மாறாகக் கொலைகாரர்களை தீவிரவாதி என்பது சரியல்ல.

பாரிஸ் பத்திரிகையாளர்கள் மீது தாக்குதல் நடத்தியவர்களைப் போன்றவர்களை “தீவிரவாதிகள்” என்ற சொல்லால் சித்தரிப்பதே தவறு என்று நினைக்கிறேன். ஒரு நல்ல நோக்கமும் கொள்கையும் உள்ள ஒருவர் அதற்காக முனைப்புடன் செயல்படுவதும், அதற்காக எதையும் இழக்கத் தயாராக இருப்பதும்தான் தீவிரவாதம். அந்த வகையில் காந்தி ஒரு தீவிரவாதி எனலாம். மாறாகக் கொலைகாரர்களை தீவிரவாதி என்பது சரியல்ல. அவர்கள் பயங்கரர்கள், மனிதகுல விரோதிகள். உலக ஆதிக்க சக்திகள் திட்டமிட்ட முறையில் இப்படிப்பட்ட சொற்களை உருவாக்கிப் பரப்புகிறார்கள், நாமும் அவற்றைப் பயன்படுத்திக்கொண்டிருக்கிறோம்.

இறைவனுக்கு உருவம் இல்லை என்பது இஸ்லாமிய நம்பிக்கை. உருவமே இல்லாத இறைவனை ஒருவர் உருவமாக வரைந்தார், கேலிச்சித்திரம் தீட்டினார் என்பதற்காக அவரைத் தாக்குகிறார்கள் என்றால் அவர்களுக்குத்தான் தங்களுடைய மார்க்கம் பற்றிய சரியான புரிதல் இல்லை என்று அர்த்தம். உருவமில்லா இறைவனுக்கு உருவம் கொடுப்பது தவறென்றால், அதற்காக ஆத்திரமடைவதும் தவறுதான். அப்படி ஆத்திரப்படுகிறவர்களும் வன்முறையில் இறங்குகிறவர்களும்தான் தங்களுடைய இறைவனை அவமதிக்கிறார்கள்.
அந்தப் பத்திரிகை செய்தது சரியா, கருத்துச் சுதந்திரம் எதுவரை என்று கேட்கிறீர்கள். ஜனநாயகத்தின் உயர்ந்த பண்பு - உங்கள் கருத்தோடு முரண்படுகிறேன், ஆனால் உங்கள் கருத்தை வெளியிடும் உரிமையை மதிக்கிறேன், அதறகாக நான் நிற்கிறேன் என்பதே. எனது சுதந்திரம் இன்னொருவரின் சுதந்திரத்திற்கு இடைஞ்சலாக இருக்கக்கூடாது என்ற உணர்வு எனக்கு இருக்க வேண்டும். ஒரு கருத்தை வெளிப்படுத்துகிறவர்களுக்கு அந்தக் கருத்து மக்களிடையே பரவ வேண்டும் என்ற நோக்கம் இருக்குமானால் அதைப் பக்குவமாகத்தான் செய்ய வேண்டும்.

என்னைப் பொறுத்தவரையில் உலகத்தில் ஒரு மதம் கூட இருக்கக்கூடாது என்பதுதான் என் விருப்பம். மதம் இல்லாத உலகமே என் கனவு. ஆனால், அதைச் சொல்கிறபோது உங்கள் மத உணர்வை இழிவுபடுத்தக்கூடாது, உங்கள் நம்பிக்கையைப் புண்படுத்தக்கூடாது என்ற பொறுப்போடும்தான் என் கருத்தை வெளிப்படுத்துவேன். எனது நாத்திகக் கருத்துகளைக் கருத்துகளைக் கூறுகிறபோது, நம்பிக்கை உள்ளவர்களோடும் உரையாட வேண்டும் என்ற கவனத்தோடுதான் சொற்களைக் கையாளுவேன்.

அப்படித்தான ‘சார்லி ஹெப்தோ’ போன்ற பத்திரிகைகளும் செயல்பட வேண்டும். இது அவரவர் சமூக அக்கறையோடு சம்பந்தப்பட்டது. அரசியல, மதம், பொருளாதாரம் என அனைத்தையும் விமரிசிக்கிற கார்ட்டூன்கள் அந்தப் பத்திரிகையில் வெளியாகின்றன. ஒரு கார்ட்டூனால் ஒரு பிரிவினர் தங்கள் நம்பிக்கை அவமதிக்கப்படுவதாக நினைக்கிறார்கள் என்று அந்தப் பத்திரிகைக்கு ஏற்கெனவே தெரியும் என்கிறபோது, அந்தப் பொறுப்பும் சமூக அக்கறையும் மேலோங்க வேண்டும்.

ஆனால் அந்தப் பொறுப்பு சமுதாய அக்கறையிலிருந்து வரவேண்டுமேயல்லாமல், சட்டத்தால் வரையறுக்கப்பட்டதாக ஆயுதங்களால் அடக்கப்பட்டதாக வரக்கூடாது. தூரிகையையே ஆயுதமாக ஏந்தியவர்களுக்கு எதிராகத் துப்பாக்கியைத் தூக்குவது அநாகரிகத்தின் உச்சம்.
இஸ்லாமிய தலைவர்கள் இதைக் கண்டிக்க வேண்டாமா என்று கேட்கப்படுகிறது. பிரான்ஸ் உட்பட உலகெங்கும் இஸ்லாமிய தலைவர்கள் இதைக் கண்டித்திருக்கிறார்கள். முதலில், சிலர் செய்கிற இப்படிப்பட்ட அத்துமீறல்களிலிருந்து இஸ்லாமிய அமைப்புகள் தங்களை வேறுபடுத்திக் காட்ட வேண்டும் என்று எதிர்பார்ப்பதிலேயே கூட ஒரு நிர்ப்பந்தம் இருக்கிறது. இப்படிப்பட்ட மனிதவிரோத வன்முறைகள் எல்லோராலும் கண்டிக்கப்பட வேண்டியவை. அது ஒரு புறமிருக்க, தமிழகத்தில் அண்மையில் ஒரு இஸ்லாமிய அமைப்பு தீவிரவாத எதிர்ப்புப் பேரணி நடத்தியது. அந்த அமைப்பின் பல நிலைபாடுகளோடு எனக்கு கருத்து வேறுபாடு உண்டு என்றாலும், எத்தனை ஊடகங்கள் அந்தப் பேரணிக்கு முக்கியத்துவம் கொடுத்தன என்று கேட்க விரும்புகிறேன்.

இது போன்ற செயல்களில் இறங்குகிறவர்களை “லோன்லி உல்வ்ஸ்” அதாவது “தனிப்பட்ட ஓநாய்கள்” என்று மேற்கத்திய ஊடகங்கள் சித்தரிக்கின்றன. ஆனால் மீண்டும் மீண்டும் இப்படி ஆயுதம் தூக்குகிறவர்களின் பின்னால், மதவாதம் ஊறிய சிந்தனைகளை விதைக்கிற கூட்டங்க்ள் இருக்கின்றன. காந்தியைக் கொன்ற கோட்ஸே ஒரு லோன்லி உல்ஃப் என்று சொல்ல முடியுமா? தமிழ்நாட்டில் திருச்செங்கோட்டில் ஒரு எழுத்தாளரை அச்சுறுத்துகிறவர்கள் லோன்லி உல்வ்ஸ் என்று சொல்ல முடியுமா? உலகம் முழுவதும் கடவுளின் பெயரால் இப்படிப்பட்ட செயல்களில் இறங்குகிறவர்கள் நிச்சயமாக லோன்லி உல்வ்ஸ் அல்ல, அவர்கள் “கிரௌடட் உல்வ்ஸ்” (கூட்டமாக உள்ள உல்வ்ஸ்)என்றுதான் சொல்ல வேண்டும்.

பாலஸ்தீன மக்களை ஒடுக்கிக்கொண்டிருக்கும் இஸ்ரேல் அரசு, இராக்கிலும் ஆப்கானிஸ்தானிலும் தாக்குதல் நடத்திய அமெரிக்க அரசு... பல நாடுகளிலும் தலைதூக்கியிருக்கிற வலதுசாரி அரசியல்... அதிலே குளிர்காயும் உலகச் சுரண்டல் கூட்டங்கள்... இந்த கிரௌடட் உல்வ்ஸ் பற்றியும் விவாதித்தால்தான் எதிர்காலத்திலாவது இப்படிப்பட்டவர்கள் உருவாவதைத் தடுக்க முடியும்.
(‘நியூஸ் 7 தமிழ்’ தொலைக்காட்சியில் ஜனவரி 10 அன்று இரவு நடந்த விவாதத்தில் நான் கூறிய கருத்துகளின் அடிப்படையில் எழுதப்பட்டது. உடன் பங்கேற்றோர் மத்திய புலனாய்வுத் துறை முன்னாள் இயக்குநர் ரகோத்தமன், தமுமுக செயலாளர் ஹாஜா கனி.)

Kumaresan Asak

அமைதி சமாதானம் ஜனநாயகம்

www.sooddram.com