இந்தநிலையில், முதலாவதாகச் செய்யவேண்டியது, இந்தப் பகுதிகளின் கிணறுகள் பரிசோதிக்கப்பட்டு, அவைகளில் என்னென்ன அளவுகளில் எணணெய், கீறீஸ் என்பவைகள் கலந்துள்ளன என்பது ஆதாரபுர்வமாக அறியப்படவேண்டும். அதே வேளையில் உடுவில் வயல் பகுதிகளிலும், அதனை அண்டிய கிழக்கு, தெற்கு, மேற்கு, வடக்குப் பகுதிகளிலும். கந்தரோடைக் கிராமம், மற்றும் சங்குவேலி என்பவைகளின் கிணறுகளிலும் கழிவு எண்ணெய்கள் கலந்துள்ளனவா என்பது பரீட்சித்துப் பார்த்து, உறுதிப்படுத்தப்படவேண்டும்.
இன்றுவரை உடுவில் வயல் பகுதியிலும், அதைச் சுற்றிய குடியிருப்புப் பகுதிகளிலும் கழிவு எண்ணெய் கிணற்று நீரில் கலந்திருப்பது உறுதிப்படுத்தப்படவில்லை. இந்தநிலையில், ஒரு மிக முக்கிய கேள்வி எழுகிறது.

சுண்ணாகம் மின் நிலையத்திலிருந்து வெகு தொலைவிலுள்ள தெல்லிப்பழை, இளவாலை, கட்டுவன், இணுவில் , உரும்பிராய் போன்ற பகுதிகளில் கழிவு எண்ணெய்கள் கலந்ததாகக் கூறப்படும்போதும், மேற்கே அருகில் உள்ள உடுவில் வயல் பகுதிக்கும், அதனைச் சுற்றியுள்ள பகுதிகளிலும் ஏன் கழிவு எண்ணெய்கள் நிலத்தடி நீரில் பரவவில்லை? பல கிலோ மீற்றர்கள் தொலைவிலுள்ள இளவாலை, தெல்லிப்பழை, கட்டுவன் பகுதிகளுக்கு எப்படிப் பரவியுள்ளது.
மிகத் தொலைவில் உள்ள கிராமங்களில் பரவியிருக்கிறது எனக் கூறப்படுவது பொய்யா?
இக்கேள்விக்குப் பதிலளிப்பதாயின்:

1) கழிவு எண்ணெய்கள் மணல், மண், கற்பாறை, ஏனைய பகுதிகளில் எப்படி உறுஞ்சப்படுகிறது, பரப்பப்படுகிறது என்பது பற்றித் தெரியவேண்டும்.

2) சுண்ணகம் மின் நிலையத்து பகுதியின் தரை படை அமைப்புக்கள், அவற்றின் தன்மைகள் பற்றித் தெரியவேண்டும்,

3) கழிவு எண்ணெய் பரவியதாகக் கூறப்படுத் கிராமங்களின் தரைப் படைகளின் தன்மைகள், அமைப்புக்கள் பற்றித் தெரியவேண்டும்.

 இவைகளைப் பற்றி எவர்களாவது இன்றுவரை ஆய்வுகளைச் செய்து அறிபக்கைகளை வெளியிட்டுள்ளார்களா?
கழிவு எண்ணெய்யினை மணல் பகுதியில் விட்டால், அது மணலுடன் பொருந்தி, ஒரு தொகுதியாக நின்றுகொள்ளும்.
மண்ணிலும் இதுவே பெருமளவில் நடைபெறும்.
ஆனால், கற்பாறைத் தொகுதியில் கழிவு எண்ணெய் ஆனது, பாறை வெடிப்புக்களுடாக வழிந்து ஓடியவண்ணம்தான் இருக்கும்.
சுண்ணாகம் மின் நிலையப் பகுதியானது, தரையின் மட்டத்திலேயே கற்பார்கள் இருக்கும் பகுதியாகும். இந்தக் கற்கள் உடைத்து எடுக்கப்பட்டே இப்பகுதிகளில் விவசாயம் செய்யப்பட்டு வருகிறது.
கழிவு எண்ணெய் பரவியிருப்பதாகக் கூறப்படும் செம்மண் கிராமங்களிலும், கற்படையானது வெவ்வேறு ஆழங்களில் காணப்படுகின்றது.
ஆகையினால், சுண்ணாகம் மின் நிலையத்தில் கழிவு எண்ணெய்கள் நில மேற்பரப்பில் விடப்பட்டால், அவை ஒரு குளமாக இருந்து, மிகச் சிறிய அளவுகளில் மெல்லமெல்லக் கசிந்து செல்லும் நிலைதான் உருவாகியிருக்கமுடியும்.
இல்லாதுபோனால். மின் நிலையப் பகுதியில் துளைக் கிணறுகள் துளைக்கப்பட்டு அவற்றினுள் கழிவு எண்ணெய்கள் விடப்பட்டிருக்கவும் முடியும்.
அப்படி விடப்பட்டாலும், ஒரு குறிப்பிட்ட ஆழத்தில் நீர் கிடைக்கும் நிலை உருவாகியிருக்கமுடியும்.
கழிவு எண்ணெய்களின் அடர்த்தியைப் பொறுத்தே அது எப்படி கற்படைகளுடாகக் கசியும் என்பது தங்கியுள்ளது.
இதைவிட, நிலத்தின் அடியில் காணப்படும் Aquifer மட்டம்வரை சில நூறு அடிகள் ஆழமாகத் துளைக்கப்பட்டு, அந்தத் தண்ணீருள் கழிவு எண்ணெய்கள் பெரும் அழுத்தத்துடன் இறைக்கப்படவும் முடியும்.
இப்படிச் செய்யப்பட்டால், சுண்ணாகம், மற்றும் பகுதிகளின் அடியில் இருக்கும் Aquifer முழுவதும் கழிவு எண்ணெய்கள் கலந்த நீரைக் கொண்டதாக மாற்றப்பட்டுவிடும்.
இது, அந்த Aquifer இல் இலிருந்து தண்ணீர் பெறப்படும் அனைத்துக் கிராமங்களினது தண்ணீரிலும் நிரந்தமாக கழிவு எண்ணெய்கள் கலந்த நிலையை உருவாக்கிவிடும்.
இந்த நிலையில், யாழ் குடா நாட்டின் நில அடியில் எத்தனை Aquifer உள்ளன, அவைகளின் அமைப்பு, பரப்பு நிலைகள் என்பவைகள் அறியப்படவேண்டும்.
இது பற்றிய ஆய்வுகள் செய்யப்பட்டு வரை படங்கள் கிடைக்கப்பெறும் நிலை உள்ளதா என்பது அடுத்த கேள்வி.
இப்படி Waste oils கலக்கப்பட்ட Aquifers ஐச் சுத்திகரிக்கம் முறை கண்டறியப்பட்டுவிட்டதா என்பது தெரியவில்லை.
இன்றைய யாழ்குடாவின் நிலை இப்படி இருக்கும்போது, வட மாகாண சபையின் சுகாதார அமைச்சின் செயலாளர் ஓரு அவசர அறிக்கையை திணைக்களங்களுக்கு அனுப்பியுள்ளார்.
அந்த அறிக்கையில், மாகாண சுகாதார சேவை அதிகாரிகள் யாரும் ஊடகங்களுக்கோ, பொது மக்களுக்கோ தகவல்களை வழங்கக் கூடாது. அவ்வாறு வழங்குவதாயின் அந்தத் தகவலைகளை அமைச்சின் செயலாளருக்கு சமர்ப்பித்து அனுமதியைப் பெற்றே கின்னரே செளியிடமுடியும் எனக் கூறியுள்ளது.
வடமாகாண சபையின் சுகாதார அமைச்சுச் செயலரின் இந்த அறிக்கை எப்படியானது?
ஒரு பொது, தனியார் கிணற்றில் கழிவு எண்ணெய்கள் கலந்துள்ளதா என்பதைப் பரிசோதிக்கப் பணம் செலுத்தி ஒருவர் அறிந்த நிலையில், அந்த நீரின் பயன்பாடு பற்றி. சுகாதாரத்திற்குப் பொறுப்பான MOH ஓ, PHI ஓ மாகாண சபை செயலருக்கு அறிவித்துத்தானா, அக்கிணற்று நீரைப் பயன்படுத்தவேண்டாம் என்ற அறிவித்தலை வாய்மொழியுடாகவும், துண்டுப் பிரசுரம் ஊடதகவும் செய்யவேண்டும்?
அதற்கான அனுமதியை சுகாதார அமைச்சுச் செயலர் வழங்காவிடின், அந்த விடயம் மூடி மறைக்கப்பட்டு, மக்கள் தொடர்ந்தும் கழிவு எண்ணெய்கள் கலந்த நீரை உட்கொண்டு இறக்கவேண்டியதுதான்!!
2. சுண்ணாகம் மின் நிலையத்தின் Northern Power Company யின் எந்திரங்களால் உருவாகக்கூடிய கழிவு எண்ணெய்கள்.
வலிகாமப் பகுதியின் கிணறுகளில் கழிவு எண்ணெய்கள் கலப்பது பற்றிப் பலர் பலவற்றை முகநூல்களிலும், இணையத் தளங்களிலும் எழுதி வருகின்றனர். ஆனால். சுண்ணாகம் மின் நிலையமூடாக எப்படி, எவ்வளவு கழிவு எண்ணெய்கள் ஒரு வருடத்திற்கு உருவாகியிருக்க முடியும் என்பது பற்றியும், இதற்கு உண்மையில் என்ன நடைபெற்றது என்பது பற்றியும், திட்டவட்டமாகவும், ஆதாரபுர்வமாகவும் எதனையும் எவரும் கூறவேயில்லை! இவற்றை அறிய, முதலில் எமக்குப் பின்வருவன பற்றி முழுமையாகத் தெரியவேண்டும்.

1) சுண்ணாகம் மின் நிலையத்திலுள்ள மின் பிறப்பாக்கிகள் எத்தனை?

2) இவை ஒவ்வொன்றும் எத்தனை Mega Watts சக்தியை உண்டாக்கக்கூடியவை?

3) இவைகள் என்ன எரிபொருள் கொண்டு, எப்படி இயக்கப்படுகின்றன?

4) ஒவ்வொரு இயத்திரத்திலும், எத்தனை லிற்றர் என்ன வகையான Lubricating Oil பயன்படுத்தப்படுகிறது?

5) எத்தனை மணித்தியாலங்கள் என்ஜின்கள் இயக்கப்பட்டபின்னர் used lubricating oil மாற்றப்பட்டு வருகின்றன?

6) ஒரு வருடத்திற்குச் சராசரியாக எத்தனையாயிரம் லிற்றர்கள் கழிவு எண்ணெய்கள் ஒரு என்ஜினிலிருந்து வெளியே எடுக்கப்பட்டு, புதிய எண்ணெய்கள் விடப்படுகின்றன?

7) Northern Power Company செயற்பட ஆரம்பித்திலிருந்து ஐந்து மின் பிறப்பாக்கிகளிலும் இருந்து எத்தனை லட்சம் லிற்றர் கழிவு எண்ணெய்கள் உண்டாகி. வெளியே எடுப்பட்டன?

8) இவ்வளவு பெரும் அளவிலான கழிவு எண்ணெய்களை Northern Power Company எப்படி அகற்றியது?

இந்த விடயங்கள் பற்றிய சரியான தகவல்களைப் பெறாது விடயங்களைப் பேசுவது வீண்.
நொதேர்ன் பவரின் மின் பிறப்பாக்கி என்ஜின்கள் பழையனவாக இருந்தால், திகவும் சீக்கிரத்தில் எரிவுக்குப் பயன்படுத்தம் எண்ணையானது lubricating oil உடன் கலந்து, lubricating oil ஆனது வெகு சீக்கிர கால எல்லைக்குள் மாற்றப்படவேண்டி இருக்கும்.
இதே கேள்விகள் இலங்கை மின்சார சபையின் மின் பிறப்பாக்கிகள் தொடர்பாகவும் எழுப்பப்பட்டு விடைகளைக் காணவேண்டியுமுள்ளது.

அதே நேரத்தில் கடந்த காலங்களில் யாழ்ப்பாணக் குடா நாட்டில் இலங்கை மின்சார சபையினால் பயன்படுத்தப்பட்டு வந்த transformers, oil circuit breakers, ஏனையவைகளின் கழிவு எண்ணெய்கள் என்ன செய்யப்பட்டன என்பதும் ஆராயப்படவேண்டும்.
மேலும் மின்சாரசபை எவ்வளவு மின் சக்தியினை ஒவ்வொரு மாதமும் இந்தக் கொம்பனியிடமிருந்து கொள்வனவு செய்துள்ளது, அது சுண்ணாகத்தில் எவ்வளவு மின் சக்தியை உற்பத்தி செய்துள்ளது என்ற விபரங்களை மின்சார சபையிடமிருந்து பெறவேண்டியும் உள்ளது.

இந்த அடிப்படை விடயங்கள் அறியப்பட்ட பின்னரே, விசாரணைகள் மேற்கொள்ளப்பட்டு, உண்மையில் என்ன நடைபெற்றுள்ளது என்பதை ஓரளவுக்குச் சரியாக அறிந்து, அடுத்த கட்ட நகர்வினைச் செய்யமுடியும். சக்தி அமைச்சினாலும், வடக்கு மாகாண சபையாலும் நியமிக்கப்பட்ட விசேட குழுக்கள் இவற்றை எவ்வளவு காலத்தினுள் செய்து, அடுத்த கட்ட வேலைகளைச் செய்வார்கள் என்பது தெரியாத நிலைதான் தொடர்கிறது.

(Abimanasingham Sitthawatthai Uthayakumar)

அமைதி சமாதானம் ஜனநாயகம்

www.sooddram.com