1950களில் 'இந்துச் சட்டத்தை' நிறைவேற்ற கடும் எதிர்ப்பு இருந்த நிலையில் ஒரு அரசியல் சட்ட நெருக்கடியைத் தவிர்ப்பதற்காக நேரு அதை அபோது திரும்பப் பெற்றுக் கொண்டு, பின்னர் அடுத்தடுத்த ஆண்டுகளில் படிப்படியாக நிறைவேற்றினார். இது போல ஒரு அரசியல் தந்திர அணுகல்முறையை மேற்கொள்ள இயலாத இவர்கள் இந்த ஆண்டு தொடக்கத்தில் நடை பெற்ற நாடாளுமன்றத் தேர்தலில் முறியடிக்கப்பட்டனர். இதன் பலனை பா.ஜ.க அறுவடை செய்து கொண்டது.

தற்போது நடைபெற்றுள்ள மாநிலத் தேர்தலில் பா.ஜ.கவை மக்கள் நிராகரித்துள்ளனர். பா.ஜ.கவின் கடந்த 10 மாத கால ஆளுகையின் மீதான தீர்ப்பாகவே நாம் இதை எடுத்துக் கொள்ள வேண்டியுள்ளது. ஒபாமா வருகையின்போது மோடி அரங்கேற்றிய கோமாளித்தனங்கள், டெல்லி கிறிஸ்தவ ஆலயங்களின் மீதான தாக்குதல்களில் சட்ட ஒழுங்கைக் கையில் வைத்துள்ள மோடி அரசு காட்டிய திமிர்த்தனம், கோட்சேயைக் கொண்டாடுவது மற்றும் 'கர்வாபசி'க் கலாட்டாக்கள், திட்டக் கமிஷன் முதலான ஜனநாயக நிறுவனங்களின் மீதான தாக்குதல்கள் ஆகியவற்றை மக்கள் ஏற்கவில்லை என்பதை இந்தத் தேர்தல் முடிவுகள் நிறுவிவிட்டன.

இதை ஏதோ மாநிலத் தேர்தல் முடிவுகள்தான், இதை மத்திய அரசின் மீதான தீர்ப்பாகப் பார்க்கத் தேவையில்லை எனக் கருத முடியாது. ஏனெனில் டெல்லி மக்கள் தலை நகரத்தில் வாழ்பவர்கள். சட்ட ஒழுங்கு நிறைவேற்றம் முதலானவற்றில் மத்திய அரசின் நேரடிக் கட்டுப்பாட்டில் இருப்பவர்கள்.தவிரவும் மோடியே களத்தில் இறங்கிப் படு தீவிரமாகப் பிரச்சாரம் செய்தும் இந்தத் தோல்வி ஏற்பட்டுள்ளதை நாம் கவனத்தில் கொள்ள வேண்டும்.
2014 நாடாளுமன்ரத் தீர்ப்பு என்பதை பா.ஜ.கவினர் ஒரு மாற்றம் வேண்டிய தீர்ப்பு, காங்கிரஸ் கூட்டணி ஆட்சிக்கு எதிரான தீர்ப்பு என்கிற அளவிலேயே புரிந்து கொள்ள வேண்டும். மாறாக அவர்களின் கொள்கைகளுக்கும் சங்கப் பரிவாரங்களின் சேஷ்டைகளுக்கும் ஆதரவாக வழங்கப்பட்ட தீர்ப்பாக அவர்கள் புரிந்து கொள்ளக் கூடாது என்பதை அவர்கள் உணர்ந்து கொள்ள இது ஒரு நல்ல சந்தர்ப்பம்.

ஆம் ஆத்மி கட்சியைப் பொறுத்த மட்டில் அது லஞ்சம், ஊழல் ஒழிப்பு, நல் ஆளுகை என்பதைத் தாண்டி இந்தியாவின் பன்முகப் பிரச்சினைகள் குறித்த கருத்துக்கள் இல்லாத ஒரு கட்சி அது. சாதிப்பிரச்சினை, மத வெறி அரசியல், அயலுறவு, அண்டை நாடுகளுடனான பிரச்சினைகளில் அதன் அணுகல்முறை ஆகியவை குறித்த அவர்களுக்குக் கருத்துக்கள் இருப்பதாகத் தெரியவில்லை.

முற்போக்கு, பிற்போக்கு என்பதற்கெல்லாம் இது காலமில்லை என்கிறார் அந்தக் கட்சியின் 'ஐடியலாக்' யோகேந்திர யாதவ். எல்லோராலும் கண்டிக்கப்படும் ஹரியானாவின் சாதிப் பஞ்சாயத்துகளுக்கு ஆதரவாக கெஜ்ரிவால் உளறிக் கொட்டி சிக்கலில் மாட்டிக் கொண்டதும், ஆம் ஆத்மியின் அமைச்சர் ஒருவர் வெளிநாட்டுக்கறுப்பினப் பெண்கள் குறித்து அவதூறாகப் ப் பேசியதோடு அவர்களிடம் தனது அதிகாரத்தைத் தவறாகப் பயன்படுத்தியது என்பதெல்லாமும், அந்த நபரைக் கடைசிவரை கட்சித் தலைமை காப்பாற்ற முனைந்ததும் அவர்களின் மத்தியதர வர்க்க மனநிலையையும், அரசியல் முதிர்ச்சியற்ற தன்மையையுமே காட்டின.

சாதி, மதம், அயலுறவு, அணுக் கொள்கை, தொழிலாளர் கொள்கை, தாராளமயக் கொள்கை முதலானவற்றில் ஆம் ஆத்மி தன் நிலைபாடுகளை விளக்காதவரை அதை நாம் சந்தேகக் கண்களுடனேயே அணுக வேண்டியுள்ளது.
Marx Anthonisamy

அமைதி சமாதானம் ஜனநாயகம்

www.sooddram.com