்கா அவர்கள் தீர்வைக்கொண்டு வந்தபோது எதிர்க்கட்சித்தலைவர் ரணில் அவர்கள் தமிழர்களுக்கான தீர்வை எதிர்த்தது மட்டுமல்ல பாராளுமன்றத்தில் வைத்து எரித்தும் தனது எதிர்ப்பைக்காட்டினார். அதே ரணிலுடன் இணைந்து சம்பந்தன் சரத்பொன்சேகாவை ஜனாதிபதி ஆக்குவதற்காக தமிழ்மக்களிடத்தில் வாக்குகள் கேட்டார் யாழ்ப்பாணத்தில் ரணில் அவர்களுடன் இணைந்து சிங்கக்கொடியை ஏற்றியிருந்தார் சம்பந்தன்.

கடந்த  கிழக்கு மாகாணசபைத்தேர்தலில் தமிழர் தேசிய கூட்டமைப்பு போட்டியிடாமல் விலகி இருந்ததிற்கு காரணம் சொன்னார்,  இத்தேர்தலில் போட்டியிட்டால் வடக்கு-கிழக்கு பிரிப்புக்கு தாங்கள் துணைபோவதாக போய்விடும் என்று வீரமான அறிக்கைவிட்டுவிட்டு இப்போது அதே கிழக்குமாகாணத் தேர்தலில் போட்டியிடுகின்றார்கள்.                                                                  

மூன்றாம்தர அரசியல்தனம் புரியும் சம்பந்தன் அவர்கள் தமிழர் நலனை  முன்னிறுத்தி எப்படி  ஒரு தீர்வை பெற்றுத்தருவார். காலம்காலங்களாக எதிர்க்கட்சிகளுடன் இணைந்து ஆளுங்கட்சியை எதிர்ப்பது தேர்தல்வரும்போது தமிழ்மக்களின் வாக்குகளுக்காக அந்த எதிர்க்கட்சிகளைத்திட்டி இனவாதம் பேசுவது இப்படியாக உள்ளத்தில் ஒன்றும் உதட்டில் வேறொன்றுமாகப் பேசி 60 வருடங்களாக தமிழ்மக்களை ஏமாற்றி தங்கள் பதவிக்காலத்தை ஓட்டியவர்களின் கபடத்தனத்தை அனைவரும் புரிந்துகொள்ளும் காலம் வந்துவிட்டது.          

டென்சில்(கனடா)