பிரதமர் உருத்திரகுமாரனால் மறக்கப்பட்ட மாவீரர்களும், மறைக்கப்பட்ட தேசியத் தலைவரும்!

கே.பி. அவர்களால் முன்மொழியப்பட்ட நாளிலிருந்து 'நாடு கடந்த தமிழீழ அரசு' தமிழ்த் தேசியத்திற்கெதிரான அச்சுறுத்தல் தளமாகவே தன்னை நிறுவி வருகின்றது. நாடு கடந்த தமிழீழ அரசும், மக்கள் அவைகளும் இரட்டைக் குழல் துப்பாக்கியாக தமிழீழ விடுதலைத் தளத்தில் இணைந்து பயணிக்கும் என்ற தனது முன்னைய வாக்குறுதியையும் மீறியே திரு. உருத்திரகுமாரன் அவாகள் செயற்பட்டு வருகிறார் என்ற குற்றச்சாட்டும் தமிழ்த் தேசிய விடுதலைத் தளத்தால் முன்வைக்கப்பட்டுள்ளது.

நாடு கடந்த தமிழீழ அரசுக்கான தேர்தலை நடாத்தி முடிக்கும்வரை புலம்பெயர் தமிழ்த் தேசியக் கட்டமைப்புக்களுடன் சமரசம் செய்து கொண்ட திரு. உருத்திரகுமாரன், அதன் பின்னரான இன்று வரையிலான நாட்கள் வரை புலம்பெயர் தமிழ்த் தேசியக் கட்டமைப்புக்களுடன் மோதல் போக்கையே கடைப்பிடித்து வருகின்றார்.
 
தமிழ்த் தேசியக் கட்டமைப்புக்களுக்குச் சார்பானவாகள் எனக் கருதப்படுபவர்களின் தேர்தல் தெரிவுகளை இரத்துச் செய்ததில் ஆரம்பித்த இந்த முரண்பாடு தமிழ்த் தேசியத் தளத்தில் நாடு கடந்த தமிழீழ அரசு சார்பான ஒரு குழுவை உருவாக்கியுள்ளது.

முள்ளிவாய்க்காலில் நடைபெற்ற விடுதலைப் புலிகளின் களமுனை இழப்பினைச் சாதகமாகக் கொண்டு, தேசியத் தலைவர் அவர்களது இடத்திற்கு கே.பி.யை நகர்த்த முயன்ற குழுவினர், அதில் தோல்வியுற்ற நிலையில், தமிழ்த் தேசியத் தளத்தைச் சிதைக்கும் எண்ணக் கருவுடன் நாடு கடந்த தமிழீழ அரசில் உள் நுழைந்து, தம்மைப் பலப்படுத்திக்கொண்டனர்.
 
குழப்பமான காலத்தில் மேற்கொள்ளப்பட்ட தேர்தலில் விருப்பத்துடன் பங்குபற்றப் பலர் முன்வராத நிலையிலும், கே.பி. மீது உருவான நம்பிக்கையீனத்தின் அடிப்படையில், கே.பி.யால் முன்மொழியப்பட்ட நாடு கடந்த தமிழீழ அரசுக்கான தேர்தலை தமிழ்த் தேசிய உணர்வாளாகள் பலர் நிராகரித்தும் இருந்த நிலையில், நாடு கடந்த தமிழீழ அரசு என்ற தளத்தில் கே.பி. குழுவினர் இலகுவாக உள் நுழைந்து கொண்டனர். பெரும்பான்மை பலம் கொண்ட இவர்களிடம் திரு. உருத்திரகுமாரன் அவர்கள் சூழ்நிலைக் கைதியாகச் சிக்கிக்கொள்ள நேர்ந்தது.  

பிரான்சில் இடம்பெற்றதாகப் புனையப்பட்ட தேர்தல் மோசடி நாடகமும், அதனைத் தொடர்ந்து தமிழ்த் தேசிய தளத்தின் முன்னணிப் பணியாளர்கள் இருவரது தெரிவுகள் இரத்துச் செய்யப்பட்டதும் தவறான அணுகுமுறை என்று திரு. உருத்திரகுமாரன் அவர்களுக்கு மிகத் தெளிவாக ஆதாரங்களுடன் விளக்கப்பட்டது. ஆனாலும், நீதிக்குச் சார்பாக நிற்க முடியாத நிலையில் திரு. உருத்திரகுமாரன் அவர்கள் முன்னுக்குப் பின் முரணான பதில்களை வழங்கியதுடன், அந்தத் தேர்தல் பிரச்சினைகளைத் தீர்க்கும் பொறுப்பை கே.பி. குழுத் தலைவரிடமே விட்டிருந்தார். இன்றுவரை, அந்தத் தேர்தல் பிரச்சினை தீர்க்கப்படாமலேயே நாடாளுமன்றம், பிரதமர், சபாநாயகர், மந்திரிகள் என்ற தொடர் அரங்கேற்றப்பட்டு வருகின்றது.

திரு. உருத்திரகுமாரன் அவர்களது தளம்பல் போக்கினாலும், முன் - பின் முரணான முடிவுகளாலும் அச்சத்துக்குள்ளான தமிழ்த் தேசிய உணாவாளர்கள் நாடு கடந்த தமிழீழ அரசின் தடம் மாறிய திசையை நேர் படுத்தும் முயற்சியில் இறங்கிளார்கள். தமிழ்த் தேசிய உணாவாளாகளது இந்த நீதிக்கான போராட்டமும் கே.பி. குழுவினரால் முறியடிக்கப்பட்டது.
 
இதனால், நாடு கடந்த தமிழீழ அரசின் இரண்டாவது அமர்வில் கலந்து கொண்ட மக்கள் பிரதிநிதிகளில் 38 பேர் வெளிநடப்புச் செய்த நிலையில், கே.பி. குழுவினரின் ஆலோசனையுடன் புதிய அரசியல் அமைப்புக்கான அங்கீகாரமும், பிரதமர், சபாநாயகர் தெரிவும், தொடர்ந்து மந்திரி சபை நியமனங்களும் ஜனநாயக விழுமியங்களின் படுகொலை மீது நிகழ்த்தப்பட்டது.

கே.பி. குழுவினரது தமிழ்த் தேசிய சிதைவு முயற்சியினைத் தடுத்து நிறுத்தி, தேசியத் தலைவர் அவர்களது பாதையில் இணைந்து பணியாற்றுமாறு தமிழ்த் தேசிய உணர்வாளாகளால் விடுக்கப்பட்ட  உருக்கமான வேண்டுகோளும் பிரதமர் உருத்திரகுமாரன் அவர்களால் நிராகரிக்கப்பட்டுள்ளது.
 
புது வருடத்தை முன்னிட்டு, தமிழ்த் தேசிய விடுதலைத் தளம் சார்பாக பிரான்ஸ் தமிழீழ மக்கள் பேரவை விடுத்த ஒன்றிணைந்த போராட்டத்திற்கான அழைப்பும் நிராகரிக்கப்பட்டுள்ளது. திரு. உருத்திரகுமாரன் அவர்களது இந்தக் குழுநிலைவாதம் தமிழ்த் தேசிய விடுதலைப் போராட்டத்தை வெகு தூரம் பின் நகர்த்தி வருகின்றது.

இந்த நிலையில், திரு. உருத்திரகுமாரன் அவர்கள் விடுத்துள்ள புது வருடத்திற்கான செய்தி தமிழ்த் தேசியவாதிகளை மிகுந்த அதிருப்திக்கும், கோபத்திற்கும் உள்ளாக்கியுள்ளது. அவரது அறிக்கையில் திட்டமிட்ட வகையில் மாவீரர்களது அர்ப்பணிப்புக்கள், விடுதலைப் புலி வீரர்களது தியாகம் மறக்கப்பட்டும், தேசியத் தலைவர் அவர்கள் குறித்த செய்தி மறைக்கப்பட்டும் உள்ளது.
 
தமிழீழ விடுதலை நோக்கிய எந்த நகர்வுக்கும் விதைகளாகவும், வேர்களாகவும் இருந்து வழிகாட்டும் மாவீரர்களையும், சூரியத் தேவனாகத் தமிழீழம் நோக்கிய அத்தனை நகர்வுகளுக்கும் ஒளி வழங்கி உயிர்ப்பிக்கும் தேசியத் தலைவர் அவர்களையும் திட்டமிட்ட வகையில் மறைப்புச் செய்துள்ள உருத்திரகுமாரன் அவர்களது செயல் தமிழ்த் தேசிய தளத்தில் பல்வேறு அதிர்வலைகளை எழுப்பியுள்ளது.

சிங்கள தேசம் அறிவித்துள்ள, ''கே.பி. ஊடாக, புலம்பெயர் தமிழர்கள் மீதான தாக்குதல் ஆரம்பமாகிவிட்டது'' என்ற செய்தி இதுவாக இருக்குமோ என்ற அச்சம் தற்போது புலம்பெயர் தமிழீழ மக்களை முற்றாக ஆக்கிரமித்துள்ளது. இதனைத் தெளிவு படுத்த வேண்டிய கடமை திரு. உருத்திரகுமாரன் அவர்களுக்கு உண்டு எள்பதையும் இந்தத் தருணத்தில் அவருக்கு நினைவூட்டுவது பொருத்தமாக இருக்கும்.
 
அத்துடன், புலம்பெயர் தமிழ்த் தேசிய கட்டமைப்புக்களுடன் இணைந்து பணியாற்றுவதிலும், தமிழீழ விடுதலை நோக்கிய பாதையில் ஒன்றாகப் பயணிப்பதற்கும் தனக்கு இருக்கும் சந்தேகங்களையும், அச்சத்தையும் திரு. உருத்திரகுமாரன் அவர்கள் தமிழ் மக்களுக்குப் பகிரங்கப்படுத்த வேண்டும்.

- சுவிசிலிருந்து கதிரவன்