தமிழ் தேசிய கூட்டமைப்பின்

உள் முரண்பாடுகளும் அதற்கான காரணங்களும்

(இரா. துரைரட்ணம் )

தமிழ்த் தேசியக் கூட்டமைப்பு பல கட்சிகள் இணைந்த கூட்டுக் கட்சியாக பதிவு செய்யப்படாமை உள்ளக முரண்பாட்டிற்கான முக்கிய காரணமாக உள்ளது. தமிழ்த் தேசியக் கூட்டமைப்பு உதயம் பெற்று இன்று 12 வருடங்கள் கடந்து விட்டன. அதன் ஆரம்ப காலத்தில் தமிழர் விடுதலை கூட்டணி தலைமையில் இயங்கலாம் என சிலரும், இல்லை இல்லை அகில இலங்கை தமிழ் காங்கிரஸ் தான் தலைமை தாங்க வேண்டும் என சிலரும் அடம்பிடித்து நின்றனர். அகில இலங்கை தமிழ் காங்கிரஸ் கட்சிதான் தமிழ் கட்சிகளில் மூத்த கட்சி, எனவே அக்கட்சியின் சின்னத்தையே தமிழ் தேசியக் கூட்டமைப்புக்கு பயன்படுத்த வேண்டும் என தமிழ் காங்கிரஸ் தலைவர்கள் அந்நேரத்தில் வாதிட்டதையும் நான் அறிவேன். இவை எல்லாவற்றையும் கடந்து தமிழ் தேசியக் கூட்டமைப்பு சட்ட ரீதியாக பதிவு செய்யப்பட வேண்டும் என 2001 ஆம் ஆண்டு காலப் பகுதியில் ஏற்றுக் கொண்டனர். அக்காலப்பகுதியில் மட்டக்களப்புக்கு வந்த செல்வம் அடைக்கலநாதன், ஜோசப் பரராசசிங்கம் ஆகிய தலைவர்கள் அங்கு நடைபெற்ற கலந்துரையாடலில் இதனை பதிவு செய்வதற்கு நடவடிக்கை எடுக்க வேண்டும் என்றும் இணங்கியிருந்தனர். இன்றைக்கு இந்த இணக்கம் ஏற்பட்டு 12 வருடங்கள் கடந்து விட்டன. கட்சியை பதிவு செய்வதில் இழுபறிக்கான காரணம் என்ன?

கடந்த வருடத்தில் தமிழரசுக் கட்சியின் செயலாளர் மாவை சேனாதிராசாவை நான் சந்தித்த போது இந்த இழுபறி பற்றி கேட்ட போது அவர் சில விளக்கங்களை சொன்னார்.

மாவை சேனாதிராசா சொன்ன விடயம். தமிழ் தேசியக் கூட்டமைப்பை தனி ஒரு கட்சியாக பதிவு செய்ய முடியாது. பல கட்சிகள் இணைந்த கூட்டு கட்சியாகவே பதிவு செய்ய வேண்டும். தனிக்கட்சியாக பதிவு செய்தால் ஆனந்தசங்கரி ஒரு காலத்தில் தமிழர் விடுதலைக் கூட்டணியை கொண்டு போனது போல தனிநபர் ஒருவரின் ஆதிக்கத்திற்குள் வந்து விடும். எனவே தமிழ் தேசியக் கூட்டமைப்பை பல கட்சிகள் இணைந்த கூட்டமைப்பாக பதிவு செய்ய வேண்டும். அதற்காக இப்போது தமிழ்த் தேசியக் கூட்டமைப்பில் உள்ள கட்சிகள் மகாநாடுகளை நடத்தி தீர்மானம் நிறைவேற்ற வேண்டும். அத்தீர்மானங்களை சமர்ப்பித்து தமிழ் தேசியக் கூட்டமைப்பில் பங்கு வகிக்கும் அனைத்து கட்சிகளுக்கும் சமபலம் இருக்கும் வகையிலேயே கட்சி பதிவு செய்யப்பட வேண்டும். அதற்காகவே தமிழரசுக் கட்சி மாவட்ட கூட்டங்களையும் தேசிய மகாநாட்டையும் நடத்த தீர்மானித்துள்ளோம். எமக்கு தமிழ் தேசியக் கூட்டமைப்பு பதிவு செய்வதில் எந்த கருத்து முரண்பாடும் கிடையாது என மாவை சேனாதிராசா தெரிவித்திருந்தார்.

ஒவ்வொரு கட்சியும் மகாநாட்டை நடத்துவதோ அல்லது கட்சி கிளைகளை அமைப்பதோ தவறில்லை. அது அவர்களின் ஜனநாயக உரிமை. ஆனால் அந்த ஜனநாயக உரிமை தமிழ் தேசியக் கூட்டமைப்பு என்ற அரசியல் தலைமையை பலவீனப்படுத்துவதற்கோ, அல்லது கட்சியை பதிவு செய்து சட்ட அங்கீகாரம் பெறுவதற்கு முட்டுக்கட்டையாகவோ இருக்க அனுமதிக்க முடியாது.

தமிழரசுக் கட்சியில் இருக்கும் சிலரின் அண்மைக்கால நடவடிக்கைகளும், பேச்சும் தமிழ்த் தேசியக் கூட்டமைப்பில் இணைந்திருக்கும் ஏனைய கட்சித் தலைவர்களின் மனதை புண்படுத்தும் வகையில் அமைந்திருப்பதையும், தமிழ் தேசியக் கூட்டமைப்பு என்ற அரசியல் தலைமையை பலவீனப்படுத்தும் வகையில் அமைந்திருப்பதையும் அவதானிக்க முடிகிறது.

தமிழ் மக்களைப் பொறுத்தவரை தமிழரசுக் கட்சி, தமிழ் காங்கிரஸ், ரெலோ, ஈ.பி.ஆர்.எல்.எப்., புளொட் எனப் பிரிந்து நிற்க விரும்பவில்லை என்பதை கடந்த கால வரலாறுகள் எமக்கு தெளிவாக புலப்படுத்துகின்றன. தமிழரசுக் கட்சி மாநாட்டை நடத்துவதோ அல்லது அதற்கு அப்பால் சென்று அங்கத்தவர்களை சேர்ப்பதோ தவறில்லை. ஆனால் அந்த நடவடிக்கைகளை மேற்கொள்வதை விட தமிழ் தேசியக் கூட்டமைப்பு என்ற அரசியல் தலைமைக்கு சட்ட அங்கீகாரத்தை பெறுவதில் இரண்டு மடங்கு வேகத்தை காட்ட வேண்டும். சட்ட அங்கீகாரம் பெற்ற அரசியல் தலைமையாக தமிழ் தேசியக் கூட்டமைப்பை பலப்படுத்தவில்லை என்றால் தமிழ் மக்களின் அரசியல் உரிமையை பெறும் விடயத்தில் தோற்றுப்போய் விடக் கூடிய அபாயம் காணப்படுகிறது. உள் முரண்பாடுகளை வைத்துக்கொண்டு ஒருபோதும் வெளியகத்தில் எமது தேசிய பிரச்சினையை தீர்ப்பதற்கு ஒன்றுபட்டு நிற்க முடியாது.

எனவே தமிழ்த் தேசியக் கூட்டமைப்பிற்கான சட்ட அங்கீகாரம் பெறும் விடயத்தில் தலைவர் சம்பந்தனும், செயலாளர் மாவை சேனாதிராசாவும் பொறுப்புணர்வோடு செயற்பட்டு ஏனைய அரசியல் கட்சித் தலைவர்களையும் இணைத்துக் கொண்டு செயற்பட வேண்டும்.

தாங்கள் ஓரங்கட்டப்படுகிறோம் என்ற உணர்வு எந்த வகையிலும் ஏனைய தலைவர்களுக்கு வராத வகையில் செயற்பட வேண்டியது அனுபவம் வாய்ந்த சம்பந்தன், மாவை சேனாதிராசா ஆகியோர் முன்னிலையில் உள்ள பொறுப்பாகும்.

தீர்மானம் எடுக்கும் சக்திகளாக சம்பந்தன், சுமந்திரன் ஆகியோரே இருக்கின்றனர் என்ற மன ஆதங்கம் ஏனைய நாடாளுமன்ற உறுப்பினர்களுக்கு அல்லது ரெலோ, ஈ.பி.ஆர்.எல்.எப். ஆகிய கட்சிகளின் தலைவர்களுக்கு இருப்பதை மறைப்பதற்கில்லை. இந்த நிலைகள் மாற்றப்பட்டு பன்முக ஜனநாயக சூழல் ஒன்று தமிழ் தேசியக் கூட்டமைப்பில் ஏற்படுத்தப்பட வேண்டும்.

அது போல ஈ.பி.ஆர்.எல்.எப். தலைவர் சுரேஷ் பிரேமச்சந்திரனும், ரெலோ தலைவர் செல்வம் அடைக்கலநாதனும், இந்த விடயத்தை வெளியில் இருந்து கொண்டு பேசிக்கொண்டிருப்பதாலோ சம்பந்தனையும், மாவை சேனாதிராசாவையும் குற்றம் சாட்டிக்கொண்டிருப்பதை விடுத்து நேரடியாக அவர்களுடன் பேசி உள்ளக பிரச்சினைக்கு துரிதமாக தீர்வு காண வேண்டும். உள்ளக பிரச்சினையையும் முரண்பாடுகளையும் பலவீனங்களையும் களைய முடியாத உங்களால் எப்படி தேசியப் பிரச்சினைக்கு தீர்வை பெற்றுத்தரப் போகிaர்கள் என மக்கள் உங்கள் மீது சந்தேகம் கொள்வதற்கு நீண்ட காலம் எடுக்காது. உள்ளக பிரச்சினையை தீர்த்தால் மட்டுமே நீங்கள் பலமான அரசியல் தலைமை என்ற நம்பிக்கை தமிழ் மக்களுக்கு ஏற்படும்.

(தொடரும்)