பண்டிதருக்கு பாமரனின் வேண்டுகோள்

(பாமரன்)

இது போன்ற ஆரோக்கிமற்ற கருத்துக்களை சூத்திரம் இணையத்தளத்தில் வெளியிடுவதில் எமக்கு அவ்வளவாக உடன்பாடுகளும் இல்லை. இது தமிழ் மக்கள் அரங்கத்தின் வலுப்பெற்றுவரும் ஐக்கியப்பாட்டையும், ஏற்பட்டுவரும் புரிந்துணர்வுகளை விரும்பாதவர்கள் செய்யும் செயற்பாடாகத்தான் பார்க்க முடிகின்றது. விமர்சனம், சுயவிமர்சத்தில் எமக்கு நம்பிக்கையும், உடன்பாடும் உண்டு. ஆனால் கொச்சைப்படுத்திய வார்த்தை பிரயோகங்களுடன் கூடிய 'தனிப்பட்ட' காழ்ப்புணர்ச்சியை வீசும் பண்டிதர்களின் சலசலப்புகளில் எமக்கு உடன்பாடும் இல்லை. இச் சலசலப்புகளை இனியும் தொடரா வண்ணம் இருத்தல் நாகரிகமாகவும், சரியானதாகவும் இருக்கும் என நம்புகின்றோம். எனவே இவை போன்ற தனி நபர் தாக்குதல்களை இத்தோடு நிறுத்திக் கொள்ளுமாறு விநயமாக யாபேரையும் கேட்டுக் கொள்கின்றோம். - சூத்திரம் ஆசிரியர் குழாம்

ஐயா! ‘சலசலப்பு பண்டிதர் அவர்களே!

"பெருமாளுக்கு ஏனிந்த கோணங்கித்தனம்?" என்ற தலைப்பில் சலசலப்பில் உங்களது பதிவைப் பார்த்தேன்.

வரதராஜப் பெருமாள் அண்மையில் டான் தொலைக்காட்சியில் ஈபிடிபி கட்சி பற்றி என்ன கருத்துக்களைச் சொன்னார் என்று உங்கள் பதிவில் எதுவுமே தெரிவிக்காது, அடிப்படை பத்திரிகை தர்மங்களையும் மீறி, சகட்டுமேனிக்கு, "பெருமாள் ஈ.பி.டி.பி கட்சியை வாங்கு வாங்கென்று வாங்கி தனது வக்கிர புத்திகளை வாந்தி வாந்தியாக எடுத்த அநாகரீகச்செயல் என்று அவரைத் திட்டிக் கொண்ட அவற்றையே நீங்கள்தான் முழுதாகச் செய்திருக்கிறீர்கள்!

 ‘கோணங்கித்தனம், ‘காழ்ப்புணர்ச்சி, ‘சில்லறைத்தனங்கள், ‘கூடப்பிறந்த குணம் ‘முட்டையில் மயிர் பிடுங்குகிறார் என்கிறீர்கள்—ஆனால், அவர் பிடுங்கிய ‘மயிர்கள் என்ன என்பதை கட்டுரையில் காட்டியிருந்தால் நாமும் அந்த மயிர்களைப் பார்த்திருக்கலாமே!

 "வெண்ணை திரண்டு வரும் வேளையில் தாழியை உடைக்க முனைவது போல் இன்று தமிழ் கட்சிகள் ஒன்று பட்டு சிந்தித்து பேசும் ஆரோக்கியமான தளம் ஒன்று உருவாகி வருகையில் அந்த முயற்சிகளை உடைத்து நாசம் செய்ய கிளம்பி விட்டார் பெருமாள் என்றும், "ஐக்கிய முயற்சிகளுக்கு கடந்த காலங்களை போல் கல்லறை கட்டி விடாதீர்கள் என்றும் கூறிக்கொண்டே அந்த முயற்சிகளில் நீங்கள்தான் ஈடுபட்டு, அந்த நோக்கத்தை எய்துவதற்காக பெருமாளைப் பலிக்கடாவாக்கும் தீர்மானம் செய்து மேற்கொள்ளப்படுவதுபோல் தெரிகிறதே! --- ஒருவேளை, தமிழ்ப் பிரதேசங்களில் உள்ளாட்சித் தேர்தல்கள் விரைவில் வரும் சாத்தியக்கூறுகள் தென்படுவதால், ஒற்றுமையாகத் தேர்தலில் நிற்பதானால் தமிழ்க்கட்சிகளின் அரங்கத்தில் அங்கம் வகிக்கும் மற்றைய கட்சிகளின் அபேட்சகர்களுக்கும் ஈபிடிபி இடம் கொடுக்க நேரிடும் என்பதால் அதனைத் தவிர்க்க, அதற்கு காணமாக, வரதராஜப் பெருமாளைப் பலிக்கடாவாக்க அட்வான்ஸாக அத்திவாரம் போடப்படும் பின்னணியின் பிரதிபலிப்பாக இருக்குமோ உங்கள் ஆக்கம் என்ற சந்தேகம் தோன்றுகிறது.

பாரிசிக்கு வரதராஜப்பெருமாள் வருகை தந்தபோது ஈ.பி.டி.பியை திட்டித்தீர்த்தாக எழுதியிருக்கிறீர்கள். நானும் நீங்கள் குறிப்பிட்ட அந்த நிகழ்வில் ஒரு பொதுமகனாகக் கலந்து கொண்டேன்; அப்படி அவதூறு வார்த்தைகள் எதுவும் பேசப்பட்டதாக எனக்கு ஞாபகம் இல்லை. அப்படியாக வந்திருந்த பார்வையாளர்களுக்குத் தெரியாத திட்டுகள்தான் என்பதைத் நீங்கள் உங்கள் ஆக்கத்தில் தெரிவித்தால் மற்றவர்களும் வரதராஜப் பெருமாளைப் புரிந்து கொள்ள வாய்ப்பாக அமையும். தெரிவிப்பீர்களா?

 "ஈ.பி.டி.பி குறித்து பெருமாளுக்கு விமர்சனங்கள் இருக்குமாயின் பேசுவதற்குரிய தளம் ஒன்று இருக்கின்றது, வரட்டும் எனக் குறிப்பட்டிருக்கிறீர்கள். அது என்ன தளம்? எங்கிருக்கிறது? என்பதை உங்கள் பதிவில் குறிப்பிடாது விட்டீர்கள். அநத விபரங்களையும் தந்திருக்கலாமே. நாமும் அந்தத் தளம் பறறி அறியவும் அந்த தளத்திற்குச் செல்லவும் வாய்ப்பாக அமைந்திருக்கும்.

"மனித உரிமைகள் குறித்து பேச பெருமாளுக்கு அருகதை கிடையாது" என்கிறீர்கள்.-சரி! ஆனால் யாருக்கு அந்த அருகதை இருக்கிறது? உங்களுக்கு இருக்கிறதென்றால் அந்த அருகதையை எப்பொழுது? எப்படிப் பெற்றுக்கொண்டீர்கள்?

 "சுகுத் தோழருக்குச் சொல்லிவிட்டீர்கள்என்று திரும்பத் திரும்ப வேறு எழுதுகிறீர்கள்.-- என்ன சொன்னீர்கள்? அதற்கு அவர் என்ன சொன்னார்? என்பதை எழுதாது விடுகிறீர்கள். இதில், சுகுவிற்கும் வரதராஜப் பெருமாளுக்கும் சிண்டு முடிக்கும் எத்தனங்களல்லவா தெரிகின்றன! --‘சுகு பாவம்!-ஒரு மாதிரி இழுத்துக் கொண்டு போகலாம், பெருமாள்தான் இழுத்த இழுப்புக்கெல்லாம் வரமாட்டார் என்ற தொனி தென்படும் உங்கள் வார்த்தைகள், சுகுவைத் தட்டிக் கொடுப்பதாக பாவனை பண்ணி உண்மையிலேயே அவரைக் கீழ்மைப்படுத்துவதுபோல் அல்லவா தெரிகிறது!

 "பெருமாளின் விமர்சனங்கள் அரசியல் நாகரிகம் அற்றவை எனக் கூறி நீங்களே அரசியல் நாகரிகம் எதுவுமில்லாமல் வெறும் வசவுகளால் சரமாரியாகச் சாடியிருக்கிரீர்கள். அப்படியானால் விமர்சனங்களை தன்னிச்சையாக வெறும் வசவுகளால் எதிர்கொள்வதுதான் அரசியல் நாகரிகம் என்பது உங்களது நிலைப்பாடா?

பாமரன் நானும் உங்களைக் கேட்கிறேன்: வாருங்கள் பண்டிதரே! வெறும் வசவுகளை விடுத்து வரதராஜப் பெருமாள் வெளிப்படுத்திய அந்தக் கருத்துக்கள், விமர்சனங்கள்தான் என்ன? –அவற்றிற்கு உங்கள் கருத்துக்கள், விமர்சனங்கள்தான் என்ன? --தெளிவு படுத்துங்கள்; என்னைப் போன்ற சமானியர்கள் அவற்றை ஆராய்ந்து, சீர்தூக்கி, சிந்தனை செய்ய – ஒரு முடிவுக்கு வர!

(பாமரன்)

பெருமாளுக்கு ஏனிந்த கோணங்கித்தனம்?…..(நன்றி: சலசலப்பு இணையத்தளம்)

(பண்டிதர்!)

ஞானி சந்திரனை சுட்டிக்காட்டிக்கொண்டிருக்க முட்டாள் ஒருவன் ஞானியின் சுட்டுவிரலை பார்த்து கொட்டாவி விட்டுக்கொண்டிருந்தானாம்.

அது போல அமைச்சர் தேவா தானும் தன் பணியும் என்று அர்ப்பணங்களுக்குள் மூழ்கிக்கிடக்க முன்னாள் முதல்வர் என்ற வரதராஐப்பெருமாள் முட்டையில் மயிர் பிடுங்க கிளம்பி விட்டார். அண்மையில் டான் தொலைக்காட்சியில் தோன்றிய பெருமாள் ஈ.பி.டி.பி கட்சியை வாங்கு வாங்கென்று வாங்கி தனது வக்கிர புத்திகளை வாந்தி வாந்தியாக எடுத்த ஆநாகரீகச்செயல் கண்டு யர்ரும் ஆச்சரியமடைந்துவிடல்லை. காரணம் இது பெருமாளோடு கூடப்பிறந்த குணம்!

ஆனாலும் வெண்ணை திரண்டு வரும் வேளையில் தாழியை உடைக்க முனைவது போல் இன்று தமிழ் கட்சிகள் ஒன்று பட்டு சிந்தித்து பேசும் ஆரோக்கியமான தளம் ஒன்று உருவாகி வருகையில் அந்த முயற்சிகளை உடைத்து நாசம் செய்ய கிளம்பி விட்டார் பெருமாள்.

இந்த அருவருக்கத்தக்க செயல்கள் இன்று நேற்றல்ல. பெருமாள் இந்தியாவில் பளிங்கு மாளிகையும், அதனருகே வியாபாரம் பெருக்க மாட்டுப்பண்ணையும் வைத்திருந்து விட்டு, அஞ்ஞாதவாசம்  கழிந்து அண்ணை எப்ப சாவான் திண்ணை எப்ப காலி என்று நாட்டுப்பற்றில் இலங்கையில் கால் வைத்த நாட்களில் இருந்து நடக்கின்றது.

ஆனாலும் அவர் நினைத்த படி அண்ணை ஒருவரும் சாகவில்லை என்பது அவருக்கு தீராத கவலை. தம்பியாவது செத்து மடிந்து விட்டான், இருக்கின்ற அண்ணன்மார்களை பொய்யாவது சொல்லி ஏதாவது ஒரு பிடி பிடித்து தனது சில்லறைத்தனமான அரசியல் சேட்டைகளை நடத்தி விடலாம் என்று கற்பனைத்தேரில் ஏறி வருகின்றார்.

இது குறித்து, சுகுத்தோழருக்கு பல தடவைகள் சொல்லி பார்த்தும் பெருமாள் திருந்தவில்லை. பாரிசில் தோழர் நாபாவின் அஞ்சலி நிகழ்வின் போது ஈ.பி.டி.பி தோழர்களை அழைத்து வைத்துக்கொண்டு பெருமாள் தொலை பேசியில் ஈ.பி.டி.பி யை திட்டித்தீர்த்ததும் தெரிந்த கதை. தோழர் நாபாவிற்கு மரியாதை செலுத்த சென்ற தோழர்கள் பெருமாளின் காழ்ப்புணர்சிகளை கண்டும் காணாமல் இருந்து விட்டு பெரு மனத்தோடு திரும்பியிருந்தனர்.

இது போல் பெருமாள் தனது காழ்ப்புணர்ச்சிகளை பல இடங்களிலும் வாந்தி எடுத்து வருகின்றார். சுகுத்தோழரிடமும் செலால்லிப்பயன் இல்லை என்ற அளவிற்கு வந்த பிறகு எழுதித்தான் தீர வேண்டும் என்பது நியாயமான முடிவுதான்.

டான் தொலைக்காட்சியில் தோன்றி சில தினங்களுக்கு முன்னர் பெருமாள் விட்ட சில்லறைத்தனங்களை தொடர்ந்தும் கண்டும் காணமால் இருப்பதென்றால் ஏதோ பெருமாளுக்கு மட்டும்தான் பேசத்தெரியும் என்று அர்த்தமாகிவிடும்.

கசாப்புக்கடைகாரன் ஜீவகாருண்ணியம் குறித்து பேசுவது போல் பெருமாளும் பேச விழைகின்றார். மனித உரிமைகள் குறித்து பேச பெருமாளுக்கு அருகதை கிடையாது.

ஆயுதக்குழு என்றும், வன்முறை என்றும், அது இது என்றும் பேசி தன் முதுகை திரும்பி பார்க்க முடியாத பெருமாள் முதலில் இந்த அநாகரீச்சொல்லாடல்களை நிறுத்த வேண்டும்.

ஈ.பி.டி.பி குறித்து பெருமாளுக்கு விமர்சனங்கள் இருக்குமாயின் பேசுவதற்குரிய தளம் ஒன்று இருக்கின்றது வரட்டும். வந்து பேசட்டும். விமர்சனங்கள் இருந்தால் அதை அரசியல் நாகரிகத்தோடு முன்வைக்கட்டும். விமர்சனங்களில் உண்மை இருக்குமாயின் எற்றுக்கொள்ளப்படும்.

நூறு பூக்கள் மலரட்டும். வாருங்கள் பெருமாள் அவர்களே! வந்து நின்று மக்களுக்காக இனியாவது உழையுங்கள். வாழை கமுக தோரணம் கட்டி தொங்க விட்டு வரவேற்போம்.

அடுத்தவன் வளர்ச்சிகண்டு அடுக்கடுக்காக பொய் புனையும் காழ்ப்புணர்சிகளால்தான் இன்று தமிழ் சமூகத்தின் நிலை இப்படி ஆகியது… தயவு செய்து ஐக்கிய முயற்சிகளுக்கு கடந்த காலங்களை போல் கல்லறை கட்டி விடாதீர்கள்.

இப்போதைக்கு இத்தோடு நிறுத்துவோம்!

(பண்டிதர்!)